Pul muomalasini mustahkamlash va naqd pullarning aylanishini tezlashtirish, shuningdek barcha darajalardagi rahbarlar va mansabdor shaxslarning mamlakat mintaqalarida naqd pul muomalasining ahvoli uchun mas’uliyatini oshirish maqsadida Vazirlar Mahkamasi qaror qiladi:

1. Qoraqalpog‘iston Respublikasida, viloyatlar, shaharlar va tumanlarda 1997-yilning II choragida naqd pul mablag‘lari emissiyasi darajasi prognozlariga va kassa rejasiga 1-ilovaga* muvofiq rozilik berilsin.

Qoraqalpog‘iston Respublikasi Vazirlar Kengashining Raisi, viloyatlar, shaharlar va tumanlar hokimlari naqd pul mablag‘lari emissiyasi darajasi prognozlari va kassa rejalari bajarilishi ustidan nazoratni ta’minlasinlar.

2. “O‘zbeksavdo” davlat uyushmasi, O‘zbekbirlashuv, “O‘zmaishiyxizmatuyushma”, “O‘zavtotrans” korporatsiyasi, “O‘zbekiston havo yo‘llari” milliy aviakompaniyasi, “O‘zbekiston temir yo‘llari” davlat-aksiyadorlik kompaniyasi, “Toshshaharyo‘lovchitrans” davlat uyushmasi, Aloqa vazirligi, Kommunal xizmat ko‘rsatish vazirligi, savdo tarmog‘iga ega bo‘lgan va aholiga pulli xizmatlar ko‘rsatuvchi boshqa vazirliklar va idoralar hokimliklar bilan birgalikda bozorni zarur xalq iste’mol tovarlari bilan to‘ldirish va xizmatlar sohasini kengaytirish chora-tadbirlarini ko‘rsinlar.

Vazirlar Mahkamasining komplekslari rahbarlari mazkur bandning amalga oshirilishi ustidan doimiy nazorat o‘rnatsinlar.

4. Davlat hokimiyati va boshqaruvi organlari ustav faoliyatida aholi bilan pul hisob-kitoblarini amalga oshirish nazarda tutilgan korxonalarni nazorat-kassa apparatlari mavjud bo‘lgan va ular korxona joylashgan joydagi soliq organlarida ro‘yxatdan o‘tkazilgan taqdirdagina davlat ro‘yxatidan o‘tkazsinlar.

5. Aholiga pulli xizmatlar ko‘rsatishda kvitansiyalar to‘ldiradigan, chiptalar, talonlar yoki ularga tenglashtirilgan boshqa hujjatlar beradigan korxonalar, tashkilotlar, muassasalar va jismoniy shaxslar ko‘rsatib o‘tilgan hujjatlarning O‘zbekiston Respublikasi Moliya vazirligi tomonidan tasdiqlangan shakllaridan majburiy tartibda foydalansinlar.

6. O‘zbekiston Respublikasi Davlat soliq qo‘mitasi nazorat-kassa apparatlarini qo‘llamasdan tovarlar sotish va xizmatlar ko‘rsatish hamda tasdiqlangan shakldagi kvitansiyalar yoki boshqa hujjatlar berish bilan bog‘liq savdo qoidalari buzilgan hollarda sotuvchi bilan birgalikda tegishli tashkilotning rahbarini ham qonun hujjatlarida belgilangan javobgarlikka tortsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B. S. Hamidov va O‘zbekiston Respublikasi Markaziy bankining raisi F. M. Mullajonov zimmasiga yuklansin.