O‘zbekiston Respublikasi Prezidentining 2010-yil 26-fevraldagi “O‘zbekiston Yozuvchilar uyushmasi huzurida “Ijod” fondini tashkil etish to‘g‘risida”gi PQ-1292-sonli qaroriga asoslanib buyuraman:

1. Noshirlik va matbaa korxonalari tomonidan O‘zbekiston Yozuvchilar uyushmasi huzuridagi “Ijod” fondiga ajratmalar to‘lash tartibi to‘g‘risidagi nizom ilovaga muvofiq tasdiqlansin.

2. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Ushbu Nizom O‘zbekiston Respublikasi Prezidentining 2010-yil 26-fevraldagi “O‘zbekiston Yozuvchilar uyushmasi huzurida “Ijod” fondini tashkil etish to‘g‘risida”gi PQ-1292-son qaroriga muvofiq noshirlik va matbaa korxonalari tomonidan O‘zbekiston Yozuvchilar uyushmasi huzuridagi “Ijod” fondiga bosma mahsulotlarini realizatsiya qilishdan, shuningdek, bosma mahsulotlarni ishlab chiqarish va realizatsiya qilish bilan bog‘liq tahrir, matbaa va noshirlik xizmatlari ko‘rsatishdan tushgan tushumlardan 1 foizli ajratmalar (keyingi o‘rinlarda majburiy ajratmalar deb ataladi) to‘lash tartibini belgilaydi.

1. O‘zbekiston Respublikasi Prezidentining 2010-yil 26-fevraldagi “O‘zbekiston Yozuvchilar uyushmasi huzurida “Ijod” fondini tashkil etish to‘g‘risida”gi PQ-1292-son qaroriga muvofiq noshirlik va matbaa korxonalarining (keyingi o‘rinlarda ajratma to‘lovchilar deb ataladi) bosma mahsulotlarini realizatsiya qilishdan, shuningdek, bosma mahsulotlarni ishlab chiqarish va realizatsiya qilish bilan bog‘liq tahrir, matbaa va noshirlik xizmatlari ko‘rsatishdan tushgan tushumning 1 foizi miqdoridagi majburiy ajratmalar O‘zbekiston Yozuvchilar uyushmasi huzuridagi “Ijod” fondi (keyingi o‘rinlarda Fond deb ataladi) mablag‘larini shakllantirish manbalaridan biri etib belgilangan.

2. Noshirlik korxonasi deganda qonunchiilik hujjatlarida belgilangan tartibda davlat ro‘yxatidan o‘tgan va noshirlik faoliyati uchun litsenziyaga ega bo‘lgan yuridik shaxslar tushuniladi.

3. Matbaa korxonalari deb qonunchilik hujjatlarida belgilangan tartibda davlat ro‘yxatidan o‘tib, O‘zbekiston matbuot va axborot agentligidan guvohnoma olgan va Ichki ishlar vazirligining hududiy organlarida hisobga qo‘yilgan yuridik shaxslar tushuniladi.

4. O‘zbekiston matbuot va axborot agentligi yangi yoki qayta tashkil etilgan noshirlik va matbaa korxonalariga tegishligicha litsenziya va guvohnoma berilgan (yoki bekor qilingan) vaqtdan boshlab bir hafta muddatda ushbu korxonalar yuzasidan ma’lumotlarni Fondga va tegishli davlat soliq xizmati organlariga taqdim etadi.

5. Majburiy ajratmalar summasi ajratma to‘lovchilar tomonidan mustaqil ravishda, buxgalteriya hisobi to‘g‘risidagi qonunchilik hujjatlariga muvofiq, bosma mahsulotlarini realizatsiya qilishdan, shuningdek, bosma mahsulotlarni ishlab chiqarish va realizatsiya qilish bilan bog‘liq tahrir, matbaa va noshirlik xizmatlari ko‘rsatishdan tushgan tushumning 1 foizi miqdorida hisoblab chiqariladi.

6. Yuridik shaxslardan olinadigan foyda solig‘i, yagona soliq to‘lovi hamda davlat maqsadli jamg‘armalariga majburiy ajratmalarni hisoblab chiqarishda soliq solinadigan baza Fondga o‘tkaziladigan majburiy ajratmalar summasiga kamaytiriladi (shartli misol 1-ilovada keltirilgan).

7. Ajratma to‘lovchilar Fondga yilning har choragida, hisobot choragidan keyingi oyning 25-kunidan kechiktirmay, yil yakunlari bo‘yicha esa yillik moliyaviy hisobot topshiriladigan muddatda hisoblangan majburiy ajratmalar to‘g‘risidagi ma’lumotlarni ushbu Nizomning 2-ilovasiga muvofiq o‘sib boruvchi yakun bilan korxona muhri, rahbari va bosh hisobchisi imzolari bilan tasdiqlangan holda, shaxsan yoki pochta (elektron pochta) yoxud faks orqali taqdim etib boradi.

8. Fondga majburiy ajratmalarni to‘lash har oyda hisobot davridan keyingi oyning 25-kunidan kechiktirmay amalga oshiriladi.

9. Majburiy ajratmalarni to‘lash muddati buzilishi to‘lovning belgilangan muddatidan keyingi kundan e’tiboran muddati o‘tkazib yuborilgan har bir kun uchun (to‘lov kuni ham shunga kiradi) Fond hisobiga 0,05 foiz miqdorda penya hisoblanishiga sabab bo‘ladi. Hisoblangan penya miqdori umumiy qarz summasining 10 foizidan oshmasligi lozim.

10. Fondga ortiqcha to‘langan majburiy ajratmalar summasi mazkur majburiy ajratmalar bo‘yicha kelgusi to‘lovlar hisobiga hisobga olinadi yoki Fond mablag‘laridan ajratma to‘lovchining yozma arizasi asosida, Fond tomonidan ariza berilgan sanadan e’tiboran 30 ish kuni ichida ajratma to‘lovchining bankdagi hisobvarag‘iga pul mablag‘larini o‘tkazish orqali qaytariladi.

Ortiqcha to‘langan majburiy ajratmalar summasi boshqa ajratma to‘lovchilarning qarzini uzish hisobiga hisobga olinishi mumkin emas.

11. Fond hisob raqamiga mablag‘larning to‘liq tushishi ustidan nazorat Fondning ijro etuvchi direksiyasi tomonidan amalga oshiriladi.

12. Fondga kelib tushgan majburiy ajratmalarning hisobi va hisoboti yuritilishi hamda maqsadli ishlatilishi uchun Fondning ijro etuvchi direksiyasi amaldagi qonunchilik hujjatlariga muvofiq javob beradi.

12¹. Majburiy ajratmalarning to‘g‘ri hisoblanishi va belgilangan muddatda to‘lanishi uchun ajratma to‘lovchilar rahbarlari va bosh hisobchilari qonunchilikda belgilangan tartibda javobgardir.

13. Majburiy ajratmalarning to‘g‘ri hisoblanishi va ushbu Nizomning 6-bandida nazarda tutilgan soliq imtiyozlari to‘g‘ri qo‘llanilishi ustidan nazorat davlat soliq xizmati organlari tomonidan amalga oshiriladi.

14. Ushbu Nizom O‘zbekiston Respublikasi Moliya vazirligi, Davlat soliq qo‘mitasi, Savdo-sanoat palatasi va O‘zbekiston Yozuvchilar uyushmasi huzuridagi “Ijod” fondi ijro etuvchi direksiyasi bilan kelishilgan.

Yagona soliq to‘lovchi yuridik shaxsning matbaa faoliyatidan tushumi:

yanvar oyida 10 000 ming so‘mni;

fevral oyida 8 000 ming so‘mni;

mart oyida 6 000 ming so‘mni tashkil etgan.

Jami birinchi chorakda ushbu faoliyat turidan tushgan tushum 24 000 ming so‘m hisoblangan.

Yuqoridagi tushumdan Fondga quyidagicha ajratmalar hisoblanadi:

Yanvar oyida — 100 ming so‘mni;

Fevral oyida — 80 ming so‘mni;

Mart oyida — 60 ming so‘mni tashkil etgan.

Jami birinchi chorak uchun Fondga 240 ming so‘m ajratmalar hisoblanadi.

Yagona soliq to‘lovi to‘lovchisi bo‘lgan yuridik shaxs davlat soliq xizmati organlariga hisob-kitoblarni taqdim etishda soliq solinadigan baza 240 ming so‘mga kamaytiriladi, ya’ni yagona soliq to‘lovi hisob-kitobining “soliq solinadigan yalpi tushumni kamaytirish” 0502-satrida hisobga olinadi.

Xuddi shunday tartib umumbelgilangan tartibda soliq (foyda solig‘i) to‘lovchi yuridik shaxslarga ham qo‘llaniladi. Ular (yagona soliq to‘lovi to‘lovchilardan farqli ravishda) soliq hisoboti shakllarini to‘ldirishda:

davlat maqsadli jamg‘armalariga majburiy ajratmalarni hisoblab chiqarishda sof tushum summasini kamaytirib hisoblaydi;

foyda solig‘ini hisoblab chiqarishda “Ijod” fondiga o‘tkazilgan ajratmalar summasi chegiriladigan xarajatlarga olib boradi.