“Prokuratura toʻgʻrisida”gi Oʻzbekiston Respublikasi Qonunining 51-moddasiga muvofiq Oʻzbekiston Respublikasi Oliy Majlisi qaror qiladi:

1. Oʻzbekiston Respublikasi prokuratura organlarining xodimlarini ragʻbatlantirish va ularning intizomiy javobgarligi toʻgʻrisidagi Nizom tasdiqlansin (ilova qilinadi).

2. Oʻzbekiston Respublikasi Oliy Kengashi 1992-yil 9-dekabrda qabul qilgan Qarorning Oʻzbekiston Respublikasi prokuratura idoralari xodimlarini ragʻbatlantirish va ularning intizomiy javobgarligi toʻgʻrisidagi Nizomni tasdiqlashga doir qismi (Oʻzbekiston Respublikasi Oliy Kengashining Axborotnomasi, 1993-yil, № 1, 31-modda) oʻz kuchini yoʻqotgan deb hisoblansin.

Ushbu Nizom prokuror-tergov xodimlarining, shuningdek prokuraturaga qarashli oʻquv, ilmiy va boshqa muassasalarning xodimlarini ragʻbatlantirish va ularga intizomiy jazo choralari qoʻllash tartibini belgilaydi.

1. Prokuror-tergov xodimlari, shuningdek prokuraturaga qarashli oʻquv, ilmiy va boshqa muassasalarning xodimlari oʻz xizmat vazifalarini vijdonan va namunali bajarganligi, tashabbuskorligi va ishdagi epchilligi uchun ragʻbatlantiriladi.

2. Ragʻbatlantirishning quyidagi turlari mavjud:

tashakkurnoma;

pul mukofoti;

sovgʻa;

qimmatbaho sovgʻa;

belgilangan muddat tugamasdan navbatdagi darajali unvon berish;

“Oʻzbekiston Respublikasi prokuraturasining faxriy xodimi” koʻkrak nishoni bilan mukofotlash.

Prokuratura organlarining xodimlari mehnatdagi alohida xizmatlari uchun Oʻzbekiston Respublikasining davlat mukofotlariga tavsiya etilishi mumkin.

Ish haqi, mukofotlar, qoʻshimcha toʻlovlar, ustamalar va mehnat haqi tizimida nazarda tutilgan boshqa toʻlovlar ragʻbatlantirish turlariga kirmaydi.

3. Ragʻbatlantirish quyidagi tartibda:

tashakkurnoma eʼlon qilish, pul mukofoti hamda sovgʻa berish Oʻzbekiston Respublikasi Bosh prokurori, Qoraqalpogʻiston Respublikasi prokurori, shuningdek viloyatlar, Toshkent shahar prokurori va ularga tenglashtirilgan prokurorlar tomonidan;

qimmatbaho sovgʻa bilan mukofotlash, belgilangan muddat tugamasdan navbatdagi darajali unvon berish, “Oʻzbekiston Respublikasi prokuraturasining faxriy xodimi” koʻkrak nishoni bilan taqdirlash va Oʻzbekiston Respublikasining davlat mukofotlariga tavsiya etish Oʻzbekiston Respublikasi Bosh prokurori tomonidan amalga oshiriladi.

Ishda alohida oʻrnak koʻrsatgan prokuratura organlarining xodimlarini ragʻbatlantirish haqida yuqori turuvchi prokurorga tavsiyanomalarni tuman, shahar prokurorlari va ularga tenglashtirilgan prokurorlar kiritadilar.

4. Ragʻbatlantirish buyruq bilan eʼlon qilinadi. Ragʻbatlantirish haqidagi buyruq mazkur prokuratura xodimlariga, zarur hollarda barcha prokuror-tergovchi xodimlarga eʼlon qilinadi. Ragʻbatlantirish toʻgʻrisidagi buyruq nusxasi xodimning shaxsiy ish jildiga tikib qoʻyiladi.

5. Prokuror-tergov xodimlariga, shuningdek prokuraturaga qarashli oʻquv, ilmiy va boshqa muassasalarning xodimlariga nisbatan intizomiy jazo oʻz xizmat vazifasini bajarmaganligi yoki lozim darajada bajarmaganligi yoxud prokuratura xodimi degan nomga dogʻ tushiradigan nojoʻya xatti-harakat sodir etganligi uchun qoʻllaniladi.

6. Intizomiy jazoning quyidagi turlari mavjud:

hayfsan;

oʻrtacha oylik ish haqining 40 foizidan ortiq boʻlmagan miqdorda jarima solish;

Oʻzbekiston Respublikasi Mehnat kodeksining 100-moddasi ikkinchi qismining 3 va 4-bandlarida nazarda tutilgan asoslarga koʻra mehnat shartnomasini bekor qilish.

Mehnat vazifalarini bir marta qoʻpol ravishda buzishga quyidagilar kiradi, chunonchi:

uzrli sabablarsiz progul qilish (shu jumladan ish kuni davomida ishda uch soatdan ortiq boʻlmaslik);

mast holda ishga kelish, shuningdek ish joyida spirtli ichimliklar ichish;

xizmat lavozimini suiisteʼmol qilish;

qonunga xilof ekanligini bila turib, shaxsni javobgarlikka tortish, ushlab turish yoki hibsga olish, koʻrsatma berishga majbur qilish, shuningdek boshqa jinoiy qilmish yoki nojoʻya xatti-harakat sodir etish;

prokuratura organlari prokuror-tergov xodimlarining qasamyodini buzish,

7. Oʻzbekiston Respublikasining Bosh prokurori barcha intizomiy jazo turlarini qoʻllash huquqiga ega, Oʻzbekiston Respublikasining Prezidenti yoki Qoraqalpogʻiston Respublikasining oliy vakillik organi tomonidan tayinlanadigan shaxslar bilan mehnat shartnomasini bekor qilish bundan mustasno. Bunday hollarda Bosh prokuror tegishli taqdimnoma bilan Oʻzbekiston Respublikasining Prezidentiga yoki Qoraqalpogʻiston Respublikasining oliy vakillik organiga murojaat qilishi mumkin.

Qoraqalpogʻiston Respublikasi, shuningdek, viloyatlar, Toshkent shahar prokurorlari va ularga tenglashtirilgan prokurorlar oʻzlariga boʻysunuvchi xodimlarga ushbu Nizomning 6-moddasida nazarda tutilgan hayfsan va jarima tarzidagi intizomiy jazo turlarini qoʻllash mumkin. Bundan tashqari, ular oʻz vakolatlari doirasida ishga qabul qilgan xodimlar bilan mehnat shartnomasini bekor qilishlari mumkin.

Tumanlar, shaharlar prokurorlari va ularga tenglashtirilgan boshqa prokurorlar oʻzlariga boʻysunadigan prokuror-tergov xodimlarini intizomiy javobgarlikka tortish haqida yuqori turuvchi prokurorga taqdimnoma kiritadilar.

8. Prokuror intizomiy jazo qoʻllash masalasini hal etayotganda sodir etilgan xatti-harakatni shaxsan oʻzi oʻrganib chiqishi shart. Zarur hollarda xizmat tekshiruvi tayinlashi mumkin.

Intizomiy jazo qoʻllanilishidan avval xodimdan tushuntirish xati talab qilinishi lozim. Xodimning tushuntirish xati berishdan bosh tortishi uning ilgari sodir qilgan nojoʻya xatti-harakati uchun jazo qoʻllashga toʻsiq boʻla olmaydi.

Har bir nojoʻya xatti-harakat uchun faqat bitta intizomiy jazo qoʻllanishi mumkin.

Intizomiy jazo bevosita nojoʻya xatti-harakat aniqlangandan keyin, ammo bu xatti-harakat aniqlangandan boshlab, xodimning kasal yoki taʼtilda boʻlgan vaqtini hisobga olmasdan, uzogʻi bilan bir oy ichida qoʻllaniladi.

Nojoʻya xatti-harakat sodir etilgan kundan boshlab olti oy oʻtgandan, xizmat tekshiruvi natijasida aniqlanganda esa, — sodir etilgan kundan boshlab ikki yil oʻtganidan keyin jazoni qoʻllab boʻlmaydi. Jinoiy ish boʻyicha ish yuritilgan davr bu muddatga kirmaydi.

Intizomiy jazo buyruq tarzida berilib, xodimga tilxat olib eʼlon qilinadi va buyruq nusxasi uning shaxsiy ish jildiga tikib qoʻyiladi. Intizomiy jazo qoʻllash haqidagi buyruq mazkur prokuratura xodimlariga, zarur hollarda barcha prokuror-tergov xodimlariga ham eʼlon qilinadi.

9. Yuqori turuvchi prokuror oʻz qarorini buyruqda asoslagan holda jazoni bekor qilish, kuchaytirish yoki yengillashtirish huquqiga ega. Agar intizomiy jazo sifatida mehnat shartnomasini bekor qilish qoʻllangan boʻlsa, yuqori turuvchi prokuror mehnat shartnomasi bekor qilinganligini asossiz deb topib, jazolangan xodimini avvalgi ishiga qayta tiklash va mehnat shartnomasi bekor qilingan kundan boshlab, majburiy ishlamagan vaqti uchun oʻrtacha ish haqi toʻlash haqida qaror chiqaradi, biroq bunday haq toʻlash muddati bir oydan oshmasligi kerak.

10. Xodim intizomiy jazo qoʻllanganidan keyin bir yil ichida qayta intizomiy jazoga tortilmasa, u intizomiy jazo olmagan hisoblanadi.

Xodim oʻz xizmat vazifasini bajarishda halollik koʻrsatsa, jazo qoʻllagan prokuror yoki yuqori turuvchi prokuror intizomiy jazoni muddatidan ilgari bekor qilishi mumkin.

11. Intizomiy jazo amal qilib turgan muddat mobaynida xodimga nisbatan ragʻbatlantirish qoʻllanilmaydi. Intizomiy jazoning mavjudligi xodimning lavozimga koʻtarilishida ham toʻsiq boʻladi.

12. Prokuror intizomiy jazo qoʻllash borasida oʻziga berilgan vakolat doirasidan chiqsa yoki vakolatini yetarli darajada qoʻllamasa, yuqori turuvchi prokuror oldida javobgar boʻladi.

13. Xodimga qoʻllanilgan intizomiy jazo chorasi ustidan shikoyat qilinishi mumkin. Shikoyat intizomiy jazo berish toʻgʻrisida buyruq chiqargan prokurorga yoki Oʻzbekiston Respublikasining Bosh prokuroriga xodimga intizomiy jazo qoʻllash toʻgʻrisida buyruq eʼlon qilinganidan keyin ikki hafta ichida beriladi.

Xodimga intizomiy jazo qoʻllash toʻgʻrisida buyruq chiqargan prokuror yoki Oʻzbekiston Respublikasining Bosh prokurori shikoyat boʻyicha u tushgan kundan boshlab oʻn kun ichida, qoʻshimcha tekshirish oʻtkazish lozim boʻlgan hollarda esa, bir oydan kechiktirmay qaror qabul qiladi.

Shikoyat berilishi intizomiy jazoning ijrosini toʻxtatib qoʻymaydi.

14. Oʻzbekiston Respublikasining Bosh prokurori oʻziga boʻysunadigan prokurorlar tomonidan ragʻbatlantirish va intizomiy jazo choralari qoʻllashning asosliligi va qonuniyligini nazorat qilib boradi hamda asossiz va noqonuniy buyruqlarni bekor qilish choralarini koʻradi.