O‘zbekiston Respublikasi Suv xo‘jaligi vazirligining suv xo‘jaligi tashkilotlari iste’mol qiladigan elektr energiya uchun to‘lovlarning asoslanganligi, to‘liqligi va o‘z vaqtida to‘lanishi ustidan nazoratni kuchaytirish maqsadida:

1. 2008-yilning 1-yanvaridan quyidagi tartib o‘rnatilsin, unga muvofiq:

davlat budjetining O‘zbekiston Respublikasi Suv xo‘jaligi vazirligi uchun nazarda tutiladigan xarajatlarida suv xo‘jaligi tashkilotlari iste’mol qiladigan elektr energiya to‘lovlari uchun alohida satr bilan mablag‘ ajratiladi;

O‘zbekiston Respublikasi Moliya vazirligi G‘aznachiligida va uning hududiy bo‘linmalarida O‘zbekiston Respublikasi Suv xo‘jaligi vazirligining hududiy suv xo‘jaligi tashkilotlari uchun shaxsiy hisobvaraqlar ochiladi;

hududiy suv xo‘jaligi tashkilotlarining xarajatlar smetasi O‘zbekiston Respublikasi Suv xo‘jaligi vazirligi tomonidan tasdiqlanganidan hamda Moliya vazirligida belgilangan tartibda ro‘yxatga olinganidan so‘ng, Moliya vazirligi G‘aznachiligi va uning hududiy bo‘linmalarining yagona ma’lumotlar bazasida qayd etiladi;

suv xo‘jaligi tashkiloti bilan energiya ta’minoti tashkiloti o‘rtasida ro‘yxatga olingan xarajatlar smetasi doirasida tuzilgan shartnomalar O‘zbekiston Respublikasi Moliya vazirligi G‘aznachiligining hududiy bo‘linmalarida ro‘yxatdan o‘tkazilishi shart;

O‘zbekiston Respublikasi Suv xo‘jaligi vazirligining suv xo‘jaligi tashkilotlari iste’mol qiladigan elektr energiya uchun to‘lovlar ularning shaxsiy hisobvaraqlaridan Moliya vazirligi G‘aznachiligi va uning hududiy bo‘linmalari orqali “Hududiy elektr tarmoqlari” AJning maxsus bank hisobvarag‘iga o‘tkaziladi;

G‘aznachilikning hududiy bo‘linmalari hisoblagich asboblar ko‘rsatkichlari bilan tasdiqlangan elektr energiyasini iste’mol qilishning fizik hajmlari to‘g‘risidagi ma’lumotlar bilan suv xo‘jaligi tashkiloti va energiya ta’minoti tashkiloti o‘rtasida ro‘yxatga olingan shartnomalar, hisobvaraq-fakturalar, shuningdek o‘zaro hisob-kitoblarni qiyoslab tekshirish hujjatlari asosida iste’mol qilingan elektr energiya to‘lovlarini amalga oshirish uchun elektron to‘lov hujjatlarini shakllantiradi.

Bunda qiyoslab tekshirish hujjatlari Qoraqalpog‘iston Respublikasi va viloyatlardagi hududiy suv xo‘jaligi tuzilmalari hamda Moliya vazirligi G‘aznachiligi boshqarmalarining birinchi rahbarlari tomonidan birgalikda tasdiqlanadi.

2. Belgilansinki, quyidagilar:

suv xo‘jaligi tashkilotlari tomonidan davrlar bo‘yicha elektr energiyasini iste’mol qilishning fizik hajmlari to‘g‘ri aniqlanishi va ulardan maqsadli, aniq foydalanilishi ustidan — suv xo‘jaligi tashkilotlari idoraviy mansub bo‘lgan tegishli mintaqaviy tuzilmalar tomonidan;

iste’mol qilingan elektr energiya uchun to‘lanadigan summaning asosliligi ustidan — Qoraqalpog‘iston Respublikasi va viloyatlardagi Moliya vazirligi G‘aznachiligi boshqarmalari tomonidan tizimli nazorat amalga oshiriladi.

3. O‘zbekiston Respublikasi Moliya vazirligi, Qishloq va suv xo‘jaligi vazirligi “O‘zbekenergo” DAK bilan birgalikda ikki hafta muddatda O‘zbekiston Respublikasi Qishloq va suv xo‘jaligi vazirligining suv xo‘jaligi tashkilotlari iste’mol qiladigan elektr energiya uchun to‘lovlarni amalga oshirish tartibi to‘g‘risidagi nizomni ilova qilingan sxema asosida belgilangan tartibda ishlab chiqsin va tasdiqlasin.

4. O‘zbekiston Respublikasi Moliya vazirligining Nazorat-taftish bosh boshqarmasi zimmasiga Qishloq va suv xo‘jaligi vazirligining suv xo‘jaligi tashkilotlari iste’mol qiladigan elektr energiya uchun to‘langan summalarning asosliligini muntazam ravishda yoppasiga va tanlab tekshirishlarni o‘tkazish vazifasi yuklansin.

5. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.

1) Moliya vazirligi tomonidan belgilangan tartibda ro‘yxatga olingan xarajatlar smetasini Moliya vazirligi G‘aznachiligi bo‘linmalariga taqdim etish;

2) tasdiqlangan xarajatlar smetasi doirasida suv xo‘jaligi tashkilotlari va “Hududiy elektr tarmoqlari” AJ bo‘linmalari o‘rtasida elektr energiyasini yetkazib berish bo‘yicha shartnomalar tuzish;

3) suv xo‘jaligi tashkilotlari tomonidan shartnomalarni tegishli g‘aznachilik bo‘linmalariga ro‘yxatdan o‘tkazish uchun taqdim etish;

4) “Hududiy elektr tarmoqlari” AJ bo‘linmalari tomonidan suv xo‘jaligi tashkilotlariga yetkazib beriladigan elektr energiyasi hajmi va to‘lanishi lozim bo‘lgan summalar bo‘yicha schet-fakturalarni taqdim etish;

5) suv xo‘jaligi tashkilotlari tomonidan g‘aznachilikning tegishli hududiy bo‘linmalariga schet-fakturalar taqdim etish;

6) hududiy g‘aznachilik bo‘linmalari tomonidan schet-fakturalarni tekshirish va elektr energiyasi uchun to‘lovlarni amalga oshirish maqsadida ular ma’lumotlarini Moliya vazirligi G‘aznachiligining yagona ma’lumotlar bazasiga kiritish;

7) Moliya vazirligi G‘aznachiligi tomonidan “Hududiy elektr tarmoqlari” AJ bo‘linmalarining maxsus bank hisobvaraqlariga elektr energiyasi uchun to‘lovni amalga oshirish;

8) hududiy g‘aznachilik bo‘linmalari tomonidan suv xo‘jaligi tashkilotlariga iste’mol qilingan elektr energiyasi uchun haq to‘lash bo‘yicha to‘lov topshiriqnomalaridan ko‘chirma va nusxalarni taqdim etish.