LexUZ sharhi
Mazkur qaror O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Sil kasalligiga qarshi kurashishga Germaniya Federativ Respublikasi Hukumati tomonidan beriladigan grant mablag‘laridan samarali va maqsadli foydalanishni ta’minlash maqsadida:
2007-2008-yillarda rivojlanishga ko‘maklashish sohasida Germaniya Federativ Respublikasi bilan O‘zbekiston Respublikasi o‘rtasidagi ikki tomonlama hamkorlik to‘g‘risida 2007-yil 18-apreldagi Hukumatlararo muzokaralar yakunlarining bayonnomasiga muvofiq “KfW” Banki (Germaniya) tomonidan “Silga qarshi kurash” dasturlarini amalga oshirish uchun O‘zbekiston Respublikasiga avvalgi uchta grant mablag‘lariga qo‘shimcha ravishda 2,5 mln. yevro va 2,0 mln. yevroga teng miqdorda ikkita grant mablag‘lari ajratilgan;
Germaniya Federativ Respublikasi bilan O‘zbekiston Respublikasi Hukumatlari o‘rtasidagi moliyaviy hamkorlik to‘g‘risida 2005-yil 18-yanvardagi Bitimga asosan 2006-yil 12-aprelda “KfW ” Banki bilan O‘zbekiston Respublikasi Tashqi iqtisodiy aloqalar, investitsiyalar va savdo vazirligi o‘rtasida “Silga qarshi kurash — IV” dasturini amalga oshirishga yo‘naltirilgan 2,5 mln. yevro miqdorida moliyalashtirish to‘g‘risidagi Shartnoma imzolangan.
O‘zbekiston Respublikasi Sog‘liqni saqlash vazirligi zimmasiga — ushbu grantlarni olishga aloqador bo‘lgan barcha tartib-qoidalarni Germaniya tomoni bilan kelishib olingan muddatlarda rasmiylashtirish, xorijiy ekspertlar va konsultantlarni jalb etish masalalarini hal qilish vazifasi, shuningdek silga qarshi kurashga ajratilayotgan mablag‘lardan maqsadli foydalanilishi mas’uliyati yuklansin;
O‘zbekiston Respublikasi Tashqi iqtisodiy aloqalar, investitsiyalar va savdo vazirligi zimmasiga — “KfW” Banki bilan 2,0 mln. yevro miqdorida “Silga qarshi kurash — V” dasturini moliyalashtirish to‘g‘risida shartnoma tayyorlash va imzolash vazifasi yuklansin.
“KfW” Banki bilan tuzilgan shartnomalar bo‘yicha barcha shartlar bajarilishini, shuningdek silga qarshi kurash dasturlari ilovaga* muvofiq ro‘yxat bo‘yicha amalga oshirilishini ta’minlasin;
* Ilova rus tilidagi matnda berilgan.
grantlarni berish rasmiy tartib-qoidalari yakunlangandan so‘ng bir hafta muddatda mazkur dasturlarni amalga oshirish doirasida xarid qilinadigan tovarlar, ishlar va xizmatlar ro‘yxatini tasdiqlash uchun Vazirlar Mahkamasiga kiritsin.
grant mablag‘laridan foydalangan holda ushbu dasturlarni amalga oshirish doirasida tibbiy va notibbiy asbob-uskunalar, sarflanadigan materiallar, dori-darmonlar, o‘quv va axborot-ma’rifat materiallari va boshqa tovarlarni xarid qilish “KfW” Bankining moliyaviy hamkorlik tartib-qoidalariga muvofiq tender (tanlov) asosida amalga oshiriladi;
O‘zbekiston Respublikasi Sog‘liqni saqlash vazirligining “O‘zmedeksport” Respublika tashqi iqtisodiy korxonasi dasturlarni amalga oshirish doirasida shartnomalar bo‘yicha kontragent hisoblanadi.
5. Ma’lumot uchun qabul qilinsinki, amaldagi qonun hujjatlariga muvofiq, grant mablag‘lari hisobiga olib kelinadigan tovarlar bojxona to‘lovlaridan (bojxona rasmiylashtiruvi yig‘imlaridan tashqari) ozod etiladi.
Mazkur dasturlarni amalga oshirishda ishtirok etayotgan O‘zbekiston Respublikasining norezidentlari to‘lov manbaidan undirib olinadigan daromad solig‘i to‘lashdan ozod qilinsin.
6. “O‘zbekiston havo yo‘llari” milliy aviakompaniyasi grant mablag‘lari hisobidan ushbu dasturlar doirasida kelib tushadigan barcha tovarlarni ular aeroportda saqlanadigan butun davr mobaynida to‘lov undirilmagan holda ortish-tushirish ishlarini hamda omborlarga joylashtirilishini tashkil etsin.
7. O‘zbekiston Respublikasi Moliya vazirligi sog‘liqni saqlash muassasalari ta’minoti uchun nazarda tutilgan mablag‘lar doirasida ushbu grantlar hisobidan sotib olinadigan tovarlarni xarid qilish va pirovard iste’molchilarga yetkazib berish bilan bog‘liq xarajatlarni moliyalashtirsin.
8. O‘zbekiston Respublikasi Tashqi ishlar vazirligi O‘zbekiston Respublikasi Sog‘liqni saqlash vazirligining talabnomalariga ko‘ra mazkur dasturlarni amalga oshirishda ishtirok etuvchi mutaxassislarga konsullik yig‘imlari va boshqa yig‘imlar undirilmagan holda belgilangan tartibda kirish vizalari rasmiylashtirilishini ta’minlasin.
9. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston Respublikasi Sog‘liqni saqlash vazirligi bilan birgalikda dasturlar loyihalarini amalga oshirish uchun ushbu grantlar doirasida yetkazib beriladigan jihozlarni montaj qilishga tegishli xonalar tayyorlashni hamda ulardan maqsadli foydalanishni ta’minlasin.
10. Mazkur Qarorning ijrosini nazorat qilish O‘zbekiston Respublikasi Bosh vazirining o‘rinbosari R.S. Qosimov zimmasiga yuklansin.