Eksportga mo‘ljallangan mahsulotlar ishlab chiqarish va respublikaning kalsiylangan hamda kaustik sodaga bo‘lgan ehtiyojini qondirish maqsadida Vazirlar Mahkamasi qaror qiladi:

1. “Mannesman Zifert GmbX”, “Shtork Komprimo SKL GmbX”, “Vemeks Xandel GmbX” firmalaridan iborat Germaniya firmalari konsorsiumining:

160 ming tonna kalsiylangan soda va 150 ming tonna kaustik soda ishlab chiqaruvchi loyiha quvvatlari yaratilishini ko‘zda tutuvchi Qo‘ng‘irot soda zavodi loyihasining texnik-iqtisodiy asoslanishini ishlab chiqishni tugatganligi;

texnologiya qurilmalarini foydalanishga tayyor, kafolatlangan ko‘rsatkichlarga chiqargan holda mukammal loyihalashni, asbob-uskunalar yetkazib berishni, qurish va ishga tushirishni o‘z zimmasiga olganligi;

jalb qilinayotgan xorijiy kreditlar qisman to‘lanishini ta’minlash uchun zavod ishlab chiqaradigan mahsulotning kamida 50 foizini jahon bozorida sotish majburiyatini olganligi ma’lumot uchun qabul qilinsin.

2. Qo‘ng‘irot soda zavodini loyihalash va qurish jadvali ilovaga* muvofiq tasdiqlansin.

3. O‘zbekiston Respublikasi Tashqi iqtisodiy faoliyat milliy banki va “Berliner bank” (Germaniya)ning:

zavodning texnologiya qismi bazaviy loyihasini ishlab chiqish bo‘yicha xizmatlarga “Berliner bankning “O‘zkimyosanoat” uyushmasiga qayta moliyalanadigan O‘zbekiston Respublikasi Tashqi iqtisodiy faoliyat milliy bankiga kredit liniyasi hisobiga haq to‘lanishini;

import bo‘yicha texnologiya asbob-uskunalari va materiallar yetkazib berish, obyekt qurilishi bo‘yicha injiniring ishlarini olib borish xarajatlarini kreditlash uchun “Germes” sug‘urta jamiyatini va boshqa mamlakatlarning eksport-sug‘urta agentliklarini jalb qilishni nazarda tutuvchi loyihani mablag‘ bilan ta’minlashni birgalikda tashkil etish to‘g‘risidagi taklifi ma’qullansin.

4. O‘zbekiston Respublikasi Vazirlar Mahkamasining Investitsiya dasturlari departamenti “O‘zkimyosanoat” uyushmasini, Makroiqtisodiyot va statistika vazirligini, Moliya vazirligini, Tashqi iqtisodiy aloqalar vazirligini va Tashqi iqtisodiy faoliyat milliy bankini jalb qilgan holda konsorsium tomonidan taqdim etilgan loyihaning texnik-iqtisodiy asoslanishini 1998-yil 10-maygacha ko‘rib chiqsin va uning O‘zbekiston Respublikasi Vazirlar Mahkamasi tomonidan tasdiqlanishi yuzasidan taklif kiritsin.

5. “O‘zkimyosanoat” uyushmasi:

1998-yil 20-maygacha konsorsiumga zavodning texnologiya qismi bazaviy loyihasi ishlab chiqilishi uchun topshiriq bersin va kontraktni imzolasin;

foydalanishga tayyor holda topshirish sharti bilan zavodning texnologiya qismi qurilishi yuzasidan, keyinchalik bazaviy loyiha tasdiqlangandan so‘ng kontraktning asosiy ko‘rsatkichlarini, shu jumladan, uning qiymatini aniqlagan holda, chegaralangan kontraktni bir oy muddatda ishlab chiqsin va tuzsin.

6. O‘zbekiston Respublikasi Tashqi iqtisodiy aloqalar vazirligi zavodning bazaviy loyihasini ishlab chiqish yuzasidan kontraktni belgilangan tartibda ro‘yxatdan o‘tkazsin.

7. O‘zbekiston Respublikasi Tashqi iqtisodiy faoliyat milliy banki bir oy muddatda:

loyihaning texnologiya qismini mablag‘ bilan ta’minlashni birgalikda tashkil etish yuzasidan “Berliner bank” bilan chegaralangan bitim tuzsin;

zavodning texnologiya qismi bazaviy loyihasi ishlab chiqilishini mablag‘ bilan ta’minlash uchun “Berliner bank” bilan kredit bitimi tuzsin va mablag‘larni “O‘zkimyosanoat” uyushmasiga qayta moliyalashtirsin.

8. Belgilab qo‘yilsinki, zavodning texnologiya qismi bazaviy loyihasi ishlab chiqilishi uchun olingan kredit mazkur loyiha bo‘yicha investitsiya dasturida ko‘zda tutiladigan budjet mablag‘lari hisobidan qaytariladi.

9. O‘zbekiston Respublikasi Moliya vaziri zavodning texnologiya qismi bazaviy loyihasi ishlab chiqilishi uchun jalb qilinayotgan valyuta krediti yuzasidan O‘zbekiston Respublikasi Hukumatining kafolatini belgilangan tartibda “Berliner bank”ka va O‘zbekiston Respublikasi Milliy bankiga berishi vakil qilinsin.

10. Adliya vazirligi O‘zbekiston Respublikasi Hukumati kafolatlariga oid yuridik xulosalarni amaldagi qonunchilikka muvofiq rasmiylashtirsin.

11. O‘zbekiston Respublikasi Tashqi ishlar vazirligi “O‘zkimyosanoat” uyushmasi buyurtmanomalariga ko‘ra vizalarni rasmiylashtirganlik uchun konsullik yig‘imlari to‘lashdan ozod qilgan holda konsorsiumga kiruvchi kompaniyalarning xodimlariga ko‘p martalik kirish vizalari belgilangan tartibda berilishini ta’minlasin.

12. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari I.H. Jo‘rabekov zimmasiga yuklansin.