Oʻzbekiston Respublikasi Prezidentining 2011-yil 4-oktabrdagi “Ishlab chiqarish hajmlarini kengaytirish va raqobatbardosh mahsulotlarning yangi turlarini ishlab chiqarishni rivojlantirish boʻyicha birinchi navbatdagi chora-tadbirlar dasturi toʻgʻrisida”gi PQ-1623-son qaroriga muvofiq va oʻz xomashyo resurslari bazasidan yanada samarali foydalanish hisobiga raqobatbardosh rux mahsulotlari ishlab chiqarish hajmlarini kengaytirish maqsadida Vazirlar Mahkamasi qaror qiladi:

1. Umumiy kapital qoʻyilmalari qiymati 25,7 mln. AQSH dollari ekvivalentida, asosiy texnik-iqtisodiy parametrlarini hisobga olgan holda, “Rux zavodini rekonstruksiya qilish” investitsiya loyihasining texnik-iqtisodiy asoslari va 2014-yilning IV choragida ishga tushirilishi ilovaga* muvofiq tasdiqlansin.

2. “Rux zavodini rekonstruksiya qilish” loyihasini moliyalashtirish manbalari etib quyidagilar belgilansin:

“Olmaliq KMK” OAJning 9,3 mln. AQSH doll. ekvivalentidagi oʻz mablagʻlari, shu jumladan, maxsus investitsiya hisobvaraqlaridagi mablagʻlarni hisobga olgan holda;

“Ipoteka-bank” ATIB tomonidan 7 yil muddatga, shu jumladan 3 yillik imtiyozli davr bilan, yillik 6,0 foiz stavka bilan 16,4 mln. AQSH doll. miqdorida ajratiladigan kredit.

3. Belgilansinki:

“Olmaliq KMK” OAJ qarz oluvchi va ijro etuvchi organ, loyihani amalga oshirish, jalb qilingan kreditdan maqsadli va samarali foydalanish uchun masʼul organ hisoblanadi;

jalb qilingan kreditni soʻndirish va unga xizmat koʻrsatish bilan bogʻliq xarajatlar “Olmaliq KMK” OAJning oʻz mablagʻlari hisobidan, shu jumladan, maxsus investitsiya hisobvaraqlaridagi mablagʻlar hisobidan amalga oshiriladi.

4. “Olmaliq KMK” AJga loyihani amalga oshirish doirasida, istisno tartibda, koʻrsatib oʻtilgan loyihani amalga oshirish doirasida qurilish-montaj ishlarini oʻz kuchlari bilan bajarish, zarurat yuzaga kelganda- subpudrat ishlariga ixtisoslashtirilgan qurilish-montaj tashkilotlari va respublikaning boshqa tashkilotlari toʻgʻridan-toʻgʻri tuzilgan shartnomalar asosida jalb qilish huquqi berilsin.

5. Oʻzbekiston Respublikasi Davlat arxitektura-qurilish qoʻmitasi belgilangan tartibda “Rux zavodini rekonstruksiya qilish” loyihasining loyiha-smeta hujjatlari ekspertizasidan oʻtkazilishini taʼminlasin va loyihani amalga oshirish doirasida qurilish-montaj ishlarining sifatli bajarilishi yuzasidan davlat arxitektura-qurilish nazoratini oʻrnatsin.

6. Oʻzbekiston Respublikasi Tashqi ishlar vazirligi “Olmaliq KMK” OAJ buyurtmalari boʻyicha koʻrsatilgan loyihani amalga oshirishda ishtirok etuvchi xorijiy davlatlar mutaxassislariga belgilangan tartibda kirish vizalarini, konsullik va boshqa yigʻimlar undirilmagan holda, rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi “Olmaliq KMK” OAJ buyurtmalari boʻyicha koʻrsatilgan loyihani amalga oshirishda ishtirok etuvchi xorijiy davlatlar mutaxassislarni belgilangan tartibda vaqtincha roʻyxatga qoʻyish va uning amal qilish muddatini ularning vaqtinchalik yashash joyi manzili boʻyicha uzaytirilishini taʼminlasin.

8. Oʻzbekiston Respublikasi Mehnat va aholini ijtimoiy muhofaza qilish vazirligi “Olmaliq KMK” OAJ buyurtmalari boʻyicha Oʻzbekiston Respublikasiga malakali xorijiy davlatlar mutaxassislarini jalb qilish uchun ruxsatnomalar belgilangan tartibda berilishini (muddatini uzaytirilishini) taʼminlasin, hamda koʻrsatilgan loyihani amalga oshirishda ishtirok etuvchi xorijiy davlatlar mutaxassislariga Oʻzbekiston Respublikasi hududida mehnat faoliyatini amalga oshirish huquqi berilganligi toʻgʻrisida tasdiqnomalar berish (uzaytirish)ni taʼminlasin.

9. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklatilsin.