Oʻzbekiston Respublikasi Prezidentining “2011 — 2015-yillarda respublika moliya-bank tizimini yanada isloh qilish va barqarorligini oshirish hamda yuqori xalqaro reyting koʻrsatkichlariga erishishning ustuvor yoʻnalishlari toʻgʻrisida” 2010-yil 26-noyabrdagi PQ-1438-son qaroriga muvofiq hamda lizing faoliyatini yanada takomillashtirish, moliya bozori infratuzilmasi institutlarini mustahkamlash va bankdan tashqari moliya xizmatlari koʻrsatish sohasida raqobatbardoshlilikni rivojlantirish maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligi, Markaziy bank, Iqtisodiyot vazirligi hamda boshqa vazirliklar va idoralarning Oʻzbekiston Respublikasi Moliya vazirligini lizing xizmatlari koʻrsatuvchi tashkilotlar faoliyatini muvofiqlashtirish boʻyicha vakolatli organ etib belgilash va unga quyidagi funksiyalarni yuklash toʻgʻrisidagi taklifi qabul qilinsin:

lizing xizmatlari koʻrsatish sohasida regulyativ bazani va milliy standartlarni ishlab chiqish;

lizing xizmatlari koʻrsatish sohasidagi axborotlarni toʻplash va umumlashtirish, shuningdek bozorning holatini tahlil qilish;

lizing xizmatlari sohasida, shu jumladan xalqaro normalar va standartlarni tahlil qilish asosida islohotlarni yanada chuqurlashtirishning ustuvor yoʻnalishlarini belgilash yuzasidan takliflar kiritish;

lizing xizmatlari koʻrsatish sohasida Oʻzbekiston Respublikasi qonun hujjatlarini takomillashtirish boʻyicha takliflarni ishlab chiqish va kiritish;

qonun hujjatlariga muvofiq boshqa funksiyalarni amalga oshirish.

2. Oʻzbekiston Respublikasi Moliya vazirligi tuzilmasida markaziy apparatning boshqaruv xodimlari cheklangan sonini koʻpaytirgan holda shtatdagi xodimlar soni ikki nafar boʻlgan lizing faoliyatini muvofiqlashtirish shoʻbasi tashkil etilsin.

3. Belgilansinki, lizing xizmatlari koʻrsatish sohasida axborot toʻplash, umumlashtirish va tahlil qilish statistika organlari tomonidan taqdim etiladigan maʼlumotlar asosida Moliya vazirligi tomonidan amalga oshiriladi.

4. Oʻzbekiston Respublikasi Davlat statistika qoʻmitasi Moliya vazirligi bilan birgalikda xoʻjalik yurituvchi subyektlarning lizing faoliyati boʻyicha statistika hisobotini qayta koʻrib chiqsin va zaruriyat boʻlganda belgilangan tartibda joriy etsin.

5. Oʻzbekiston Respublikasi Moliya vazirligi Oʻzbekiston lizing beruvchilar uyushmasi, Markaziy bank, Adliya vazirligi hamda boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.