Ishlab chiqarish quvvatlaridan yanada toʻliq foydalanish va yangi korxonalar qurilishi hisobiga mahsulot ishlab chiqarish hajmlari uzluksiz oʻsib borayotgan sharoitlarda respublikaning rivojlanayotgan xalq xoʻjaligini elektr energiyasi bilan taʼminlashning ishonchliligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Energetika va elektrlashtirish vazirligining 800 ming kVt quvvatga ega boʻlgan Tolimarjon GRESining 1-energiya blokida qurilish-montaj ishlarini 1998-yilda tugallash va ishga tushirish-sozlash ishlarini 1999-yilning II choragida bajarish toʻgʻrisidagi taklifi qabul qilinsin.

2. Oʻzbekiston Respublikasi Energetika va elektrlashtirish vazirligi 1-energiya blokini montaj qilish va ishga tushirish-sozlash ishlarining tugallanishini taʼminlovchi ishga tushiriladigan kompleksning 1-ilovaga* muvofiq qurilayotgan obyektlarini asbob-uskunalar, qurilish konstruksiyalari va materiallari bilan butlash tadbirlarini va yiriklashtirilgan jadvallarini bir oy muddatda ishlab chiqsin va tasdiqlasin.

3. Oʻzbekiston Respublikasi Tashqi iqtisodiy aloqalar vazirligi Oʻzbekiston Respublikasi Energetika va elektrlashtirish vazirligining vakolatli tashkilotlari tomonidan taqdim etiladigan kontraktlar va shartnomalarning belgilangan tartibda tezkorlik bilan koʻrib chiqilishini va roʻyxatdan oʻtkazilishini taʼminlasin.

4. Oʻzbekiston Respublikasi Energetika va elektrlashtirish vazirligiga uning montaj va ishga tushirish-sozlash ishlari, murakkab texnologiya asbob-uskunalarini taftish qilish va modernizatsiyalash, Tolimarjon GRES 1-energiya blokini ishga tushirish va foydalanish rejimini ishlab chiqishda qatnashish, mahalliy xodimlarni oʻqitish va tayyorlash uchun quvvati 800 ming kVt boʻlgan bloklarda ishlash tajribasiga ega boʻlgan ixtisoslashtirilgan tashkilotlarni yuqori malakali xodimlari bilan birgalikda MDH mamlakatlaridan kontraktlar boʻyicha tender asosida jalb qilishga, shuningdek stansiya xodimlarini stajirovkadan oʻtkazish va oʻqitish uchun MDH mamlakatlarining xuddi shunday stansiyalariga yuborishiga ruxsat etilsin.

5. Tolimarjon GRESining 1-energiya bloki qurilishi ishlarini muvofiqlashtirish uchun 2-ilovaga* muvofiq tarkibda Respublika shtabi tashkil etilsin. Respublika shtabi Tolimarjon GRESida ishlarni bajarish uchun respublika korxonalari va tashkilotlarini, ular qaysi idoraga boʻysunishidan qatʼi nazar jalb etsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. X. Joʻrabekov zimmasiga yuklansin.