Oʻzbekiston Respublikasi Prezidentining “Navoiy viloyatida erkin industrial-iqtisodiy zona tashkil etish toʻgʻrisida” 2008-yil 2-dekabrdagi PF-4059-son Farmonini bajarish yuzasidan Vazirlar Mahkamasi qaror qiladi:

1. Quyidagilar:

“Navoiy” erkin industrial-iqtisodiy zonasi hududidagi alohida bojxona rejimi toʻgʻrisidagi Nizom 1-ilovaga muvofiq;

“Navoiy” erkin industrial-iqtisodiy zonasi hududida alohida soliq rejimini taʼminlash tartibi toʻgʻrisidagi Nizom 2-ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

1. Ushbu Nizom “Navoiy” erkin industrial-iqtisodiy zona (keyingi oʻrinlarda “Navoiy” EIIZ deb ataladi) hududidagi alohida bojxona rejimini qoʻllanish tartibini belgilaydi.

2. “Navoiy” EIIZ hududi bojxona nazorati zonasi hisoblanadi. Bojxona nazorati bojxona qonun hujjatlariga muvofiq bojxona organlari tomonidan amalga oshiriladi.

3. Ushbu Nizomning amal qilishi faqat “Navoiy” EIIZ hududida “Navoiy” EIIZ qatnashchilari tomonidan amalga oshiriladigan faoliyatga tatbiq etiladi.

4. Ushbu Nizom maqsadlari uchun qonun hujjatlarida foydalaniladigan tushunchalar qoʻllaniladi.

5. Har qanday tovarlarni ham “Navoiy” EIIZ hududidagi xoʻjalik faoliyati qatnashchilari (keyingi oʻrinlarda “Navoiy” EIIZ qatnashchilari deb ataladi), ham “Navoiy” EIIZ qatnashchilari hisoblanmaydigan xoʻjalik yurituvchi subyektlar tomonidan “Navoiy” EIIZ hududiga olib kirish va “Navoiy” EIIZ hududidan olib chiqib ketish davlat bojxona xizmati organlarining (keyingi oʻrinlarda bojxona organlari deb ataladi) ruxsati bilan amalga oshiriladi.

6. “Navoiy” EIIZ qatnashchilari tomonidan “Navoiy” EIIZ hududiga olib kiriladigan eksport qilinadigan mahsulotlar ishlab chiqarish uchun asbob-uskunalar, xomashyo, materiallar va butlovchi buyumlar(keyingi oʻrinlarda ishlab chiqarish uchun tovarlar deb ataladi), kelib chiqish mamlakatidan qatʼi nazar, erkin bojxona zonasining bojxona rejimida rasmiylashtiriladi. Bunda:

ishlab chiqarish ehtiyojlari uchun xorijiy tovarlarga nisbatan bojxona toʻlovlari (bojxonada rasmiylashtirish uchun yigʻimlardan tashqari) va iqtisodiy siyosat choralari qoʻllanmaydi;

Oʻzbekiston tovarlari bojxona eksport rejimiga muvofiq tovarlarni olib chiqib ketishga nisbatan qoʻllanadigan shartlarda joylashtiriladi.

7. Ishlab chiqarish uchun tovarlar “Navoiy” EIIZ hududida u faoliyat koʻrsatadigan muddat mobaynida turishi mumkin.

8. Ishlab chiqarish uchun tovarlar bilan har qanday operatsiyalarni, agar bunday operatsiyalar “Navoiy” EIIZ hududida investitsiyalash toʻgʻrisidagi bitim (keyingi oʻrinlarda investitsiyalash toʻgʻrisidagi bitim deb ataladi) shartlariga muvofiq boʻlsa, amalga oshirishga yoʻl qoʻyiladi.

9. Ishlab chiqarish uchun tovarlar va ulardan foydalangan holda “Navoiy” EIIZ qatnashchilari tomonidan ishlab chiqarilgan tovarlar hisoblanmaydigan, Oʻzbekiston Respublikasining bojxona hududida erkin muomalada turgan tovarlar “Navoiy” EIIZ hududida erkin harakat qiladi va uning hududidan erkin olib chiqib ketiladi.

10. Xorijiy tovarlar hisoblanadigan ishlab chiqarish uchun tovarlar:

ularga nisbatan bojxona toʻlovlari (bojxonada rasmiylashtirish uchun yigʻimdan tashqari) va iqtisodiy siyosat choralari qoʻllanmasdan Oʻzbekiston Respublikasi tashqarisiga olib chiqib ketiladigan taqdirda — qayta eksport qilish bojxona rejimida;

tovarlar “Navoiy” EIIZ qatnashchilari boʻlmagan shaxslarga Oʻzbekiston Respublikasi hududida foydalanish uchun, toʻlanishi kerak boʻlgan barcha bojxona toʻlovlarini toʻlatgan holda, berilgan (begonalashtirilgan) taqdirda — erkin muomalaga chiqarish bojxona rejimiga joylashtirilishi mumkin.

11. Oʻzbekiston tovarlari hisoblanadigan ishlab chiqarish uchun tovarlar “Navoiy” EIIZ qatnashchilari hisoblanmaydigan shaxslarga Oʻzbekiston Respublikasi hududida foydalanish uchun berilganda (begonalashtirilganda) belgilangan tartibda, bojxona rejimiga ushbu rejimda belgilangan shartlarda joylashtiriladi.

12. “Navoiy” EIIZ qatnashchilari tomonidan ishlab chiqariladigan tovarlar (keyingi oʻrinlarda mahsulotlar deb ataladi) Oʻzbekiston Respublikasi hududidan tashqariga olib chiqib ketishda eksport bojxona rejimiga joylashtiriladi.

Bunda eksport statistikasida ularni ishlab chiqarishda foydalanilgan Oʻzbekiston tovarlari hisoblanadigan tovarlar hisobga olinmaydi.

13. “Navoiy” EIIZ qatnashchilari hisoblanmaydigan shaxslarga Oʻzbekiston Respublikasi hududida foydalanish uchun beriladigan (begonalashtiriladigan) mahsulot belgilangan tartibda, erkin muomalaga chiqarish rejimiga joylashtiriladi. Bunda:

sotiladigan miqdorda mahsulot ishlab chiqarish uchun foydalanilgan xorijiy tovarlarga (xomashyo, materiallar va butlovchi buyumlarga) nisbatan bojxona toʻlovlari (bojxonada rasmiylashtirish uchun yigʻimlardan tashqari) yukning bojxona deklaratsiyasi qabul qilingan sanada belgilangan stavkalarning 50 foizi miqdorida toʻlanadi;

sotiladigan miqdorda mahsulot ishlab chiqarish uchun foydalanilgan Oʻzbekiston tovarlariga (xomashyo, materiallar va butlovchi buyumlarga) nisbatan ushbu tovarlar erkin bojxona zonasi bojxona rejimiga joylanishi munosabati bilan ozod qilingan qoʻshilgan qiymat soligʻi va aksiz soligʻi toʻlanadi.

Ushbu toʻlovlar, agar qonun hujjatlarida yanada imtiyozliroq rejim belgilanmagan boʻlsa, bojxonada rasmiylashtirilgan sanadan boshlab 180 kun mobaynida toʻlanishi mumkin.

14. “Navoiy” EIIZning bir qatnashchisi ishlab chiqarish uchun oʻz tovarlarini va mahsulotini “Navoiy” EIIZning boshqa qatnashchisiga bergan (begonalashtirgan) taqdirda bojxona toʻlovlari (bojxonada rasmiylashtirish uchun yigʻimlardan tashqari) toʻlanmaydi, lekin bu holda ushbu tovarlarni bojxonada rasmiylashtirish ularning yangi egasi — “Navoiy” EIIZ qatnashchisi uchun amalga oshiriladi.

15. “Navoiy” EIIZ hududida erkin bojxona zonasi rejimida turgan ishlab chiqarish uchun tovarlar erkin muomalaga chiqarish rejimiga joylashtirilgan taqdirda Oʻzbekiston Respublikasi bojxona hududining yoki xorijiy davlatlarga eksportning qolgan qismi uchun tovarlarning kelib chiqish mamlakatiga qarab bojxona toʻlovlari va iqtisodiy siyosat choralari qoʻllanadi.

16. “Navoiy” EIIZ hududida ishlab chiqarilgan tovarlarning kelib chiqish mamlakatini aniqlash maqsadlari uchun tovarlarning kelib chiqish mamlakatini aniqlashning Oʻzbekiston Respublikasida belgilangan qoidalari qoʻllanadi.

17. “Navoiy” EIIZ qatnashchilari har bir kalendar yil boshlangungacha oʻn besh kundan kechikmay yozma shaklda bojxona organiga:

ishlab chiqarish uchun “Navoiy” EIIZ hududiga olib kirilishi moʻljallanayotgan tovarlar toʻgʻrisidagi maʼlumotlarni (tovarning nomi, miqdori, Oʻzbekiston Respublikasi TIF TN boʻyicha kodi, qiymati, kelib chiqish mamlakati);

ishlab chiqarish uchun tovarlar (xorijiy tovarlar va Oʻzbekiston tovarlari) hamda mahsulotlar bilan amalga oshiriladigan operatsiyalar va bunday operatsiyalarni amalga oshirish natijasida olinadigan mahsulotni ishlab chiqarishdagi ularning sarflash normalari toʻgʻrisidagi maʼlumotlarni;

Oʻzbekiston Respublikasi tashqarisiga olib chiqib ketishga, “Navoiy” EIIZning boshqa qatnashchisiga yoki “Navoiy” EIIZ qatnashchisi hisoblanmaydigan shaxsga Oʻzbekiston Respublikasi hududida foydalanish uchun berish (begonalashtirish) moʻljallanayotgan mahsulot toʻgʻrisidagi (tovarning nomi, miqdori, Oʻzbekiston Respublikasi TIF TN boʻyicha kodi, xorijiy tovarlar va Oʻzbekiston tovarlarining mahsulot birligidagi tarkibi, mahsulot birligining qiymati) maʼlumotlarni maʼlum qiladi.

18. “Navoiy” EIIZ qatnashchisi ushbu Nizomning 17-bandida nazarda tutilgan maʼlumotlarni oʻzgartirishga haqlidir, u bu toʻgʻrida bojxona deklaratsiyasi berilgungacha 15 kundan kechikmay bojxona organiga yozma ravishda xabar qiladi.

19. “Navoiy” EIIZ hududiga olib kirilayotgan ishlab chiqarish uchun tovarlarning birinchi turkumiga nisbatan “Navoiy” EIIZ qatnashchisi ushbu Nizomning 17-bandida nazarda tutilgan maʼlumotlarni bojxona deklaratsiyasi berilgungacha oʻn besh kundan kechikmay maʼlum qilishi kerak.

20. “Navoiy” EIIZ qatnashchisi bojxona organiga taqdim etilgungacha ushbu Nizomning 17 — 19-bandlarida koʻrsatilgan maʼlumotlarni “Navoiy” EIIZ boshqaruv organlari bilan tovarlar turi, ularning miqdori va ular bilan amalga oshiriladigan operatsiyalarning investitsiyalash toʻgʻrisidagi bitim shartlariga muvofiqligini kelishib oladi.

21. “Navoiy” EIIZ qatnashchisining arizasida koʻrsatilmagan ishlab chiqarish uchun tovarlar erkin bojxona rejimiga joylashtirilmaydi.

22. “Navoiy” EIIZ qatnashchisi arizasining shakli va unda koʻrsatiladigan maʼlumotlarga qoʻyiladigan talablar Oʻzbekiston Respublikasi Davlat bojxona qoʻmitasi tomonidan belgilanadi.

23. “Navoiy” EIIZ qatnashchilari ishlab chiqarish uchun olib kiriladigan, olib chiqib ketiladigan, saqlanayotgan, tayyorlanayotgan, qayta ishlanayotgan, sotib olinadigan va sotiladigan tovarlarning hamda “Navoiy” EIIZ hududida ulardan foydalangan holda ishlab chiqarilgan tovarlarning hisobini olib borishlari va ushbu tovarlarga doir maʼlumotlarni bojxona organlariga taqdim etishlari shart.

24. Ishlab chiqarish uchun tovarlar boʻyicha va “Navoiy” EIIZ doirasida ulardan foydalangan holda ishlab chiqariladigan tovarlar boʻyicha sodir boʻlgan har qanday oʻzgarishlar hisobga olish hujjatlarida aks ettiriladi. Hisobga olish va hisobot shakli, shuningdek hisobotlarni taqdim etish tartibi va muddatlari belgilangan tartibda:

buxgalteriya hisoboti boʻyicha — Oʻzbekiston Respublikasi Moliya vazirligi tomonidan;

statistik hisobot boʻyicha — Oʻzbekiston Respublikasi Davlat statistika qoʻmitasi va Davlat bojxona qoʻmitasi tomonidan belgilanadi.

25. Erkin bojxona zonasi bojxona rejimiga joylashtirilgan tovarlar, ushbu tovarlar tijorat qimmatini yoʻqotgan taqdirda, bojxona organi nazorati ostida yoʻq qilinishi yoki “Navoiy” EIIZning boshqa qatnashchisi foydasiga begonalashtirilishi mumkin, bu holda yoʻq qilish yoki begonalashtirish fakti bojxona organiga taqdim etiladigan hisobotda aks ettiriladi.

26. Tovarlarni bojxonada baholash uchun Oʻzbekiston Respublikasining bojxona hududiga olib kiriladigan tovarlarning bojxona qiymatini belgilashning umumiy tartibi qoʻllanadi, bunda quyidagi xususiyatlar hisobga olinadi:

olib kiriladigan tovarlarning bitimdagi qiymatini aniqlash metodi boʻyicha bojxona qiymati aniqlangan taqdirda bitim qiymati, yaʼni ularni “Navoiy” EIIZ qatnashchisi hisoblanadigan shaxs tomonidan “Navoiy” EIIZ qatnashchisi hisoblanmaydigan shaxsga sotishda tovar uchun amalda toʻlangan yoki toʻlanishi kerak boʻlgan narx bojxona qiymati hisoblanadi;

“Navoiy” EIIZ hududida ishlab chiqarilgan tovarlarning bojxona qiymatini aniqlash maqsadlari uchun tovarlarning “Navoiy” EIIZ hududidan Oʻzbekiston Respublikasining bojxona hududiga olib chiqilishi yoki tovarlarni “Navoiy” EIIZ qatnashchilari hisoblanmaydigan shaxslar foydasiga begonalashtirilishi munosabati bilan bojxona tomonidan bojxona deklaratsiyasi qabul qilingan kun baholanayotgan tovarlarning bojxona chegarasidan oʻtkazilgan sanasi hisoblanadi;

Oʻzbekiston Respublikasining bojxona hududiga tovarlar keltirilgan joy “Navoiy” EIIZ hududidan olib chiqilgan joy sifatida yoki tovarlarni Oʻzbekiston Respublikasining bojxona hududidan olib chiqmasdan, tovarlarni “Navoiy” EIIZ qatnashchisi hisoblanmaydigan shaxsga sotishda “Navoiy” EIIZ hududi sifatida belgilanadi.

27. “Navoiy” EIIZning faoliyat koʻrsatishi toʻxtatilgan taqdirda uning hududida boʻlgan ishlab chiqarish uchun tovarlar boshqa erkin zonaga oʻtkaziladi yoxud “Navoiy” EIIZning faoliyat koʻrsatishi toʻxtatilgan vaqtdan boshlab ikki oy mobaynida boshqa bojxona rejimiga oʻtkaziladi.

28. Ushbu Nizomning 27-bandida nazarda tutilgan muddat mobaynida koʻrsatib oʻtilgan tovarlar bojxona maqsadlari uchun vaqtinchalik saqlash uchun bojxona rejimida turgan tovarlar hisoblanadi.

29. Shaxs “Navoiy” EIIZ qatnashchisi maqomidan mahrum etilgan taqdirda, shu jumladan investitsiyalash toʻgʻrisidagi bitimning amal qilishi muddatidan oldin toʻxtatilganligi munosabati bilan qatnashchi maqomidan mahrum etilganda qatnashchiga tegishli boʻlgan ishlab chiqarish uchun tovarlar “Navoiy” EIIZning boshqa qatnashchisi foydasiga begonalashtiriladi yoxud “Navoiy” EIIZ qatnashchilari reyestriga shaxsning “Navoiy” EIIZning qatnashchisi maqomidan mahrum etilgani toʻgʻrisidagi yozuv kiritilgan sanadan boshlab ikki oy mobaynida boshqacha bojxona rejimiga oʻtkaziladi.

30. “Navoiy” EIIZ qatnashchisi maqomini yoʻqotgan shaxs oʻzining mulki boʻlgan ishlab chiqarish uchun tovarlarni begonalashtirmaganda yoxud ularni boshqacha bojxona rejimiga joylashtirmaganda ushbu Nizomning 29-bandida nazarda tutilgan muddat oʻtib boʻlgach bojxona organlari qonun hujjatlariga muvofiq chora-tadbirlar koʻradi.

1. Ushbu Nizom “Navoiy” erkin industrial-iqtisodiy zonasi (keyingi oʻrinlarda “Navoiy” EIIZ deb ataladi) hududida alohida soliq rejimini taʼminlash, soliqlar va boshqa majburiy toʻlovlar boʻyicha imtiyozlarni qoʻllanish tartibini belgilaydi.

Alohida soliq rejimining amal qilishi “Navoiy” EIIZ qatnashchilari tomonidan faqat “Navoiy” EIIZ hududida amalga oshiriladigan faoliyatga tatbiq etiladi.

“Navoiy” EIIZ qatnashchilari boʻlmagan xoʻjalik yurituvchi subyektlarga soliq solish umumiy belgilangan tartibda amalga oshiriladi.

2. Oʻzbekiston Respublikasi Prezidentining “Navoiy viloyatida erkin industrial-iqtisodiy zona tashkil etish toʻgʻrisida” 2008-yil 2-dekabrdagi PF-4059-son Farmoniga muvofiq “Navoiy” EIIZ qatnashchilari yer soligʻi, mol-mulk soligʻi, yuridik shaxslardan olinadigan foyda soligʻi, obodonlashtirish va ijtimoiy infratuzilmani rivojlantirish soligʻi, mikrofirmalar va kichik korxonalar uchun yagona soliq toʻlovi, Respublika yoʻl jamgʻarmasi va budjetdan tashqari Taʼlim va tibbiyot muassasalarini rekonstruksiya qilish, mukammal taʼmirlash va jihozlash jamgʻarmasiga majburiy ajratmalar toʻlashdan ozod qilinadi.

3. Ushbu Nizomning 2-bandida koʻrsatilgan imtiyozlar toʻgʻridan toʻgʻriinvestitsiyalar hajmi:

3 mln. yevrodan 10 mln. yevrogacha teng (ekvivalent) boʻlganda — 7 yilga;

10 mln. yevrodan 30 mln. yevrogacha teng (ekvivalent) boʻlganda — 10 yilga beriladi. Keyingi 5 yil davomida yuridik shaxslardan olinadigan foyda soligʻi, mikrofirmalar va kichik korxonalar uchun yagona soliq toʻlovi stavkalari amaldagi stavkalarning 50 foizi miqdorida belgilanadi;

30 mln. yevrodan ortiqqa teng (ekvivalent) boʻlganda — 15 yilga beriladi. Keyingi 10 yil davomida yuridik shaxslardan olinadigan foyda soligʻi, mikrofirmalar va kichik korxonalar uchun yagona soliq toʻlovi stavkalari amaldagi stavkalarning 50 foizi miqdorida belgilanadi.

“Toʻgʻridan-toʻgʻri investitsiyalar” deganda mazkur Nizom maqsadlari uchun yuridik va jismoniy shaxslar tomonidan Oʻzbekiston Respublikasi kafolati taqdim etilmasdan amalga oshiriladigan investitsiyalar tushuniladi.

4. “Navoiy” EIIZ qatnashchilariga ushbu Nizomning 2-bandida koʻrsatilgan imtiyozlar toʻgʻridan toʻgʻriinvestitsiyalarning belgilangan hajmiga:

a) oyning 15-kunigacha erishilganda — oyning boshidan;

b) qolgan boshqa hollarda — toʻgʻridan toʻgʻriinvestitsiyalarning belgilangan hajmiga erishilgan oydan keyingi oyning boshidan boshlab tatbiq etiladi.

Koʻrsatib oʻtilgan imtiyozlarning amal qilish muddati xoʻjalik yurituvchi subyektlar “Navoiy” EIIZ qatnashchilari reyestriga kiritilgan sanadan boshlab hisoblanadi.

“Navoiy” EIIZ qatnashchisi tomonidan toʻgʻridan toʻgʻriinvestitsiyalarning hajmi imtiyoz qoʻllanadigan darajagacha koʻpaytirilganda imtiyozlar investitsiyalar hajmiga koʻra imtiyozni qoʻllanish huquqi yuzaga kelgan oydan boshlab qoʻllanadi hamda imtiyozlarning amal qilish muddati tugagungacha qolgan davrda amal qiladi.

5. Toʻgʻridan-toʻgʻri investitsiyalarning hajmi oldingi berilgan muddatdan ortiq boʻlgan muddatdagi darajagacha koʻpaytirilganda imtiyozlar investitsiyalarning oldingi hajmiga koʻra imtiyozni qoʻllanish huquqi yuzaga kelgan oydan boshlab qoʻllanadi hamda imtiyozning muddati ilgari amalda boʻlgan imtiyoz muddati amal qilishi hisobga olingan holda uzaytiriladi.

6. “Navoiy” EIIZ direksiyasi ushbu Nizomning 2-bandida koʻrsatilgan imtiyozlar “Navoiy” EIIZ qatnashchilari tomonidan qoʻllanilishi uchun soliqlarni hisobga olish joyidagi davlat soliq xizmati organlariga toʻgʻridan toʻgʻriinvestitsiyalar kiritilgan kundan boshlab 30 kun mobaynida quyidagi hujjatlarni taqdim etadi:

a) “Navoiy” EIIZ qatnashchisi guvohnomasining nusxasi;

b) kiritilgan investitsiyalar hajmi toʻgʻrisida maʼlumotnoma;

v) Oʻzbekiston Respublikasi Moliya vazirligining investitsiyalar Oʻzbekiston Respublikasining kafolati berilmasdan amalga oshirilganligi toʻgʻrisidagi tasdiqnomasi. Tasdiqnoma Oʻzbekiston Respublikasi Moliya vazirligi tomonidan “Navoiy” EIIZ direksiyasidan Oʻzbekiston Respublikasi Moliya vazirligiga soʻrov tushgan kundan boshlab 10 ish kuni mobaynida beriladi.

7. Imtiyozli davr oshishiga olib keladigan investitsiyalar hajmi koʻpaygan taqdirda “Navoiy” EIIZ direksiyasi toʻgʻridan toʻgʻriinvestitsiyalar qoʻshimcha ravishda kiritilgan kundan boshlab 30 kun mobaynida soliqlarni hisobga olish boʻyicha davlat soliq xizmati organlariga ushbu Nizomning 6-bandi “b” va “v” kichik bandlarida nazarda tutilgan hujjatlarni taqdim etadi.

8. Davlat soliq xizmati organlari taqdim etilgan hujjatlar oʻrganib chiqilgandan keyin 3 ish kuni mobaynida “Navoiy” EIIZ direksiyasiga soliqlar va boshqa majburiy toʻlovlar boʻyicha imtiyozlar “Navoiy” EIIZ qatnashchisiga tatbiq etilishi yoki tatbiq etilmasligi toʻgʻrisidagi aniq asoslashlar bilan birga yozma xulosani yuboradi hamda imtiyozlar tatbiq etiladigan “Navoiy” EIIZ qatnashchisini, qatnashchining nomini va imtiyozli davr muddatini koʻrsatgan holda, “Navoiy” EIIZning imtiyozlarga ega boʻlgan qatnashchilari reyestriga kiritadi.

9. Oʻzbekiston Respublikasi Davlat soliq qoʻmitasi davlat soliq xizmatining quyi organlari maʼlumotlari asosida “Navoiy” EIIZ qatnashchilarining yigʻma reyestrini yuritadi va uni har yili hisobot yilidan keyingi yilning 15-apreligacha boʻlgan muddatda Oʻzbekiston Respublikasi Moliya vazirligiga taqdim etadi.

10. “Navoiy” EIIZ hududida buxgalteriya hisobi va hisobotini yuritish Oʻzbekiston Respublikasi qonun hujjatlariga muvofiq yoki moliyaviy hisobotning xalqaro standartlariga muvofiq “Navoiy” EIIZ qatnashchisining tanlovi boʻyicha amalga oshiriladi.

11. Moliyaviy hisobot “Navoiy” EIIZ qatnashchilari tomonidan “Buxgalteriya hisobi toʻgʻrisida”gi Oʻzbekiston Respublikasi Qonuniga muvofiq davlat soliq xizmati organlariga taqdim etiladi.

12. Imtiyozlar berilgan soliqlar va boshqa majburiy toʻlovlar boʻyicha soliqqa doir hisobot “Navoiy” EIIZ qatnashchilari tomonidan davlat soliq xizmati organlariga taqdim etilmaydi.

13. Soliq majburiyatlari mavjud boʻlgan soliqlar va boshqa majburiy toʻlovlar boʻyicha soliqqa doir hisobot “Navoiy” EIIZ qatnashchilari tomonidan Oʻzbekiston Respublikasining Soliq kodeksiga muvofiq davlat soliq xizmati organlariga taqdim etiladi.

14. Imtiyozlarga ega boʻlgan “Navoiy” EIIZ qatnashchilari davlat soliq xizmati organlariga yillik moliyaviy va soliq hisobotlarini taqdim etish bilan bir vaqtda ushbu Nizomga ilovaga muvofiq shakl boʻyicha soliqlar va majburiy ajratmalar boʻyicha imtiyozlar summasi toʻgʻrisida maʼlumotnoma taqdim etadilar.

15. Soliqlar va boshqa majburiy toʻlovlarni hisoblab chiqarish va toʻlash tartibi Oʻzbekiston Respublikasining Soliq kodeksiga muvofiq belgilanadi.

16. “Navoiy” EIIZ qatnashchilari soliq toʻgʻrisidagi qonunlar buzilganligi uchun qonun hujjatlariga muvofiq javob beradilar.

17. Ushbu Nizomning 2-bandida koʻrsatilgan imtiyozlar toʻgʻri qoʻllanilishini nazorat qilish Oʻzbekiston Respublikasi davlat soliq xizmati organlari tomonidan qonun hujjatlariga muvofiq amalga oshiriladi.