O‘zbekiston Respublikasi Prezidentining “Oliy ta’lim muassasalarining rahbar va pedagog kadrlarini qayta tayyorlash va malakasini oshirish tizimini yanada takomillashtirish chora-tadbirlari to‘g‘risida” 2015-yil 12-iyundagi PF-4732-son Farmoniga muvofiq oliy ta’lim muassasalari pedagog kadrlarini qayta tayyorlash va malakasini oshirish tizimining o‘qitish shakllari va usullarini, pedagog kadrlar tarkibining sifat darajasini zamonaviy talablardan kelib chiqqan holda takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Vazirlar Mahkamasining 2015-yil 20-avgustdagi 242-son qarori (O‘zbekiston Respublikasi QHT, 2015-y., 33-son, 442-modda) bilan tasdiqlangan Oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kurslari to‘g‘risidagi Nizomga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Oliy va o‘rta maxsus ta’lim vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Ta’lim va ilm-fan masalalari axborot-tahlil departamentiga va O‘zbekiston Respublikasi Oliy va o‘rta maxsus ta’lim vaziri R.S. Kasimov zimmasiga yuklansin.

1. 12-band quyidagi tahrirda bayon qilinsin:

“12. Qayta tayyorlash va malaka oshirish kurslarida o‘qish yakunlari bo‘yicha attestatsiyadan o‘tmagan oliy ta’lim muassasalarining rahbar va pedagog kadrlari bir yil mobaynida pulli asosda o‘qishning tegishli yoki turdosh yo‘nalishi (mutaxassisligi) bo‘yicha keyingi qayta tayyorlash va malaka oshirish kursi yakunida attestatsiyadan o‘tishi shart.

Oliy ta’lim muassasalari rahbar va pedagog kadrlarini qayta tayyorlash va malaka oshirish kurslarini takroran o‘zlashtirishi asosiy ishdan ajralmagan holda kurslarning o‘quv dasturlarini mustaqil ravishda yoki masofadan o‘qitish usullari orqali o‘zlashtirish asosida amalga oshiriladi.

Mustaqil ravishda yoki masofadan o‘qitish usullari orqali qayta tayyorlash va malaka oshirish kurslari o‘quv dasturlari bo‘yicha tayyorlanib kelgan tinglovchilar yakuniy attestatsiyaga kiritiladi. Yakuniy attestatsiya tegishli yo‘nalishlar bo‘yicha tayanch oliy ta’lim muassasalari huzuridagi attestatsiya komissiyalari tomonidan amalga oshiriladi”.

2. Quyidagi mazmundagi 12¹-band qo‘shilsin:

“12¹. Qayta tayyorlash va malaka oshirish kurslarida uzrsiz sabablarga ko‘ra dars qoldirgani uchun tinglovchilar safidan chiqarilgan oliy ta’lim muassasalarining rahbar va pedagog kadrlari pulli asosda qayta tayyorlash va malaka oshirish kursidan takroran o‘tishi hamda o‘qishning tegishli yo‘nalishi (mutaxassisligi) bo‘yicha keyingi qayta tayyorlash va malaka oshirish kursida attestatsiyadan o‘tishi shart.

Qayta tayyorlash va malaka oshirish kurslaridan takroran o‘tish 288 soat hajmida tashkil etiladi”.

3. 13-bandning ikkinchi xatboshidagi “3 yil” so‘zlari “bir yil” so‘zlari bilan almashtirilsin.

4. 16-bandni o‘zbek tilidagi matnining uchinchi xatboshidagi “bazaviy” so‘zi “tayanch” so‘zi bilan almashtirilsin.

5. 18-bandning uchinchi xatboshidagi va 35-bandning ikkinchi xatboshidagi “Nizom 12 va 13-bandlarining” so‘zlari “Nizom 12¹ va 13-bandlarining” so‘zlari bilan almashtirilsin.

6. 23-band quyidagi tahrirda bayon qilinsin:

“23. O‘zbekiston Respublikasi Oliy va o‘rta maxsus ta’lim vazirligi:

umumiy rahbarlikni amalga oshiradi, qayta tayyorlash va malaka oshirish kurslarining o‘quv jarayonini takomillashtirish mexanizmlari va uslublarini belgilaydi, tegishli normativ-huquqiy hujjatlarni (masofadan o‘qitish ta’lim usullarini tashkil etish va o‘tkazish, tinglovchilarining bitiruv (loyiha) ishini tayyorlash va himoyaga taqdim etish, pedagogik (malakaviy) amaliyotni tashkil etish va o‘tkazish tartiblarini) tasdiqlaydi, shuningdek qayta tayyorlash va malaka oshirish yo‘nalishlarining oliy ta’lim yo‘nalishlari va mutaxassisliklar klassifikatori bilan mutanosibligini ta’minlaydi;

qayta tayyorlash va malaka oshirish kurslaridan, shuningdek masofadan o‘qitish usullari orqali kurslardan o‘tishi kerak bo‘lgan tinglovchilarning prognoz qilinayotgan kontingentini belgilaydi;

oliy ta’lim muassasalari rahbar va pedagog kadrlarining talab qilinadigan malakasini ta’minlash bo‘yicha maqsadli topshiriqlarni tasdiqlaydi”.

7. 24-bandda:

a) o‘zbek tilidagi matnning to‘rtinchi xatboshidagi “bazaviy” so‘zi “tayanch” so‘zi bilan almashtirilsin;

b) quyidagi mazmundagi oltinchi xatboshi qo‘shilsin:

“kurslar yakunidagi attestatsiyadan o‘tmagan tinglovchilar uchun tayanch oliy ta’lim muassasalari tomonidan tegishli yo‘nalishlarning o‘quv dasturiga mos holda ishlab chiqilgan o‘quv-metodik resurslar asosida masofadan o‘qitishning onlayn va offlayn shakllarida takroriy qayta tayyorlash va malaka oshirish kurslarini tashkil etadi”;

v) oltinchi — o‘n ikkinchi xatboshilar tegishli ravishda yettinchi — o‘n uchinchi xatboshilar deb hisoblansin.

8. 25-bandda:

a) quyidagi mazmundagi to‘rtinchi xatboshi qo‘shilsin:

“masofadan o‘qitish usullari asosida oliy ta’lim muassasalari pedagog kadrlari uchun tashkil etiladigan qayta tayyorlash va malaka oshirish kurslarining tegishli o‘quv-metodik resurslarini ishlab chiqadi”;

b) to‘rtinchi — sakkizinchi xatboshilar tegishli ravishda beshinchi — to‘qqizinchi xatboshilar deb hisoblansin.

9. 30-bandga quyidagi mazmundagi xatboshi qo‘shilsin:

“Masofadan o‘qitish usullari asosidagi takroriy kurslarda o‘quv mashg‘ulotlari onlayn va offlayn shakllarida tashkil etiladi”.

10. 32-bandga quyidagi mazmundagi xatboshilar qo‘shilsin:

“Istisno tariqasida:

tinglovchilar kontingenti yetarli bo‘lmagan yo‘nalishlarda, jumladan rus yoki qoraqalpoq tilida dars olib boriladigan guruhlarda, tinglovchilar kontingenti bir guruh me’yorida yig‘ilmaydigan kam sonli alohida ta’lim yo‘nalishlarida o‘quv jarayonini tashkillashtirishda bir guruhdagi tinglovchilar soni kamida 5 nafar etib belgilanishi mumkin;

yil davomida 5 nafargacha pedagog kadrlar yig‘ilmaydigan alohida ta’lim yo‘nalishlarida malaka oshirish guruhi mavjud holatdan kelib chiqib, O‘zbekiston Respublikasi Oliy va o‘rta maxsus ta’lim vazirligi bilan kelishgan holda, qayta tayyorlash va malaka oshirish bo‘yicha tayanch oliy ta’lim muassasasining buyrug‘i bilan tinglovchilar soni 5 nafardan kam guruh shakllantirilishi yoki ular uchun malaka oshirish masofadan o‘qitish usullari orqali amalga oshirilishi mumkin”.

11. 34-bandga quyidagi mazmundagi xatboshi qo‘shilsin:

“Masofadan o‘qitish usullari asosidagi takroriy kurslarda tinglovchilarning assisment topshiriqlari (joriy nazorat) onlayn shaklida tashkillashtiriladi”.

12. Nizomga ilovaning (Oliy ta’lim muassasalarining rahbar va pedagog kadrlarini qayta tayyorlash va ularning malakasini oshirish kurslarini tashkil etish sxemasining) 5-bosqichidagi “pulli asosda kurslardan takroran o‘tishi va o‘qishning tegishli yo‘nalishi” so‘zlari “pulli asosda o‘qishning tegishli yo‘nalishi” so‘zlari bilan almashtirilsin.