Yer va suv resurslaridan oqilona foydalanish, respublika aholisining guruchga bo‘lgan ehtiyojini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Makroiqtisodiyot va statistika vazirligi, Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar hokimliklarining 2001-yilda sholi ekiladigan maydonlar, sholi yetishtirish va uni davlat resurslariga topshirish hajmlari to‘g‘risidagi taklifiga 1-ilovaga muvofiq rozilik berilsin.

O‘zbekiston Respublikasi Vazirlar Mahkamasining 2000-yil 25-maydagi 417-son qaroriga muvofiq Andijon, Buxoro, Jizzax, Qashqadaryo, Navoiy, Namangan, Samarqand va Farg‘ona viloyatlari xo‘jaliklarida sholi ekishning maqsadga muvofiq emas deb e’tirof etilgani ma’lumot uchun qabul qilinsin.

2. O‘zbekiston Respublikasi Qishloq va suv xo‘jaligi vazirligi “O‘zdonmahsulot” davlat-aksiyadorlik korporatsiyasi, Qishloq xo‘jaligi ilmiy-ishlab chiqarish markazi, Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda 2001-yilda sholining yuqori hosilli, ertapishar navlarining qulay agrotexnik muddatlarda ekilishini ta’minlasinlar. Shu bilan birga sholi ekiladigan maydonlar suv bilan kafolatli ta’minlangan tumanlarda joylashtirilsin. Yer resurslaridan samarali foydalanish maqsadida sholini ko‘chat usulida ekish texnologiyasi keng qo‘llansin, buning uchun mavjud maxsus texnika parkidan foydalanilsin.

3. O‘zbekiston Respublikasi Qishloq va suv xo‘jaligi vazirligining Qoraqalpog‘iston Respublikasi va viloyatlarga 2001-yil hosilidan urug‘lik sholi yetishtirish va “O‘zdonmahsulot” davlat-aksiyadorlik korporatsiyasi korxonalariga yetkazib berish bo‘yicha 2-ilovaga muvofiq topshiriq belgilash to‘g‘risidagi taklifi qabul qilinsin.

Belgilab qo‘yilsinki, urug‘chilik xo‘jaliklari davlat resurslariga tovarbop sholi sotishni faqat urug‘lik sholi g‘amlash topshirig‘i bajarilgandan keyingina amalga oshiradilar.

4. “O‘zdonmahsulot” davlat-aksiyadorlik korporatsiyasi, O‘zbekiston Respublikasi Qishloq va suv xo‘jaligi vazirligi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda tovarbop va urug‘lik sholi xarid qilish yuzasidan kontraktatsiya shartnomalari tuzilishini 2001-yil 1-fevralgacha ta’minlasinlar.

5. “O‘zdonmahsulot” davlat-aksiyadorlik korporatsiyasi va O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi 2001-yil 1-avgustgacha sholichilik xo‘jaliklariga tovarbop va urug‘lik sholi davlat xaridlari umumiy summasining 50 foizgachasi miqdorida bosqichma-bosqich avans berib turishni amalga oshirsinlar.

6. “O‘zdonmahsulot” davlat-aksiyadorlik korporatsiyasiga sholichilik xo‘jaliklariga 2001-yil hosili uchun davlat resurslaridagi tovarbop sholidan 19,0 ming tonna urug‘lik berishga ruxsat etilsin.

7. O‘zbekiston Respublikasi Moliya vazirligi Qishloq va suv xo‘jaligi vazirligi bilan birgalikda tovar va urug‘lik uchun xarid qilinadigan sholining xarid (shartnomaviy) narxlari bo‘yicha 2001-yil 1-avgustgacha taklif kiritsin.

8. Mazkur qarorning bajarilishini nazorat qilish O‘zbekiston Respublikasi Prezidentining Davlat maslahatchisi I.H. Jo‘rabekov va O‘zbekiston Respublikasi Bosh vazirining o‘rinbosari T. Xoltoyev zimmasiga yuklansin.