Shanxay hamkorlik tashkilotiga a’zo davlatlar — keyingi o‘rinlarda — Tomonlar,

terrorizm Shanxay hamkorlik tashkilotiga a’zo davlatlarning tinch hayotiga jiddiy xavf solishini anglagan holda,

Tomonlar hududida terrorizmga qarshi samarali kurashni ta’minlash maqsadida,

Tomonlarning terrorizmga qarshi kurashi borasida kelishilgan harakatlari dolzarb ekanligiga ishonch hosil qilgan holda,

Tomonlarning terrorizmga qarshi kurashida hamkorlikni mustahkamlanishi Shanxay hamkorlik tashkilotiga a’zo davlatlar xalqi manfaatlariga mos keladi deb hisoblagan holda,

Tomonlar hududlarida qo‘shma aksilterror tadbirlarni tashkil etish va o‘tkazishning huquqiy asoslarini yaratishga uringan holda,

2002-yil 7-iyundagi Shanxay hamkorlik tashkilotining Xartiyasi, 2001-yil 15-iyundagi Terrorizm, separatizm va ekstremizmga qarshi kurashish to‘g‘risidagi Shanxay konvensiyasi va 2002-yil 7-iyundagi Shanxay hamkorlik tashkilotiga a’zo davlatlar o‘rtasidagi Mintaqaviy aksilterror tuzilma to‘g‘risidagi Kelishuvga rioya qilgan holda,

milliy qonunchilik, xalqaro huquqning umumqabul qilingan tamoyillari va normalariga rioya qilgan holda,

quyidagilar to‘g‘risida kelishib olindi:

Mazkur Kelishuv maqsadlarini amalga oshirishda qo‘llaniladigan tushunchalar quyidagi ma’nolarni anglatadi:

“qo‘shma aksilterror tadbirlar” — Tomonlar vakolatli organlari tomonidan maxsus aksilterror tuzilmalar kuch-qudratidan foydalanib, kelishilgan maqsad va reja bo‘yicha so‘ralayotgan Tomonlar hududlarida o‘tkaziladigan terrorizmga qarshi tadbirlar;

“maxsus aksilterror tuzilmalar” — har qaysi Tomonning o‘z qonunchiligiga muvofiq qo‘shma aksilterror tadbirlarni o‘tkazish uchun shakllantiradigan mutaxassislar guruhi;

“qo‘shma aksilterror tadbirlar ishtirokchilari” — maxsus aksilterror tuzilmalar bo‘linmalarining shaxsiy tarkibi, qo‘shma aksilterror tadbirlarning boshqaruv organi tarkibiga kiritilgan va qo‘shma aksilterror tadbirlarni o‘tkazishda ko‘maklashuvchi boshqa shaxslar;

“so‘rayotgan Tomon” — o‘z hududida qo‘shma aksilterror tadbirlarni o‘tkazish uchun maxsus aksilterror tuzilmalarni jo‘natilishi haqida talabnoma bilan murojaat qilgan Tomon;

“so‘ralayotgan Tomon” — qo‘shma aksilterror tadbirlarni o‘tkazish uchun maxsus aksilterror tuzilmalarni jo‘natilishini so‘rab, talabnoma bilan so‘rayotgan Tomon murojaat qilgan Tomon;

“ko‘maklashish to‘g‘risida talabnoma” — so‘rayotgan Tomon vakolatli organining so‘ralayotgan Tomon vakolatli organiga qo‘shma aksilterror tadbirlarni o‘tkazishda ko‘maklashishini so‘rab murojaati;

“vakolatli organ” — o‘z qonunchiligiga muvofiq, terrorizmga qarshi kurashni amalga oshiruvchi va qo‘shma aksilterror tadbirlarni o‘tkazishga javobgar bo‘lgan Tomonning davlat organi;

“maxsus vositalar va ta’minot materiallari” — qo‘shma aksilterror tadbirlarni o‘tkazishda qo‘llaniladigan va so‘ralayotgan Tomon qonunchiligiga muvofiq, uning hududidan olib chiqishga ruxsat etilgan qurol-aslaha va harbiy texnika, qurol va o‘q-dorilar, uskunalar, aloqa vositalari, maxsus aksilterror tuzilmalarning qurol-aslahalari, texnika, transport hamda boshqa maxsus vositalar va materiallar;

“ShHT MATTning Ijroiya qo‘mitasi” — Shanxay Hamkorlik Tashkiloti Mintaqaviy aksilterror tuzilmasining Ijroiya qo‘mitasi.

Qo‘shma antiterroristik tadbirlarni o‘tkazishning huquqiy asosini Tomonlar qonunchiligi, ularning xalqaro majburiyatlari, xalqaro huquqning umumqabul qilingan tamoyillari va normalari, shuningdek, mazkur Kelishuv tashkil etadi.

Qo‘shma aksilterror tadbirlar terroristik faoliyati bilan birga jumladan, quyidagilarni to‘xtatish maqsadida o‘tkaziladi:

terroristlar tomonidan garovga olingan kishilarni ozod etish;

texnologik va ekologik xavfi yuqori bo‘lgan obyektlarni, atom sanoati, transport, energetika, kimyoviy ishlab chiqarish va boshqa obyektlarni qaytarib olish;

portlovchi yoki tuzilishi murakkab bo‘lgan shikastlantiruvchi uskunalarni zararsizlantirish;

terroristlar, terroristik guruhlar va/yoki tashkilotlar faoliyatini to‘xtatish.

So‘ralayotgan Tomon maxsus aksilterror tuzilmalari tarkibiga kiruvchi qo‘shma aksilterror tadbirlar ishtirokchilari so‘rayotgan Tomon hududida bo‘lgan davrida so‘rayotgan Tomon qonunlari va an’analarini hurmat qiladilar.

So‘rayotgan Tomon va tranzit Tomon so‘ralayotgan Tomon maxsus aksilterror tuzilmalarning tarkibiga kiruvchi qo‘shma aksilterror tadbirlar ishtirokchilarining huquqiy holatini hurmat qiladilar.

Tomonlar maxsus aksilterror tuzilmalar so‘rayotgan Tomon hududida bo‘lgan davrida va boshqa Tomon hududi bo‘ylab tranzit vaqtida quyidagilarga rioya etadilar:

maxsus aksilterror tuzilmalar tarkibiga kiruvchi qo‘shma aksilterror tadbirlarning ishtirokchilariga nisbatan so‘rayotgan Tomon va tranzit Tomon qonunchiligi qo‘llanmaydi. Har qanday holatda ham ular so‘rayotgan Tomon yurisdiksiyasi ostida bo‘ladilar;

huquqbuzarlik sodir etilganida, qo‘shma aksilterror tadbirlar ishtirokchisi o‘z davlati qonunchiligiga ko‘ra, javobgarlikka tortiladi;

Tomonlarning har biri o‘z qonunchiligiga ko‘ra, maxsus aksilterror tuzilmalarning tarkibiga kiruvchi qo‘shma aksilterror tadbirlarning ishtirokchilarini so‘rayotgan Tomon hududida sodir etgan jinoyati uchun jinoiy ta’qib qilishga majburdir;

Tomonlar huquqiy yordam ko‘rsatish doirasida protsessual harakatlarni amalga oshirishda, o‘z qonunchiligi va o‘z zimmasiga olgan xalqaro majburiyatlariga rioya qiladi.

Qo‘shma aksilterror tadbirlarni o‘tkazish haqidagi qarorni so‘rayotgan va so‘ralayotgan Tomonlar birgalikda yozma shaklda qabul qiladilar. So‘rayotgan Tomon ShHT MATTning Ijroiya qo‘mitasi orqali qabul qilingan qarordan boshqa Tomonlarni xabardor qiladi.

So‘rayotgan Tomonning vakolatli organi qo‘shma aksilterror tadbirlarni o‘tkazish haqidagi qaror asosida so‘ralayotgan Tomonning vakolatli organiga hamkorlik qilish haqida talabnoma yuboradi va bu to‘g‘risida ShHT MATTning Ijroiya qo‘mitasini xabardor qiladi.

Ko‘maklashish to‘g‘risidagi talabnoma yozma shaklda, jumladan, texnik vositalardan foydalangan holda matnni uzatish orqali ham amalga oshiriladi.

Ko‘maklashish to‘g‘risidagi talabnoma so‘rayotgan Tomon vakolatli organining rahbari yoki uning o‘rnini bosuvchi shaxs tomonidan imzolanadi va/yoki ushbu organning gerbli muhri bilan tasdiqlanadi.

Ko‘maklashish to‘g‘risidagi talabnomaning haqiqiyligi yoki mazmuniga shubha uyg‘onganida, so‘ralayotgan Tomon tasdiqlovchi qo‘shimcha hujjat so‘rashi mumkin.

Ko‘maklashish to‘g‘risidagi talabnoma va unga ilova qilinayotgan hujjatlar hamda boshqa (operativ) ma’lumot, so‘rayotgan Tomon vakolatli organi tomonidan rus yoki xitoy tillarida yuboriladi.

Ko‘maklashish to‘g‘risidagi talabnoma o‘zida quyidagilarni jamlaydi:

so‘ralayotgan Tomon vakolatli organining nomini;

so‘rayotgan Tomon vakolatli organining nomini;

talabnoma mazmunining bayoni va so‘ralayotgan hamkorlik maqsadini ko‘rsatgan holda uning asosini;

so‘ralayotgan Tomonning maxsus aksilterror tuzilmasini qo‘shma aksilterror tadbirni o‘tkazish joyiga yetkazish va tuzilma bo‘lib turgan davlatga qaytarish usullari hamda sharoitlari to‘g‘risidagi ma’lumotni, jumladan, so‘ralayotgan Tomonning davlat chegarasini kesib o‘tgan joy, vaqt va tartibi haqidagi axborotlarni;

tegishli talabnomani bajarish uchun zarur bo‘lgan boshqa axborotlarni.

Ko‘maklashish to‘g‘risidagi talabnomani bajarish, so‘rayotgan Tomonning suvereniteti, xavfsizligi yoki boshqa mavjud manfaatlariga ziyon keltirishini taxmin qilinayotgan bo‘lsa, talabnomani bajarish to‘liq yoki qisman rad etilishi mumkin.

Agar so‘rayotgan Tomon ko‘rsatilgan talabnomani zudlik bilan bajarilishi uning hududida o‘tkazilayotgan tezkor-qidiruv faoliyati va jinoiy ta’qibga xalaqit beradi deb taxmin qilayotgan bo‘lsa, u talabnomani bajarilishini keyinga qoldirishi yoki uni amalga oshirish uchun zarur deb topilgan shartlarga rioya qilgan holda bajarilishiga bog‘lash mumkin.

Ko‘maklashish to‘g‘risidagi talabnomani bajarishning imkoni bo‘lmaganida yoki rad etilgan holatda, so‘ralayotgan Tomon zudlik bilan so‘rayotgan Tomonni bunda yozma xabardor etadi.

ShHT MATTning Ijroiya qo‘mitasi o‘z vakolati doirasida Tomonlarga qo‘shma antiterroristik tadbirlarni tashkil etish va o‘tkazishda ko‘maklashadi.

So‘rayotgan Tomon so‘ralayotgan Tomonning maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilarini hamda bunday tadbirlarni o‘tkazish joyiga maxsus vosita va ta’minot materiallarini yetkazish uchun zarur shart-sharoitlarni yaratadi.

So‘ralayotgan Tomonning maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilari va ularning front orqasi hamda texnik ta’minoti so‘rayotgan Tomon hisobidan amalga oshiriladi.

So‘ralayotgan Tomon maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilarini o‘zining vakolatli organi bilan o‘zaro erkin harakatlanishini ta’minlaydi.

Tomonlarning davlat chegaralarini maxsus aksilterror tuzilma tarkibiga kiruvchi qo‘shma aksilterror tadbirlar ishtirokchilari, ushbu tuzilmalarning alohida mutaxassislari tomonidan kesib o‘tishi, shuningdek, chegara orqali Tomonlar maxsus vositalari va ta’minot materiallarini o‘tkazishda, ularning qonunchiligi bilan o‘rnatilgan tegishli tartib-taomillarni tezlashtirgan holda bajarilishiga imkon yaratadi.

So‘ralayotgan Tomonning maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilari va ushbu tuzilmalarning alohida mutaxassislari Tomonlar chegarasidan ko‘rsatilgan tuzilmalar shaxsiy tarkibining nomma-nom tuzilgan ro‘yxati hamda shaxsini tasdiqlovchi hujjati, maxsus vositalar va ta’minot materiallari esa so‘ralayotgan Tomonning vakolatli organi tasdiqlagan hujjat bo‘yicha, belgilangan o‘tish joylaridan o‘tadilar.

Ko‘rsatilgan ro‘yxat hamda hujjatlar rus va xitoy tillarida, agar Xitoy Tomoni o‘tkazilayotgan qo‘shma aksilterror tadbirda qatnashmasa, rus tilida tuziladi.

Maxsus vositalar va ta’minot materiallari bojxona hamda boshqa to‘lovlardan ozod etiladi, tekshiruvga jalb qilinmaydi, olib qo‘yilmaydi, musodara qilinmaydi.

So‘ralayotgan Tomonning maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilari yoki ushbu tuzilmalarning alohida mutaxassislari, shuningdek, maxsus vositalari va ta’minot materiallari so‘rayotgan Tomon hududi bo‘yicha o‘tkazilishini so‘rayotgan Tomon vakolatli organi vakilining nazorati ostida amalga oshiriladi.

So‘ralayotgan Tomonning maxsus aksilterror tuzilmasi tarkibiga kiruvchi qo‘shma aksilterror tadbirlar ishtirokchilari yoki ushbu tuzilmalarning alohida mutaxassislari, shuningdek maxsus vositalar va ta’minot materiallarini tranzit Tomon hududiga o‘tkazish, uning vakolatli organi ruxsati va hamkorligida amalga oshiriladi.

So‘ralayotgan Tomon qo‘shma aksilterror tadbirlarni tayyorlash va o‘tkazish uchun boshqaruv organi (keyingi o‘rinlarda — boshqaruv organi) tashkil etadi.

Boshqaruv organi rahbarini so‘rayotgan Tomon tayinlaydi va u ushbu lavozimga tayinlagan shaxsga bo‘ysinadi.

Qo‘shma aksilterror tadbirlar ishtirokchilari boshqaruv organi rahbariga bo‘ysinadi.

Boshqaruv organi tuzilmasi, maqsad va vazifalari boshqaruv organi rahbari tomonidan belgilanadi.

Boshqaruv organi tarkibiga qo‘shma aksilterror tadbirlarda ishtirok etuvchi maxsus aksilterror tuzilmalarning rahbarlari, Tomonlarning vakolatli organlari va ShHT MATT Ijroiya qo‘mitasidan vakillar kiritiladi.

Boshqaruv organida ish yuritish rus va xitoy tillarida, agar Xitoy Tomoni qo‘shma aksilterror tadbirlarga jalb etilmagan bo‘lsa, ish rus tilida olib boriladi.

Boshqaruv organining asosiy vazifalari quyidagilar hisoblanadi:

holat to‘g‘risida axborot yig‘ish, umumlashtirish, kelib tushayotgan ma’lumotlarni baholash va tahlil qilish, qo‘shma aksilterror tadbirlar ishtirokchilariga hamda ko‘rsatilgan tadbirni o‘tkazishga jalb qilinayotgan boshqa tuzilmalariga yetkazish;

so‘rayotgan Tomonning boshqaruv organi rahbari tomonidan qaror qabul qilishi uchun takliflar tayyorlash;

qo‘shma aksilterror tadbirlarni o‘tkazish rejasini ishlab chiqish va bajarish;

qo‘shma aksilterror tadbirlar ishtirokchilari o‘rtasida aloqa o‘rnatish va o‘zaro hamkorlikni tashkil etish;

qo‘shma aksilterror tadbirlarni o‘tkazishga tayyorgarlik va ehtimoliy salbiy oqibatlarni bartaraf etish bo‘yicha choralar qabul qilish;

qo‘shma aksilterror tadbirlarning obyektlari hisoblangan shaxslar bilan muzokaralar olib borish va o‘tkazilishini tashkil etish zarurati yuzaga kelganida, uning taktikasini ishlab chiqish;

so‘rayotgan Tomon davlat hokimiyati va boshqaruv organlari bilan o‘zaro hamkorlikni amalga oshirish;

qo‘shma aksilterror tadbirlar o‘tkaziladigan joyda tezkor-qidiruv tadbirlari va tergov harakatlarini amalga oshirilishini ta’minlash;

qo‘shma aksilterror tadbirlariga yakun yasashni tashkil etish;

Qo‘shma aksilterror tadbirlarni o‘tkazish davomida boshqaruv organi rahbari quyidagilarni amalga oshiradi:

boshqaruv organi mansabdor shaxslarini tayinlaydi;

qo‘shma aksilterror tadbirlarni o‘tkazish joyini belgilaydi;

qo‘shma aksilterror tadbirlarga tayyorgarlik ko‘rish va o‘tkazishga rahbarlik qiladi;

so‘rayotgan va so‘ralayotgan Tomonlar maxsus aksilterror tuzilmalari rahbarlari bilan kelishgan holda qo‘shma aksilterror tadbirlar ishtirokchilarining harakatlari va maxsus vositalar hamda ta’minot materiallarini qo‘llash to‘g‘risida qaro qabul qiladi;

qo‘shma aksilterror tadbirlarni o‘tkazish rejasini tasdiqlaydi;

qo‘shma aksilterror tadbirlar ishtirokchilarining harakatlari hamda maxsus vositalar va ta’minot materiallarini qo‘llashni boshlash hamda tugatish vaqtini belgilaydi;

qo‘shma aksilterror tadbirlar ishtirokchilarining harakatlarini muvofiqlashtirilishini amalga oshiradi;

qo‘shma aksilterror tadbirlar ishtirokchilariga so‘rayotgan Tomon maxsus vositalari va ta’minot materiallarini qo‘llash tartibi to‘g‘risida qonunchilik talablarini yetkazadi;

aksilterror tadbirlarning obyektlari hisoblangan shaxslar bilan muzokaralar olib borishga ruxsat beradi;

so‘rayotgan Tomon davlat hokimiyati organlarini, ShHT MATT Ijroiya qo‘mitasi va ommaviy axborot vositalari rahbarlarini qo‘shma aksilterror tadbirlarning borishi hamda uning natijalaridan xabardor qiladi;

so‘rayotgan Tomonga qo‘shma aksilterror tadbirini tugatish haqida taklif beradi va Tomonlarning vakolatli organlari hamda ShHT MATT Ijroiya qo‘mitasiga tadbir natijalari to‘g‘risida hisobot taqdim etadi.

Qo‘shma aksilterror tadbirni o‘tkazishga rahbarlik qilishga boshqaruv organi tayinlagan shaxsdan tashqari, boshqa qandaydir shaxslarning aralashuviga yo‘l qo‘yilmaydi.

So‘ralayotgan Tomon maxsus aksilterror tuzilmasining rahbari qo‘shma aksilterror tadbirni o‘tkazish rejasini tayyorlash davrida o‘z Tomonining vakolatli organi bilan kelishgan holda ular tomonidan boshqarilayotgan maxsus aksilterror tadbirda qatnashishdan bosh tortish huquqiga ega. Bu holatda rad etish yozma shaklda bildirgi bilan rasmiylashtiriladi.

Qo‘shma aksilterror tadbirlar ishtirokchilarining harakatlari va maxsus vositalar hamda ta’minot materiallarini qo‘llash to‘g‘risida qaror boshqaruv organi rahbarining yozma buyrug‘i bilan rasmiylashtiriladi.

Ta’minotning maxsus vositalari hamda materiallarini qo‘llanishi nazarda tutilgan qo‘shma aksilterror tadbirlarda maxsus aksilterror tuzilma harakatlarini boshlashi bilan faqat ko‘rsatilgan tuzilmalarning rahbarlari ushbu tuzilma bilan boshqaruv organi rahbarining buyrug‘ini bajarishda ularning harakatlarini boshqaradi.

Bunda maxsus vositalar va ta’minot materiallarini qo‘llashni amalga oshiruvchi qo‘shma aksilterror tadbirlar ishtirokchilarining harakatlari javobgarlikka tortilishini yo‘qqa chiqaruvchi harakat sifatida qaraladi.

Qo‘shma aksilterror tadbirlarni o‘tkazishda, shunday tadbirlarni o‘tkazish rejasida nazarda tutilgan harakatlarni sodir etish tartibi boshqaruv organi tomonidan, so‘ralayotgan Tomon maxsus aksilterror tuzilma rahbari bilan kelishgan holda o‘zgartirilishi mumkin.

Qo‘shma aksilterror tadbirlarni o‘tkazishda maxsus vositalar va ta’minot materiallarini qo‘llash, so‘rayotgan Tomon qonunchiligiga muvofiq amalga oshiriladi.

So‘rayotgan Tomonga chegaradosh Tomon xavfsizligiga xavf-xatar yuzaga kelganida, boshqaruv organi o‘sha Tomon vakolatli organini xavf-xatar xususiyati va uning ehtimoliy ko‘lamidan xabardor etadi hamda so‘rayotgan Tomon hududida ushbu xavf-xatarni to‘xtatilishi bo‘yicha choralar qabul qiladi.

Qo‘shma aksilterror tadbirini borishi haqida ma’lumot so‘rayotgan Tomon o‘z qonunchiligiga muvofiq, boshqaruv organi tomonidan belgilanadigan shakl va hajmda yoki uning topshirig‘i bilan jamoatchilik bilan aloqa qiluvchi mas’ul shaxs tomonidan yetkaziladi.

Qo‘shma aksilterror tadbirga tayyorgarlik va uni o‘tkazishda, tadbir ishtirokchilariga quyidagilarni tarqatishga ruxsat etilmaydi:

maxsus aksilterror tadbir ishtirokchilari to‘g‘risida;

qo‘shma aksilterror tadbirini o‘tkazishning maxsus texnik tomonlari va taktikasini fosh qiluvchi;

maxsus vositalar va ta’minot materiallarining xususiyati to‘g‘risida;

so‘rayotgan Tomon qonunchiligi bilan tarqatilishi taqiqlangan boshqa ma’lumotlarni.

Qo‘shma aksilterror tadbirni tugatish va boshqaruv organini bekor qilish to‘g‘risidagi qarorni so‘rayotgan Tomon qabul qiladi.

So‘rayotgan Tomon qo‘shma aksilterror tadbirni tugatish va uning yakunlari to‘g‘risida boshqa Tomonlarni va ShHT MAKTning Ijroiya qo‘mitasini xabardor qiladi.

So‘rayotgan Tomonning vakolatli organi Tomonlarning vakolatli organlari va ShHT MATTning Ijroiya qo‘mitasiga qo‘shma aksilterror tadbirning borishi to‘g‘risida yakuniy va tahliliy materiallarni taqdim etadi.

So‘ralayotgan Tomonning maxsus aksilterror tuzilmalari tarkibiga kiruvchi qo‘shma aksilterror tadbir ishtirokchilari va so‘rayotgan Tomonga tegishli maxsus vositalar hamda ta’minot materiallarini Tomon hududiga qaytishini ta’minlaydi.

So‘rayotgan Tomonning maxsus aksilterror tuzilmalari tarkibiga kiruvchi qo‘shma aksilterror tadbir ishtirokchilarini so‘ralayotgan Tomon hududidan olib chiqish rejasi va muddatlari so‘ralayotgan Tomonning vakolatli organi tomonidan so‘rayotgan Tomon vakolatli organi bilan kelishgan holda belgilanadi va tasdiqlanadi.

So‘rayotgan Tomonga tegishli bo‘lgan maxsus vositalar hamda ta’minot materiallari uning mulki hisoblanadi va so‘ralayotgan Tomon yoki tranzit Tomon qandaydir yo‘llar bilan ushbu mulkni ushlab qolishi va/yoki o‘z ixtiyoriga o‘tkazib ololmaydi.

Qo‘shma aksilterror tadbirlar tugashi bilan foydalanilmagan maxsus vositalar hamda ta’minot materiallari so‘ralayotgan Tomon hududidan so‘rayotgan Tomoniga olib chiqib ketilishi zarur.

Agar alohida vaziyat sabab maxsus vositalar hamda ta’minot materiallarini olib chiqishning imkoni bo‘lmasa, so‘rayotgan va so‘ralayotgan Tomonlarning o‘zaro kelishuviga ko‘ra, so‘ralayotgan Tomonning qonunchiligiga muvofiq, uning hududida sotilishi yoki yo‘q qilinishi mumkin.

So‘rayotgan Tomon qo‘shma aksilterror tadbirlarda ishtirok etayotgan so‘ralayotgan Tomonga, agar boshqaruv organi tomonidan qo‘yilgan topshiriqlarni bajarish chog‘ida qandaydir, jumladan, so‘ralayotgan Tomonning hududida bo‘lgan jismoniy, shuningdek yuridik shaxslar hayotiga, sog‘ligi va mulkiga va so‘rayotgan Tomonga yetkazilgan boshqa har qanday o‘lim, tan jarohati olish bilan bog‘liq keltirilgan ziyon bo‘yicha shikoyat qilishdan bosh tortadi.

Agar so‘rayotgan Tomon maxsus aksilterror tuzilmalari tarkibiga kiruvchi qo‘shma antiterroristik tadbir ishtirokchisi boshqaruv organi tomonidan qo‘yilgan topshiriqlarni bajarish chog‘ida qandaydir shaxsga, tashkilotga va so‘rayotgan Tomonning o‘ziga ziyon keltirsa, u holda bunday zarar so‘rayotgan Tomon qonunchilikka muvofiq qoplanadi.

So‘rayotgan Tomon maxsus aksilterror tuzilmalari tarkibiga kiruvchi qo‘shma aksilterror tadbir ishtirokchilari so‘rayotgan Tomon hududida zarar keltirilsa va bu zarar mazkur Kelishuvning 26-moddasida nazarda tutilmagan bo‘lsa, ushbu keltirilgan zarar manfaatdor Tomonlar o‘rtasida kelishuvga ko‘ra qoplanadi.

So‘rayotgan Tomonga keltirilgan maxsus vositalar hamda ta’minot materiallarining yo‘qotilishi, to‘liq yoki qisman darajada yo‘q qilinishi bilan bog‘liq sarf-xarajatlarini qoplab berish tartibi manfaatdor Tomonlar o‘rtasida kelishuvga ko‘ra belgilanadi.

Qo‘shma aksilterror tadbirlar davomida so‘ralayotgan Tomonning qo‘shma aksilterror tadbirlar ishtirokchilarining hayoti va sog‘lig‘iga yetkazilgan zarar, so‘rayotgan Tomonning qonunchiligida ko‘rsatilgan tartibda qoplanadi va bunday holat so‘rayotgan Tomonning qo‘shma aksilterror tadbir ishtirokchilariga, ular shunga o‘xshash vaziyatlarda ko‘rgan zarari uchun ham qo‘llaniladi.

Bunda so‘rayotgan Tomon maxsus aksilterror tuzilmalari tarkibiga kiruvchi qo‘shma aksilterror tadbir ishtirokchilari, ularning oila a’zolari uchun o‘sha Tomonning qonunchiligida belgilangan imtiyozlar, kafolat va kompensatsiya pullari to‘liq hajmda saqlanadi. Bunday tartib so‘rayotgan Tomon maxsus aksilterror tuzilmalari tarkibiga kiruvchi qo‘shma antiterroristik tadbir ishtirokchilarini so‘ralayotgan Tomon hududida, shuningdek boshqa Tomon hududida tranzit vaqtida bo‘lgan davrda uning hayoti va sog‘lig‘iga zarar keltirilganida ham qo‘llanadi.

Tomonlar o‘z qonunchiligiga muvofiq, mazkur Kelishuvni amalga oshiruvchi vakolatli organlarni belgilaydi va depozitariyga bir vaqtning o‘zida xabarnoma bilan mazkur Kelishuv kuchga kirishi uchun zarur bo‘lgan ichki davlat tartib-taomillarini bajarilganligi haqida depozitariyni xabardor qiladi shuningdek, depozitariyga vakolatli organni va uning nomlarini o‘zgargani to‘g‘risida axborot beradi.

Tomonlar o‘zaro kelishuvga ko‘ra, Shanxay hamdo‘stlik tashkiloti Mintaqaviy antiterroristik tuzilmasi hamkorligida qo‘shma aksilterror tadbirlarda ishtirok etuvchi maxsus aksilterror tuzilmalarni tayyorlash bo‘yicha kelishilgan dasturlarni ishlab chiqadi shuningdek, maxsus aksilterror tuzilmalarning birgalikdagi o‘quv mashg‘ulotlarini o‘tkazadi, ularning mutaxassislarini stajirovkasini amalga oshiradi.

Tomonlar mazkur Kelishuvni izohlash yoki qo‘llash bilan bog‘liq yuzga keladigan munozarali masalalarni konsultatsiya va muzokaralar o‘tkazish yo‘li bilan hal etiladi.

Mazkur Kelishuv Tomonlar ishtirokchilari bo‘lgan boshqa xalqaro kelishuvlariga ko‘ra belgilangan haq-huquqlari hamda majburiyatlariga daxl qilmaydi.

Mazkur Kelishuv doirasida hamkorlikni amalga oshirishda Tomonlar ishchi til sifatida rus va xitoy tillaridan foydalanadi.

Tomonlarning roziligi bilan mazkur Kelishuvga bayonnomalar bilan rasmiylashtiriladigan o‘zgartishlar kiritilishi mumkin, ular mazkur Kelishuvning 36-moddasida belgilangan tartibda kuchga kiradi.

Mazkur Kelishuv noma’lum muddatga tuziladi va depozitariydan Tomonlar mazkur Kelishuvni kuchga kirishi uchun zarur bo‘lgan ichki davlat tartib-taomillarini bajargani to‘g‘risidagi yozma shakldagi to‘rtinchi xabarnomani qabul qilganidan keyin 30-kun kuchga kiradi.

Mazkur Kelishuv depozitariysi Shanxay Kotibiyati hisoblanadi va Kelishuv imzolanganidan keyin 15 kun ichida mazkur Kelishuvning tasdiqlangan nusxasini Tomonlarga jo‘natadi.

Depozitariy Tomonlardan mazkur Kelishuvning 30-moddasida ko‘rsatilganidek, o‘zining vakolatli organi to‘g‘risidagi xabarnomani olgan kunidan boshlab o‘n besh kun ichida boshqa Tomonlarga bu haqida xabar beradi.

Mazkur Kelishuv 2001-yil 15-iyundagi Terrorizm, separatizm va ekstremizmga qarshi kurashish to‘g‘risidagi Shanxay konvensiyasining ishtirokchilari bo‘lgan davlatlarning birlashishi uchun ochiq. Qo‘shilayotgan davlat uchun mazkur Kelishuv uning qo‘shilishi to‘g‘risidagi hujjat depozitariy tomonidan olingan kundan o‘ttizinchi kuni kuchga kiradi.

Mazkur Kelishuv 2001-yil 15-iyundagi Terrorizm, separatizm va ekstremizmga qarshi kurashish to‘g‘risidagi konvensiyasining a’zosi hisoblangan istalgan Tomonlarga nisbatan o‘z kuchida qoladi.

2006-yil 15-iyunda Shanxay shahrida, rus va xitoy tillarida bitta asl nusxada tuzildi, ikkala matn ham bir xil kuchga ega.