O‘sib kelayotgan yosh avlodni jismoniy tarbiya va sportning suv turlari bilan shug‘ullanishga yanada ommaviy jalb etish, suzish havzalari tarmog‘ini kengaytirish va ularning moddiy-texnik bazasini mustahkamlash, foydalanish-texnik holatini zamonaviy standartlarga hamda xavfsizlik talablariga muvofiqlashtirish maqsadida:

1. O‘zbekiston Respublikasi Xalq ta’limi vazirligi, Sog‘liqni saqlash vazirligi, Madaniyat va sport ishlari vazirligi, Iqtisodiyot vazirligi, Moliya vazirligi, Davlat arxitektura va qurilish qo‘mitasi tomonidan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ishlab chiqilgan 2008 — 2012-yillarda suzish havzalarini rekonstruksiya qilish hamda mukammal ta’mirlash Dasturi, shuningdek, 2008-yilda suzish havzalarini rekonstruksiya qilish hamda mukammal ta’mirlash manzilli dasturi 1 va 2-ilovalarga* muvofiq tasdiqlansin.

2. Xo‘jalik birlashmalari va korxonalarning ular tomonidan 2008-yilda O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasiga 2008-yil uchun nazarda tutilgan loyihalarni, suzish havzalarini rekonstruksiya qilish hamda mukammal ta’mirlash ishlarini moliyalashtirish uchun 3-ilovaga* muvofiq qo‘shimcha homiylik yordamini yo‘naltirish to‘g‘risidagi takliflari ma’qullansin.

3. O‘zbekiston Respublikasi Iqtisodiyot vazirligi, Moliya vazirligi, O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi, Madaniyat va sport ishlari vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

suzish havzalarini rekonstruksiya qilish hamda mukammal ta’mirlashning tasdiqlangan parametrlari belgilangan muddatlarda samarali va sifatli bajarilishini ta’minlasin;

har yili Investitsiya dasturi loyihasi va qurilishlarning manzilli ro‘yxatlarini shakllantirishda suzish havzalarining aniq soni hamda ro‘yxatini ularni rekonstruksiya qilish hamda mukammal ta’mirlash bo‘yicha ishlarni, zarur uskuna va anjomlar bilan jihozlashni moliyalashtirish hajmlarini belgilagan holda ko‘rsatsin.

4. Ma’lumot uchun qabul qilinsinki, O‘zbekiston Respublikasi Davlat arxitektura va qurilish qo‘mitasi tomonidan barcha manfaatdor vazirliklar hamda idoralar bilan kelishilgan holda xavfsizlik talablariga to‘liq javob beradigan va eng yaxshi xorijiy andoza hamda xalqaro standartlarga mos keladigan suzish havzalarining uchta namunaviy loyihasi ishlab chiqildi va tasdiqlandi.

5. Belgilansinki:

suzish havzalarini rekonstruksiya qilish hamda mukammal ta’mirlash ishlarini olib borish bo‘yicha buyurtmachi vazifalari Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining yagona buyurtmachi xizmatlari zimmasiga yuklanadi;

suzish havzalarini rekonstruksiya qilish hamda mukammal ta’mirlashning asosiy mezoni ularning foydalanish-texnik holatini zamonaviy standartlarga va foydalanish xavfsizligi talablariga mos holga keltirish hisoblanadi;

mazkur Qarorga muvofiq pudrat qurilish ishlari faqat budjet tashkilotlari balansida bo‘lgan havzalarda olib boriladi.

6. O‘zbekiston Respublikasi Xalq ta’limi vazirligi huzuridagi Bolalar sportini rivojlantirish jamg‘armasi Sog‘liqni saqlash vazirligi, Madaniyat va sport ishlari vazirligi, Davlat arxitektura va qurilish qo‘mitasi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2008-yil uchun nazarda tutilgan obyektlar bo‘yicha quyidagilarni ta’minlasin:

2008-yil 15-iyungacha bo‘lgan muddatda — suzish havzalarini rekonstruksiya qilish hamda mukammal ta’mirlash bo‘yicha loyiha ishlarini va davlat ekspertizasi o‘tkazilishini yakunlash;

2008-yil 1-avgustgacha bo‘lgan muddatda — ijtimoiy soha obyektlarini qurish bo‘yicha ixtisoslashtirilgan pudrat tashkilotlari orasida suzish havzalarini rekonstruksiya qilish hamda mukammal ta’mirlash ishlari ijrochilarini saralab olish bo‘yicha tanlov savdolari o‘tkazilishini nihoyasiga yetkazish;

tanlov savdolari natijalari tasdiqlangandan so‘ng o‘n kun muddatda — tanlov savdolari g‘oliblari bilan pudrat shartnomalari tuzish va obyektlarni rekonstruksiya qilish hamda mukammal ta’mirlash uchun moliyalashni ochish.

7. Quyidagilar:

1-ilovada* ko‘rsatilgan parametrlarga qat’iy rioya qilgan holda, rekonstruksiya qilinishi hamda mukammal ta’mirlanishi lozim bo‘lgan suzish havzalarini bir toifadagi qayta tiklash ishlaridan boshqa toifaga o‘tkazish;

moliyalanish manbaidan qat’i nazar, namunaviy loyihalar qo‘llanilmasdan va tasdiqlangan qurilish normalari hamda standartlariga, shuningdek, foydalanish xavfsizligi talablariga muvofiq bo‘lmagan suzish havzalarini qurish, rekonstruksiya qilish va mukammal ta’mirlash qat’iyan taqiqlansin.

8. O‘zbekiston Respublikasi Davlat arxitektura va qurilish qo‘mitasi:

manzilli dasturga kiritilgan suzish havzalarini rekonstruksiya qilish hamda mukammal ta’mirlash bo‘yicha loyiha hujjatlari va ishlarning sifati ustidan arxitektura-qurilish nazoratini amalga oshirsin;

suzish havzalarini rekonstruksiya qilish hamda mukammal ta’mirlash Dasturini amalga oshirishda qatnashayotgan pudratchi tashkilotlar tomonidan tanlov savdolari natijalari bo‘yicha tuzilgan shartnomalarga muvofiq qabul qilingan majburiyatlar bajarilishining qat’iy monitoringini ta’minlasin.

9. Mazkur Qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari N.M. Xanov zimmalariga yuklansin.