Oʻzbekiston Respublikasi Prezidentining “Vazirlar Mahkamasining tuzilmasiga Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri lavozimini kiritish toʻgʻrisida” 2009-yil 13-noyabrdagi PQ-1226-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri – Oʻzbekiston Respublikasi Vazirlar Mahkamasining Tashqi iqtisodiy faoliyat, xorijiy investitsiyalarni jalb etish va ishlab chiqarishni mahalliylashtirish masalalari kompleksi rahbarining maqomi va vazifalari toʻgʻrisidagi Nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari E.M. Gʻaniyev zimmasiga hamda Vazirlar Mahkamasining Tashqi iqtisodiy faoliyat, xorijiy investitsiyalarni jalb etish va ishlab chiqarishni mahalliylashtirish masalalari axborot-tahlil departamentiga yuklansin.

1. Ushbu Nizom Oʻzbekiston Respublikasi Prezidentining “Vazirlar Mahkamasining tuzilmasiga Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri lavozimini kiritish toʻgʻrisida” 2009-yil 13-noyabrdagi PQ-1226-son qaroriga muvofiq ishlab chiqilgan hamda yangidan joriy etilayotgan Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri lavozimining maqomi va vazifalarini belgilaydi.

2. Oʻzbekiston Respublikasi Bosh vazirining oʻrinbosari – Tashqi iqtisodiy aloqalar, investitsiyalar va savdo vaziri maqomiga koʻra Oʻzbekiston Respublikasi Hukumatining aʼzosi hisoblanadi, Oʻzbekiston Respublikasi Vazirlar Mahkamasi Prezidiumi tarkibiga kiradi.

3. Oʻzbekiston Respublikasi Vazirlar Mahkamasi va uning Prezidiumi majlislarida bevosita ishtirok etadi. Oʻz faoliyati toʻgʻrisida Oʻzbekiston Respublikasi Prezidentiga va Oʻzbekiston Respublikasining Bosh vaziriga hisobot beradi.

4. Vazirlar Mahkamasining Tashqi iqtisodiy faoliyat, xorijiy investitsiyalarni jalb etish va ishlab chiqarishni mahalliylashtirish masalalari kompleksiga rahbarlik qiladi.

5. Quyidagilar Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vazirining asosiy vazifalari hisoblanadi:

Tashqi iqtisodiy aloqalar, investitsiyalar va savdo vazirining lavozim vazifalarini soʻzsiz bajarish;

yagona tashqi iqtisodiy siyosatning oʻtkazilishini, birinchi navbatda, tashqi savdo aylanmasining balanslanganligini kuchaytirish, eksport salohiyatini kengaytirish, Oʻzbekiston Respublikasiga tovarlar va xizmatlar importi hajmlari va tarkibini maqbullashtirish boʻyicha taʼminlash;

Oʻzbekiston Respublikasi hududida tashqi iqtisodiy faoliyatni amalga oshiruvchi vazirliklar, idoralar, tijorat tuzilmalari, kompaniyalar, uyushmalar, firmalar, korxonalar va tashkilotlar ishlarining muvofiqlashtirilishi va kelishilishini taʼminlash, buning uchun zarur shart-sharoitlar va preferensiyalar yaratish;

mamlakatni rivojlantirishning strategik maqsadlaridan va jahon bozoridagi konyunkturaning oʻzgarishi tahlilidan kelib chiqqan holda xorijiy davlatlar, xalqaro moliya va iqtisodiyot institutlari, xorijiy kompaniyalar, firmalar va banklar bilan tashqi iqtisodiy hamda tashqi savdo hamkorligining ustuvor vazifalari boʻyicha takliflar ishlab chiqish;

mamlakatimiz oldida turgan strategik vazifalarga erishish ishlarida oʻtkazilayotgan tashqi iqtisodiy siyosatning rolini kuchaytirish va samaradorligini oshirish;

iqtisodiyotni modernizatsiya qilish, ishlab chiqarishni texnik va texnologik jihatdan qayta jihozlash uchun xorijiy investitsiyalar va grantlarni jalb etish;

tashqi savdo aylanmasi tarkibini yanada maqbullashtirish va ishlab chiqarishning mahalliylashtirilishini chuqurlashtirish;

investitsiya va tashqi savdo shartnomalari (kontraktlari) loyihalari ishlab chiqilishini muvofiqlashtirish, maʼlumotlarning tizimlashtirilgan banki shakllantirilishini va yuritilishini taʼminlash, Oʻzbekiston Respublikasi Prezidentining xorijiy davlatlarga tashriflari, shuningdek xorijiy davlatlar va hukumatlar, xalqaro tashkilotlar boshliqlarining Oʻzbekiston Respublikasiga tashriflari davomida imzolangan investitsiya va tashqi savdo shartnomalari monitoringini olib borish.

6. Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri:

Tashqi iqtisodiy faoliyat, xorijiy investitsiyalarni jalb etish va ishlab chiqarishni mahalliylashtirish masalalari axborot-tahlil departamenti faoliyatiga bevosita rahbarlik qiladi;

Idoralararo bojxona — tarif Kengashi (IBTK)ning, Jahon savdo tashkiloti bilan ishlash boʻyicha Idoralararo komissiyaning, shuningdek boshqa komissiyalarning ishlarini boshqaradi;

Tashqi iqtisodiy aloqalar, investitsiyalar va savdo vazirligining tashqi savdo kompaniyalari rahbarlarini lavozimga tayinlash va lavozimdan ozod qilish yuzasidan takliflarini koʻrib chiqadi;

Oʻzbekiston Respublikasi Davlat bojxona qoʻmitasi, “Oʻzbekturizm” milliy kompaniyasi, shuningdek vazirliklar, davlat qoʻmitalari, idoralar, xoʻjalik birlashmalari, korxonalar, mahalliy davlat hokimiyati organlari va boshqa tashkilotlarning tashqi iqtisodiy faoliyatiga mutasaddilik qiladi;

davlat va xoʻjalik boshqaruvi organlari, mahalliy davlat hokimiyati organlari, boshqa organlar va tashkilotlarning rahbarlari va vakillari ishtirokida xorijiy mamlakatlar bilan tashqi iqtisodiy aloqalarni rivojlantirish, respublikaning eksport salohiyatini kengaytirish, tovarlar va xizmatlar eksporti boʻyicha belgilangan vazifalarni bajarish, tashqi savdo aylanmasini koʻpaytirish va uning tarkibini maqbullashtirish, ishlab chiqarishni mahalliylashtirish, ishlab chiqarishni modernizatsiya qilish va texnologik jihatdan qayta jihozlash maqsadida xorijiy investitsiyalarni jalb etish masalalari boʻyicha yakuniy va muntazam yigʻilishlar oʻtkazadi;

Oʻzbekiston Respublikasi Bosh vazirining topshiriqlariga binoan respublikaning alohida olingan mintaqalarida ijtimoiy-iqtisodiy rivojlantirish ustuvor vazifalari va dasturlarining, iqtisodiy islohotlarning bajarilishini muvofiqlashtiradi.

7. Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vazirining oʻz tasarrufidagi masalalar boʻyicha topshiriqlarining vazirliklar, davlat qoʻmitalari, idoralar, xoʻjalik birlashmalari, korxonalar va boshqa tashkilotlar rahbarlari tomonidan bajarilishi majburiydir.

8. Oʻzbekiston Respublikasi Bosh vazirining oʻrinbosari — Tashqi iqtisodiy aloqalar, investitsiyalar va savdo vaziri oʻz zimmasiga yuklangan vazifalarning bajarilishi uchun qonun hujjatlarida belgilangan tartibda javob beradi.