Xalqaro talablar va standartlarga javob beradigan, O‘zbekiston milliy avtomagistrali tarkibiga kiruvchi I toifali to‘rt yo‘lakli xalqaro avtomobil yo‘llarini qurish hamda rekonstruksiya qilish yo‘li bilan respublikaning barcha mintaqalarini ishonchli birlashtiradigan yagona milliy transport tizimini yaratish, uning negizida avtotransportda yuk tashish hajmlarini ko‘paytirish va samaradorligini oshirish, yangi ish joylarini shakllantirish hamda aholining bandligi oshirilishini ta’minlash maqsadida:

1. O‘zbekiston Respublikasi Iqtisodiyot vazirligi, Moliya vazirligi, Respublika yo‘l jamg‘armasi va “O‘zavtoyo‘l” DAK tomonidan ishlab chiqilgan 2009 — 2014-yillarda O‘zbekiston milliy avtomagistralini rekonstruksiya qilish va rivojlantirishning quyidagilarni o‘z ichiga oladigan parametrlari:

“O‘zbekiston milliy avtomagistrali” loyihasini amalga oshirishning birinchi navbatdagi chora-tadbirlari kompleksi 2-ilovaga* muvofiq ma’qullansin.

2009 — 2014-yillarda O‘zbekiston milliy avtomagistralini rivojlantirish bo‘yicha tasdiqlangan parametrlar to‘liq hajmda hamda belgilangan muddatlarda amalga oshirilishini ta’minlash uchun shaxsiy javobgarlik O‘zbekiston Respublikasi Moliya vazirligi huzuridagi Respublika yo‘l jamg‘armasi ijrochi direktori va “O‘zavtoyo‘l” DAK raisi zimmasiga yuklansin.

2. Quyidagilar:

O‘zbekiston milliy avtomagistrali tarkibiga kiruvchi avtomobil yo‘llari uchastkalarini qurish va rekonstruksiya qilish bo‘yicha buyurtmachi etib — O‘zbekiston Respublikasi Moliya vazirligi huzuridagi Respublika yo‘l jamg‘armasi;

O‘zbekiston milliy avtomagistrali tarkibiga kiruvchi avtomobil yo‘llari uchastkalarini qurish va rekonstruksiya qilish bo‘yicha zarur hujjatlarni ishlab chiqish bo‘yicha bosh loyihalovchi tashkilot etib — “Yo‘l loyiha byurosi” MChJ loyiha instituti;

O‘zbekiston milliy avtomagistrali tarkibiga kiruvchi va Qoraqalpog‘iston Respublikasi hamda viloyatlardan o‘tadigan avtomobil yo‘llari uchastkalarini qurish va rekonstruksiya qilish bo‘yicha bosh pudrat tashkilotlari etib — “O‘zavtoyo‘l” DAKning tegishli hududiy bo‘linmalari belgilansin.

Shunday tartib o‘rnatilsinki, unga muvofiq xalqaro va xorijiy hukumat moliya tashkilotlarining kredit mablag‘lari hisobidan moliyalashtiriladigan avtomobil yo‘llari uchastkalari bo‘yicha bosh pudrat tashkiloti tuzilgan xalqaro shartnomaga muvofiq tanlov asosida aniqlanadi.

3. O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Moliya vazirligi bilan birgalikda:

uch oy muddatda O‘zbekiston milliy avtomagistralini rekonstruksiya qilish va rivojlantirish loyihasi amalga oshirilishini jadallashtirish uchun xalqaro moliya institutlarining mablag‘larini, ushbu mablag‘larni faqat sement-beton qoplamali uchastkalar qurilishiga maqsadli yo‘naltirgan holda jalb etish masalalarini ishlab chiqsin;

6 to‘plamdan iborat ixtisoslashtirilgan mobil asfalt-beton komplekslarini O‘zbekiston Respublikasi Tiklanish va taraqqiyot jamg‘armasining O‘zbekiston Respublikasi Moliya vazirligi huzuridagi Respublika yo‘l jamg‘armasi resurslaridan 5 yil davomida to‘lanadigan kredit mablag‘lari hisobiga 2010-yilning birinchi choragida yetkazib berilishini hisobga olgan holda ularni xarid qilish bo‘yicha belgilangan tartibda tender savdolari o‘tkazilishini ta’minlasin.

4. O‘zbekiston Respublikasi Iqtisodiyot vazirligi, Moliya vazirligi, Tashqi iqtisodiy aloqalar, investitsiyalar va savdo vazirligi har yili O‘zbekiston Respublikasi Investitsiya dasturini shakllantirishda O‘zbekiston milliy avtomagistrali tarkibiga kiruvchi avtomobil yo‘llarini qurish va rekonstruksiya qilish obyektlari mazkur Qarorga 1-ilovaga* muvofiq belgilangan tartibda Investitsiya dasturiga kiritilishini ta’minlasin.

5. “Davarxitektqurilish” qo‘mitasi, O‘zbekiston Respublikasi Ichki ishlar vazirligi Iqtisodiyot vazirligi, Moliya vazirligi, Qoraqalpog‘iston Respublikasi Vazirlar Kengashi, viloyatlar hokimliklari, “O‘zavtoyo‘l” DAK va boshqa manfaatdor vazirliklar hamda idoralar bilan birgalikda 2009-yil 1-avgustgacha motellar va kempinglar, AYQSh, avtomobillarga texnik xizmat ko‘rsatish stansiyalari hamda boshqa obyektlarning yagona me’moriy qiyofasini hisobga olgan holda, aniq investorlarni va ularni moliyalashtirish manbalarini belgilash bilan ularning kompleks qurilishini nazarda tutuvchi O‘zbekiston milliy avtomagistrali bo‘ylab yo‘l infratuzilmasi va servisini rivojlantirish dasturi loyihasini tasdiqlash uchun Vazirlar Mahkamasiga kiritsin.

6. “Davarxitektqurilish” qo‘mitasi 2009 — 2014-yillarda O‘zbekiston milliy avtomagistralini rekonstruksiya qilish va rivojlantirish loyihasini amalga oshirishning butun davri ichida bajarilayotgan yo‘l-qurilish ishlari, shuningdek xalqaro va milliy talablarga muvofiq darajada qo‘llanadigan qurilish materiallari sifati ustidan tizimli nazorat o‘rnatsin.

7. Mazkur Qarorning bajarilishini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.