LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
2009-yilgi boshoqli don ekinlari hosilidan bo‘shaydigan yerlar o‘z vaqtida va sifatli shudgor qilinishini ta’minlash, kelgusi yil hosili uchun qulay shart-sharoitlar yaratish maqsadida:
1. O‘zbekiston Respublikasi Qishloq va suv xo‘jaligi vazirligining 2009-yilgi boshoqli don ekinlari hosili o‘rib-yig‘ib olingandan keyin o‘tkaziladigan shudgorlash ishlarining ilovaga* muvofiq hajmlari va muddatlari bo‘yicha Qoraqalpog‘iston Respublikasi Vazirlar Kengashi hamda viloyat hokimliklari bilan kelishilgan taklifiga rozilik berilsin.
* Ilova rus tilidagi matnda berilgan.
Belgilansinki, Qoraqalpog‘iston Respublikasi Vazirlar Kengashining Raisi, viloyatlar va tumanlar hokimlari, O‘zbekiston Respublikasi Qishloq va suv xo‘jaligi vazirligi, “Yergeodezkadastr” Davlat qo‘mitasi, “O‘zagromashservis” uyushmasi rahbarlari shudgorlash ishlarining o‘z vaqtida tashkil etilishi va sifatli o‘tkazilishi, hisobotning buzib ko‘rsatilishiga yo‘l qo‘yilmasligi uchun shaxsan javobgardirlar.
O‘zbekiston Respublikasi Bosh prokuraturasi boshoqli don ekinlari o‘rib-yig‘ib olingandan keyin shudgorlash ishlari mazkur Qarorning ilovasiga qat’iy muvofiq belgilangan hajmlar va muddatlarda o‘tkazilishi ustidan nazoratni ta’minlasin. Aybdor shaxslarga nisbatan qonun hujjatlarida ko‘zda tutilgan qattiq javobgarlik choralari ko‘rilsin.
2. “O‘zagromashservis” uyushmasi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda ikki hafta muddatda 2009-yilgi boshoqli don ekinlari hosili yig‘ishtirib olingandan keyin shudgorlash ishlarini o‘tkazish to‘g‘risida mashina-traktor parklari, fermer xo‘jaliklari, shuningdek, mulkchilik shakli va idoraviy bo‘ysunuvidan qat’i nazar, boshqa tashkilotlar hamda idoralar o‘rtasida shartnomalar tuzilishini ta’minlasin.
3. Qoraqalpog‘iston Respublikasi Vazirlar Kengashi va viloyatlar hokimliklari O‘zbekiston Respublikasi Qishloq va suv xo‘jaligi vazirligi, “O‘zagromashservis” uyushmasi bilan birgalikda:
bir hafta muddatda zarur resurslar bilan ta’minlanganlikni hamda yer fondidan yanada samarali foydalanishni hisobga olgan holda tumanlar va xo‘jaliklar bo‘yicha shudgorlash ishlarini o‘tkazish jadvallarini tuzsin va tasdiqlasin;
shudgorlash ishlarini o‘tkazish uchun mo‘ljallangan maydonlarda poxol yig‘ishtirib olinishini tashkil qilsin;
mulkchilik shakli va idoraviy bo‘ysunuvidan qat’i nazar, shartnoma asosida boshqa korxonalar hamda tashkilotlarning haydov agregatlarini jalb etsin;
haydov agregatlarining ikki smenada ishlashini va ulardan otryadlar tashkil etish usuli bilan samarali foydalanishni tashkil etsin.
xo‘jaliklar va mashina-traktor parklarining buyurtmanomalari asosida ehtiyot qismlar yetkazib berishni, shuningdek ko‘chma ta’mirlash ustaxonalarining uzluksiz ishlashini ta’minlasin.
Yerni shudgorlashning sifat ko‘rsatkichlariga erishishni rag‘batlantirishga alohida e’tibor berilsin.
4. O‘zbekiston Milliy teleradiokompaniyasi, O‘zbekiston Milliy axborot agentligi O‘zbekiston Respublikasi Davlat tabiatni muhofaza qilish qo‘mitasi bilan birgalikda poxolni yoqishdan kelib chiqadigan zarar va noxush oqibatlarni keng tushuntirish bo‘yicha kompleks chora-tadbirlar amalga oshirilishini ta’minlasin.
5. “O‘zneftmahsulot” aksiyadorlik kompaniyasi yonilg‘i-moylash materiallarining zarur zaxirasini yaratsin hamda shudgorlash ishlarida qatnashuvchi mashina-traktor parklariga, qishloq xo‘jalik korxonalariga dizel yonilg‘isi qiymatining 60 foizi oldindan to‘langandan keyin ularga yonilg‘i-moylash materiallari uzluksiz yetkazib berilishini ta’minlasin.
6. Ushbu Qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.