Issiqlik ta’minoti va suv ta’minoti korxonalari xodimlarini yakuniy ish natijalari uchun rag‘batlantirish va mas’uliyatini oshirish mexanizmini tubdan takomillashtirish, ular faoliyatini iste’molchilarni issiqlik va suv bilan uzluksiz hamda sifatli ta’minlash darajasiga bevosita bog‘liq holda baholash va mehnatiga haq to‘lash, shuningdek issiqlik ta’minoti va suv ta’minotida isrofgarchilikni kamaytirish bo‘yicha samarali chora-tadbirlarni amalga oshirish maqsadida:

1. 2007-yilning 1-iyulidan boshlab issiqlik ta’minoti korxonalari xodimlarini moddiy rag‘batlantirishning ularning bajarilayotgan ish samaradorligi va sifatini oshirish uchun moddiy manfaatdorligi va mas’uliyatini kuchaytirishga qaratilgan hamda quyidagilarni nazarda tutuvchi yangi tizimi joriy etilsin:

issiqlik ta’minoti korxonalari xodimlari mehnatiga haq to‘lashning xodimlar malakasi va ular ko‘rsatayotgan xizmatlar sifatiga bevosita bog‘liq holda ish haqi miqdorini belgilashni ta’minlaydigan tarif tizimini takomillashtirish;

issiqlik ta’minoti korxonalari har bir xodimining shaxsiy hissasi darajasiga bog‘liq holda muayyan ish natijalari uchun har oylik mukofotlarini belgilash yo‘li bilan mehnatni tabaqalashtirilgan tarzda moddiy rag‘batlantirish;

issiqlik ta’minoti korxonalari xodimlarini korxonada isrofgarchilikni kamaytirish va uning faoliyat samaradorligini oshirish yo‘lida tashabbus ko‘rsatgani hamda ijodiy munosabati uchun rag‘batlantirish.

2. Quyidagilar tasdiqlansin:

issiqlik ta’minoti korxonalari boshqaruv xodimlari, muhandis-texnik xodimlari va xizmatchilari uchun mehnatga haq to‘lash tarif setkalari 1-ilovaga* muvofiq;

issiqlik ta’minoti korxonalari ishchilari uchun mehnatga haq to‘lash tarif setkalari 2-ilovaga* muvofiq.

O‘zbekiston Respublikasi Mehnat va aholini ijtimoiy muhofaza qilish vazirligi issiqlik ta’minoti korxonalari bilan birgalikda lavozimlarni tarif setkasi razryadlariga moslashtirish va tarif stavkalari miqdorini tasdiqlangan tarif setkalariga muvofiq belgilashni ta’minlasin.

3. Belgilansinki, issiqlik ta’minoti korxonalari xodimlarini moddiy rag‘batlantirish miqdorlari quyidagi shartlarga so‘zsiz rioya etilgan holda belgilanadi:

iste’molchilarni davlat tomonidan belgilangan talablar va me’yorlarga qat’iy muvofiq ravishda issiqlik bilan ta’minlash bo‘yicha ishlarni sifatli hamda o‘z vaqtida bajarish;

iste’molchilarning asosli shikoyatlari yo‘qligi;

energetika va boshqa moddiy resurslarni tejash, isrofgarchilikni qisqartirish.

4. Issiqlik ta’minoti korxonalari xodimlarining mehnatiga haq to‘lash to‘g‘risidagi Nizom 3-ilovaga muvofiq tasdiqlansin.

5. O‘zbekiston Respublikasi “O‘zkommunxizmat” agentligi, Mehnat va aholini ijtimoiy muhofaza qilish vazirligi, Iqtisodiyot vazirligi va Moliya vazirligining issiqlik ta’minoti hududiy korxonalarida issiqlik ta’minoti korxonalari xodimlarini rag‘batlantirish jamg‘armalarini tashkil etish to‘g‘risidagi taklifiga rozilik berilsin.

Quyidagilar jamg‘armalarning daromadlarini shakllantirish manbalari sifatida belgilansin:

energetika resurslarini va mehnat haqi fondini tejashdan tushgan mablag‘lar;

tuzilgan bitimlar shartlariga muvofiq iste’molchilar tomonidan issiqlik ta’minoti korxonalariga to‘lanadigan jarima sanksiyalari;

aholi va o‘zga iste’molchilarga boshqa xizmatlar ko‘rsatishdan olinadigan daromadlar.

6. O‘zbekiston Respublikasi “O‘zkommunxizmat” agentligi Mehnat va aholini ijtimoiy muhofaza qilish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

2007-yilning 10-iyuliga qadar issiqlik ta’minoti va suv ta’minoti korxonalarida tegishli jamg‘armalar va moddiy rag‘batlantirish chora-tadbirlarini joriy etish bo‘yicha korxona rahbarlari boshchiligida maxsus komissiyalar tashkil etilishini ta’minlasin;

joriy yilning iyun-iyul oylarida issiqlik ta’minoti va suv ta’minoti korxonalari xodimlarini moddiy rag‘batlantirish jamg‘armalarini shakllantirish tartibi va mexanizmlarini joriy etish to‘g‘risida joylarda seminarlar o‘tkazilishini tashkil qilsin.

7. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

8. Mazkur qarorning ijrosini nazorat qilish O‘zbekiston Respublikasi Bosh vaziri Sh. M. Mirziyoyev zimmasiga yuklansin.

1. Mazkur Nizom issiqlik ta’minoti korxonalari (bundan keyin matnda korxona deb yuritiladi) boshqaruv xodimlari, muhandis-texnik xodimlari, xizmatchilari va ishchilarining mehnatiga haq to‘lash tartibini belgilaydi.

2. Mazkur Nizom xodimlarning shartnoma majburiyatlariga qat’iy rioya qilish hamda iste’molchilarni issiqlik energiyasi bilan ta’minlash, ish haqi miqdorining korxonadagi yakuniy ish natijalariga bog‘liqligini kuchaytirish bo‘yicha barqaror ishlarni tashkil etishda xodimlarning moddiy manfaatdorligini kuchaytirish va mas’uliyatini oshirish maqsadida joriy etiladi.

3. Xodimlar mehnatiga haq to‘lash O‘zbekiston Respublikasi Mehnat kodeksi va mazkur Nizomga muvofiq amalga oshiriladi.

4. Korxonalar xodimlarining mehnatiga haq to‘lash quyidagilarni o‘z ichiga oladi:

xodimlarning mansab maoshlari;

qonun hujjatlariga muvofiq mansab maoshlariga belgilangan ustama va qo‘shimcha haqlar;

issiqlik ta’minoti korxonalari xodimlarini moddiy rag‘batlantirish jamg‘armasidan (bundan keyin matnda Jamg‘arma deb yuritiladi) to‘lanadigan mukofotlar;

jamg‘arma hisobidan to‘lanadigan bir martalik moddiy yordam.

5. Xodimlarga korxona rahbari tomonidan tasdiqlangan shtat jadvaliga muvofiq belgilangan mansab maoshiga qarab ish haqi to‘lanadi.

6. Xodimlarning mansab maoshlari mehnatga haq to‘lashning tasdiqlangan tarif setkalari bo‘yicha belgilangan bazaviy tarif stavkalari asosida shakllantiriladi.

Lavozimlarni tarif setkasi razryadlariga moslashtirish issiqlik ta’minoti korxonalari tomonidan O‘zbekiston Respublikasi Mehnat va aholini ijtimoiy muhofaza qilish vazirligi bilan kelishilgan holda amalga oshiriladi.

Bazaviy tarif stavkalarini indeksatsiyalash, korxona indeksatsiyalash uchun moliyaviy imkoniyatga ega bo‘lgan taqdirda amalga oshiriladi.

7. Issiqlik ta’minoti korxonalarining ishchilari uchun mehnat haqi bo‘yicha bazaviy tarif stavkalari miqdori tarif setkasining tegishli razryadi tarif koeffitsiyentini tarif setkasining boshlang‘ich (birinchi) razryadi tarif stavkasi miqdoriga ko‘paytirilishi bilan belgilanadi.

8. Mehnat to‘g‘risidagi qonun hujjatlariga muvofiq korxona xodimlariga quyidagilar uchun haq to‘lanadi:

ish vaqtidan tashqari hamda dam olish va bayram kunlaridagi ish uchun — soatbay tarif stavkasidan kelib chiqqan holda ikki barobar miqdorda;

tungi ish vaqti uchun — soatbay tarif stavkasidan kelib chiqqan holda 1,5 barobar miqdorda;

kasblar bo‘yicha o‘rindoshligi, xizmat ko‘rsatish doirasini kengaytirgani, xodim o‘zining asosiy ishi bilan bir qatorda vaqtincha yo‘q xodimning vazifalarini bajargani uchun — amalda bajarilgan ishga xodim bilan ish beruvchi o‘rtasidagi kelishuv bo‘yicha;

tabiiy-iqlim sharoitlari noqulay joylarda ishlaganlik uchun — mazkur hududda belgilangan tuman koeffitsiyentini hisobga olgan holda;

qonun hujjatlariga muvofiq mansab maoshlariga belgilangan boshqa ustama va qo‘shimcha haqlar.

9. Issiqlik ta’minoti korxonalarining ishchilari uchun mehnat haqi bo‘yicha korxonada qo‘llaniladigan tarif setkasining boshlang‘ich (birinchi) razryadi tarif stavkasi miqdorlari korxona tomonidan korxona moliyaviy imkoniyati va mehnat haqi fondining (mukofotlarni hisobga olmaganda) korxona xarajatlaridagi mavjud ulushidan kelib chiqib, shuningdek moliyaviy-iqtisodiy hisob-kitoblar asosida mehnat organlari bilan kelishilgan holda belgilanadi.

Issiqlik ta’minoti korxonalarining ishchilari uchun mehnat haqi tarif setkasining boshlang‘ich (birinchi) razryadi tarif stavkasi miqdori mehnatga haq to‘lashning Yagona tarif setkasi bo‘yicha birinchi razryad tarif stavkasi miqdoridan past bo‘lishi mumkin emas;

10. Issiqlik ta’minoti korxonalarining ishchilari uchun mehnat haqi bo‘yicha tarif setkasining boshlang‘ich (birinchi) razryadi tarif stavkasini mazkur Nizomga muvofiq belgilash (o‘zgartirish) ko‘rsatilayotgan xizmatlar tariflarining o‘sishiga olib kelmasligi kerak.

11. Issiqlik ta’minoti korxonalarining ishchilari uchun mehnat haqi bo‘yicha tarif setkasining boshlang‘ich (birinchi) razryadi tarif stavkasi miqdori, mehnat organlari bilan kelishilgandan so‘ng, issiqlik ta’minoti korxonasi rahbarining buyrug‘i bilan tasdiqlanadi.

12. Issiqlik ta’minoti korxonalarining ishchilari uchun mehnat haqi bo‘yicha tarif setkasining boshlang‘ich (birinchi) razryadi tarif stavkasi miqdori, qoidaga ko‘ra, O‘zbekiston Respublikasida belgilangan mehnatga haq to‘lashning eng kam miqdori o‘zgartirilishi munosabati bilan qayta ko‘rib chiqiladi.

Ko‘rsatilayotgan xizmatlar uchun belgilangan tartibda aniqlanadigan tariflarning o‘zgarishi issiqlik ta’minoti korxonalarining ishchilari uchun mehnat haqi bo‘yicha tarif setkasining boshlang‘ich (birinchi) razryadi tarif stavkasining o‘zgarishiga olib kelmaydi.

13. Bir oylik ish yakunlari bo‘yicha mukofotlash uchun quyidagilar korxona xodimlari mehnatini baholashning asosiy mezonlari hisoblanadi:

ko‘rsatiladigan xizmatlar hajmi va sifati — davlat tomonidan belgilangan talablar va me’yorlarga qat’iy muvofiq ravishda iste’molchilarga issiqlik energiyasini uzluksiz yetkazib berishni ta’minlash;

iste’molchilarning asosli, shu jumladan takroriy shikoyatlari yo‘qligi;

energetika va boshqa moddiy resurslarni tejash, isrofgarchilikni kamaytirish.

14. Xodimlarga mukofotlar miqdori korxona xodimlari mehnatini baholashning asosiy mezonlaridan kelib chiqib, tabaqalashtirilgan tarzda belgilanadi. Mukofotning umumiy miqdori har bir xodimga hisoblaganda tarif setkasi bo‘yicha uning tarif stavkasi (mansab maoshi)ning 50 %idan oshishi mumkin emas.

15. Xodimni mukofotlash to‘g‘risidagi masalani ko‘rib chiqish uchun asos bo‘lib korxona tegishli bo‘linmasi rahbari tomonidan mazkur bo‘linmaning moliyaviy-xo‘jalik faoliyati bo‘yicha asoslari hamda buxgalterlik va tezkor hisob-kitob ma’lumotlarini ilova qilib berilgan bildirishnomasi hisoblanadi.

16. Mukofotlash va moddiy yordam ajratish to‘g‘risidagi qaror korxona rahbari buyrug‘i bilan, korxona rahbari (komissiya raisi), rahbar o‘rinbosari, iqtisodiy xizmat rahbari, bosh buxgalter, kasaba uyushmasi qo‘mitasi raisi va ikki xodimdan iborat 7 kishilik tarkibda tuziladigan komissiya tomonidan qabul qilinadi.

17. Komissiya ish tartibi kasaba uyushmasi qo‘mitasi bilan kelishilgan holda korxona rahbari tomonidan belgilanadi.

Komissiya majlislari, qoidaga ko‘ra, har oy, alohida hollarda esa zarurat yuzasidan o‘tkaziladi. Mukofotlash va moddiy yordam puli to‘lash to‘g‘risidagi qaror ochiq ovoz berish yo‘li bilan qabul qilinadi. Qaror komissiya a’zolarining kamida uchdan ikki qism ovozi mavjud bo‘lganda qabul qilingan hisoblanadi va korxona rahbari buyrug‘i bilan rasmiylashtiriladi.

18. Mukofotni tayinlashda xodimning o‘z xizmat vazifalarini korxona rahbari tomonidan tasdiqlangan ko‘rsatkichlarga muvofiq bajarganiga baho beriladi.

19. Mukofotlar amalda ishlangan vaqt uchun beriladi.

Mukofot berilayotgan oyda xodim ishdan ozod etilishi (xodimning aybi bilan ishdan ozod etilishi bundan mustasno) yoki ishga qabul qilinishi, harbiy xizmatga chaqirilishi munosabati bilan yoki boshqa uzrli holatlar tufayli to‘liq ishlab berilmagan taqdirda mukofot amalda ishlangan vaqtga proporsional tarzda tayinlanadi.

20. Ishlab chiqarish va texnologik instruksiyalarni, ichki tartib - qoidalarni buzishda aybdor bo‘lgan, nuqsonlarga yo‘l qo‘ygan xodimlar mukofotdan to‘liq yoki qisman mahrum etiladi.

Qoidabuzarliklarga yo‘l qo‘ygan xodimlarni mukofotdan mahrum etish (kamaytirish) qoidabuzarliklar yo‘l qo‘yilgan yoki aniqlangan davrda amalga oshiriladi. Mehnat kodeksining 181-moddasiga muvofiq intizomiy jazo chorasi qo‘llanilgan xodim mazkur chora qo‘llangan davrda mukofotdan to‘liq mahrum etiladi.

21. Bir martalik moddiy yordam kasaba uyushmasi qo‘mitasi tashabbusi bo‘yicha yoki xodimning o‘z arizasiga ko‘ra komissiya qarori bilan jamoaviy shartnomada nazarda tutilgan tartibda tayinlanadi.

22. Xodimlarga bir martalik moddiy yordam mehnat ta’tiliga chiqishda bazaviy tarif stavkasining bir barobarigacha miqdorda, shuningdek alohida holatlar (uzoq muddatli kasallik, oila a’zosining vafoti, to‘y marosimi, farzand tug‘ilishi va boshqa holatlar) munosabati bilan bir martalik moddiy yordam to‘lanishi mumkin.

Moddiy yordamning aniq miqdori komissiya tomonidan vaziyatga qarab belgilanadi.

23. Mablag‘lar mavjud bo‘lgan taqdirda xodimlarga ovqat va kommunal xizmatlarning oshgan narxini kompensatsiya qilish uchun issiqlik ta’minoti korxonalarining ishchilari uchun mehnat haqi bo‘yicha tarif setkasining boshlang‘ich (birinchi) razryadi tarif stavkasining 20%igacha miqdorda har oylik moddiy yordam puli to‘lanishi, shuningdek davlat bayramlariga mukofotlar berilishi mumkin.

28. Jamg‘arma issiqlik ta’minoti korxonalarida tashkil etiladi.

Jamg‘arma mablag‘lari korxonalarning maxsus hisob raqamlarida jamlanadi.

Korxona rahbari, u yo‘qligida uning o‘rnini bosuvchi shaxs jamg‘arma mablag‘larini tasarruf etuvchi hisoblanadi.

29. Quyidagilar Jamg‘arma mablag‘larini shakllantirish manbalari hisoblanadi:

energetika resurslarini tejashdan olingan mablag‘lar;

mehnat haqi fondini tejashdan olingan mablag‘lar;

tuzilgan shartnomalarga muvofiq iste’molchilar tomonidan issiqlik ta’minoti korxonalariga to‘lanadigan jarima sanksiyalari;

aholi va o‘zga iste’molchilarga boshqa xizmatlar ko‘rsatishdan olinadigan daromadlar.

30. Korxona tomonidan yil yakunlari bo‘yicha rentabelli ishni ta’minlash sharoitida issiqlik ta’minoti xizmatlari ko‘rsatishning belgilangan prognozi bajarilgan taqdirda korxona tasarrufida qoladigan foydaning 40 %igacha miqdori Jamg‘arma mablag‘larini ko‘paytirishga yo‘naltirilishi mumkin.

31. Jamg‘armadan mukofotlar va bir martalik moddiy yordam pulini to‘lash Jamg‘arma mablag‘lari doirasida amalga oshiriladi.

Hisobot yilida foydalanilmagan Jamg‘arma mablag‘lari olib qo‘yilmaydi va keyingi yilga o‘tkaziladi.

32. Jamg‘arma mablag‘lari sarflanishini nazorat qilish korxona rahbariyati tomonidan qonun hujjatlarida belgilangan tartibda amalga oshiriladi.

33. Jamg‘arma mablag‘laridan maqsadga nomuvofiq foydalanish holatlari aniqlanganda, Jamg‘armaning maqsadga nomuvofiq foydalanilgan mablag‘lari jami summasi davlat budjeti daromadiga o‘tkaziladi, aybdor shaxslarga nisbatan esa qonun hujjatlarida belgilangan tartibda tegishli javobgarlik choralari ko‘riladi.

34. Korxona rahbari korxona xodimlariga mukofot va moddiy yordam pullarini to‘g‘ri ajratib berishda, shuningdek korxona xodimlarini moddiy rag‘batlantirishga yo‘naltiriladigan mablag‘lardan foydalanishda qonun hujjatlariga muvofiq shaxsan javobgar hisoblanadi.