Islom ta’limoti va falsafasini keng o‘rganish, o‘zbek xalqining diniy, tarixiy va madaniy merosini chuqur ilmiy tadqiq etish maqsadida Vazirlar Mahkamasi qaror qiladi:

1. Movarounnahr musulmonlar idorasining Toshkent shahrida Xalqaro islom tadqiqot markazini tashkil etish va uning maqomini O‘zbekiston Respublikasi Fanlar akademiyasining ilmiy-tadqiqot muassasalariga tenglashtirish haqidagi taklifi qabul qilinsin. Markazning Nizomi 1-ilovaga, tuzilmasi 2-ilovaga hamda Markaz xodimlari mehnatiga haq to‘lash razryadlari va tarif koeffitsiyentlari, xodimlarning soni va ularga to‘lanadigan mablag‘ hisob-kitobi 3-ilovaga muvofiq tasdiqlansin.

3. “Toshshaharyo‘lovchitrans” uyushmasi ajratilgan limitga muvofiq markazga avtotransport xizmati ko‘rsatsin.

4. O‘zbekiston Respublikasi Fan va texnika davlat qo‘mitasi 1996-yildan boshlab Xalqaro islom tadqiqot markazining ilmiy izlanishlar mavzularini tanlov orqali mablag‘ bilan ta’minlanuvchi ishlar ro‘yxatiga kiritsin.

5. Aloqa vazirligi belgilangan tartibda Xalqaro islom tadqiqot markaziga zarur miqdorda shahar telefonlari, shu jumladan, hukumat ATSdan telefon va boshqa aloqa vositalari o‘rnatib bersin.

6. Toshkent shahar hokimligi (K. To‘laganov):

Xalqaro islom tadqiqot markazi binolarini qurish uchun bir oy muddatda zarur yer maydoni ajratsin.

7. Xalqaro islom tadqiqot markazi uning yangi binolari majmui ishga tushgunga qadar Movarounnahr musulmonlari idorasiga qarashli Zarqaynar ko‘chasining 18-berk ko‘chasidagi 47-uyga joylashtirilishi;

Movarounnahr musulmonlari idorasining Xalqaro islom tadqiqot markazi binolari loyihalarini tayyorlashga va ularni qurishga sarflanadigan barcha xarajatlarni o‘z zimmasiga olishi ma’lumot uchun qabul qilinsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari S. Saidqosimov zimmasiga yuklansin.

1.1. Toshkent Xalqaro islom tadqiqot Markazi (bundan keyin matnda “Markaz” deb ataladi) Movarounnahr musulmonlari idorasining taklifiga binoan O‘zbekiston Respublikasi Vazirlar Mahkamasining "Toshkent shahrida Xalqaro islom tadqiqot Markazini tashkil etish to‘g‘risida”gi qarori asosida tashkil etilgan, o‘z-o‘zini boshqaradigan mustaqil tashkilot bo‘lib, o‘z faoliyatini O‘zbekiston Respublikasining Konstitutsiyasi va amaldagi boshqa qonunlari, hukumat qarorlari hamda ushbu Nizom asosida olib boradi.

1.2. Markaz Movarounnahr musulmonlari idorasi huzurida islom dini va madaniyatini, Vatanimiz tarixi va milliy merosini, qadimiy an’analarini har tomonlama o‘rganish, ularga oid mavjud manbalarni ilmiy talablar asosida tadqiq va nashr qilish maqsadini ko‘zlab ish tutadi.

Markaz O‘zbekiston Respublikasida islom tarixi va islomshunoslik bo‘yicha olib borilayotgan tadqiqotlarni O‘zbekiston Respublikasi Vazirlar Mahkamasi huzuridagi Din ishlari qo‘mitasi bilan hamkorlikda muvofiqlashtiradi va zarur ilmiy-uslubiy tavsiyalar ishlab chiqadi.

1.3. Markazning asosiy vazifalari:

islom tarixi va madaniyati bo‘yicha konseptual tadqiqotlar yaratish va ularni chop etish;

mamlakatimizda mavjud bo‘lgan boy diniy, milliy va ma’naviy merosni o‘rganish, diyorimizdan yetishib chiqqan allomalarning asarlarini tadqiq etish, ilmiy-tanqidiy matnlarni tayyorlash va nashr etish;

Qur’on va hadislarning o‘zbek tilidagi akademik tarjimalarini tayyorlash, ularga tegishli sharhlarni nashr etish;

mamlakat axborot organlariga amalga oshirayotgan ilmiy izlanishlari haqida ma’lumot va axborotlar berib turish;

xalqaro musulmon tashkilotlari bilan aloqa bog‘lash, mahalliy va xalqaro ilmiy anjumanlar tashkil qilish;

oliy va o‘rta maxsus o‘quv yurtlari uchun O‘zbekiston Respublikasi Fanlar akademiyasi ilmiy-tekshirish institutlari bilan hamkorlikda islomiy ilmlar bo‘yicha qo‘llanmalar tayyorlash;

boshqa joylarda yozilgan shunday ishlarni ilmiy ekspertizadan o‘tkazish va ulardan foydalanish yuzasidan xulosalar tayyorlashdan iboratdir.

1.4. Markaz yuridik shaxs maqomiga, mustaqil balansga, dumaloq shakldagi muhrga, shtampga, hisob raqamlari, o‘zbek, ingliz va arab tillarida nomi ko‘rsatilgan rasmiy ish qog‘ozlariga ega bo‘ladi.

2.1. Markazni boshqarish Vazirlar Mahkamasi bilan kelishilgan holda Movarounnahr musulmonlari idorasi tomonidan tasdiqlangan direktor va uning o‘rinbosarlari zimmasiga tushadi.

Direktor o‘z vakolatlari doirasida Markazning barcha xodimlari uchun bajarilishi majburiy bo‘lgan buyruqlar chiqaradi, amaldagi qonunlarga muvofiq xodimlarni ishga qabul qiladi va ishdan bo‘shatadi.

2.2. Markazda bo‘limlar, shu’balar, laboratoriyalar, kutubxona va boshqa ilmiy tadqiqotlar uchun kerakli ish joylari tashkil etiladi.

2.3. Markazda asosiy faoliyat bilan bog‘liq masalalarni hal qilish uchun Movarounnahr musulmonlari idorasi tasdiqlagan Markaz direktori rahbarligida ilmiy hay’at tuziladi. Ilmiy hay’at tarkibi, vakolatlari va ish jarayoni respublika ilmiy-tadqiqot institutlari uchun qabul qilingan tartib asosida tuziladi va amalga oshiriladi.

3.1. Markazga islom dini asoslari va ta’limotini yaxshi bilgan, yuqori saviyadagi diniy va zamonaviy bilimlarga ega bo‘lgan mutaxassislar, iqtidorli ilmiy kadrlar jalb etiladi. Barcha vazifalar O‘zbekiston Respublikasi Qonuniga ko‘ra mehnat shartnomasi asosida taqsimlanadi.

3.2. Markaz ilmiy xodimlari ilmiy hay’at a’zoligiga saylash va saylanish, Markaz faoliyatiga taalluqli muhim masalalarning muhokamasida qatnashish, Markaz tasarrufidagi xonalar va texnik vositalardan foydalanish huquqiga egadirlar.

3.3. Markaz ilmiy xodimlari ichki tartib-intizomning saqlanishi, tadqiqotlarning yuqori saviyada bajarilishi va o‘z malakalarini muntazam ravishda oshirib borish uchun mas’uldirlar.

3.4. Markazda turli siyosiy partiyalar, ijtimoiy-siyosiy va diniy harakatlar faoliyatiga yo‘l qo‘yilmaydi.

3.5. Markaz xodimlarining huquq va majburiyatlari amaldagi qonunchilik, ichki tartib-qoidalar va rahbariyatning ko‘rsatmalari bilan belgilanadi.

4.1. Markazning moliya-xo‘jalik faoliyati:

Movarounnahr musulmonlari idorasidan ajratiladigan mablag‘lar;

budjetdan ajratiladigan mablag‘lar;

turli tashkilot va fuqarolarning, shu jumladan, chet ellik fuqarolar va tashkilotlarning xayr-ehsonlari asosida shakllantiriladi.

4.2. Markaz turli davlat va jamoat tashkilotlari, tijorat tizimlari va korxonalar, shu jumladan, chet el firmalari bilan o‘z faoliyati doirasida shartnomalar tuzishi mumkin.

4.3. Markaz pul mablag‘larini saqlash, turli shakldagi hisob-kitob, kredit, kassa muomalalarini olib borish uchun bank va boshqa kredit muassasalarida so‘m va valyuta hisoblarini oladi.

4.4. Markazning ilmiy va boshqa xodimlariga yagona tarif setkasiga muvofiq budjet hisobidan haq to‘lanadi. Markaz o‘z imkoniyatlari doirasida mustaqil ravishda turli rag‘batlantirish shakllaridan foydalanishi mumkin.

Har yil yakunida O‘zbekiston Moliya vazirligi va Movarounnahr musulmonlari idorasiga moliyaviy hisobot berib boradi.

5.1. Markaz ilmiy xodimlarning malakasini oshirish, chet ellarda ilmiy-tadqiqot ishlarini olib borish, o‘zaro tajriba almashish hamda tashqi iqtisodiy faoliyatni amalga oshirish maqsadida xalqaro hamkorlikni amalga oshirish huquqiga egadir.

5.2. Markaz ilmiy xodimlarining xorijga ilmiy-xizmat safariga borishi va shuningdek, xorijdan Markazga mutaxassislar jalb qilish davlatlararo tuzilgan shartnomalar, respublika ijro etuvchi organlarining xorijiy davlatlar idoralari bilan bitimlari va Markazning chet ellik fuqarolar va idoralar bilan tuzilgan shartnomalari Respublika Vazirlar Mahkamasining tegishli bo‘limi bilan kelishgan holda amalga oshiriladi.

Markaz va uning bo‘limlarini tugatish yoki qayta tashkil etish Movarounnahr musulmonlari idorasi tavsiyasiga muvofiq O‘zbekiston Respublikasi Vazirlar Mahkamasi tomonidan belgilangan tartibda amalga oshiriladi.