“Tadbirkorlik faoliyati sohasidagi ruxsat berish tartib-taomillari to‘g‘risida”gi O‘zbekiston Respublikasi Qonunini bajarish hamda O‘zbekiston Respublikasi Vazirlar Mahkamasining “Tadbirkorlik faoliyati sohasidagi ruxsat berish tartib-taomillari to‘g‘risida”gi O‘zbekiston Respublikasi Qonunini amalga oshirish chora-tadbirlari haqida” 2013-yil 15-avgustdagi 225-son qaroriga muvofiq, shuningdek tadbirkorlik subyektlari tomonidan temir yo‘l transporti sohasida ruxsat berish tartibotlaridan o‘tishning yagona tartibini belgilash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Transport vazirligi tomonidan obyektlar, mahsulotlar va texnologiyalarning loyihalarini hamda ularni foydalanishga qabul qilib olish ishlarini ularning temir yo‘l transporti sohasida belgilangan talablarga muvofiqligi yuzasidan ekspertizadan o‘tkazish tartibi to‘g‘risidagi nizom 1-ilovaga muvofiq;

Lokomotivlar, yuk va izotermik vagonlarning xizmat qilish muddatlarini uzaytirishga texnik yechimlardan ishlab chiqarishda foydalanishni O‘zbekiston Respublikasi Transport vazirligi bilan kelishish tartibi to‘g‘risidagi nizom 2-ilovaga muvofiq tasdiqlansin.

2. “O‘zdavtemiryo‘lnazorat” davlat inspeksiyasi, vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.I. Zakirov zimmasiga yuklansin.

1. Ushbu Nizom o‘tkazilgan ekspertiza natijalari bo‘yicha obyektlar, mahsulotlar va texnologiyalarning loyihalarni hamda ularni foydalanishga qabul qilib olish ishlarini amalga oshirish huquqini beradigan ushbu Nizomga 1 va 2-ilovalarga* muvofiq sxema va shakl bo‘yicha xulosa (keyingi o‘rinlarda xulosa deb ataladi) berish uchun O‘zbekiston Respublikasi Transport vazirligi (keyingi o‘rinlarda — Transport vazirligi) tomonidan obyektlar, mahsulotlar va texnologiyalarning loyihalarini hamda ularni foydalanishga qabul qilib olish ishlarini ularning temir yo‘l transporti sohasida belgilangan talablarga muvofiqligi yuzasidan ekspertizadan o‘tkazish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza beruvchi — xulosa olish uchun hujjatlarni Transport vazirligiga taqdim etadigan tadbirkorlik subyekti — yuridik shaxs;

temir yo‘l transporti obyekti (keyingi o‘rinlarda obyekt deb ataladi) — foydalanilayotgan temir yo‘l infratuzilmasi (temir yo‘l infratuzilmasining uchastkalari); temir yo‘l infratuzilmasining tarkibiy qismlari (yo‘llar, temir yo‘l elektr ta’minoti, boshqarish, nazorat qilish, signalizatsiya va aloqa, stansiya kichik tizimlari); tashkil etilgan temir yo‘l harakat tarkibi va uning tarkibiy qismlari (poyezdlar, monyovrli tarkiblar, tirkamalarning kichik tizimlari); umumiy foydalanishdagi temir yo‘l transporti, egalari jismoniy shaxslar hisoblanadigan idoraviy temir yo‘l kirish yo‘llari hamda va temir yo‘l kirish yo‘llari, shuningdek texnologik temir yo‘l transporti;

temir yo‘l transporti mahsuloti (keyingi o‘rinlarda mahsulot deb ataladi) — temir yo‘l transporti uchun yangidan tayyorlanadigan mahsulotlar: temir yo‘l harakat tarkibi va (yoki) uning tarkibiy qismlari, shuningdek temir yo‘l transporti infratuzilmasi kichik tizimlarining tarkibiy qismlari elementlari yoki uning kichik tizimlari tarkibiy qismlari elementlarining yig‘indisi;

temir yo‘l transporti texnologiyasi (keyingi o‘rinlarda texnologiya deb ataladi) — temir yo‘l transporti sohasida foydalaniladigan metodlar va jarayonlar yig‘indisi, shuningdek temir yo‘l transporti mahsulotini tayyorlashga, unga xizmat ko‘rsatishga, uni ta’mirlashga va (yoki) undan foydalanishga yo‘naltirilgan tashkiliy chora-tadbirlar, operatsiyalar va usullar kompleksini o‘z ichiga oladigan texnik ishlab chiqarish usullarining ilmiy tavsifi;

ekspertiza — loyihalar hujjatlarini va obyektlar, mahsulotlar va texnologiyalarni qabul qilib olish ishlari hujjatlarini ularning temir yo‘l transporti sohasidagi talablarga muvofiqligi yuzasidan Transport vazirligi tomonidan ko‘rib chiqish. Ekspertizani amalga oshirish davomida taqdim etilgan hujjatlarning va texnik tartibga solish sohasidagi normativ hujjatlarning qonun hujjatlari talablariga muvofiqligi aniqlanadi.

3. Xulosa 5 yil muddatga beriladi.

4. Ariza beruvchi tomonidan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirishda ruxsat berish talablari va shartlariga quyidagilar kiradi:

loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirishda qonun hujjatlariga majburiy rioya etish;

harakat xavfsizligini, texnika xavfsizligini, yong‘in xavfsizligi talablari va normalarini, ishlab chiqarish sanitariyasi va ekologiyasini ta’minlash;

texnik asbob-uskunalarning, moslamalar va instrumentlarning, shuningdek xizmat ko‘rsatuvchi xodimlarning temir yo‘l transportida belgilangan talablarga muvofiqligi;

loyihalarni hamda obyektlar, mahsulotlar va texnologiyalarni qabul qilib olish ishlarini xulosada ko‘rsatilgan doirada amalga oshirish;

ariza beruvchining nomi yoki joylashgan joyi (pochta manzili) o‘zgarganligi qayta ro‘yxatdan o‘tkazilgandan keyin yetti ish kuni mobaynida Transport vazirligini xabardor qilish.

5. Xulosa olish uchun ariza beruvchi Transport vazirligiga quyidagi hujjatlarni taqdim etadi:

ariza beruvchining nomi, joylashgan joyi (pochta manzili) va tashkiliy-huquqiy shakli ko‘rsatilgan xulosa berish to‘g‘risidagi ariza; ushbu Nizomning 3-ilovasiga* muvofiq shakl bo‘yicha obyektlar, mahsulotlar va texnologiyalarning loyihalari hamda foydalanishga qabul qilib olish ishlari;

yuridik shaxsning davlat ro‘yxatidan o‘tkazilganligi to‘g‘risidagi guvohnoma nusxasi;

tashkilot rahbariyati tomonidan belgilangan tashkilotning ichki nazorati bo‘yicha ariza beruvchining talablari keltirilgan holda, temir yo‘l transporti sohasidagi ishlarni bajarish uchun tashkilot rahbari tomonidan tasdiqlangan, ariza beruvchi tomonidan ishlab chiqilgan, temir yo‘l transporti sohasida amalga oshiriladigan ishlarni bajarish texnologiyasi (temir yo‘l harakat tarkibining xizmat muddatini uzaytirish uchun texnik diagnostika metodikasi).

6. Ariza beruvchidan ushbu Nizomning 5-bandida nazarda tutilmagan hujjatlarni talab qilishga yo‘l qo‘yilmaydi.

7. Xulosa olish uchun zarur bo‘lgan hujjatlar ariza beruvchi tomonidan Transport vazirligiga bevosita, ularning olinganligi to‘g‘risidagi xabarnoma bilan, pochta aloqasi vositasi orqali yoki elektron shaklda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

8. Xulosa olish uchun Transport vazirligiga taqdim etilgan hujjatlar ro‘yxat bo‘yicha qabul qilinadi, ro‘yxat Transport vazirligi tomonidan hujjatlar qabul qilingan sana to‘g‘risidagi belgi bilan ariza beruvchiga darhol beriladi (yuboriladi).

9. Transport vazirligi arizani ko‘rib chiqadi, loyihalarni hamda obyektlar, mahsulotlar va texnologiyalarni qabul qilib olish ishlarini ekspertizadan o‘tkazadi, so‘ngra ushbu Nizomning 5-bandida nazarda tutilgan hujjatlar qabul qilib olingan sanadan boshlab o‘n besh ish kunidan oshmaydigan muddatda xulosa beradi yoki xulosa berishni rad etadi. Ariza ko‘rib chiqilganligi uchun yig‘im undirilmaydi.

10. Agar Transport vazirligi ushbu Nizomning 9-bandida nazarda tutilgan muddat mobaynida ariza beruvchiga xulosani bermasa yoki uni berishni rad etmasa, u holda ushbu muddat o‘tgach ariza beruvchi, bu to‘g‘rida Transport vazirligini yozma ravishda xabardor qilgan holda, o‘zi amalga oshirish uchun xulosa olmoqchi bo‘lgan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish huquqiga ega.

Ushbu bandning birinchi xatboshida nazarda tutilgan holatda, Transport vazirligi ariza beruvchining yozma shakldagi xabarnomasini olgach, besh ish kuni mobaynida unga xulosa berishi shart. Xulosa olingungacha, qabul qilib olingan sanasi ko‘rsatilgan holdagi taqdim etilgan hujjatlar ro‘yxati hamda ariza beruvchi tomonidan Transport vazirligiga yuborilgan xabarnoma xulosaga tenglashtiriladi hamda loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish uchun asos hisoblanadi.

11. Transport vazirining o‘rinbosari Transport vazirligining litsenziyalash va ruxsat beruvchi hujjatlarni berish boshqarmasining mutaxassislari tomonidan tayyorlangan ushbu Nizomga 4-ilovaga* binoan shakl bo‘yicha muvofiqlik to‘g‘risidagi dalolatnoma asosida xulosani imzolaydi yoki uni berishni rad etadi.

Transport vaziri o‘rinbosarining imzosi gerbli muhr bilan tasdiqlanadi.

12. Transport vazirligi ariza beruvchiga xulosani beradi (yuboradi) yoki uni tegishli qaror qabul qilingan sanadan boshlab bir ish kunidan kechikmay xulosa berishning rad etilgani to‘g‘risida yozma shaklda xabardor qiladi. Xulosa berilganligi va uning amal qilish muddati uzaytirilganligi uchun yig‘im undirilmaydi.

13. Xulosa berish quyidagi asoslar bo‘yicha rad etilishi mumkin:

ariza beruvchi tomonidan ushbu Nizomning 5-bandida ko‘rsatilgan hujjatlar to‘liq hajmda taqdim etilmaganda;

ariza beruvchi ruxsat berish talablari va shartlariga muvofiq bo‘lmaganda;

ariza beruvchi tomonidan taqdim etilgan hujjatlarda ishonchsiz yoki buzilgan ma’lumotlar mavjud bo‘lganda.

Xulosa berishning boshqa asoslarga ko‘ra, shu jumladan maqsadga muvofiq emasligi sabablariga ko‘ra rad etilishiga yo‘l qo‘yilmaydi.

14. Xulosa berishni rad etish to‘g‘risida qaror qabul qilingan taqdirda rad etish to‘g‘risidagi xabarnoma ariza beruvchiga, rad etishning sabablari, qonunchilikning aniq normalari va ariza beruvchi ko‘rsatib o‘tilgan sabablarni bartaraf etib hujjatlarni takroran ko‘rib chiqish uchun taqdim etishi mumkin bo‘lgan muddat ko‘rsatilgan holda yozma shaklda yuboriladi (taqdim etiladi). Ariza beruvchi rad etish sabablarini bartaraf etishga va hujjatlarni takroran ko‘rib chiqish uchun taqdim etishga haqli bo‘lgan muddat xulosa berishni rad etish to‘g‘risidagi yozma xabarnoma olingan kundan boshlab o‘n ish kunidan kam bo‘lishi mumkin emas.

15. Xulosa berishni rad etish uchun asos bo‘lgan sabablar belgilangan muddatda ariza beruvchi tomonidan bartaraf etilgan taqdirda hujjatlarni takroran ko‘rib chiqish, xulosa berish yoki uni berishni rad etish Transport vazirligi tomonidan rad etish sabablari bartaraf etilganligi to‘g‘risida ariza va rad etish sabablari bartaraf etilganligini tasdiqlovchi tegishli hujjatlar olingan kundan boshlab o‘n ish kunidan oshmaydigan muddatda amalga oshiriladi. Tadbirkorlik subyektining arizasi takroran ko‘rib chiqilganligi uchun yig‘im undirilmaydi.

16. Hujjatlarni takroran ko‘rib chiqishda ariza beruvchiga ilgari yozma shaklda bayon qilinmagan rad etish sabablarining Transport vazirligi tomonidan ko‘rsatilishiga yo‘l qo‘yilmaydi, ilgari ko‘rsatilgan sabablarning bartaraf etilganini tasdiqlovchi hujjatlar bilan bog‘liq holdagi rad etish sabablarining ko‘rsatilishi bundan mustasno.

17. Xulosa berishining rad etilgani to‘g‘risidagi yozma xabarnomada ko‘rsatilgan muddat o‘tgandan keyin ariza beruvchi bergan ariza yangidan berilgan ariza hisoblanadi va Transport vazirligi tomonidan umumiy asoslarda ko‘rib chiqiladi.

18. Ariza beruvchi xulosa berishning rad etilgani, shuningdek Transport vazirligi mansabdor shaxsining harakati (harakatsizligi) to‘g‘risida belgilangan tartibda shikoyat qilish huquqiga ega.

19. Ariza beruvchi qayta tashkil etilganda, uning nomi yoki joylashgan joyi (pochta manzili) o‘zgarganda ariza beruvchi yoki uning huquqiy vorisi qayta rasmiylashtirishdan o‘tgandan keyin yetti ish kuni mobaynida Transport vazirligiga, ko‘rsatilgan ma’lumotlarni tasdiqlovchi tegishli hujjatlarni ilova qilgan holda, xulosani qayta rasmiylashtirish to‘g‘risida ariza berishi shart.

Yangidan vujudga kelgan yuridik shaxsni davlat ro‘yxatidan o‘tkazish sanasida xulosaga ega bo‘lgan ariza beruvchilar qo‘shib yuborilgan taqdirda, xulosani ushbu bandning birinchi xatboshida nazarda tutilgan tartibda qayta rasmiylashtirishga yo‘l qo‘yiladi.

Xulosadagi mavjud ma’lumotlar mazkur bandning birinchi va ikkinchi xatboshilarida nazarda tutilmagan hollarda o‘zgartirilgan taqdirda, xulosa ariza beruvchining tegishli hujjatlar ilova qilingan arizasi bo‘yicha qayta rasmiylashtiriladi.

Hujjatlar ariza beruvchi tomonidan Transport vazirligiga ushbu Nizomning 7-bandida nazarda tutilgan tartibda taqdim etiladi.

Tadbirkorlik subyektidan ushbu bandda nazarda tutilmagan hujjatlarni taqdim etishni talab qilishga yo‘l qo‘yilmaydi.

20. Xulosa qayta rasmiylashtirilgungacha xulosani qayta rasmiylashtirish to‘g‘risida ariza bergan yoki uning huquqiy vorisi xulosada ko‘rsatilgan loyihalarni hamda obyektlar, mahsulotlar va texnologiyalarni qabul qilib olish ishlarini ariza qabul qilib olingan sanasi Transport vazirligi tomonidan ko‘rsatilgan holdagi xulosani qayta rasmiylashtirish to‘g‘risida berilgan ariza asosida amalga oshiradi.

21. Xulosani qayta rasmiylashtirishda Transport vazirligi berilgan xulosalar reyestriga tegishli o‘zgartirishlar kiritadi. Xulosalarni qayta rasmiylashtirish va berish tegishli hujjatlar ilova qilingan holda xulosani qayta rasmiylashtirish to‘g‘risidagi ariza Transport vazirligi tomonidan olingan kundan boshlab besh ish kunidan ko‘p bo‘lmagan muddatda amalga oshiriladi.

22. Xulosani qayta rasmiylashtirilganlik uchun yig‘im undirilmaydi.

23. Arizaning amal qilish muddati tugagach u ariza beruvchining arizasiga ko‘ra uzaytirilishi mumkin. Xulosaning amal qilish muddatini uzaytirish to‘g‘risidagi arizaTransport vazirligiga xulosaning amal qilish muddati o‘tgungacha berilishi kerak. Xulosaning amal qilish muddatini uzaytirish uni berish uchun nazarda tutilgan tartibda amalga oshiriladi.

24. Xulosa yo‘qolganda yoki yaroqsiz holga kelganda ariza beruvchining arizasi bo‘yicha xulosaning dublikati beriladi.

25. Transport vazirligi xulosa dublikatini ariza, shuningdek u yaroqsiz holga kelganda xulosaning asl nusxasi olingan kundan boshlab besh ish kunidan ko‘p bo‘lmagan muddatda berishi (yuborishi) shart. Xulosa dublikati berilganligi uchun yig‘im undirilmaydi.

26. Xulosaning amal qilish muddatini to‘xtatib turish, to‘xtatish va xulosani bekor qilish “Tadbirkorlik faoliyati sohasidagi ruxsat berish tartib-taomillari to‘g‘risida”gi O‘zbekiston Respublikasi Qonunining tegishli ravishda 22, 23 va 25-moddalarida nazarda tutilgan holatlarda va tartibda amalga oshiriladi.

27. Quyidagilar xulosaning amal qilishini belgilangan tartibda to‘xtatish uchun asos bo‘ladigan ruxsat berish talablari va shartlarining bir marta qo‘pol ravishda buzilishiga kiradi:

Transport vazirligi tomonidan belgilangan tartibda o‘tkaziladigan ruxsat berish talablari va shartlariga rioya etilishini tekshirishlardan bosh tortish;

ular yuzasidan xulosa berilgan loyihalarni hamda obyektlar, mahsulotlar va texnologiyalarni qabul qilib olish ishlarini amalga oshirish natijasida fuqarolarning hayoti va sog‘lig‘iga zarar yetkazish yoxud bunday zarar yetkazilishining aniq xavfini tug‘dirish.

28. Transport vazirligi berilgan xulosalar reyestrini yuritadi va uni o‘zining rasmiy veb-saytida joylashtiradi.

29. Berilgan xulosalar reyestrida quyidagilar ko‘rsatilgan bo‘lishi kerak:

ariza beruvchining nomi, joylashgan joyi (pochta manzili) va tashkiliy-huquqiy shakli, telefoni;

xulosaning berilgan sanasi va tartib raqami;

xulosaning amal qilish muddati;

xulosani qayta rasmiylashtirish, amal qilish muddatini uzaytirish, amal qilishini to‘xtatib turish va tiklashning asosi va sanasi;

xulosaning amal qilish muddatini to‘xtatishning asosi va sanasi;

xulosani bekor qilishning asosi va sanasi;

xulosa dublikatini berishning asosi va sanasi.

30. Ushbu Nizom talablarining buzilishida aybdor bo‘lgan shaxslar qonun hujjatlariga muvofiq javob beradilar.

1. Ushbu Nizom amalga oshirilgan kelishish natijalari bo‘yicha muayyan muddatga, ushbu Nizomga 1 va 2-ilovalarga* muvofiq sxema va shakl bo‘yicha harakatlanadigan temir yo‘l tarkibining xizmat qilish muddatlarini uzaytirishga texnik yechimlardan ishlab chiqarishda foydalanish huquqini beruvchi guvohnomani (keyingi o‘rinlarda guvohnoma deb ataladi) berish uchun tashkilotlarning lokomotivlari, yuk va izotermik vagonlarining (keyingi o‘rinlarda harakatlanadigan temir yo‘l tarkibi deb ataladi) xizmat qilish muddatlarini uzaytirishga texnik yechimlardan ishlab chiqarishda foydalanishni O‘zbekiston Respublikasi Transport vazirligi (keyingi o‘rinlarda — Transport vazirligi) bilan kelishish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza beruvchi — xizmat qilish muddati tamom bo‘lgan yoki tamom bo‘layotgan o‘zining harakatlanadigan temir yo‘l tarkibiga ega bo‘lgan, Transport vazirligiga guvohnoma olish uchun hujjatlarni taqdim etuvchi tadbirkorlik subyekti — yuridik shaxs;

harakatlanadigan temir yo‘l tarkibi xizmat qilishining belgilangan muddati — belgilangan xalqaro normalarga va ushbu Nizomga 3-ilovaga* muvofiq tayyorlovchi zavod tomonidan nazarda tutilgan, unga erishilganda harakatlanadigan temir yo‘l tarkibidan foydalanish, texnik holatidan qat’i nazar, to‘xtatilishi kerak bo‘lgan foydalanishning kalendar davom etishi;

harakatlanadigan temir yo‘l tarkibining xizmat qilish muddati — harakatlanadigan temir yo‘l tarkibidan foydalanish boshlangandan boshlab foydalanishning kalendar davom etishi yoki cheklangan holatga o‘tgunga qadar ta’mirlashdan keyin uning tiklanishi;

ixtisoslashtirilgan ekspert tashkilot — harakatlanadigan temir yo‘l tarkibiga texnik tashxis qo‘yish bo‘yicha ishlarni bajarish vakolati berilgan tashkilot;

texnik yechim — maxsus ekspert tashkiloti tomonidan berilgan, ariza beruvchi bilan kelishilgan hamda texnik asos va harakatlanadigan temir yo‘l tarkibi xizmat qilishining belgilangan muddatini uzaytirish shartlari mavjud bo‘lgan hujjat.

3. Guvohnomaning amal qilish muddati — harakatlanadigan temir yo‘l tarkibi xizmat qilishini uzaytirish muddatiga muvofiqdir.

4. Harakatlanadigan temir yo‘l tarkibi xizmat qilishining yangi muddatini hisoblash guvohnoma berilgan sanadan belgilanadi.

5. Lokomotivlar, yuk va izotermik vagonlarning xizmat muddatini uzaytirishda quyidagilar ruxsat berish talablari va shartlariga kiradi:

lokomotivlar, yuk va izotermik vagonlarning xizmat qilish muddatini uzaytirishda qonunchilikka majburiy rioya qilish;

harakat xavfsizligini, texnika xavfsizligini, yong‘in xavfsizligi, ishlab chiqarish sanitariyasi va ekologiya talablari va normalarini ta’minlash;

guvohnomada ko‘rsatilgan doiralarda lokomotivlar, yuk va izotermik vagonlarning xizmat qilish muddatini uzaytirish bo‘yicha tadbirlarni amalga oshirish;

qayta ro‘yxatdan o‘tgandan keyin ariza beruvchining nomi yoki turgan joyi (pochta manzili) o‘zgarganligi to‘g‘risida yetti ish kuni mobaynida Transport vazirligini xabardor qilish.

6. Guvohnomani olish uchun ariza beruvchi Transport vazirligiga quyidagi hujjatlarni taqdim etadi:

ushbu Nizomga 4-ilovaga* muvofiq shakl bo‘yicha quyidagilar: ariza beruvchining nomi, joylashgan joyi (pochta manzili) va tashkiliy huquqiy shakli; xizmat qilish muddatini uzaytirish taklif etilayotgan harakatlanadigan temir yo‘l tarkibining soni va tipi (seriyasi) ko‘rsatilgan holda guvohnoma berish to‘g‘risidagi ariza;

ushbu Nizomga 5-ilovaga* (lokomotivlar uchun), 6-ilovaga* (vagonlar uchun) muvofiq shakllar bo‘yicha ixtisoslashtirilgan ekspert tashkilot tomonidan rasmiylashtiriladigan harakatlanadigan temir yo‘l tarkibining xizmat qilish muddatini uzaytirish to‘g‘risidagi texnik yechim.

7. Ariza beruvchidan ushbu Nizomning 6-bandida nazarda tutilmagan hujjatlarni talab etishga yo‘l qo‘yilmaydi.

8. Guvohnoma olish uchun zarur bo‘lgan hujjatlar ariza beruvchi tomonidan Transport vazirligiga bevosita, ular olinganligi to‘g‘risidagi xabarnoma bilan pochta aloqasi yoki elektron shaklda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

9. Guvohnoma olish uchun Transport vazirligiga taqdim etilgan hujjatlar ro‘yxat bo‘yicha qabul qilinadi va ro‘yxat Transport vazirligi tomonidan hujjatlar qabul qilingan sana to‘g‘risida belgi qo‘yilgan holda darhol ariza beruvchiga beriladi (yuboriladi).

10. Transport vazirligi ushbu Nizomning 6-bandida nazarda tutilgan hujjatlarni qabul qilish sanasidan boshlab besh ish kunidan ortiq bo‘lmagan muddatda, shu jumladan ushbu Nizomning 23-bandida nazarda tutilgan arizani ko‘rib chiqish muddatida arizani ko‘rib chiqadi, guvohnomani beradi yoki uni berishni rad etadi. Ariza ko‘rib chiqilganligi uchun yig‘im undirilmaydi.

11. Agar Transport vazirligi ushbu Nizomning 10-bandida nazarda tutilgan muddat mobaynida ariza beruvchiga guvohnomani bermasa yoki uni berishni rad etmasa, u holda ushbu muddat tamom bo‘lgandan keyin ariza beruvchi bu haqda Transport vazirligini yozma ravishda xabardor qilgan holda texnik yechimda ko‘rsatilgan muddatda ariza berilgan harakatlanadigan temir yo‘l tarkibining xizmat qilish muddatlarini uzaytirish huquqiga ega bo‘ladi.

Ushbu bandning birinchi xatboshida nazarda tutilgan holatda Transport vazirligi ariza beruvchining yozma xabarnomasi olingandan keyin besh ish kuni mobaynida unga guvohnoma berishi shart. Guvohnoma olingunga qadar taqdim etilgan hujjatlarning ro‘yxati ular qabul qilingan sana to‘g‘risida qo‘yilgan belgi va ariza beruvchi tomonidan Transport vazirligiga yuborilgan yozma xabarnoma bilan birgalikda guvohnomaga tenglashtiriladi va texnik yechimda ko‘rsatilgan muddatda ariza berilgan harakatlanadigan temir yo‘l tarkibining xizmat qilish muddatlarini uzaytirish uchun asos hisoblanadi.

12. Transport vazirining o‘rinbosari Transport vazirligining litsenziyalash va ruxsat beruvchi hujjatlarni berish boshqarmasining mutaxassislari tomonidan tayyorlangan 7-ilovaga* muvofiq shakl bo‘yicha muvofiqlik to‘g‘risidagi dalolatnoma asosida guvohnomani imzolaydi yoki uni berishni rad etadi.

13. Transport vazirining o‘rinbosari imzosi gerbli muhr bilan tasdiqlanadi.

14. Transport vazirligi tegishli qaror qabul qilingan sanadan boshlab bir ish kunidan kechikmay ariza beruvchiga guvohnomani beradi (yuboradi) yoki uni berish rad etilganligi to‘g‘risida yozma shaklda uni xabardor qiladi. Guvohnoma berilganligi uchun yig‘im undirilmaydi.

15. Guvohnomani berish quyidagi asoslar bo‘yicha rad etilishi mumkin:

ariza beruvchi tomonidan ushbu Nizomning 6-bandida ko‘rsatilgan hujjatlarning to‘liq bo‘lmagan hajmda taqdim etilishi;

ariza beruvchining ruxsat berish talablari va shartlariga nomuvofiqligi;

ariza beruvchi tomonidan taqdim etilgan hujjatlarda ishonchsiz yoki buzilgan ma’lumotlar mavjudligi.

Boshqa asoslar bo‘yicha, shu jumladan maqsadga muvofiq emasligi sababi bilan xulosa berish rad etilishiga yo‘l qo‘yilmaydi.

16. Guvohnomani berish rad etilishi to‘g‘risida qaror qabul qilingan taqdirda rad etish to‘g‘risidagi xabarnoma ariza beruvchiga rad etishning sabablari, qonun hujjatlarining aniq normalari va ariza beruvchi ko‘rsatib o‘tilgan sabablarni bartaraf etib hujjatlarni takroran ko‘rib chiqish uchun taqdim etishi mumkin bo‘lgan muddat ko‘rsatilgan holda yozma shaklda yuboriladi (topshiriladi). Ariza beruvchi rad etish sabablarini bartaraf etishga va hujjatlarni takroran ko‘rib chiqish uchun taqdim etishga haqli bo‘lgan muddat guvohnoma berish rad etilganligi to‘g‘risidagi yozma xabarnoma olingan kundan boshlab o‘n ish kunidan kam bo‘lishi mumkin emas.

17. Ariza beruvchi tomonidan guvohnomani berish rad etilishi uchun asos bo‘lgan sabablar belgilangan muddatda bartaraf etilgan taqdirda hujjatlarni takroran ko‘rib chiqish, guvohnomani berish yoki uni berishni rad etish Transport vazirligi tomonidan rad etish sabablari bartaraf etilganligi to‘g‘risidagi ariza va rad etish sabablari bartaraf etilganligini tasdiqlovchi tegishli hujjatlar olingan kundan boshlab o‘n ish kunidan ortiq bo‘lmagan muddatda amalga oshiriladi. Ariza takroran ko‘rib chiqilganligi uchun yig‘im undirilmaydi.

18. Hujjatlarni takroran ko‘rib chiqishda Transport vazirligi tomonidan oldin ariza beruvchiga yozma shaklda bayon qilinmagan rad etish sabablari ko‘rsatilishiga yo‘l qo‘yilmaydi, oldin ko‘rsatilgan sabablar bartaraf etilganligini tasdiqlovchi hujjatlar bilan bog‘liq rad etish sabablarini ko‘rsatish bundan mustasno.

19. Guvohnomani berish rad etilishi to‘g‘risidagi yozma xabarnomada ko‘rsatilgan muddat tamom bo‘lgandan keyin ariza beruvchi tomonidan berilgan ariza yangidan berilgan ariza hisoblanadi va Transport vazirligi tomonidan umumiy asoslarda ko‘rib chiqiladi.

20. Ariza beruvchi guvohnomani berish rad etilishi, shuningdek Transport vazirligi mansabdor shaxsining harakati (harakatsizligi) yuzasidan belgilangan tartibda shikoyat qilish huquqiga ega.

21. Transport vazirligi guvohnomani berishda “O‘zbekiston temir yo‘llari” aksiyadorlik jamiyati bilan o‘zaro hamkorlikni tashkil etadi.

22. “Bir oyna” bo‘yicha guvohnomani berishda Transport vazirligi bilan “O‘zbekiston temir yo‘llari” AJning o‘zaro hamkorligi ayirboshlash vositasida, shu jumladan elektron pochta, guvohnoma berish to‘g‘risidagi qarorni qabul qilish uchun zarur bo‘lgan ma’lumotlarni ayirboshlash orqali amalga oshiriladi.

23. “O‘zbekiston temir yo‘llari” AJ Transport vazirligidan hujjatlar olingan kundan boshlab ikki ish kuni mobaynida hujjatlarni ko‘rib chiqishi va texnik yechimni kelishishi yoxud Transport vazirligiga asoslangan yozma mulohazalar va takliflarni taqdim etishi shart.

24. Ariza beruvchi — yuridik shaxs qayta tashkil etilgan, uning nomi yoki turgan joyi (pochta manzili) o‘zgargan taqdirda ariza beruvchi yoki uning huquqiy vorisi qayta ro‘yxatdan o‘tkazilgandan keyin yetti ish kuni mobaynida ko‘rsatib o‘tilgan ma’lumotlarni tasdiqlaydigan tegishli hujjatlarni ilova qilgan holda guvohnomani qayta rasmiylashtirish to‘g‘risida Transport vazirligiga ariza berishi shart.

Yangidan vujudga kelgan yuridik shaxsni davlat ro‘yxatidan o‘tkazish sanasida guvohnomaga ega bo‘lgan ariza beruvchilar qo‘shib yuborilgan taqdirda, guvohnomani ushbu bandning birinchi xatboshida nazarda tutilgan tartibda qayta rasmiylashtirishga yo‘l qo‘yiladi.

Guvohnomadagi mavjud ma’lumotlar mazkur bandning birinchi va ikkinchi xatboshilarida nazarda tutilmagan hollarda o‘zgartirilgan taqdirda, guvohnoma ariza beruvchining tegishli hujjatlar ilova qilingan arizasi bo‘yicha qayta rasmiylashtiriladi.

Ariza beruvchi tomonidan hujjatlar Transport vazirligiga ushbu Nizomning 8-bandida ko‘rsatilgan tartibda taqdim etiladi.

Tadbirkorlik subyektidan ushbu bandda nazarda tutilmagan hujjatlar taqdim etilishini talab qilishga yo‘l qo‘yilmaydi.

25. Guvohnoma qayta rasmiylashtirilgunga qadar guvohnomani qayta rasmiylashtirish to‘g‘risida ariza bergan ariza beruvchi yoki uning huquqiy vorisi ariza qabul qilingan sana to‘g‘risida Transport vazirligining belgisi bilan birgalikda guvohnomani qayta rasmiylashtirish to‘g‘risida berilgan ariza asosida guvohnomada ko‘rsatilgan lokomotivlar, yuk va izotermik vagonlarning xizmat qilish muddatini uzaytiradi.

26. Guvohnomani qayta rasmiylashtirishda Transport vazirligi berilgan guvohnomalar reyestriga o‘zgartirishlar kiritadi. Guvohnomani qayta rasmiylashtirish va berish tegishli hujjatlar ilova qilingan holda guvohnomani qayta rasmiylashtirish to‘g‘risidagi ariza Transport vazirligi tomonidan olingan kundan boshlab besh ish kunidan ortiq bo‘lmagan muddatda amalga oshiriladi.

27. Guvohnoma qayta rasmiylashtirilganligi uchun yig‘im undirilmaydi.

28. Guvohnomaning amal qilish muddati tamom bo‘lgach u ariza beruvchining arizasiga ko‘ra uzaytirilishi mumkin. Guvohnomaning amal qilish muddatini uzaytirish to‘g‘risidagi ariza Transport vazirligiga guvohnomaning amal qilish muddati tamom bo‘lgunga qadar berilishi kerak. Guvohnomaning amal qilish muddatini uzaytirish uni berish uchun nazarda tutilgan tartibda amalga oshiriladi.

29. Guvohnoma yo‘qolgan yoki yaroqsiz holga kelgan taqdirda ariza beruvchining arizasiga ko‘ra unga guvohnomaning dublikati beriladi.

30. Transport vazirligi guvohnomaning dublikatini ariza, shuningdek u yaroqsiz holga kelgan taqdirda guvohnomaning asl nusxasi olingan kundan boshlab besh ish kunidan ortiq bo‘lmagan muddatda beradi (yuboradi). Guvohnomaning dublikati berilganligi uchun yig‘im undirilmaydi.

31. Guvohnomaning amal qilishini to‘xtatib turish va to‘xtatish, guvohnomani bekor qilish “Tadbirkorlik faoliyati sohasidagi ruxsat berish tartib-taomillari to‘g‘risida”gi O‘zbekiston Respublikasi Qonunining tegishli ravishda 22, 23 va 25-moddalariga muvofiq nazarda tutilgan hollarda va tartibda amalga oshiriladi.

32. Quyidagilar guvohnomaning amal qilishini belgilangan tartibda to‘xtatish uchun asos bo‘luvchi ruxsat berish talablari va shartlari bir marta qo‘pol ravishda buzilishiga tegishlidir:

Transport vazirligi tomonidan belgilangan tartibda o‘tkaziladigan ruxsat berish talablari va shartlariga rioya etishni tekshirishdan bosh tortish;

guvohnoma berilgan harakatlanadigan temir yo‘l tarkibining xizmat qilish muddatlarini uzaytirishga texnik yechimlardan ishlab chiqarishda foydalanish natijasida fuqarolarning hayoti va sog‘lig‘iga zarar yetkazilishi yoxud bunday zarar yetkazilishining real xavfi yaratilishi.

33. Transport vazirligi berilgan guvohnomalar reyestrini yuritadi va uni o‘zining rasmiy veb-saytiga joylashtiradi.

34. Berilgan guvohnomalar reyestrida quyidagilar ko‘rsatilishi kerak:

ariza beruvchining nomi, joylashgan joyi (pochta manzili) va tashkiliy-huquqiy shakli, telefoni;

guvohnoma berilgan sana va uning tartib raqami;

guvohnomaning amal qilish muddati;

guvohnomani qayta rasmiylashtirishning asosi va sanasi;

guvohnoma dublikatini berishning asosi va sanasi.

35. Ixtisoslashtirilgan ekspert tashkilot xizmat qilish muddatini uzaytirishga taqdim etilgan harakatlanadigan temir yo‘l tarkibining o‘tkazilgan texnik tashxisi xolisligi, ishonchliligi, asoslanganligi, to‘liqligi, tayinlangan ta’mirlashning turi va hajmi hamda texnik yechim bilan belgilangan harakatlanadigan temir yo‘l tarkibi xizmat qilishining yangi muddati to‘g‘ri tanlanganligi uchun javob beradi.

36. Ushbu Nizom talablari buzilishida aybdor bo‘lgan shaxslar qonun hujjatlariga muvofiq javob beradilar.