LexUZ sharhi
Mazkur qaror O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
O‘zbek adabiyoti va madaniyati rivojiga ulkan hissa qo‘shgan atoqli adib, O‘zbekiston xalq yozuvchisi Abdulla Qahhor ijodiy merosining yosh avlodni Vatanga muhabbat va sadoqat, milliy va umuminsoniy qadriyatlar ruhida tarbiyalash borasida muhim ahamiyatga ega ekanini inobatga olib hamda yozuvchi tavalludining 100 yilligini keng nishonlash maqsadida:
1. O‘zbekiston Yozuvchilar uyushmasi, Madaniyat va sport ishlari vazirligi, O‘zbekiston Respublikasi Fanlar akademiyasi, Respublika Ma’naviyat targ‘ibot markazining Abdulla Qahhor tavalludining 100 yilligini nishonlash to‘g‘risidagi taklifi qabul qilinsin.
Abdulla Qahhor tavalludining 100 yilligiga tayyorgarlik ko‘rish va uni o‘tkazish bo‘yicha tashkiliy qo‘mita tarkibi ilovaga* muvofiq tasdiqlansin.
2. Tashkiliy qo‘mita bir oy muddatda tegishli vazirliklar va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda yubiley tadbirlari rejasini ishlab chiqsin va uni amalga oshirishga kirishsin.
Fanlar akademiyasi, Yozuvchilar uyushmasi, Respublika Ma’naviyat targ‘ibot markazi bilan birgalikda 2007-yilning sentyabr oyida “Abdulla Qahhor ijodining ma’naviy-ma’rifiy ahamiyati” mavzusida ilmiy-amaliy konferensiya, O‘zbekiston milliy akademik drama teatrida adib tavalludiga bag‘ishlangan tantanali adabiy-badiiy kecha o‘tkazish;
2007-yilning may oyigacha Abdulla Qahhor uy-muzeyining ekspozitsiyasini boyitish, muzeydagi mebellar va san’at asarlarini restavratsiya qilish, muzey binosi tomini kapital ta’mirlash bilan bog‘liq ishlarni amalga oshirish;
O‘zbekiston teatrlarida Abdulla Qahhor asarlari asosida spektakllar sahnalashtirish choralarini ko‘rsin.
3. Toshkent shahar hokimligi bir oy muddatda Badiiy akademiya va boshqa tegishli tashkilotlar bilan birgalikda Abdulla Qahhorning haykalini yaratish va uni belgilangan tartibda o‘rnatish bo‘yicha taklif kiritsin.
4. Respublika Ma’naviyat targ‘ibot markazi, Oliy va o‘rta maxsus ta’lim hamda Xalq ta’limi vazirliklari va Yozuvchilar uyushmasi hamkorlikda bir oy muddatda ta’lim muassasalarida Abdulla Qahhor hayoti va ijodiga bag‘ishlangan adabiy-badiiy tadbirlar, davra suhbatlari, ijodiy uchrashuvlar tashkil etish rejasini ishlab chiqsin.
5. O‘zbekiston matbuot va axborot agentligi Fanlar akademiyasi va Yozuvchilar uyushmasi bilan birgalikda adibning 100 yilligiga bag‘ishlab Abdulla Qahhorning bir jildlik saylanma asarlarini hamda Kibriyo Qahhorovaning “Chorak asr hamnafas” xotiralar kitobini qayta nashr etsin.
6. “O‘zbekkino” milliy agentligi 2007-yilning iyun oyigacha Abdulla Qahhorning hayoti va ijodiga bag‘ishlangan yangi hujjatli film yaratsin.
7. O‘zbekiston aloqa va axborotlashtirish agentligi 2007-yilning iyul oyigacha Abdulla Qahhor siymosi tushirilgan va uning asarlari mavzusi asosida ishlangan pochta markalari hamda konvertlar turkumini chiqarsin.
8. O‘zbekiston milliy axborot agentligi, O‘zbekiston milliy teleradiokompaniyasi va ommaviy axborot vositalariga adib hayoti va ijodi to‘g‘risida turkum ko‘rsatuvlar hamda radioeshittirishlar tayyorlash, matbuotda maqolalar chop etish va yubiley tadbirlarini keng yoritish tavsiya etilsin.
9. Moliya vazirligi yubiley tadbirlarini moliyalashtirishni 2007-yil uchun tasdiqlangan budjet parametrlarida madaniyat sohasi uchun nazarda tutilgan mablag‘lar doirasida amalga oshirishni ta’minlasin.
10. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R. Qosimov zimmasiga yuklansin.