O‘zbekiston Respublikasi hududida ommaviy tadbirlar o‘tkazilishi paytida jamoat xavfsizligini ta’minlash va tartibni muhofaza qilish maqsadida Vazirlar Mahkamasi qaror qiladi:

1. Ommaviy tadbirlarni o‘tkazish qoidalari ilovaga muvofiq tasdiqlansin.

2. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

ommaviy tadbirlar o‘tkazishga mo‘ljallangan obyektlar ro‘yxatini ishlab chiqsinlar va tasdiqlasinlar;

ommaviy tadbirlarni o‘tkazish qoidalariga muvofiq Qoraqalpog‘iston Respublikasi Vazirlar Kengashi Raisi, viloyatlar va Toshkent shahar, tumanlar (shaharlar) hokimlarining tegishli o‘rinbosarlari boshchiligida ommaviy tadbirlar o‘tkazilishini nazorat qilish komissiyalari tashkil etsinlar.

3. O‘zbekiston Respublikasi Ichki ishlar vazirligi Adliya vazirligi, Bosh prokuratura hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga Ommaviy tadbirlarni o‘tkazish qoidalarini buzganlik uchun javobgarlik belgilanishini nazarda tutuvchi o‘zgartirish va qo‘shimchalar kiritish haqida takliflar kiritsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari H.S. Karomatov zimmasiga yuklansin.

1. Mazkur Qoidalar O‘zbekiston Respublikasida ommaviy tadbirlarni o‘tkazish paytida jamoat xavfsizligini ta’minlash va tartibni muhofaza qilishga qaratilgan hamda ommaviy tadbirlar o‘tkazish tartibini va ular qatnashchilari munosabatlarini tartibga soladi.

2. Mazkur Qoidalar maqsadlari uchun ko‘ngilochar, teatr-tomosha, konsert, sport, reklama dasturlari va boshqa dam olish dasturlarini, shuningdek kamida 100 kishi ishtirokida umumxalq, diniy, professional bayramlarni o‘tkazish maqsadida yuridik va jismoniy shaxslar tomonidan ochiq va yopiq inshootlarda, maydonlarda, binolarda va boshqa joylarda tashkil etiladigan kishilarni to‘plash ommaviy tadbir deb e’tirof etiladi.

3. Davlat hokimiyati va boshqaruv organlari, yuridik va jismoniy shaxslar ommaviy tadbirlarni o‘tkazish tashkilotchilari bo‘lishlari mumkin.

4. Quyidagilar: tashkilotchilar, artistlar, sportchilar va dasturda nazarda tutilgan tomoshali chiqishlarni (harakatlarni) bevosita amalga oshiruvchi boshqa shaxslar hamda tomoshabinlar ommaviy tadbirlar qatnashchilari hisoblanadi.

5. Ommaviy tadbirlar ro‘yxati Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadigan bunday maqsadlar uchun maxsus mo‘ljallangan joylarda, tegishli ruxsatnoma olingandan keyin o‘tkaziladi.

6. Ommaviy tadbirlarni o‘tkazishga ruxsatnoma:

respublika (Qoraqalpog‘iston Respublikasi uchun) ahamiyatiga ega bo‘lgan ommaviy tadbirlarni o‘tkazishga — Qoraqalpog‘iston Respublikasi Vazirlar Kengashi;

viloyat va shahar (Toshkent shahri uchun) ahamiyatiga ega bo‘lgan tadbirlarni o‘tkazish uchun — viloyatlar va Toshkent shahar hokimliklari;

tuman (shahar) ahamiyatiga ega bo‘lgan ommaviy tadbirlarni o‘tkazishga — tumanlar (shaharlar) hokimliklari tomonidan beriladi.

Xalqaro va umumdavlat ahamiyatiga ega bo‘lgan ommaviy tadbirlarni o‘tkazishga ruxsatnoma O‘zbekiston Respublikasi Vazirlar Mahkamasi bilan kelishgan holda tegishli ravishda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan beriladi.

O‘zbekiston Respublikasi Vazirlar Mahkamasining qarorlariga muvofiq tashkil etiladigan ommaviy tadbirlarni o‘tkazishga ruxsatnoma olish talab etilmaydi.

7. Ommaviy tadbirlarni o‘tkazishga ruxsatnoma berish masalalarini ko‘rib chiqish va ular ustidan nazoratni amalga oshirish uchun Qoraqalpog‘iston Respublikasi Vazirlar Kengashi, viloyatlar va Toshkent shahar, shaharlar va tumanlar hokimliklari huzurida ommaviy tadbirlar o‘tkazilishini nazorat qiluvchi komissiyalar tashkil etiladi (keyingi o‘rinlarda matnda “Komissiyalar” deb yuritiladi). Komissiyalarga Qoraqalpog‘iston Respublikasi Vazirlar Kengashi Raisi, viloyatlar va Toshkent shahri, shaharlar va tumanlar hokimlarining tegishli o‘rinbosarlari boshchilik qiladi. Komissiyalar tarkibiga Ichki ishlar, Milliy xavfsizlik xizmati, Favqulodda vaziyatlar vazirligi, Sog‘liqni saqlash vazirligining hududiy organlari va boshqa manfaatdor muassasalar va tashkilotlarning vakillari kiradi.

Komissiyalarning shaxsiy tarkibi Qoraqalpog‘iston Respublikasi Vazirlar Kengashi, tegishli hokimlar tomonidan tasdiqlanadi.

8. Ommaviy tadbirlarni o‘tkazishda jamoat tartibi muhofaza qilinishini va xavfsizlikni ta’minlash ichki ishlar organlari tomonidan budjet mablag‘lari, shuningdek xayriya va diniy maqsadlarda o‘tkazilayotgan tadbirlar hisobiga pulli-shartnoma asosida amalga oshiriladi, davlat hokimiyati va boshqaruv organlari tomonidan tashkil etilayotgan ommaviy tadbirlar bundan mustasno.

9. Ommaviy tadbirlarni o‘tkazishga ruxsatnoma olish uchun tashkilotchilar ommaviy tadbir o‘tkazishning mo‘ljallangan sanasidan kamida bir oy oldin tegishli komissiyalarga ariza bilan murojaat etadilar.

Arizada:

a) yuridik shaxsning nomi va manzili, vakolatli shaxsning lavozimi ko‘rsatilgan holda familiyasi, ismi, otasining ismi yoki tashkilotchi-jismoniy shaxsning familiyasi, ismi, otasining ismi, yashash joyi;

b) kamida ikkita muloqot telefoni raqami;

v) tadbirning nomi, maqsadi va shakli;

g) tadbir o‘tkaziladigan sana, joy;

d) tadbir boshlanishi va tamom bo‘lishi vaqti;

e) qatnashchilarning mo‘ljallanayotgan soni;

j) tashkilotchilarning tadbir qatnashchilari xavfsizligini ta’minlash chora-tadbirlarini ko‘rish yuzasidan majburiyati;

z) ariza berilgan sana, tashkilotchilarning imzolari ko‘rsatiladi.

10. Ariza bilan bir vaqtda:

a) foydalaniladigan texnik vositalar ko‘rsatilgan holda tadbirlar dasturi (sahna maydonchasi, ovozni kuchaytirish, elektr manbai, chiroqlar bilan bezash, tozalash vositalari va boshqalar);

b) obyektning tadbirni o‘tkazishga tayyorligi to‘g‘risida inshoot ma’muriyatining ma’lumotnomasi;

v) agar ommaviy tadbirni o‘tkazish faoliyatning litsenziyalanadigan turlarini amalga oshirish bilan bog‘liq bo‘lgan taqdirda faoliyatning ayrim turlarini amalga oshirishga litsenziya taqdim etiladi.

11. Tadbir o‘tkazish to‘g‘risida taqdim etilgan hujjatlar komissiya tomonidan 10 kun mobaynida ko‘rib chiqiladi. Komissiya ko‘rib chiqish natijalari bo‘yicha ommaviy tadbir o‘tkazilishiga ruxsat berish yoxud sabablarini ko‘rsatgan holda ruxsat berishni rad etish to‘g‘risida qaror qabul qiladi. Komissiya qarorining nusxasi tashkilotchilarga qaror qabul qilingan kundan boshlab bir kun mobaynida yuboriladi.

12. Ommaviy tadbir o‘tkazilishiga ruxsat berish rad etilganligi to‘g‘risida qaror chiqarilgan taqdirda tashkilotchilar rad etishga sabab bo‘lgan kamchiliklar bartaraf etilgandan keyin ruxsat berish to‘g‘risidagi ariza bilan takroran murojaat qilishga haqlidirlar.

Ruxsatnoma berish to‘g‘risidagi arizani qayta ko‘rib chiqishda ilgari ushbu ruxsatnomani berishni rad etish to‘g‘risidagi qarorda ko‘rsatilmagan yangi asoslar bo‘yicha ruxsatnoma berishni rad etishga yo‘l qo‘yilmaydi.

Komissiyaning ruxsat berishni rad etish to‘g‘risidagi qarori ustidan yuqori turuvchi organlarga yoxud sudga shikoyat qilinishi mumkin.

13. Ommaviy tadbir o‘tkazilishiga ruxsat olingandan keyin tashkilotchi oldindan, biroq tadbir boshlanishidan 10 kundan kechikmay, ichki ishlar hududiy organlarini yozma ravishda xabardor qilishi hamda jamoat tartibi muhofaza qilinishi va xavfsizlik ta’minlanishi to‘g‘risida shartnoma tuzishi zarur. Bildirishnomaga jamoat tartibini muhofaza qilish va xavfsizlikni ta’minlash uchun ajratilayotgan mablag‘lar ko‘rsatilgan holda ruxsatnoma, tadbirlarni o‘tkazish dasturi ilova qilinadi.

Ommaviy tadbir o‘tkazishda jamoat tartibini muhofaza qilish va xavfsizlikni ta’minlash bo‘yicha ichki ishlar hududiy organlarining xizmatlari haqi tomonlarning kelishuviga ko‘ra belgilanadi. Jamoat tartibini muhofaza qilish va xavfsizlikni amalga oshiruvchi shaxsiy tarkib xizmat uchun zarur bo‘lgan maxsus va texnik vositalar bilan ichki ishlar hududiy organlari tomonidan ta’minlanadi.

14. Ommaviy tadbir o‘tkazish huquqini beruvchi ruxsatnomani olish hamda jamoat tartibi muhofazasi va xavfsizlik ta’minlanishi to‘g‘risida shartnoma tuzilishi ommaviy tadbir o‘tkazilishi uchun asos hisoblanadi.

15. Tashkilotchilar ichki ishlar hududiy organlari bilan birgalikda komissiyalarga tasdiqlash uchun ishchi guruhlar tarkibini kiritadilar. Ishchi guruhlarga tadbirlarni o‘tkazish joyining xususiyatlarini hisobga olgan holda tegishli mutaxassislar, tashkilotchilar, obyektlar ma’muriyatlari, ichki ishlar hududiy organlari va boshqa manfaatdor idoralarning vakillari kiritiladi.

Ishchi guruhlar tadbirning xususiyatiga, ob-havo sharoitlariga hamda qatnashchilar va tomoshabinlarning xavfsizligi ta’minlanishiga ta’sir qiluvchi boshqa omillarga bog‘liq ravishda tadbir o‘tkazilishi boshlanishidan kamida 2 kecha-kunduz oldin obyektni tekshirib chiqadilar, aniqlangan kamchiliklarni bartaraf etish choralarini ko‘radilar, mo‘ljallangan tadbir o‘tkazilishi mumkinligi to‘g‘risidagi xulosani rasmiylashtiradilar.

Ommaviy tadbir o‘tkazilishini, jamoat tartibi, tomoshabinlar va qatnashchilarning xavfsizligi muhofazasi ta’minlanishini murakkablashtiruvchi hamda tadbir boshlangunga qadar bartaraf etish mumkin bo‘lmagan holatlar aniqlangan taqdirda ishchi guruhlar komissiyaga mazkur tadbirni o‘tkazishni keyinroq muddatga qoldirish, uni tomoshabinlarsiz o‘tkazish yoxud ommaviy tadbirni bekor qilish to‘g‘risida takliflar kiritadilar. Komissiya ommaviy tadbir tashkilotchilari va obyekt ma’muriyati vakillari ishtirokida ommaviy tadbir o‘tkazilishigacha o‘ttiz olti soatdan kechikmay tegishli qaror qabul qiladi.

Mazkur tadbirni o‘tkazish keyinroq muddatga qoldirilishi, uni tomoshabinlarsiz o‘tkazish yoxud ommaviy tadbir bekor qilinishi to‘g‘risida qaror qabul qilingan taqdirda komissiya, ommaviy tadbir tashkilotchilari, ichki ishlar hududiy organlari ommaviy tadbir boshlanishidan kamida bir kecha-kunduz oldin tomoshabinlar va boshqa qatnashchilar qabul qilingan qarordan, ommaviy tadbir o‘tkazishning yangi muddatlaridan, chiptalar qiymati va tomoshabinlarning boshqa xarajatlari qaytarilishi shartlaridan xabardor qilinishini ta’minlaydilar. Ommaviy tadbir o‘tkaziladigan joylarda ko‘zga ko‘rinarli va qulay joylarda ommaviy tadbir o‘tkazilishi keyinroq muddatga qoldirilganligi, u tomoshabinlarsiz o‘tkazilishi yoxud ommaviy tadbir bekor qilinishi to‘g‘risidagi axborot joylashtirilishi kerak.

16. Yirik ommaviy tadbirlarni (spartakiadalar, xalqaro musobaqalarni) tayyorlash va o‘tkazishda tegishli muassasalar va xizmatlarning faoliyatini muvofiqlashtirish uchun tashkiliy qo‘mitalar tashkil etiladi, tadbirga keluvchilar uchun xavfsiz sharoitlarni, jamoat tartibini buzish holatlari namoyon bo‘lishi profilaktikasini, yong‘in xavfsizligini, tibbiy ta’minotni ta’minlovchi, tadbirlar o‘tkaziladigan joylar to‘ldirilishi va tomoshabinlar evakuatsiya qilinishi tartibini, favqulodda holatlar yuz bergan taqdirda xizmatlarning vazifalarini nazarda tutuvchi ommaviy tadbirlarni tayyorlash va o‘tkazishning aniq rejalari ishlab chiqiladi.

17. Ommaviy tadbirlar o‘tkazilishini rejalashtirishda ularning tashkilotchilari tomonidan tadbir tamom bo‘lgandan keyin uning qatnashchilari tomonidan jamoat transportidan foydalanish imkoniyati albatta ko‘rib chiqiladi.

18. Ommaviy tadbir tadbir dasturiga muvofiq o‘tkaziladi.

19. Ommaviy tadbirlarni o‘tkazishda inshootlarda tadbirlar tashkil etilishi va o‘tkazilishini ta’minlovchi xizmatlarning funksional vazifalarini tartibga soluvchi hujjatlar, shu jumladan quyidagi hujjatlar mavjud bo‘lishi majburiy hisoblanadi:

a) texnik foydalanish qoidalariga rioya etilishini tartibga soluvchi (muhandislik, qurilish konstruksiyalari va texnik tizimlarning ishonchliligi va barqarorligi) hujjatlar, tomoshabinlarni evakuatsiya qilish yo‘llarining belgilangan normativlarga muvofiqligi, yong‘in xavfsizligi ta’minlanishi, tadbirlarni o‘tkazishning sport-texnologiya shart-sharoitlari:

texnik xizmatlarning barcha turlari uchun texnika xavfsizligi bo‘yicha yo‘riqnomalar;

xodimlar uchun lavozim yo‘riqnomalari;

b) ommaviy tadbirlar o‘tkazishda inshootdan foydalanishning umumiy tartibini tartibga soluvchi hujjatlar:

mahalliy shart-sharoitlar va xususiyatlar hisobga olingan holda tegishli hokimlik tomonidan tasdiqlangan ommaviy tadbirlar tashkil etilishi va o‘tkazilishi tartibini tartibga soluvchi yo‘riqnomalar;

tomoshabinlarning inshoot hududi bo‘ylab harakatini tashkil etish, tribunalarni to‘ldirish va evakuatsiya qilish yo‘llari, chipta kassalari, ovqatlanish punktlari, garderoblar, dam olish, tibbiy yordam ko‘rsatish joylari, yong‘inga qarshi inventar va asbob-uskunalar mavjudligi va ularning joylashishi sxemalari;

inshootga keluvchilarning o‘zini tutish qoidalari;

v) navbatdagi (bir tipli turkumdagi) ommaviy tadbirni o‘tkazish qoidalarini tartibga soluvchi hujjatlar:

tadbirni o‘tkazuvchi tashkilot tomonidan tasdiqlangan tadbirlarni o‘tkazish qoidalari;

inshootning, uning barcha xizmatlarining tadbirni o‘tkazishga tayyorligi to‘g‘risida inshoot rahbari tomonidan tasdiqlangan dalolatnoma;

ishchi komissiya a’zolari (inshoot rahbari, ichki ishlar hududiy organlari, milliy xavfsizlik xizmati vakillari, tashkilotchining vakillari) tomonidan imzolanadigan obyektning shoshilinch-texnik tekshirib chiqilganligi to‘g‘risidagi bayonnoma;

tadbirlar o‘tkaziladigan joyga olib kirish taqiqlangan buyumlar, ashyolar ro‘yxati.

20. Ommaviy tadbirlarni o‘tkazish vaqtida obyektlarda va unga tutashib ketgan hududlarda spirtli ichimliklar, pirotexnika buyumlari, uy sharoitida tayyorlangan oziq-ovqat mahsulotlari bilan savdo qilish, shuningdek shisha idishdagi chanqovbosdi ichimliklarni sotish taqiqlanadi.

21. Ommaviy tadbirlar tashkilotchilarining majburiyatlari:

ommaviy tadbirlarni o‘tkazishda jamoat tartibini muhofaza qilish va xavfsizlikni ta’minlash masalalari bo‘yicha huquqni muhofaza qilish organlari va obyektning ma’muriyati bilan o‘zaro hamkorlik qilish;

ommaviy tadbirlar o‘tkaziladigan joyni tanlashda jamoat tartibi muhofaza qilinishi va xavfsizlik ta’minlanishi shart-sharoitlarining mavjudligini hisobga olish;

ommaviy tadbirlarni o‘tkazish vaqtini tanlashda tomoshabinlar va tadbirlarning boshqa qatnashchilari tomonidan jamoat transportidan foydalanish imkoniyatlari, yong‘in xavfsizligi, tez tibbiy yordam va boshqa maxsus xizmatlar avtomashinalari uchun kirish joylari mavjudligini hisobga olish;

ommaviy tadbirda ishtirok etuvchi davlat boshqaruv organlari va harbiylashtirilgan tuzilmalar rahbarlarini, faxriy mehmonlarni kutib olish va kuzatib qo‘yish joylarida shart-sharoitlarni ta’minlash va barpo etish masalasini ichki ishlar hududiy organlari va Milliy xavfsizlik xizmati bilan kelishish;

obyekt ma’muriyati bilan birgalikda obyektdagi o‘rinlar sonini hamda tartib va xavfsizlik ta’minlanishiga ta’sir ko‘rsatuvchi boshqa omillarni hisobga olgan holda tadbirlar qatnashchilari sonini aniqlash;

ichki ishlar hududiy organlari va milliy xavfsizlik xizmati bilan kelishgan holda ularning xodimlarini joylashtirish uchun tomoshabinlar o‘tiradigan joylarning turli joylarida o‘rinlarning zarur sonini ajratish (har bir sektorda kamida 10 o‘rin, stadionlarda esa — har bir qatorda kamida bitta o‘rin);

chipta (taklifnoma)larning orqa tomonida obyektga olib kirish taqiqlangan buyumlar va ashyolar ro‘yxati to‘g‘risida axborot hamda tadbirlar o‘tkaziladigan joylarda metall bo‘yicha detektor nazorati to‘g‘risidagi bildirishnoma mavjud bo‘lishini ta’minlash;

ommaviy tadbirlarni tayyorlashda, ularni o‘tkazishda jamoat tartibini muhofaza qilish va xavfsizlik ta’minlanishi bo‘yicha ichki ishlar organlarining xarajatlarini qoplash uchun zarur bo‘lgan pul mablag‘lari ajratishni nazarda tutish;

ommaviy tadbirlarni o‘tkazishda jamoat tartibi muhofazasi va xavfsizlik ta’minlanishi yuzasidan ichki ishlar organlari bilan shartnomalar tuzish hamda ularga muvofiq pul mablag‘lari ajratish;

mazkur Qoidalarga muvofiq ommaviy tadbirlarni o‘tkazish paytida jamoat tartibi muhofaza qilinishi va xavfsizlik ta’minlanishi masalalari bo‘yicha huquqni muhofaza qilish organlari vakillarining talablarini bajarish;

belgilangan hollarda tadbirlarni foto, audio, video suratga olish va kinoga olish taqiqlanishi to‘g‘risida tadbir qatnashchilarini oldindan xabardor qilish.

22. Ommaviy tadbirlar tashkilotchilarining huquqlari:

ommaviy tadbirlar qatnashchilaridan mazkur Qoidalarga qat’i rioya qilinishini talab etish;

ichki ishlar hududiy organlaridan tadbirlarni o‘tkazish paytida obyektda jamoat tartibi muhofazasi va xavfsizlik ta’minlanishi uchun shartnoma shartlariga muvofiq kuchlar va texnik vositalar ajratilishini talab etish.

23. Artistlar, sportchilar va dasturda nazarda tutilgan tomoshali chiqishlar (harakatlar)ni bevosita amalga oshiruvchi boshqa shaxslarning vazifalari:

dasturga muvofiq chiqish (harakat) tartibiga rioya qilish;

tashkilotchilarning vakillari bilan kelishmasdan dasturda nazarda tutilmagan harakatlarni amalga oshirmaslik;

jamoat tartibi xavfsizligiga tahdid soluvchi holatlar yuzaga kelgan taqdirda tashkilotchilarning, ma’muriyatning yoki ichki ishlar organlarining birinchi talabi bilan chiqishni to‘xtatish;

tomoshabinlarda agressiv his-tuyg‘ular qo‘zg‘atuvchi xatti-harakatlarga yo‘l qo‘ymaslik.

24. Artistlar, sportchilar va dasturda nazarda tutilgan tomoshali chiqishlar (harakatlar)ni bevosita amalga oshiruvchi boshqa shaxslarning huquqlari:

tomosha paytida huquq-tartibotni ta’minlayotgan ichki ishlar organlaridan shaxsiy xavfsizlik ta’minlanishini, shuningdek normal chiqishga to‘sqinlik qiluvchi tomoshabinlarning xulq-atvori bilan bog‘liq holatlar bartaraf etilishini talab qilish;

tadbir obyekti ma’muriyatidan chiqishga tayyorgarlik ko‘rish uchun shart-sharoitlar yaratilishini talab qilish.

25. Tomoshabinlarning majburiyatlari:

jamoat tartibiga va xulq-atvorning ijtimoiy normalariga rioya qilish;

inshootning jihozlariga ehtiyotkorlik bilan munosabatda bo‘lish;

tadbirlar o‘tkaziladigan joyda bo‘lish tartibiga rioya qilish;

mazkur Qoidalar talablariga, yong‘in xavfsizligiga rioya qilish bo‘yicha tashkilotchilar (ma’muriyatning vakillari) va huquq-tartibot organlarining talablarini bajarish.

26. Tomoshabinlarning huquqlari:

inshoot hududi va tribunaga chiptalar yoki kirish huquqini beruvchi hujjatlar bo‘yicha kirish hamda ularda ko‘rsatilgan joyni egallash;

tadbirlar o‘tkaziladigan obyektda joylashgan buyum saqlash joylari, garderoblar, yemakxonalar, kafe, ma’lumotlar byurosi, telefonlar, do‘konchalar va boshqalardan belgilangan tartibda foydalanish.

27. Ommaviy tadbir o‘tkaziladigan obyekt ma’muriyatining majburiyatlari:

obyektdagi barcha muhandislik tizimlari va yoritish tizimlari uzluksiz ishlashini, binolar va inshootlar konstruksiyalari ishonchliligini, tribunalar, qatnashchilarni evakuatsiya qilish yo‘llari tayyorligini, yong‘in o‘chirish vositalari mavjudligini, obyekt xodimlarining favqulodda vaziyatlar kelib chiqqan taqdirda ularning xatti-harakatlarini tartibga soluvchi xizmat yo‘riqnomalarini bilishini ta’minlash;

ommaviy tadbir tashkilotchisiga tadbir tomoshabinlari va qatnashchilari uchun mo‘ljallangan o‘rinlar soni to‘g‘risida yozma axborot berish, obyektdagi o‘rinlar soniga muvofiq chiptalar sotilishi va taklifnomalar tarqatilishini ta’minlash;

obyektning sanitariya talablariga muvofiqligini, obyekt ichi va unga tutashib ketgan hudud zarur darajada yoritilishini ta’minlash;

ko‘zga ko‘rinarli joylarga xavfsizlik belgilari, ko‘rsatkichlar, xulq-atvor, qoidalar, sxemalar, rejalar va evakuatsiya bo‘yicha yo‘riqnomalar, yong‘in xavfsizligi qoidalarini joylashtirish;

ichki ishlar organlariga ommaviy tadbir o‘tkazilishidan bir kecha-kunduz oldin tarqatilgan chiptalar va taklifnomalar soni, tomoshabinlar va bo‘lajak tadbirlar qatnashchilarining mo‘ljallanayotgan soni to‘g‘risida axborot berish;

elektr manbaining avariya (avtonom) manbai (dizel agregati yoki boshqa vositalar), mazkur tizimdan foydalanishga doir yo‘riqnomalar mavjud bo‘lishini ta’minlash, mas’ul navbatchini tayinlash;

tadbir boshlangunga qadar obyektning mahalliy radiotranslyatsiya (ovozni kuchaytirgich) tarmog‘i orqali obyekt ichida tomoshabinlar va qatnashchilarning o‘zini tutish qoidalari, ularning huquq va majburiyatlari e’lon qilinishini tashkil etish;

inshoot ma’muriyatining eng tayyorgarlik ko‘rgan xodimlarining kuchi bilan obyektga kirishda nazorat-o‘tkazish rejimini ta’minlash, qatnashchilar va tomoshabinlarni maydon va tribunalarda chiptalar va maxsus ruxsatnomalarga muvofiq joylashtirish;

tadbir qatnashchilarining transport vositalari uchun, qoidaga ko‘ra, obyektdan kamida 100 metr naridagi masofada to‘xtash joylari tashkil etish;

mazkur Qoidalarga muvofiq ommaviy tadbirlarni o‘tkazish paytida jamoat tartibi muhofaza qilinishi va xavfsizlik ta’minlanishi masalalari bo‘yicha huquqni muhofaza qilish organlari vakillarining talablarini so‘zsiz bajarish.

28. Ommaviy tadbirlar o‘tkaziladigan obyektlar ma’muriyatining huquqlari:

ommaviy tadbirlar tashkilotchilaridan tadbirlar dasturlari o‘z vaqtida taqdim qilinishini talab qilish;

tomoshabinlar va tadbir qatnashchilariga xulq-atvor normalariga va mazkur Qoidalarning talablariga rioya qilish majburiyatini yuklash.

29. Ommaviy tadbirlarni o‘tkazish chog‘ida ichki ishlar organlarining majburiyatlari:

ommaviy tadbirlar hajmi, xususiyati va uning qatnashchilar sonini hisobga olgan holda jamoat tartibi muhofaza qilinishi va xavfsizlik ta’minlanishi uchun yetarli bo‘lgan zarur kuchlar va texnik vositalarni jalb etish;

jamoat tartibini muhofaza qilish chog‘ida milliy xavfsizlik xizmatlari bilan o‘zaro hamkorlikni tashkil etish, ommaviy tadbirlar o‘tkazish davrida yo‘l xavfsizligi va yong‘in xavfsizligini ta’minlash;

chiptalar sotish chog‘ida kassalarda va obyektga tutashib ketgan hududda jamoat tartibi muhofaza qilinishini ta’minlash;

ommaviy tadbirlar tashkilotchilari va obyektlar ma’muriyati bilan birgalikda tomoshabinlar va qatnashchilarning tadbirlar o‘tkaziladigan joyga xavfsiz o‘tishlarini ta’minlash;

mast holatdagi yoki giyohvand moddalar ta’siri ostidagi shaxslarning ommaviy tadbirlar o‘tkaziladigan obyektlarga o‘tishiga, shuningdek inshootlarda va ularga yaqin joylarda spirtli ichimliklar ichilishiga yo‘l qo‘ymaslikda inshootlar ma’muriyatiga ko‘maklashish;

tomoshabinlarning uyushib o‘tishlari va ularni minbarlarga, buning uchun ajratilgan boshqa joylarga joylashtirishda obyektlar ma’muriyatiga ko‘maklashish;

tribunalar, sektorlarda va tutashib ketgan hududda jamoat tartibini muhofaza qilish va xavfsizlik ishlarini tashkil etish, obyektga keluvchilarning xulq-atvorining belgilangan qoidalarga rioya etishlari ustidan nazorat qilish;

jamoat tartibini va ma’muriyat tomonidan belgilangan xulq-atvor qoidalarini buzuvchi shaxslarni javobgarlikka tortish;

evakuatsiya yo‘llari va yong‘in xavfsizligining holati ustidan nazorat qilish;

sport jamoalari va ijodiy jamoalarga, shu jumladan teatr-tomosha va sport muassasalarining boshqa xodimlariga ommaviy tadbirlar o‘tkazish chog‘ida paydo bo‘ladigan noodatiy vaziyatlar sharoitlarida o‘zini tutish qoidalari bo‘yicha, shuningdek tomoshabinlarning agressiv his-tuyg‘ularini qo‘zg‘atuvchi xatti-harakatlarga yo‘l qo‘ymaslik to‘g‘risida yo‘l-yo‘riqlar berish;

ommaviy tadbirlar tamom bo‘lgach, zarurat bo‘lganda esa ularni o‘tkazish davrida (yong‘in, tabiiy ofatlar, favqulodda vaziyatlar va boshqalar kelib chiqqan taqdirda) Milliy xavfsizlik xizmati, Favqulodda vaziyatlar vazirligining tegishli xizmatlari va obyektlar ma’muriyati bilan birgalikda tomoshabinlar va tadbirlar qatnashchilarini tribunalar, sektorlar va ularga tutashib ketgan hududlardan evakuatsiya qilish jarayonini tashkil etish va boshqarish, shuningdek ularning jamoat transportida jo‘nab ketishlarini tashkil etish.

30. Ommaviy tadbirlar o‘tkazish chog‘ida ichki ishlar organlarining huquqlari:

tadbirlarni o‘tkazish chog‘ida jamoat tartibini muhofaza qilish va xavfsizlikni ta’minlash bilan bog‘liq xarajatlarni qoplash yuzasidan ommaviy tadbirlarni o‘tkazish tashkilotchilari bilan shartnomalar tuzish;

tadbir o‘tkaziladigan joyga odamlar xavfsizligiga tahdid qiluvchi buyumlar va ashyolar olib kirilishiga yo‘l qo‘ymaslik maqsadida qatnashchilar, shu jumladan maxsus texnik vositalar qo‘llanilgan holda, ko‘zdan kechirilishini amalga oshirish;

ommaviy tadbirlar tashkilotchilaridan, inshootlar va tadbirlar o‘tkaziladigan boshqa obyektlar ma’muriyatidan:

inshootdagi o‘rinlar sonidan yoki tomoshabinlar va tadbir qatnashchilari uchun tayyorlangan joylardan ortiqcha chiptalar sotmaslikni va maxsus ruxsatnomalar tarqatmaslikni;

o‘tish joylari va evakuatsiya yo‘llari har xil buyumlar bilan to‘sib qo‘yilmasligini;

inshoot ichida va unga tutashib ketgan hududda spirtli ichimliklar bilan savdo qilish taqiqlanishini talab qilish;

obyektlar ma’muriyatiga obyektga keluvchilar, ayniqsa yoshlar va o‘smirlar bilan qatnashchilar va tomoshabinlarning o‘zini tutish qoidalariga rioya etishlari bo‘yicha ko‘rgazmali tashviqot, mahalliy retranslyatsiya tarmog‘i va boshqa vositalardan foydalangan holda vaqti-vaqti bilan tushuntirish ishlari olib borish majburiyatini yuklash;

yong‘in xavfsizligi talablari bajarilishini;

inshootlar ma’muriyatining eng tayyorgarlik ko‘rgan xodimlarining kuchlari bilan nazorat-o‘tkazish rejimi tashkil etilishini, qatnashchilar va tomoshabinlar ular tomonidan sotib olingan chiptalar, maxsus ruxsatnomalar va taklifnomalarga muvofiq tribunalar va sektorlarga joylashtirilishini tashkil etishini talab etish.

31. Bir yilda kamida bir marta ichki ishlar hududiy organlari tomonidan tegishli mutaxassislar jalb etilgan holda foydalanish ishonchliligini va qurilish konstruksiyalari chidamliligini, evakuatsiya yo‘llarining normativlarga muvofiqligini aniqlash, shuningdek yong‘in xavfsizligi choralarini belgilash maqsadida ommaviy tadbirlar o‘tkazish uchun foydalaniladigan tomoshalar o‘tkaziladigan inshootlarning texnik tekshiruvi o‘tkaziladi. Tekshirish natijalari bo‘yicha dalolatnoma tuziladi. Dalolatnoma aniqlangan kamchiliklarni bartaraf etish yuzasidan chora-tadbirlar ko‘rish uchun komissiyaga yuboriladi.

32. Mazkur Qoidalar buzilishida aybdor bo‘lgan shaxslar amaldagi qonun hujjatlariga muvofiq javob beradilar.