G‘o‘zani o‘z vaqtida va sifatli defoliatsiya qilish, dalalarni paxta hosilini yig‘ishtirib olishga, shu jumladan paxta terish mashinalari bilan yig‘ishtirib olishga tayyorlash maqsadida:

1. O‘zbekiston Respublikasi Qishloq va suv xo‘jaligi vazirligining Qoraqalpog‘iston Respublikasi Vazirlar Kengashi va viloyatlar hokimliklari bilan kelishilgan 2005-yilda g‘o‘za defoliatsiya qilinadigan 1-ilovaga muvofiq maydonlar va uning maqbul muddatlari to‘g‘risidagi taklifi qabul qilinsin. G‘o‘za defoliatsiya qilinadigan maydonlarni aniqlashda urug‘lik ekin maydonlari hisobga olinmasin.

2. Qoraqalpog‘iston Respublikasi Vazirlar Kengashi, viloyatlar va tumanlar hokimliklari g‘o‘zaning yetilish davri, navi, ekilgan muddatlarini hamda joylardagi harorat sharoitlarini hisobga olgan holda, tumanlar va paxta yetishtiruvchi xo‘jaliklar bo‘yicha g‘o‘zani 1-ilovaga muvofiq muddatlarda defoliatsiya qilish yuzasidan tegishli qarorlar qabul qilsinlar.

G‘o‘za o‘z vaqtida va sifatli defoliatsiya qilishni, belgilangan muddatlar va tegishli maydonlarda defoliantlarni ishlatish normalariga qat’iy rioya etilishi uchun shaxsiy javobgarlik Qoraqalpog‘iston Respublikasi Vazirlar Kengashi Raisiga, viloyatlar va tumanlar hokimlariga, O‘zbekiston Respublikasi qishloq va suv xo‘jaligi vaziriga yuklansin.

3. O‘zbekiston Respublikasining Bosh vaziri Sh.M. Mirziyoyev:

15-avgustgacha respublika ekspert komissiyasini, shuningdek Qoraqalpog‘iston Respublikasi, viloyatlar va tumanlarda ekspert komissiyalari tashkil qilsin, ularning tarkibiga Qishloq va suv xo‘jaligi vazirligi, Respublika o‘simliklarni himoya qilish va agrokimyo markazi, “O‘zpaxtasanoat” uyushmasi, O‘zbekiston “Sifat” markazi, “Qishloqxo‘jalikkimyo” hududiy aksiyadorlik jamiyatlari mutaxassislarini kiritib, ularning zimmasiga joylarda defoliatsiyaga oid jami ishlar kompleksi olib borilishi ustidan muntazam nazoratni amalga oshirish vazifasini yuklasin;

uch kun muddatda g‘o‘za defoliatsiyasini nazorat qilish va sifatini belgilash Tartibini tasdiqlasin;

defoliatsiya ishlari o‘tkazilishi ustidan qattiq nazoratni ta’minlasin va agrotexnika tadbirlarni o‘tkazish borasida belgilangan muddatlar va normalarga rioya etishni ta’minlamayotgan mansabdor shaxslarga nisbatan qattiq javobgarlik choralarini ko‘rsin.

4. Qoraqalpog‘iston Respublikasi Vazirlar Kengashi, viloyatlar hokimliklari, O‘zbekiston Respublikasi Qishloq va suv xo‘jaligi vazirligi, “O‘zkimyosanoat” va “O‘zqishloqxo‘jalikmashxolding” kompaniyalari, “Qishloqxo‘jalikkimyo” hududiy aksiyadorlik jamiyatlari, “O‘zagromashservis” uyushmasi joriy yilning 20-avgustigacha:

paxta yetishtiruvchi xo‘jaliklarga zarur miqdordagi defoliantlar yetkazib berilishini ta’minlasinlar;

defoliatsiyani yerda bajariladigan usullar bilan o‘tkazish uchun texnik vositalar va apparatlar tayyorlanishini tugallasinlar;

maydonchalarni tayyorlashni taxt qilib qo‘ysinlar va ularda defoliantlar eritmasini tayyorlash uchun zarur idishlar va boshqa texnik vositalar mavjud bo‘lishini ta’minlasinlar.

5. “O‘zbekiston havo yo‘llari” milliy aviakompaniyasi O‘zbekiston Respublikasi Qishloq va suv xo‘jaligi vazirligining buyurtmanomalarni bo‘yicha g‘o‘za defoliatsiyasini o‘tkazish uchun samolyotlar ajratsin va ularning mintaqalarga 2-ilovaga muvofiq 2005-yil 22-avgustgacha yetib borishini ta’minlasin.

Viloyatlar hokimliklari maxsus aerodromlar tayyorlanishini, shu jumladan uchuvchilar uchun zarur maishiy shart-sharoitlar yaratilishini tugallasinlar.

6. “O‘zneftmahsulot” kompaniyasi yonilg‘i-moylash materiallarining zarur zaxirasini yaratsin hamda purkagichlar va samolyotlar ishini ta’minlash uchun g‘o‘zani defoliatsiya qilish davrida ularning belgilangan tartibda uzluksiz yetkazib berilishini tashkil etsin.

7. O‘zbekiston Respublikasi Moliya vazirligi, Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi bir hafta muddatda, asosli buyurtmanomalarga binoan tijorat banklariga qishloq xo‘jaligi korxonalari uchun g‘o‘za defoliatsiyasini o‘tkazishga zarur kredit mablag‘larini, kelgusida ulardan defoliantlar xarid qilish hamda “Qishloqxo‘jalikkimyo” hududiy aksiyadorlik jamiyatlari va “SAR” aviakompaniyasi xizmatlariga haq to‘lash uchun foydalanish maqsadida, belgilangan tartibda ajratib bersin.

8. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.