O‘zbekiston Respublikasi Prezidentining “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora- tadbirlari to‘g‘risida” 2012-yil 18-iyuldagi PF-4455-sonli Farmoniga muvofiq:

1. O‘zbekiston Respublikasi Prezidentining 2006-yil 24-maydagi PQ-357-sonli qarori bilan tasdiqlangan Tadbirkorlik subyektlarini davlat ro‘yxatiga olish va hisobga qo‘yishning xabardor qilish tartibi to‘g‘risidagi Nizomga ilovaga muvofiq o‘zgartish va qo‘shimchalar kiritilsin.

2. Mazkur qarorning ijrosini nazorat qilish O‘zbekiston Respublikasining Bosh vaziri Sh.M.Mirziyoyev zimmasiga yuklansin.

1. 10, 12, 13, 33-bandlarning birinchi xatboshilaridagi “o‘zi kelgan holda yoki pochta aloqasi orqali” so‘zlari “o‘zi kelgan holda, pochta aloqasi yoki Internet tarmog‘i orqali” so‘zlari bilan almashtirilsin.

2. Quyidagi mazmundagi 13¹-band bilan to‘ldirilsin:

“13¹. Tadbirkorlik subyektlarini davlat ro‘yxatiga olish uchun mazkur Nizomda nazarda tutilgan hujjatlar, 11-bandning “g” kichik bandi to‘rtinchi xatboshida va 33-bandning oltinchi xatboshida ko‘rsatilgan hujjatlar mustasno etilgan holda, Internet tarmog‘i orqali bir nusxada taqdim qilinadi va murojaat etuvchining elektron raqamli imzosi bilan imzolanadi. Qog‘ozda rasmiylashtirilgan va (yoki) berilgan skanerlangan hujjatlarni taqdim etishga yo‘l qo‘yiladi.

Ro‘yxatdan o‘tkazuvchi organ tomonidan berilgan, mazkur Nizomda nazarda tutilgan elektron hujjatlar mavjud bo‘lgan taqdirda, ularning asl nusxalarini murojaat etuvchi Internet tarmog‘i orqali taqdim etishga haqli”.

3. 24-band quyidagi tahrirda bayon etilsin:

“24. Ro‘yxatdan o‘tkazuvchi organ tadbirkorlik subyektiga real vaqt rejimida, Davlat soliq qo‘mitasi va Davlat statistika qo‘mitasining Internet tarmog‘idagi tegishli idoraviy saytlaridan foydalangan holda olingan STIR va OKPO kodlarini beradi”.

4. 25-band o‘z kuchini yo‘qotgan deb hisoblansin.

5. 28-band:

quyidagi mazmundagi beshinchi va oltinchi xatboshilar bilan to‘ldirilsin:

“Elektron shaklda tadbirkorlik subyektlariga taqdim etiladigan hujjatlar, ro‘yxatdan o‘tkazuvchi organ vakolatli shaxsining elektron raqamli imzosi bilan imzolanadi. Bunda murojaat etuvchi, o‘zining so‘rovnomasi bo‘yicha qog‘ozda rasmiylashtirilgan tegishli hujjatlarni o‘zi kelgan holda yoki pochta aloqasi orqali ham olish huquqiga ega.

Mazkur bandda nazarda tutilgan hujjatlarni topshirish sanasi O‘zbekiston Respublikasi davlat interaktiv xizmatlarini ko‘rsatish Yagona portalidan foydalanuvchining shaxsiy kabineti orqali tegishli elektron hujjatlarni murojaat etuvchi tomonidan qabul qilib olgan kun hisoblanadi, uning mavjudligi haqida murojaat etuvchi ro‘yxatdan o‘tkazuvchi organga xabar beradi”;

beshinchi xatboshi yettinchi xatboshi deb hisoblansin.

6. 30-bandning birinchi xatboshidan “va ariza-xabarnoma nusxasini” so‘zlari chiqarib tashlansin.

7. 32-bandning uchinchi xatboshi quyidagi tahrirda bayon etilsin:

“davlat statistika organlari — ro‘yxatdan o‘tkazuvchi organ tomonidan berilgan statistika kodlarini tekshiradi va yuridik shaxsni Korxona va tashkilotlarning yagona davlat registriga kiritadi”.

8. 381-bandning birinchi xatboshidagi “uning tiklangan nusxasi (dublikati) berilishi mumkin” so‘zlari “uning tiklangan nusxasi, shu jumladan elektron shakldagi dublikati taqdim qilinadi. Bunda davlat ro‘yxatiga olinganligi to‘g‘risida elektron shaklda avval berilgan guvohnoma haqiqiy emas, deb hisoblanadi” so‘zlari bilan almashtirilsin.

9. Nizomning 3-va 3a-ilovalari o‘z kuchini yo‘qotgan deb hisoblansin.