Vazirlar Mahkamasi qayd etadiki, Xalqaro tiklanish va taraqqiyot banki hamda Quvayt arab iqtisodiy rivojlantirish jamg‘armasi kreditlari hisobiga amalga oshirilayotgan “Toza suv, sanitariya va aholi salomatligi” loyihasini ro‘yobga chiqarishda qurilish-montaj ishlarining bajarilishi va xorijiy maslahatlashuv kompaniyalari faoliyati ustidan nazoratning susaytirib yuborilganligi tufayli kredit mablag‘laridan samarasiz foydalanishga yo‘l qo‘yilgan, buning natijasida respublika manfaatlariga iqtisodiy zarar yetkazilgan. Qoraqalpog‘iston Respublikasi Vazirlar Kengashi va Xorazm viloyati hokimligi Loyihani birgalikda amalga oshirishda qatnashishdan o‘zlarini chetga olishgan.

“Toza suv, sanitariya va aholi salomatligi” loyihasi bo‘yicha xorijiy kreditlarni o‘z vaqtida va samarali o‘zlashtirish yuzasidan ta’sirchan chora-tadbirlar ko‘rish maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot vazirligi tomonidan:

asbob-uskunalar yetkazib berish va xizmatlar ko‘rsatish bo‘yicha tuzilgan barcha kontraktlar xatlovdan o‘tkazilganligi, Loyihaning joriy holati baholanganligi va yakuniy hisob-kitob qilishda ilgari xorijiy maslahatchilarga asossiz to‘langan kredit mablag‘lari ushlab qolinganligi;

Loyiha bo‘yicha sotib olinadigan asbob-uskunalar ro‘yxati respublika korxonalari tomonidan ishlab chiqariladigan tovarlar importi chiqarib tashlangan holda maqbullashtirilganligi;

qarz mablag‘larining harakatini moliyaviy hisobga olish va nazorat qilishning milliy va xalqaro moliya hisobotlari standartlari talablariga muvofiq bo‘lgan tizimi joriy etilganligi ma’lumot uchun qabul qilinsin.

2. O‘zbekiston Respublikasi Iqtisodiyot vazirligi ijrochi agent etib belgilansin, unga ko‘rsatib o‘tilgan Loyihani amalga oshirish uchun jalb etiladigan qarz mablag‘laridan maqsadli va samarali foydalanilishi, loyiha bo‘yicha tugallangan obyektlarni foydalanuvchi tashkilotlar bilan birgalikda qabul qilib olish uchun javobgarlik yuklansin.

3. O‘zbekiston Respublikasi Iqtisodiyot vazirligi ikki hafta muddatda:

1-ilovaga muvofiq xodimlarining cheklangan soni 15 kishidan iborat bo‘lgan yuridik shaxs sifatidagi Loyihani amalga oshirish guruhini tuzsin;

O‘zbekiston Respublikasi tijorat bankida Loyihaning maxsus hisob raqamini ochsin.

4. Quyidagilar Loyihani amalga oshirish guruhining asosiy vazifalari etib belgilansin:

moliyalashtiruvchi xalqaro tashkilotlar tartibotlariga va O‘zbekiston Respublikasi qonun hujjatlariga muvofiq Loyihani va kredit mablag‘larini boshqarish;

kredit mablag‘laridan qarz bitimlari va Hukumat qarorlarida Loyihaning belgilangan maqsadlariga qat’iy muvofiq ravishda foydalanish;

qurilish ishlarining sifati va o‘z vaqtida bajarilishi ustidan nazoratni amalga oshirish, ko‘rsatkichlarda kontraktlarda nazarda tutilgan ko‘rsatkichlar o‘rtasida tafovutlar aniqlangan taqdirda pudrat tashkilotlariga o‘z vaqtida e’tiroz va reklamatsiyalar kiritish;

obyektlarning o‘z vaqtida foydalanishga topshirilishini nazorat qilish va malakali mahalliy mutaxassislar — muhandislar va guruhning shtatdagi xodimlari tomonidan qurilishning borishi ustidan texnik nazoratni amalga oshirish;

kredit mablag‘larining moliyaviy hisobini yuritish va amaldagi qonun hujjatlari talablariga muvofiq ulardan foydalanilishi to‘g‘risida hisobot tuzish;

xarid hujjatlarini tayyorlashda va takliflarni baholashda tender komissiyasi ishida qatnashish.

Belgilab qo‘yilsinki, Loyihani amalga oshirish guruhi xodimlari Loyiha boshqarilishi va mablag‘lardan samarali foydalanilishi, shuningdek qurilish ishlari texnik nazorat qilinishi uchun shaxsan javob beradilar.

8. Vazirlar Mahkamasining “Qizketgan shaharchasini suv bilan ta’minlashning ko‘rgazmali loyihasini amalga oshirish chora-tadbirlari to‘g‘risida” 1997-yil 29-avgustdagi 421-son qarorining 8-bandi va qarorga 3-ilova o‘z kuchini yo‘qotgan deb hisoblansin.

9. Mazkur qarorning bajarilishini nazorat qilish O‘zbekiston Respublikasining Bosh vaziri Sh.M.Mirziyoyev zimmasiga yuklansin.