O‘zbekiston Respublikasi mustaqilligining 4 yilligini nishonlash va respublika aholisining ishlatilmayotgan naqd pul mablag‘larini jalb etish yo‘li bilan milliy valyutani mustahkamlash maqsadida Vazirlar Mahkamasi qaror qiladi:

1. Moliya vazirligi, Markaziy bank, “O‘zjamg‘armabank”, Aloqa vazirligi, “O‘zbeksavdo” uyushmasi va O‘zbekbirlashuvning 250 mln so‘mlik miqdorda “Mustaqillik” pul-buyum lotereyasini chiqarish va o‘tkazish to‘g‘risidagi taklifi qabul qilinsin.

Lotereya bo‘yicha yutuqlar summasi 187,5 mln so‘mni yoki chiqarilgan lotereya umumiy summasining 75 foizini tashkil qiladi.

2. “Mustaqillik” pul-buyum lotereyasini o‘tkazish shartlari va tartibi 1-ilovaga muvofiq tasdiqlansin.

3. Belgilab qo‘yilsinki, lotereya biletlarini sotish “O‘zjamg‘armabank”, Aloqa vazirligi, “O‘zbeksavdo”, O‘zbekbirlashuv, “O‘ztayyorlovsavdo” uyushmasi muassasalarida hamda ushbu maqsadlar uchun shartnoma asosida jalb etilgan shaxslar orqali, qat’iy ixtiyoriylik asosida, naqd pulga amalga oshiriladi.

“Mustaqillik” pul-buyum lotereyasi respublika hududida 2-ilovaga muvofiq taqsimlansin.

4. Vakillar etib quyidagilar belgilansin:

lotereya biletlarini qabul qilib olish, saqlash va yutuqlarni to‘lash bo‘yicha — “O‘zjamg‘armabank” muassasalari;

lotereya biletlarini “O‘zjamg‘armabank” muassasalariga hamda biletlarni tarqatuvchi tashkilotlarga yetkazib berish bo‘yicha O‘zbekiston Respublikasi Markaziy banki va “O‘zjamg‘armabank”;

yutuqqa chiqqan tovarlarni yetkazib berish bo‘yicha — O‘zbekbirlashuv.

5. Belgilab qo‘yilsinki, yutuqlarni berish va jo‘natish O‘zbekbirlashuvning ulgurji bazalari tomonidan amalga oshirilsin.

6. Davlat konsernlari, uyushmalar, korxonalar, tashkilotlar va boshqa tovar ishlab chiqaruvchilar zarur tovarlarni O‘zbekbirlashuvning ulgurji bazalariga 3-ilovaga muvofiq narxlarda, miqdorlarda va assortimentda o‘z vaqtida sotishni ta’minlasinlar.

7. “O‘zbekiston temir yo‘llari” davlat-aksionerlik kompaniyasi va “O‘zavtotrans” davlat korporatsiyasi yutuqqa chiqqan tovarlarni tashish uchun O‘zbekbirlashuvning ulgurji bazalari buyurtmalariga ko‘ra zarur miqdorda transport vositalari ajratishni ta’minlasinlar.

8. Buyum yutuqlarining qiymati 1995-yil 1-apreldagi ulgurji-berish narxlari bo‘yicha belgilanadi. Tovarlarni sotib olish vaqtida narxlar o‘zgargan hollarda narxlardagi farq lotereya biletlarini sotishdan tushgan mablag‘lar hisobiga qoplanadi.

9. “O‘zjamg‘armabank” O‘zbekbirlashuvning yutuqqa chiqqan tovarlarni yetkazib berishga oid xarajatlarni O‘zbekbirlashuvning hisob-kitoblari bo‘yicha avans tariqasida to‘lasin. O‘zbekbirlashuv yutuqqa chiqqan tovarlarni berish muddati tugaganidan so‘ng haqiqiy qilingan sarf-xarajatlar to‘g‘risidagi hujjatlarni taqdim etib “O‘zjamg‘armabank” bilan o‘zaro hisob-kitob qiladi.

10. Markaziy bank bir oy muddatda lotereya biletlarini tayyorlashni va yetkazib berishni ta’minlasin.

11. “O‘zjamg‘armabank”, “O‘zbeksavdo”, O‘zbekbirlashuv, O‘zbekiston Respublikasi Aloqa vazirligi, “O‘ztayyorlovsavdo”, “O‘zdavteleradio” kompaniyasi, Davlat matbuot qo‘mitasi, O‘zA, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

aholi o‘rtasida lotereya biletlarini sotish yuzasidan keng reklama ishlarini tashkil etsinlar;

lotereya biletlarini sotishning borishi, biletlarni sotishdan tushgan pullarning o‘z vaqtida topshirilishi va yutuqlarning berilishi ustidan doimiy nazorat o‘rnatsinlar.

12. Belgilab qo‘yilsinki:

lotereya biletlarini sotishga jalb qilingan shaxslarga sotilgan biletlar summasining ikki foizi miqdorida haq to‘lanadi;

lotereya chiqarishdan olingan mablag‘lar (lotereyani o‘tkazish bilan bog‘liq bo‘lgan barcha xarajatlarni chegirgan holda) quyidagicha taqsimlanadi:

20 foizi — respublika budjeti daromadiga;

20 foizi — “O‘zjamg‘armabank” hisob-kitob schyotiga;

20 foizi — O‘zbekbirlashuv hisob-kitob schyotiga;

15 foizi — “O‘zbeksavdo” hisob-kitob schyotiga;

10 foizi — Markaziy bank hisob-kitob schyotiga;

10 foizi — Aloqa vazirligi hisob-kitob schyotiga;

5 foizi — tegishli hududda sotilgan lotereya biletlari ulushidan kelib chiqqan holda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining hisob-kitob schyotiga.

13. Lotereya biletlarini sotishdan tushgan mablag‘lar “O‘zjamg‘armabank”ning maxsus schyotida to‘planadi. Lotereya bo‘yicha yutuqlarni to‘lash, shuningdek lotereyani chiqarish bilan bog‘liq bo‘lgan boshqa xarajatlar ushbu schyotdan amalga oshiriladi.

14. Moliya vazirligi Toshkent shahar hokimligi bilan birgalikda 1995-yilning 15-avgustigacha Vazirlar Mahkamasiga “Mustaqillik” lotereyasining yutuqlar tirajini o‘tkazuvchi komissiya tarkibi to‘g‘risida taklif kiritsin.

15. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosarlari B.S. Hamidov va M.Z. Usmonov zimmasiga yuklansin.

1. “Mustaqillik” pul-buyum lotereyasi (keyingi o‘rinlarda lotereya deb ataladi) O‘zbekiston Respublikasi mustaqilligining 4 yilligini nishonlash va respublika aholisining ishlatilmayotgan naqd pul mablag‘larini jalb etish yo‘li bilan milliy valyutani mustahkamlash maqsadida chiqariladi.

2. Moliya vazirligi, Markaziy bank, “O‘zjamg‘armabank”, Aloqa vazirligi, “O‘zbeksavdo” va O‘zbekbirlashuv lotereyaning ta’sischilari hisoblanadilar.

3. Lotereya 250 000 000 (ikki yuz ellik million) so‘mlik miqdorda chiqariladi. Mana shu miqdordagi summaga nominal qiymati 10 so‘m bo‘lgan 25 000 000 (yigirma besh million) dona lotereya bileti chiqariladi.

Lotereya biletlari har biri 6 250 000 (olti million ikki yuz ellik ming) so‘mlik bo‘lgan 40 ta alohida razryadlarga bo‘linadi.

Lotereyaning har bir razryadi 000001 dan 006250 gacha tartib raqamiga ega bo‘lgan 6250 seriyadan iborat bo‘ladi.

Har bir seriya 001 dan 100 gacha tartib raqamiga ega bo‘lgan 100 biletdan iborat bo‘ladi.

4. Lotereyaning yutuqlar tiraji 1995-yilning 29-30-avgustidan Toshkent shahrida o‘tkaziladi.

5. Lotereyaning yutuqlar miqdori 187 500 000 (bir yuz sakson yetti million besh yuz ming) so‘mni yoki lotereyani chiqarish umumiy summasining 75 foizini tashkil etadi.

Lotereyaning 40 razryadi bo‘yicha tirajda umumiy miqdori 187500000 (bir yuz sakson yetti million besh yuz ming) so‘mlik 2972000 (ikki million to‘qqiz yuz yetmish ikki ming) yutuq, shu jumladan, 158869200 (bir yuz ellik sakkiz million sakkiz yuz oltmish to‘qqiz ming ikki yuz) so‘mlik 108920 (bir yuz sakkiz ming to‘qqiz yuz yigirma) buyum yutuqlari va 28630800 (yigirma sakkiz million olti yuz o‘ttiz ming sakkiz yuz) so‘mlik 2863080 (ikki million sakkiz yuz oltmish uch ming sakson) pul yutuqlari o‘ynaladi.

6. Lotereya biletlari O‘zbekiston Respublikasi hududida “O‘zjamg‘armabank” muassasalari, O‘zbekiston Respublikasi Aloqa vazirligining aloqa bo‘limlari, savdo, matlubot kooperatsiyasi va “O‘ztayyorlovsavdo” uyushmasi korxonalari hamda shu maqsadlar uchun shartnoma asosida jalb etilgan shaxslar tomonidan sotiladi.

7. Lotereya bileti 12x7 santimetr o‘lchamli to‘g‘ri burchak shaklida bo‘lib, davlat belgisi qo‘yilgan qog‘ozdan tayyorlanadi. Lotereya biletining old tomonida O‘zbekiston Respublikasining Davlat gerbi tasviri: “O‘zbekiston — Kelajagi buyuk davlat”, “1995-yil 1-sentabr — O‘zbekiston Respublikasi mustaqilligining 4 yilligi”, “O‘zbekiston Respublikasining “Mustaqillik” pul-buyum lotereyasi”, “Lotereya bileti”, “O‘zbekiston Respublikasi Moliya vazirligi, O‘zbekiston Respublikasi Markaziy banki, “O‘zjamg‘armabank”, Aloqa vazirligi, “O‘zbeksavdo”, O‘zbekbirlashuv degan yozuvlar; “Mustaqillik” maydonining tasviri; “Biletning bahosi 10 so‘m” degan yozuv; razryad, seriya, bilet tartib raqamlari; yutuqlar tiraji o‘tkaziladigan oy va kun hamda joy qayd etilgan bo‘ladi. Lotereya biletining orqa tomonida lotereyani o‘tkazish shartlari bayon qilinadi hamda “Sizga omad tilaymiz” so‘zlari yozilgan bo‘ladi. Barcha yozuvlar o‘zbek tilida ifodalanadi.

8. Lotereya biletlarini qabul qilish, saqlash, hisobga olish va pul yutuqlarini to‘lash “O‘zjamg‘armabank” tomonidan amalga oshiriladi.

9. Buyum yutuqlarini berish va jo‘natish O‘zbekbirlashuvning Qoraqalpog‘iston Respublikasi, viloyatlar va Toshkent shahridagi ulgurji bazalari tomonidan amalga oshiriladi.

10. Buyum yutuqlari qiymati 1995-yil 1-apreldagi ulgurji-berish narxlari bo‘yicha belgilangan. Tovarlarni sotib olish vaqtida narxlar o‘zgargan hollarda, narxlardagi farq lotereya biletlarini sotishdan tushgan mablag‘lar hisobiga qoplanadi.

11. Lotereya biletlari bo‘yicha pul yutuqlari yutuqli bilet ko‘rsatilgach, “O‘zjamg‘armabank”ning barcha muassasalari tomonidan to‘lanadi.

Qiymati 3800 so‘mgacha (bu summa ham kiradi) bo‘lgan buyum yutuqlari yutuq chiqqan lotereya biletlari “O‘zjamg‘armabank” operatsiya bo‘linmalarida dastlabki tekshiruvdan o‘tkazilgandan keyin O‘zbekbirlashuv ulgurji bazalari tomonidan beriladi.

Qiymati 3800 so‘mdan ortiq bo‘lgan buyum yutuqlari yutuq chiqqan lotereya biletlari “O‘zjamg‘armabank” tomonidan ekspertizadan o‘tkazilgandan so‘ng “O‘zjamg‘armabank” topshiriqnomalari bo‘yicha, topshiriqnoma olingandan keyin 15 kun mobaynida O‘zbekbirlashuvning ulgurji bazalari tomonidan beriladi va jo‘natiladi.

Buyum yutuqlari naqd pul bilan berilmaydi.

12. Yutuq chiqqan lotereya biletlari pul yoki buyum yutug‘ini olish uchun 1996-yil 1-fevralgacha (o‘sha kun ham kiradi) taqdim etilishi mumkin. Ana shu muddatdan keyin lotereya biletlari o‘z kuchini yo‘qotadi va yutuqni berish uchun qabul qilinmaydi.