2007-yil O‘zbekiston Respublikasi Investitsiya dasturi parametrlari bajarilishini ta’minlash, ishlab chiqarishni modernizatsiya qilishga, texnologik jihatdan qayta jihozlash va rekonstruksiya qilishga, shuningdek akademik litseylar, kasb-hunar kollejlari va umumta’lim maktablari qurishga ajratilgan budjet mablag‘laridan foydalanish samaradorligini oshirish maqsadida Vazirlar Mahkamasi qaror qiladi:

1. O‘zbekiston Respublikasi Iqtisodiyot vazirligi tomonidan Moliya vazirligi, Tashqi iqtisodiy aloqalar, investitsiyalar va savdo vazirligi, “Davarxitektqurilish” qo‘mitasi, boshqa manfaatdor vazirliklar, idoralar va xo‘jalik yurituvchi subyektlar bilan birgalikda ishlab chiqilgan 2007-yil Pudrat qurilish ishlari dasturining asosiy parametrlari 1-ilovaga* muvofiq ma’qullansin.

2. 2007-yil pudrat ishlarining obyektlar bo‘yicha dasturlari:

akademik litseylar va kasb-hunar kollejlari bo‘yicha 2-ilovaga* muvofiq;

umumta’lim maktablari bo‘yicha 3-ilovaga* muvofiq;

vazirliklar va idoralar bo‘yicha 2007-yil Investitsiya dasturiga kiritilgan yirik ishlab chiqarish obyektlari bo‘yicha 4-ilovaga* muvofiq tasdiqlansin.

3. O‘tkazilgan tanlov savdolari natijalariga ko‘ra hamda pudrat ishlarini bajarish yuzasidan buyurtmachilar bilan tuzilgan shartnomalarga muvofiq akademik litseylar, kasb-hunar kollejlari va umumta’lim maktablari qurishni amalga oshiruvchi pudrat tashkilotlariga kreditlar berish uchun 2007-yilgi qurilishlarning belgilangan tartibda tasdiqlangan manzilli ro‘yxatlari asosida O‘zbekiston Respublikasi Moliya vazirligi va Maktab ta’limi jamg‘armasi tomonidan 2006-yil dekabrda respublika tijorat banklarida 33,7 mlrd. so‘m miqdorida maqsadli depozitlar joylashtirilganligi ma’lumot uchun qabul qilinsin.

4. 2007-yil Investitsiya dasturiga kiritilgan obyektlar buyurtmachilari — vazirliklar va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda O‘zbekiston Respublikasi “Davarxitektqurilish” qo‘mitasi bilan birgalikda, obyektlarning belgilangan muddatlarga qat’iy muvofiq ravishda foydalanishga topshirilishini ta’minlaydigan ishlarni olib borishning alohida bosqichlarini bo‘lib chiqqan va bog‘lagan holda har bir obyekt qurilishining kalendar jadvallarini ishlab chiqsinlar va tasdiqlasinlar;

har oyning 5-kunida O‘zbekiston Respublikasi “Davarxitektqurilish” qo‘mitasiga Pudrat ishlari dasturining amalga oshirilishi to‘g‘risida axborot taqdim etsinlar.

5. O‘zbekiston Respublikasi “Davarxitektqurilish” qo‘mitasi:

taqdim etiladigan axborot asosida buyurtmachilar va pudratchilar tomonidan tanlov savdolari hamda tuzilgan shartnomalar shartlari bajarilishining muntazam monitoringini ta’minlasin, bunda qurilayotgan obyektlarning zarur qurilish materiallari bilan ta’minlanganligiga, ularning texnologik asbob-uskunalar bilan o‘z vaqtida butlanganligiga alohida e’tibor bersin;

har oyning 10-kunida O‘zbekiston Respublikasi Vazirlar Mahkamasiga Pudrat ishlari dasturining amalga oshirilishi monitoringi natijalari, bajarilgan loyiha va qurilish ishlarining sifati, buyurtmachilar va pudratchilar tomonidan o‘z zimmasiga olingan shartnoma majburiyatlarining bajarilishi to‘g‘risida axborot taqdim etsin.

6. O‘zbekiston Respublikasi Iqtisodiyot vazirligiga Moliya vazirligi bilan kelishgan holda, alohida obyektlar bo‘yicha o‘tkazilgan tanlov savdolari natijalarini va mablag‘larning amalda o‘zlashtirilishini hisobga olgan holda Pudrat ishlari dasturining ayrim ko‘rsatkichlariga tasdiqlangan limitlar doirasida tuzatishlar kiritish huquqi berilsin.

7. O‘zbekiston Respublikasi Iqtisodiyot vazirligi Moliya vazirligi, “Davarxitektqurilish” qo‘mitasi, Adliya vazirligi, boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

8. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari N.M. Xanov zimmasiga yuklansin.