Amerika Qo‘shma Shtatlari Hukumati bilan O‘zbekiston Respublikasi Hukumati o‘rtasida tuzilgan “Taraqqiyot uchun oziq-ovqatlar” dasturi bo‘yicha qishloq xo‘jaligi mahsulotlari yetkazib berish to‘g‘risidagi Bitim doirasida O‘zbekiston Respublikasiga berilgan grantdan samarali foydalanishni ta’minlash maqsadida Vazirlar Mahkamasi qaror qiladi:

1. Hukumatlararo bitimga muvofiq tuzilgan O‘zbekiston—Amerika qo‘shma ishchi guruhining “Taraqqiyot uchun oziq-ovqatlar” dasturi bo‘yicha qishloq xo‘jaligi mahsulotini sotishdan tushayotgan grant mablag‘lari hisobiga ilovaga muvofiq qishloq va suv xo‘jaligi sohasidagi ustuvor loyihalarni moliyalashtirish to‘g‘risidagi taklifiga rozilik berilsin.

2. O‘zbekiston Respublikasi Iqtisodiyot vazirligi, Moliya vazirligi Qishloq va suv xo‘jaligi vazirligi bilan birgalikda ilovada nazarda tutilgan kapital qurilish obyektlarini belgilangan tartibda 2005-yil uchun qurilishlarning aniq ro‘yxatiga kiritsin.

3. O‘zbekiston Respublikasi Moliya vazirligi loyihada ko‘rsatilgan ustuvor loyihalar Moliya vazirligining “Taraqqiyot uchun oziq-ovqatlar” dasturi bo‘yicha tushayotgan mablag‘larni jamlash uchun ochilgan maxsus hisob raqamidan moliyalashtirilishini ta’minlasin.

4. O‘zbekiston Respublikasi Qishloq va suv xo‘jaligi vazirligi, O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi “Taraqqiyot uchun oziq-ovqatlar” dasturi bo‘yicha olingan mablag‘lardan maqsadli foydalanilishini ta’minlasin va loyihalarning amalga oshirilishi to‘g‘risidagi axborotni yilning har choragida O‘zbekiston Respublikasi Tashqi iqtisodiy aloqalar, investitsiyalar va savdo vazirligiga hamda Moliya vazirligiga taqdim etsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari V.A.Golishev zimmasiga yuklansin.