Qoʻshimcha infratuzilma obyektlari boʻyicha loyihalarni amalga oshirishni jadallashtirish, shu asosda iqtisodiyotning tezkor rivojlanishini hamda respublika mintaqalarining tabiiy va iqtisodiy salohiyatidan samarali foydalanishni taʼminlaydigan zamonaviy ishlab chiqarish va ijtimoiy infratuzilmani shakllantirish, shuningdek yangi ish oʻrinlarini tashkil etish, aholining daromadlari hamda turmush darajasini oshirish maqsadida:

1. Oʻzbekiston Respublikasi Iqtisodiyot vazirligi tomonidan Tashqi iqtisodiy aloqalar, investitsiyalar va savdo vazirligi, Moliya vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, boshqa manfaatdor vazirliklar, idoralar va xoʻjalik yurituvchi subyektlar bilan birgalikda ishlab chiqilgan 2009-yilda qoʻshimcha infratuzilma obyektlarini qurish va ishga tushirishni jadallashtirish boʻyicha chora-tadbirlar Dasturi maʼqullansin. U quyidagilarni oʻz ichiga oladi:

Krizisga qarshi dasturga kiritilgan, 2009-yilda ishga tushiriladigan qoʻshimcha ishlab chiqarish va ijtimoiy infratuzilma obyektlari roʻyxati 1, 1a, 1b va 2-ilovalarga* muvofiq;

2009-yilda Krizisga qarshi dasturga kiritilgan infratuzilma obyektlari boʻyicha loyihalarni amalga oshirishni jadallashtirish chora-tadbirlari 3-ilovaga* muvofiq.

Loyihalarning buyurtmachilari — vazirliklar va idoralar, xoʻjalik yurituvchi subyektlar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2009-yilning 1-apreligacha boʻlgan muddatda 1, 1a, 1b va 2-ilovalarga kiritilgan loyihalar boʻyicha belgilangan tartibda loyiha-smeta hujjatlarining ishlab chiqilishi va ekspertizasi yakunlanishini, tanlov savdolari oʻtkazilishi va moliyalashning ochilishini taʼminlasin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda Krizisga qarshi dasturga kiritilgan qoʻshimcha ishlab chiqarish va ijtimoiy infratuzilma obyektlarini qurish hamda ishga tushirish loyihalari amalga oshirilishini jadallashtirish chora-tadbirlarining hududiy dasturlarini ishlab chiqsin.

3. Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari, dasturiy chora-tadbirlarni amalga oshirishda ishtirok etayotgan vazirliklar, idoralar, xoʻjalik yurituvchi subyektlar va korxonalar rahbarlari zimmasiga 1 va 2-ilovalarda koʻrsatilgan qoʻshimcha ishlab chiqarish va ijtimoiy infratuzilma obyektlarini belgilangan muddatlarda qurish hamda ishga tushirishni taʼminlash uchun shaxsiy javobgarlik yuklansin.

4. Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlarga binoan 4-ilovada* koʻrsatilgan telekommunikatsiya tarmoqlari va inshootlarini modernizatsiyalash hamda rivojlantirish loyihalari doirasida import qilinadigan uskunalar, dasturiy apparat vositalari va materiallar 2010-yilning 1-yanvarigacha bojxona toʻlovlari toʻlashdan (bojxona rasmiylashtiruvi yigʻimlaridan tashqari) ozod etilsin.

5. Vazirlar Mahkamasi 2009-yilda qoʻshimcha ishlab chiqarish va ijtimoiy infratuzilma obyektlari qurilishi hamda ishga tushirilishini jadallashtirish boʻyicha chora-tadbirlar Dasturining amalga oshirilishi toʻgʻrisida vazirliklar va idoralar rahbarlari, Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining hisobotlarini har oy Prezidium majlislarida koʻrib chiqqan holda uning qatʼiy nazoratga olinishini taʼminlasin.

6. Ushbu qarorning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.