Kichik biznes va xususiy tadbirkorlikni ularni kreditlashni kengaytirish hisobiga jadal rivojlantirish uchun qulay shart-sharoitlar yaratish, mikromoliyalashtirishni yanada rag‘batlantirish, shuningdek tijorat banklarining kredit resurslarini ko‘paytirish maqsadida Vazirlar Mahkamasi qaror qiladi:

1. Quyidagilar:

Osiyo taraqqiyot banki Direktorlar kengashi 2010-yil 21-aprelda O‘zbekiston Respublikasiga “Kichik va mikromoliyalashtirishni rivojlantirish. 2-faza” loyihasini amalga oshirish uchun qaytarish muddati 20 yil, shu jumladan imtiyozli davri besh yil bo‘lgan 50 mln AQSh dollari miqdorida qarz berish, shuningdek loyihada ishtirok etayotgan tijorat banklari, mikromoliyalashtirish tashkilotlari hamda kichik biznes va xususiy tadbirkorlik subyektlarining salohiyatini oshirishga texnikaviy ko‘maklashish maqsadida 600 ming AQSh dollari miqdorida grant berishni ma’qullaganligi;

ko‘rsatib o‘tilgan loyihani amalga oshirish uchun O‘zbekiston Respublikasi bilan Osiyo taraqqiyot banki o‘rtasidagi Qarz bitimi, shuningdek Osiyo taraqqiyot banki bilan loyihani amalga oshirishda ishtirok etayotgan tijorat banklari — “Agrobank” ochiq aksiyadorlik tijorat banki, “Xamkor bank” ochiq aksiyadorlik tijorat banki va “Ipak yo‘li” ochiq aksiyadorlik innovatsiya tijorat banki o‘rtasidagi loyiha bitimlari 2010-yil 1-mayda imzolanganligi ma’lumot uchun qabul qilinsin.

2. Belgilab qo‘yilsinki:

O‘zbekiston Respublikasi Moliya vazirligi ko‘rsatib o‘tilgan loyiha amalga oshirilishi hamda loyihani amalga oshirishda ishtirok etayotgan tijorat banklari faoliyati muvofiqlashtirilishi uchun mas’ul bo‘lgan ijro etuvchi organ hisoblanadi;

loyihada ishtirok etayotgan tijorat banklari loyihaning tegishli komponentlarini amalga oshirish bo‘yicha agentlar, Osiyo taraqqiyot bankining qarz mablag‘lari va grantidan maqsadli va samarali foydalanilishi uchun mas’ul hisoblanadilar;

Osiyo taraqqiyot bankining qarz mablag‘lari tijorat banklari tomonidan keyinchalik xorijiy va milliy valyutada kichik biznes va xususiy tadbirkorlik subyektlariga, shuningdek mikromoliyalashtirish tashkilotlariga kreditlar (subqarzlar) berish uchun loyihani amalga oshirishda ishtirok etuvchi tijorat banklariga qayta kreditlash to‘g‘risidagi bitimlar asosida qayta moliyalashtiriladi;

Osiyo taraqqiyot bankining qarzini qaytarish, shuningdek qarz bo‘yicha foizlar va vositachilik haqi to‘lash loyihani amalga oshirishda ishtirok etuvchi tijorat banklari tomonidan amalga oshiriladi;

loyihani amalga oshirishda ishtirok etuvchi tijorat banklari bir qarz oluvchiga 20 ming AQSh dollari miqdorida yoki O‘zbekiston Respublikasi milliy valyutasidagi ekvivalentda kreditlar (subqarzlar) beradilar;

ko‘rsatib o‘tilgan loyiha doirasida jalb qilingan subqarzlar hisobiga mikromoliyalashtirish tashkilotlari tomonidan beriladigan mikrokreditlar va mikroqarzlar ekvivalentda 1 ming AQSh dollaridan ortiq bo‘lmasligi kerak.

3. Quyidagilar:

loyihani amalga oshirishda ishtirok etuvchi tijorat banklariga Osiyo taraqqiyot bankining qarzini berish jadvali 1-ilovaga* muvofiq;

Osiyo taraqqiyot bankining qarzini qaytarish hamda qarz bo‘yicha foizlar va vositachilik haqi to‘lash jadvali 2-ilovaga* muvofiq tasdiqlansin.

4. O‘zbekiston Respublikasi Moliya vaziriga loyihani amalga oshirishda ishtirok etuvchi 1-ilovaga muvofiq tijorat banklari bilan qayta kreditlash to‘g‘risidagi bitimlarni O‘zbekiston Respublikasi nomidan imzolash vakolati berilsin.

5. O‘zbekiston Respublikasi Adliya vazirligi O‘zbekiston Respublikasi bilan Osiyo taraqqiyot banki o‘rtasidagi qarz bitimi, O‘zbekiston Respublikasi bilan loyihani amalga oshirishda ishtirok etuvchi tijorat banklari o‘rtasidagi qayta kreditlash to‘g‘risidagi bitimlar yuzasidan belgilangan tartibda yuridik xulosa bersin.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov va O‘zbekiston Respublikasi Markaziy banki raisi F.M.Mullajonov zimmasiga yuklansin.