Oʻzbekiston Respublikasi Oliy Majlisi Qonunchilik palatasining “Qoraqalpogʻiston Respublikasining Taxiatosh shahri va Xoʻjayli tumani hududlarini birlashtirish hamda Taxiatosh shahrini tuman boʻysunuvidagi shaharlar turkumiga kiritish toʻgʻrisida” 2013-yil 29-yanvardagi 607-II-sonli va Oʻzbekiston Respublikasi Oliy Majlisi Senatining “Qoraqalpogʻiston Respublikasining Taxiatosh shahri va Xoʻjayli tumani hududlarini birlashtirish hamda Taxiatosh shahrini tuman boʻysunuvidagi shaharlar turkumiga kiritish toʻgʻrisida” 2013-yil 28-martdagi SQ-371-II-sonli qarorlarining amalga oshirilishini taʼminlash maqsadida Vazirlar Mahkamasi qaror qiladi:

1. Qoraqalpogʻiston Respublikasining Taxiatosh shahri va Xoʻjayli tumani hududlarini birlashtirish hamda Taxiatosh shahrini tuman boʻysunuvidagi shaharlar turkumiga kiritish bilan bogʻliq tashkiliy masalalarni hal etish boʻyicha 1-ilovaga* muvofiq tarkibda Respublika komissiyasi tashkil etilsin.

2. Respublika komissiyasi (A.I. Ikramov):

ikki oy muddatda Qoraqalpogʻiston Respublikasining Taxiatosh shahri va Xoʻjayli tumani hududlarini birlashtirish hamda Taxiatosh shahrini tuman boʻysunuvidagi shaharlar turkumiga kiritish bilan bogʻliq zarur tashkiliy-texnik tadbirlar kompleksini ishlab chiqilishini va amalga oshirilishini taʼminlasin;

ikki hafta muddatda Qoraqalpogʻiston Respublikasi Vazirlar Kengashi, Oʻzbekiston Respublikasi Iqtisodiyot vazirligi, Moliya vazirligi, Mehnat va aholini ijtimoiy muhofaza qilish vazirligi, boshqa manfaatdor vazirliklar va idoralar bilan birgalikda Xoʻjayli tumani davlat boshqaruvi organlari hududiy boʻlinmalari xodimlarining cheklangan umumiy sonini, tuzilmasi va mehnatga haq toʻlash fondlarini belgilashga doir tashkiliy masalalarni hal etsin;

bir oy muddatda Oʻzbekiston Respublikasi Iqtisodiyot vazirligi, Moliya vazirligi va Qoraqalpogʻiston Respublikasi Vazirlar Kengashi bilan birgalikda Xoʻjayli tumani budjetining va tumanni ijtimoiy - iqtisodiy rivojlantirishning prognoz parametrlarini belgilasin;

Qoraqalpogʻiston Respublikasi Vazirlar Kengashi bilan birgalikda tashkiliy davrda iqtisodiyot tarmoqlarining aniq, barqaror va bir maromda ishlashini, shuningdek yuzaga keladigan ijtimoiy masalalarning oʻz vaqtida hal etilishini taʼminlasin.

3. Qoraqalpogʻiston Respublikasi Xoʻjayli tumani hokimligi boshqaruv apparati xodimlarining cheklangan umumiy soni 21 nafardan iborat boʻlgan tuzilmasi 2-ilovaga muvofiq tasdiqlansin.

4. Qoraqalpogʻiston Respublikasi Vazirlar Kengashi:

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda Qoraqalpogʻiston Respublikasining Taxiatosh shahri Qoraqalpogʻiston Respublikasi boʻysunuvidagi shaharlar turkumidan tuman boʻysunuvidagi shaharlar turkumiga kiritilishi munosabati bilan davlat va xoʻjalik boshqaruvi organlari hududiy boʻlinmalari tugatilishi va ular sonining qisqarishi natijasida boʻshab qolayotgan shaxslarni ishga joylashtirish chora-tadbirlarini koʻrsin, zaruriyat boʻlganda ularni qayta tayyorlash va malakasini oshirish tadbirlari amalga oshirilishini taʼminlasin;

ikki oy muddatda Oʻzbekiston Respublikasi Iqtisodiyot vazirligi hamda boshqa manfaatdor vazirliklar va idoralar bilan birgalikda Xoʻjayli tumanini yanada ijtimoiy-iqtisodiy rivojlantirish boʻyicha tadbirlar kompleksini ishlab chiqsin.

5. Oʻzbekiston Respublikasi Davlat statistika qoʻmitasi Qoraqalpogʻiston Respublikasi Xoʻjayli tumanining maʼmuriy hududi kengayishi munosabati bilan statistika koʻrsatkichlariga tegishli oʻzgartirishlar kiritsin.

6. Oʻzbekiston Respublikasi “Yergeodezkadastr” davlat qoʻmitasi Qoraqalpogʻiston Respublikasi Xoʻjayli tumanining maʼmuriy hududi kengayishi munosabati bilan yer hisobotlariga tegishli oʻzgartirishlar kiritsin.

7. Qoraqalpogʻiston Respublikasining Taxiatosh shahri va Xoʻjayli tumani hududlari birlashtirilishi hamda Taxiatosh shahrining tuman boʻysunuvidagi shaharlar turkumiga kiritilishi munosabati bilan:

Taxiatosh shahar va Xoʻjayli tumani ichki ishlar boʻlimlari xodimlarining shtatdagi soni, Xoʻjayli tumani ichki ishlar boʻlimiga berilgan holda, Oʻzbekiston Respublikasi Ichki ishlar vazirligida;

Taxiatosh shahar va Xoʻjayli tumanida faoliyat koʻrsatayotgan fuqarolik holati dalolatnomalarini yozish organlari va davlat notarial idoralari ularga tartib raqami berilgan holda hamda sud ijrochilari Taxiatosh shahar va Xoʻjayli tuman boʻlimlari xodimlarining shtatdagi soni, sud ijrochilari Xoʻjayli tuman boʻlimiga berilgan holda Oʻzbekiston Respublikasi Adliya vazirligida saqlab qolinsin.

8. Oʻzbekiston Respublikasi Bosh prokuraturasiga Oʻzbekiston Respublikasi Moliya vazirligi bilan birgalikda Taxiatosh shahar va Xoʻjayli tumani prokuraturasi, shu jumladan Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti boʻlimlari xodimlarining shtatdagi sonini Qoraqalpogʻiston Respublikasi Xoʻjayli tumanining tegishli boʻlinmalariga berish tavsiya etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.