O‘zbekiston Respublikasi Prezidentining 2008-yil 15-iyuldagi “Innovatsion loyihalar va texnologiyalarni ishlab chiqarishga tatbiq etishni rag‘batlantirish borasidagi qo‘shimcha chora-tadbirlar to‘g‘risida”gi PQ–916-sonli qarorining 6-bandiga muvofiq (O‘zbekiston Respublikasi qonun hujjatlari to‘plami, 2008-yil, 29-30-son, 280-modda) O‘zbekiston Respublikasi Moliya vazirligi, Iqtisodiyot vazirligi va Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qo‘mitasi qaror qiladi:

1. Xo‘jalik boshqaruv organlari va korxonalarning modernizatsiya va yangi texnologiyalar jamg‘armasi to‘g‘risidagi nizom ilovaga muvofiq tasdiqlansin.

2. Mazkur qaror O‘zbekiston Respublikasi Adliya vazirligida davlat ro‘yxatidan o‘tkazilgandan o‘n kundan so‘ng kuchga kiradi.

Mazkur Nizom O‘zbekiston Respublikasi Prezidentining 2008-yil 15-iyuldagi “Innovatsion loyihalar va texnologiyalarni ishlab chiqarishga tatbiq etishni rag‘batlantirish borasidagi qo‘shimcha chora-tadbirlar to‘g‘risida”gi PQ–916-sonli qaroriga muvofiq (O‘zbekiston Respublikasi qonun hujjatlari to‘plami, 2008-yil, 29-30-son, 280-modda) xo‘jalik boshqaruv organlari va korxonalar (keyingi o‘rinlarda — xo‘jalik yurituvchi subyekt) tomonidan ilmiy-amaliy tadqiqotlarni, innovatsion loyihalarni ishlab chiqish, tajriba-konstruktorlik ishlari va ularni ishlab chiqarish jarayoniga joriy qilish ishlarini moliyalashtirish uchun tashkil qilingan modernizatsiya va yangi texnologiyalar jamg‘armasi (keyingi o‘rinlarda — Jamg‘arma) mablag‘larini shakllantirish va foydalanish tartibini belgilaydi.

1. Jamg‘arma faqat ilmiy-amaliy tadqiqotlar va innovatsion texnologiyalar yutuqlaridan foydalangan holda, tovar (ishlar, xizmatlar) ishlab chiqarish jarayonini modernizatsiya qilayotgan xo‘jalik yurituvchi subyektlardagina tashkil qilinadi.

2. Jamg‘arma mablag‘lari quyidagilar hisobiga shakllanadi:

xo‘jalik yurituvchi subyektlarning sof foydasi va amortizatsiya ajratmalarining bir qismidan;

buyurtmachilarning maqsadli tushumlaridan.

Bunda, jamg‘armani shakllantiruvchi ajratmalarning miqdori xo‘jalik yurituvchi subyekt tomonidan mustaqil belgilanadi.

3. Mazkur Nizomning 2-bandida ko‘rsatilgan Jamg‘armaning mablag‘larini to‘plash xo‘jalik yurituvchi subyekt tomonidan unga xizmat ko‘rsatadigan tijorat banklaridan birida ochiladigan maxsus hisob raqamida amalga oshiriladi.

4. Jamg‘arma boshqaruvining oliy organi xo‘jalik yurituvchi subyektning Ilmiy-texnik kengashi (keyingi o‘rinlarda – Ilmiy-texnik kengash) hisoblanadi.

Ilmiy-texnik kengash tarkibi xo‘jalik yurituvchi subyekt rahbari buyrug‘i bilan tasdiqlanadi.

Ilmiy-texnik kengashni ushbu kengash raisi hisoblanuvchi xo‘jalik yurituvchi subyekt rahbarining birinchi (yoki birinchi maqomidagi) o‘rinbosari boshqaradi.

5. Ilmiy-texnik kengash quyidagilar haqidagi qarorlarni qabul qiladi:

Jamg‘arma mablag‘laridan loyihani moliyalashtirishni qabul qilish yoki loyihani moliyalashtirishdan voz kechish;

loyihani qayta ishlashga yoki qo‘shimcha ekspertizaga jo‘natish.

Ilmiy-texnik kengash qarorlari ko‘pchilik ovoz bilan qabul qilinadi, raisning imzosi bilan rasmiylashtiriladi.

6. Ilmiy-texnik kengash ko‘rib chiqishi uchun loyihalar xo‘jalik yurituvchi subyektning ilmiy-tadqiqot va tajriba-konstruktorlik ishlarini amalga oshiruvchi tarkibiy tuzilmalari tomonidan kiritiladi.

7. Ilmiy-texnik kengash Jamg‘arma mablag‘laridan moliyalashtiriladigan loyihalarni quyidagilarga alohida e’tibor qaratgan holda ilmiy-texnik ekspertizadan o‘tkazadi:

loyihaning dolzarbligi va qo‘yilgan masalalarni hal qilishga yondashuvining aniqligi;

tavsiya qilingan innovatsion va ilmiy-amaliy ishlar natijalarining amalda qo‘llash imkoniyatlari;

loyiha xarajatlar smetasining asoslanganligi, uni amalga oshirishning davomiyligi va mazkur loyihaning o‘z-o‘zini qoplash muddatlari.

8. Jamg‘armadan mablag‘larni ajratish xo‘jalik yurituvchi subyekt rahbarini qaroriga asosan tasdiqlangan smeta doirasida amalga oshiriladi.

9. Jamg‘arma mablag‘laridan:

ilmiy-amaliy tadqiqotlarni;

innovatsion loyihalarni;

tajriba-konstruktorlik ishlanmalarini hamda ularni ishlab chiqarish jarayoniga tatbiq etishni moliyalashtirishda foydalaniladi.

10. Jamg‘armaning joriy yilda ishlatilmagan mablag‘lar qoldig‘i keyingi yilga o‘tkaziladi.

11. Jamg‘arma mablag‘larini sarflanishi maxsus hisob raqamidan xo‘jalik yurituvchi subyektning yuqori boshqaruv organi tomonidan tasdiqlangan Jamg‘arma mablag‘larining tushum va xarajatlar smetasiga asosan amalga oshiriladi, qonunda belgilangan boshqa holatlar bundan mustasno.

12. Jamg‘armaga kelgusi yilda kelib tushishi kutilayotgan pul tushumini umumiy hajmini aniqlashda xo‘jalik yurituvchi subyektlari, Jamg‘armada rejalashtirilayotgan yil boshiga qoladigan qoldiqni va qonunchilikdagi o‘zgarishlarni e’tiborga olgan holda oxirgi ikki yildagi tushumlarning dinamikasidan kelib chiqqan holda yil davomida tushishi kutilayotgan tushum hajmini hisobga olishlari lozim.

13. Smetaning xarajatlar qismi Vazirlar Mahkamasining 1999-yil 5-fevraldagi “Mahsulot (ishlar, xizmatlar)ni ishlab chiqarish va sotish xarajatlari tarkibi hamda moliyaviy natijalarni shakllantirish tartibi to‘g‘risidagi nizomni tasdiqlash haqidagi” 54-sonli qaroriga muvofiq (O‘zbekiston Respublikasi Hukumati qarorlari to‘plami, 1999-yil, 2-son, 9-modda), unda nazarda tutilgan xarajatlar guruhlari bo‘yicha xarajatlar yoyilmasini va ular asosidagi hisob-kitoblarni to‘la ilova qilgan holda tuziladi.

14. Jamg‘arma mablag‘lari tushumlari va xarajatlarining yig‘ma smetasi (yil davomida kiritiladigan o‘zgarishlarni inobatga olib) xo‘jalik yurituvchi subyektning rahbari tomonidan tuziladi va tasdiqlanadi.

15. Tanlab olingan loyihalar ro‘yxatidan kelib chiqqan holda Ilmiy-texnik kengash Jamg‘armaning daromadlar va xarajatlari dastlabki yig‘ma smetasini tuzadi va xo‘jalik yurituvchi subyektning rahbariga ko‘rib chiqish uchun taqdim etadi.

16. Jamg‘arma mablag‘laridan to‘g‘ri foydalanishni nazorat qilish Ilmiy-texnik kengashni boshqaruvchi xo‘jalik yurituvchi subyektning rahbari birinchi (yoki birinchi maqomidagi) o‘rinbosari tomonidan amalga oshiriladi.

17. Jamg‘arma mablag‘larini to‘g‘ri shakllantirish va maqsadli foydalanish uchun javobgarlik xo‘jalik yurituvchi subyektning rahbariga yuklatiladi.