O‘zbekiston Respublikasi Prezidentining “O‘zbekiston Respublikasi Vazirlar Mahkamasi huzurida Ijtimoiy tadqiqotlar institutini tashkil etish to‘g‘risida” 2008-yil 30-iyuldagi PQ-930-son qarorini bajarish yuzasidan va Ijtimoiy tadqiqotlar instituti faoliyatini samarali tashkil etish uchun zarur shart-sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot vazirligi, Davlat mulki qo‘mitasi, “G‘alla-bank” aksiyadorlik-tijorat banki va “O‘zbekyengilsanoat” davlat-aksiyadorlik kompaniyasining:

Toshkent shahar, Yakkasaroy tumani, U.Nosir ko‘chasi, 53 “b” manzilidagi binoni (keyingi o‘rinlarda olinayotgan bino deb ataladi), ushbu binoga mulkchilik huquqini “G‘alla-bank” aksiyadorlik-tijorat bankiga rasmiylashtirgan holda tutash hudud bilan birga “O‘zbekyengilsanoat” davlat-aksiyadorlik kompaniyasi balansidan “G‘alla-bank” aksiyadorlik-tijorat banki balansiga berish to‘g‘risidagi takliflariga rozilik berilsin.

2. Toshkent shahar hokimligi ikki hafta muddatda:

bank rejim talablarini ta’minlash uchun yer qo‘shib berilishi hisobga olingan holda olinayotgan binoga tutash hudud bilan birga yer uchastkasi chegaralarini belgilasin va “G‘alla-bank” aksiyadorlik-tijorat bankiga ajratib bersin;

olinayotgan bino bo‘yicha tarmoqlarni rivojlantirishda ulushli qatnashishsiz “G‘alla-bank” aksiyadorlik-tijorat bankining loyiha ehtiyojlariga muvofiq shahar muhandislik kommunikatsiyalariga ulanishga texnik shartlar berilishini ta’minlasin;

olinayotgan binoga joylashgan O‘zbekiston Respublikasi jangchi-faxriy-baynalmilalchilar respublika birlashmasi qayta joylashtirilishini ta’minlasin.

3. Amaldagi qonun hujjatlariga muvofiq “G‘alla-bank” aksiyadorlik-tijorat banki olinayotgan binodagi xonalarga “O‘zbekyengilsanoat” davlat-aksiyadorlik kompaniyasi bilan “Riter” servis va o‘quv markazi firmasi (Shveysariya) o‘rtasida tuzilgan ijara shartnomasi bo‘yicha huquqiy voris hisoblanishi ma’lumot uchun qabul qilinsin.

4. Institut ikki hafta muddatda:

Institutning shtat jadvalini O‘zbekiston Respublikasi Moliya vazirligi bilan kelishsin;

Institut binosini joriy ta’mirlashni loyihalashtirishga shartnoma tuzsin va bir oy muddatda belgilangan tartibda pudrat tashkilotni tanlash bo‘yicha tanlov o‘tkazsin.

5. O‘zbekiston Respublikasi Moliya vazirligi Institut faoliyatini tashkil etish bilan bog‘liq bo‘lgan mebel, tashkiliy texnika, aloqa vositalari bilan jihozlashga, ikkita yengil avtomobil sotib olish va ularni saqlashga, axborot bosma nashrlariga, shu jumladan xorijiy nashriyotlarning bosma nashrlariga obuna bo‘lishni tashkil etishga, Institutning binosini joriy ta’mirlash bo‘yicha xarajatlarga Institutning asoslangan hisob-kitoblari bo‘yicha O‘zbekiston Respublikasi Vazirlar Mahkamasining zaxira jamg‘armasidan mablag‘ ajratsin.

6. “O‘zavtosanoat” aksiyadorlik kompaniyasi 2008-yil oxirigacha Institut uchun bittadan “Neksiya” markali va “Damas” markali avtomobil ajratsin.

7. “Fayz” xolding kompaniyasi Institut buyurtmasi olingandan keyin bir oy muddatda ofis mebeli, shuningdek inventar tayyorlanishi va yetkazib berilishini ta’minlasin.

8. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov zimmasiga yuklansin.