O‘zbekiston Respublikasi Oliy Majlisi qaror qiladi:

O‘zbekiston Respublikasi Oliy Majlisining Muvaqqat ish tartibi tasdiqlansin.

O‘zbekiston Respublikasi Konstitutsiyasining 76-moddasiga muvofiq, Oliy Majlis oliy davlat vakillik organi bo‘lib, qonun chiqaruvchi hokimiyatni amalga oshiradi.

“O‘zbekiston Respublikasining Oliy Majlisi to‘g‘risida”gi Konstitutsiyaviy Qonunning 6-moddasiga muvofiq Oliy Majlis ishining tashkiliy shakli sessiya hisoblanadi.

Oliy Majlis sessiyasi uning majlislarida ochiladi va yopiladi. Majlis jami deputatlarning kamida uchdan ikki qismi ishtirok etgan taqdirdagina vakolatli hisoblanadi.

Oliy Majlisning majlislari ochiq o‘tkaziladi.

Oliy Majlisning qaroriga muvofiq yopiq majlis o‘tkazilishi mumkin.

O‘zbekiston Respublikasining Prezidenti, Bosh vazir va Vazirlar Mahkamasining a’zolari, respublika Konstitutsiyaviy sudi, Oliy sudi, Oliy xo‘jalik sudining raislari, Bosh prokurori, Markaziy banki boshqaruvining raisi Oliy Majlisning istalgan (ochiq va yopiq) majlisida hozir bo‘lish huquqiga egadirlar.

Oliy Majlis sessiyalari Oliy Majlis Raisi tomonidan zaruratga qarab, lekin bir yilda kamida ikki marta chaqiriladi. Oliy Majlis Raisining sessiya chaqirish to‘g‘risidagi farmoyishi deputatlar e’tiboriga barvaqt yetkaziladi.

Oliy Majlis sessiyasini tayyorlash uchun deputatlar ishchi guruhi tuzilishi mumkin.

Sessiya kun tartibini va boshqa masalalarni dastlabki tarzda muhokama qilish uchun Deputatlar guruhlarining vakillar yig‘ilishi chaqirilishi mumkin.

Vakillar yig‘ilishi Oliy Majlis deputatlari orasidan siyosiy partiyalarning hamda Qoraqalpog‘iston Respublikasi, viloyatlar va Toshkent shahar hokimiyat vakillik organlarining taklifiga binoan: besh deputatdan bir vakil normasi bo‘yicha tuziladi.

Vakillar yig‘ilishi Oliy Majlisning butun vakolat muddatiga tuziladi.

Zarur hollarda Vakillar yig‘ilishi tarkibiga o‘zgartirishlar kiritish yuqorida ko‘rsatilgan tartibda amalga oshiriladi.

Vakillar yig‘ilishi, qoida tariqasida, Oliy Majlis Raisi tomonidan chaqiriladi va olib boriladi.

Oliy Majlis Raisi yo‘qligida yoki u o‘z vakolatlarini bajara olmaydigan hollarda Vakillar yig‘ilishi Oliy Majlis Raisi o‘rinbosarlarining biri tomonidan chaqiriladi va olib boriladi.

Vakillar yig‘ilishi qachon va qayerda o‘tkazilishini deputatlarga oldindan xabar qilinadi: bu xabar matbuot, televideniye va radio orqali e’lon qilinadi.

Basharti boshqacha qaror qabul qilinmasa, Vakillar yig‘ilishining majlislari ochiq o‘tkaziladi.

Majlislarda O‘zbekiston Respublikasining Prezidenti, Bosh vazir va boshqa taklif etilgan shaxslar ishtirok etishlari mumkin.

Vakillar yig‘ilishining faoliyati ko‘rib chiqilayotgan masalalarni birgalikda va erkin muhokama qilishga asoslanadi.

Qarorlar ochiq ovoz berish tarzida, hozir bo‘lgan deputatlarning ko‘pchilik ovozi bilan qabul qilinadi. Qarorlar bayon shaklida rasmiylashtirilmaydi.

Vakillar yig‘ilishining muhokamasiga dastlabki tarzda ko‘rib chiqish uchun bo‘lajak sessiyaning kun tartibiga doir takliflar, Oliy Majlis tomonidan saylanadigan, tasdiqlanadigan yoki tayinlanadigan nomzodlar, shuningdek Oliy Majlis vakolatiga berilgan boshqa masalalar to‘g‘risidagi takliflar kiritilishi mumkin.

Vakillar yig‘ilishi qabul qilingan tavsiyalarning natijalari bo‘yicha deputatlardan biriga yoki boshqa mansabdor shaxsga ushbu masala yuzasidan Oliy Majlis sessiyasida taklif bilan so‘zga chiqishni topshiradi.

Oliy Majlis sessiyasini, qoida tariqasida, Oliy Majlis Raisi olib boradi, Rais yo‘qligida yoki u o‘z vazifalarini bajara olmaydigan hollarda uning vazifalarini Oliy Majlis Raisining o‘rinbosarlaridan biri bajaradi.

Oliy Majlis har bir sessiyasining majlislari davriga birinchi majlisda sessiya Kotibiyati tuziladi.

Kotibiyat ochiq ovoz berish yo‘li bilan Oliy Majlis deputatlari orasidan Kotibiyat rahbari va a’zolaridan iborat tarkibda saylanadi. Deputatlar guruhlarining vakillar yig‘ilishi bilan oldindan kelishilgan, Kotibiyatning shaxsiy tarkibiga doir taklif deputatlardan biri yoki sessiyada raislik qiluvchi tomonidan kiritiladi.

Sessiya Kotibiyatini saylash to‘g‘risida Oliy Majlis qarori qabul qilinadi.

Sessiya Kotibiyati so‘zga chiqish istagini bildirganlarni yozib boradi, deputat so‘rovlari, savollar, ma’lumotlar, xabarlar, arizalar, takliflarni ro‘yxatga oladi, Oliy Majlis nomiga fuqarolardan kelayotgan murojaatlar va boshqa hujjatlar bilan ishlashni tashkil etadi.

Birinchi sessiyada Oliy Majlis deputatlari orasidan ovozlarni sanovchi elektron tarmog‘ining ishini nazorat qiluvchi guruh tuzilib, u guruh rahbari va to‘rt a’zodan iborat bo‘ladi.

Nazorat guruhini saylash to‘g‘risida Oliy Majlis qarori qabul qilinadi.

Oliy Majlis deputatlari sessiya kun tartibini muhokama etadilar va qabul qiladilar. Kun tartibiga doir takliflar Oliy Majlis Kengashi tomonidan dastlabki tarzda ko‘rib chiqiladi.

Kun tartibini tasdiqlash to‘g‘risida Oliy Majlis qarori qabul qilinadi.

Oliy Majlis majlislarida ish davlat tilida olib boriladi va rus tiliga hamohang tarjimasi ta’minlanadi.

Oliy Majlisning ertalabki majlislari, qoida tariqasida. soat 10 dan 13 gacha, kechqurungi majlislari esa soat 15 dan 18 gacha o‘tkaziladi, ikki soat ishlanganidan keyin 20 minutlik tanaffus e’lon qilib turiladi. Oliy Majlisning qarori bilan majlislarni boshlash, tamom qilish va tanaffus qilishning boshqa vaqti belgilanishi mumkin.

Har qaysi kechqurungi majlis oxirida kun tartibida ko‘zda tutilmagan masalalar xususida deputatlar qisqacha, qoida tariqasida, ikki minutga qadar, bayonotlar va xabarlar bilan so‘zga chiqishi uchun 10 minutgacha vaqt ajratilishi mumkin. Ushbu bayonot va xabarlar yuzasidan muzokaralar ochilmaydi.

Oliy Majlisning majlislarida ma’ruzalar uchun, qoida tariqasida, bir soatgacha, qo‘shimcha ma’ruzalar uchun — 20 minutgacha vaqt beriladi. Muzokaralarda so‘zga chiquvchilarga 10 minutgacha, qonunlarning loyihalarini moddama-modda muhokama qilish chog‘ida so‘zga chiqish uchun 3 minutgacha, nomzodlar to‘g‘risida, majlislarni olib borish tartibi haqida, ovoz berish sabablari bo‘yicha so‘zga chiqish uchun, bayonotlar uchun, so‘rovlar, savollar, takliflar, xabarlar va ma’lumotlar uchun 2 minutgacha vaqt beriladi. Ko‘pchilik deputatlarning roziligi bilan majlisda raislik qiluvchi so‘zga chiqish vaqtini uzaytirishi mumkin. Nutqlar minbardan turib yoki o‘tirgan joyidan alohida mikrofon orqali so‘zlanadi.

Raislik qiluvchining taklifiga muvofiq Oliy Majlis kun tartibidagi har bir masalani muhokama qilishga ajratiladigan vaqtni oldindan belgilab qo‘yishi mumkin.

O‘zbekiston Respublikasi Prezidenti, Oliy Majlisning Raisi, Bosh vazir va Oliy Majlis Raisining o‘rinbosarlari istalgan paytda so‘z olish huquqiga egadirlar.

Oliy Majlisning majlislarida qarab chiqilayotgan masalalarga doir qarorlar jami deputatlarning oddiy ko‘pchilik ovozi bilan qabul qilinadi, O‘zbekiston Respublikasi Konstitutsiyasida nazarda tutilgan hollar bundan mustasnodir, ishlash tartibiga doir qarorlar esa hozir bo‘lgan deputatlarning oddiy-ko‘pchilik ovozi bilan qabul qilinadi.

Oliy Majlis qarorlari, qoida tariqasida, ochiq ovoz berish yo‘li bilan qabul qilinadi. Konstitutsiyada, ushbu Muvaqqat ish tartibida nazarda tutilgan hollarda yoki Oliy Majlisning qaroriga muvofiq yashirin ovoz berish o‘tkaziladi.

Ochiq va yashirin ovoz berish, basharti Oliy Majlis boshqacha qaror qabul qilmagan bo‘lsa, ovozlarni sanovchi elektron tarmoq yordamida o‘tkaziladi.

Byulletenlardan foydalangan holda yashirin ovoz berishni o‘tkazish to‘g‘risida qaror qabul qilinsa, Oliy Majlis 5 — 7 kishidan iborat tarkibda sanoq komissiyasini saylaydi.

Saylab qo‘yiladigan organlar tarkibiga yoki mansabdor shaxslar lavozimiga nomzodlari ko‘rsatilgan deputatlar sanoq komissiyasiga kiritilishi mumkin emas.

Sanoq komissiyasi o‘z orasidan rais va komissiya kotibini saylaydi. Sanoq komissiyasining qarorlari komissiya a’zolarining ko‘pchilik ovozi bilan qabul qilinadi.

Byulletenlar sanoq komissiyasi nazorati ostida, u belgilagan shaklda va muayyan miqdorda tayyorlanadi.

Ovoz berish vaqti va joyini, uni o‘tkazish tartibini sanoq komissiyasi belgilaydi.

Ovoz berishni o‘tkazish tartibi va texnikasida xatolar borligi aniqlangan taqdirda Oliy Majlisning qaroriga muvofiq takror ovoz berish o‘tkaziladi.

Yashirin ovoz berish yakunlari bo‘yicha sanoq komissiyasi bayon tuzadi, bu bayon sanoq komissiyasining barcha a’zolari tomonidan imzolanadi. Sanoq komissiyasining ma’ruzasi yuzasidan Oliy Majlis yashirin ovoz berish natijalarini tasdiqlash to‘g‘risida qaror qabul qiladi.

O‘zbekiston Respublikasi Konstitutsiyasining 84-moddasiga muvofiq Oliy Majlis Raisi va uning o‘rinbosarlari Oliy Majlis deputatlari orasidan yashirin ovoz berish yo‘li bilan saylanadi.

Nomzod yashirin ovoz berish natijasida Oliy Majlis jami deputatlari yarmidan ko‘pining ovozini olsa, Oliy Majlis Raisi yoki Oliy Majlis Raisining o‘rinbosari lavozimiga saylangan hisoblanadi.

O‘zbekiston Respublikasi Konstitutsiyasining 86-moddasiga muvofiq Oliy Majlis deputatlar orasidan qo‘mitalar va komissiyalar saylaydi.

Oliy Majlis qo‘mitalari va komissiyalari Deputatlar guruhlarining vakillar yig‘ilishi taklifiga binoan saylanadi.

Qo‘mitalar (komissiyalar) ro‘yxati Oliy Majlis tomonidan belgilanadi. Oliy Majlis ushbu masala yuzasidan qaror qabul qiladi.

Qo‘mitalar va komissiyalar saylanayotganda qo‘mita, komissiyasining miqdor tarkibi yuzasidan ovoz berish o‘tkaziladi, qo‘mita, komissiya raisining nomzodi alohida ovozga qo‘yiladi, so‘ngra Oliy Majlis qaroriga binoan qo‘mita, komissiyaning butun tarkibi bo‘yicha yoki har bir nomzod bo‘yicha alohida-alohida ovoz berish o‘tkaziladi.

Deputat, qoida tariqasida, Oliy Majlisning faqat bitta qo‘mitasi yoki komissiyasiga a’zo etib saylanishi mumkin.

Qo‘mitalar va komissiyalarning tarkibiga Oliy Majlis Raisi va uning o‘rinbosarlari saylanishlari mumkin emas.

Siyosiy partiyalar va davlat hokimiyati vakillik organlari tomonidan ko‘rsatilgan Oliy Majlis deputatlari fraksiyalar va bloklarga birlashadilar.

Oliy Majlis deputati faqat bitta deputatlar birlashmasi (fraksiya, blok)da bo‘lishga haqli.

Fraksiyalar, bloklar o‘z faoliyatini Oliy Majlis tomonidan ro‘yxatga olinganidan keyin amalga oshiradi va O‘zbekiston Respublikasining Konstitutsiyasi va qonunlari doirasida ish olib boradi.

Fraksiyaning, blokning faoliyati Oliy Majlis tomonidan qayta tashkil etish (qo‘shib yuborish, birlashtirish, bo‘lib yuborish) yoki tugatish yo‘li bilan to‘xtatilishi mumkin.

Siyosiy partiyaning fraksiyasini yoki deputatlar blokini tuzish uchun:

1) tashabbuskor guruh tuzish;

2) fraksiya, blok tuzish niyatini e’lon qilish;

3) fraksiya yoki blokning ta’sis yig‘ilishini o‘tkazish;

4) fraksiya yoki blok tuzilganligi to‘g‘risida ta’sis bayoni qabul qilish va uni Oliy Majlisga topshirish;

5) fraksiya yoki blok raisini (rahbarini) saylash zarur.

Siyosiy partiyaning raisi (rahbari) yoki fraksiyadan (blokdan) saylangan vakil fraksiyani (blokni) ro‘yxatga olish to‘g‘risidagi iltimos bayon etilgan ariza bilan Oliy Majlisga murojaat etadi.

Arizaga ta’sis yig‘ilishining bayoni ilova qilinadi. Unda fraksiyaning, blokning miqdor tarkibi va shaxsiy tarkibi, shuningdek fraksiyaning, blokning Oliy Majlis Kengashi tarkibiga kiritiladigan vakilining (rahbarining) familiyasi, ismi, otasining ismi, ish joyi va saylov okrugining tartib raqami ko‘rsatilgan bo‘lishi kerak.

Arizani Oliy Majlis sessiyasida qarab chiqish vaqtida fraksiyalarning, bloklarning rahbarlari tuzilgan fraksiyaning, blokning maqsad va vazifalari to‘g‘risida axborot berishi, boshqa ma’lumotlarni aytishi mumkin.

Oliy Majlisdagi rasmiy fraksiyalarni, bloklarni ro‘yxatga olish masalasi yuzasidan Oliy Kengash qaror qabul qiladi.

Oliy Majlis ishini tashkil etish va “O‘zbekiston Respublikasining Oliy Majlisi to‘g‘risida”gi Konstitutsiyaviy Qonunda nazarda tutilgan boshqa vakolatlarni amalga oshirish uchun Oliy Majlis Kengashi tuziladi.

Oliy Majlis Kengashining tarkibiga Oliy Majlis Raisi, Rais o‘rinbosarlari, qo‘mitalarning, Mandat komissiyasining raislari va rasmiy fraksiyalarning, bloklarning vakillari kiradi.

O‘zbekiston Respublikasi Prezidentining O‘zbekiston Respublikasi Konstitutsiyasi 78-moddasida ko‘rsatilgan masalalar bo‘yicha chiqargan Farmonlarini tasdiqlash, qo‘mitalar, komissiyalar raislari va a’zolarini, Konstitutsiyaviy sud, Oliy sud va Oliy xo‘jalik sudi a’zolarini saqlash, Markaziy bank boshqaruvi raisini, Tabiatni muhofaza qilish davlat qo‘mitasi raisini tayinlash va lavozimidan ozod etish, Oliy Majlis Kengashi (Oliy Kengash Rayosati) qarorlarini tasdiqlash ochiq ovoz bergan holda Oliy Majlis jami deputatlarining oddiy ko‘pchilik ovozi bilan amalga oshiriladi.

Oliy Majlis qonunlarni “O‘zbekiston Respublikasining Oliy Majlisi to‘g‘risida”gi Konstitutsiyaviy Qonunning 9-moddasiga muvofiq qabul qiladi.