Qazib olinayotgan mis-molibden maʼdanlarining oʻsib borayotgan hajmlarini qayta ishlash va boyitish boʻyicha ilgʻor texnologiyalarni joriy etgan holda “Olmaliq kon-metallurgiya kombinati” ochiq aksiyadorlik jamiyatini modernizatsiyalash va texnik jihatdan qayta jihozlash kompleks dasturini amalga oshirishni jadallashtirish maqsadida Vazirlar Mahkamasi qaror qiladi:

1. “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasini amalga oshirish doirasida:

128,0 mln AQSH dollariga teng miqdorda kapital qoʻyilmalar hajmidagi loyihaning texnik-iqtisodiy asoslanishi ishlab chiqilganligi va u vakolatli organlarda belgilangan tartibda ekspertizadan oʻtkazilganligi;

asbob-uskunalar yetkazib berish, otaliq-montaj va ishga tushirish-sozlashga doir umumiy qiymati 73,9 mln AQSH dollari boʻlgan ishlarni bajarish yuzasidan loyihaning texnologik qismi boʻyicha ish hujjatlari va texnologik reglamentni ishlab chiqish uchun, belgilangan tartibda ekspertiza oʻtkazilgan holda, “Olmaliq kon-metallurgiya kombinati” ochiq aksiyadorlik jamiyati bilan “Tyajmash” ochiq aksiyadorlik jamiyati (Rossiya) oʻrtasida kontrakt tuzilganligi maʼlumot uchun qabul qilinsin.

2. Quyidagilar:

“Olmaliq kon-metallurgiya kombinati” ochiq aksiyadorlik jamiyatining oʻz mablagʻlari, shu jumladan 22,1 mln AQSH dollariga teng boʻlgan summada maxsus investitsiya hisob raqamlari mablagʻlari;

Oʻzbekiston Respublikasi Tiklanish va taraqqiyot jamgʻarmasining qayta moliyalashtiradigan bankning yillik 1,0 foiz miqdoridagi marjasini qoʻshgan holda yillik 4,0 foizli stavka bilan, jumladan 3 yillik imtiyozli davr bilan 7 yil muddatga beriladigan, “Ipoteka-bank” ATIB orqali qayta moliyalashtiriladigan 73,9 mln AQSH dollari miqdoridagi krediti;

Oʻzbekiston Respublikasi Markaziy bankining qayta moliyalashtirish stavkasidan oshmaydigan foizli stavka boʻyicha, jumladan 2 yillik imtiyozli davr bilan 7 yil muddatga ajratiladigan “Ipoteka-bank” ATIBning umumiy summasi 32,0 mln AQSH dollariga teng boʻlgan milliy valyutadagi krediti “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasini amalga oshirishni moliyalashtirish manbalari etib belgilansin.

3. Belgilansinki:

“Olmaliq kon-metallurgiya kombinati” ochiq aksiyadorlik jamiyati qarz oluvchi va koʻrsatib oʻtilgan loyiha amalga oshirilishi, jalb etiladigan kreditlardan maqsadli va samarali foydalanish uchun masʼul boʻlgan ijro etuvchi organ hisoblanadi;

Oʻzbekiston Respublikasi Tiklanish va taraqqiyot jamgʻarmasining jalb etilayotgan kreditini qaytarish va unga xizmat koʻrsatish bilan bogʻliq xarajatlar “Olmaliq kon-metallurgiya kombinati” ochiq aksiyadorlik jamiyatining oʻz mablagʻlari, shu jumladan maxsus investitsiya hisob raqamlari mablagʻlari hisobiga amalga oshiriladi.

4. Quyidagilar:

“Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasi texnik-iqtisodiy asoslanishining asosiy texnik-iqtisodiy parametrlari obyektni 2014-yilda foydalanishga topshirish muddati bilan 1-ilovaga* muvofiq;

Oʻzbekiston Respublikasi Tiklanish va taraqqiyot jamgʻarmasining kreditini qaytarishning prognoz jadvali 2-ilovaga* muvofiq tasdiqlansin.

5. Oʻzbekiston Respublikasi Moliya vaziriga Oʻzbekiston Respublikasi Tiklanish va taraqqiyot jamgʻarmasining qayta moliyalashtiriladigan krediti boʻyicha “Olmaliq kon-metallurgiya kombinati” ochiq aksiyadorlik jamiyatining majburiyatlari boʻyicha “Ipoteka-bank” ATIBga belgilangan tartibda Oʻzbekiston Respublikasi kafolatini berish vakolati berilsin.

6. “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasini amalga oshirish doirasida:

Vazirlar Mahkamasi tomonidan tasdiqlanadigan roʻyxatlar boʻyicha “Olmaliq kon-metallurgiya kombinati” ochiq aksiyadorlik jamiyati tomonidan import qilinadigan, Oʻzbekiston Respublikasida ishlab chiqarilmaydigan materiallar, asbob-uskunalar va ularga ehtiyot qismlar, shu jumladan texnik va loyiha hujjatlari 2015-yil 1-yanvargacha bojxona toʻlovlaridan (bojxona yigʻimlari bundan mustasno);

Oʻzbekiston Respublikasining norezidenti tomonidan bajariladigan ishlar (koʻrsatiladigan xizmatlar) boʻyicha “Olmaliq kon-metallurgiya kombinati” ochiq aksiyadorlik jamiyati qoʻshilgan qiymat soligʻidan;

“Tyajmash” ochiq aksiyadorlik jamiyati (Rossiya) Oʻzbekiston Respublikasi hududida undiriladigan foyda soligʻi toʻlashdan ozod qilinsin.

7. “Olmaliq kon-metallurgiya kombinati” ochiq aksiyadorlik jamiyatiga “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasini amalga oshirish doirasida, istisno tariqasida:

2013-yil 31-dekabrgacha qurilish-montaj ishlarini loyiha-smeta hujjatlari bir vaqtning oʻzida ishlab chiqilishi bilan birgalikda;

qurilish-montaj ishlarini toʻgʻridan-toʻgʻri muzokaralar asosida subpudrat ishlarini bajarish uchun zarurat boʻlganda respublikaning ixtisoslashtirilgan qurilish-montaj va boshqa tashkilotlarini jalb etgan holda oʻz kuchlari bilan bajarish huquqi berilsin.

8. Oʻzbekiston Respublikasi Davlat arxitektura va qurilish qoʻmitasi “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasi boʻyicha loyiha-smeta hujjatlari ekspertizadan oʻtkazilishini belgilangan tartibda taʼminlasin hamda “Olmaliq kon-metallurgiya kombinati” ochiq aksiyadorlik jamiyati mis boyitish fabrikasining parchalash va maydalash boʻlinmalarini rekonstruksiya qilish” investitsiya loyihasini amalga oshirish doirasida qurilish-montaj ishlari bajarilishining sifati ustidan davlat arxitektura-qurilish nazoratini oʻrnatsin.

9. Oʻzbekiston Respublikasi Ichki ishlar vazirligi “Olmaliq kon-metallurgiya kombinati” ochiq aksiyadorlik jamiyatining buyurtmanomalari boʻyicha koʻrsatib oʻtilgan loyihani amalga oshirishda qatnashuvchi xorijiy mutaxassislarning davlat boji undirmasdan vaqtincha roʻyxatdan oʻtkazilishini va vaqtincha yashash joyi boʻyicha vaqtincha roʻyxatdan oʻtkazish uzaytirilishini belgilangan tartibda taʼminlasin.

10. Oʻzbekiston Respublikasi Mehnat va aholini ijtimoiy muhofaza qilish vazirligi “Olmaliq kon-metallurgiya kombinati” ochiq aksiyadorlik jamiyatining buyurtmanomalari boʻyicha malakali xorijiy mutaxassislarga Oʻzbekiston Respublikasi hududida mehnat faoliyati bilan shugʻullanish huquqi uchun tasdiqnomalar berilishini (uzaytirilishini) taʼminlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.