Nogironligi bo‘lgan shaxslarni ijtimoiy muhofaza qilish tizimini yanada takomillashtirish, tibbiy-ijtimoiy va kasb bo‘yicha reabilitatsiya samaradorligini oshirish va ularning jamiyatga integratsiyalashuvini kengaytirish maqsadida Vazirlar Mahkamasi qaror qiladi:

1. O‘zbekiston Respublikasi Mehnat va aholini ijtimoiy muhofaza qilish vazirligi, Iqtisodiyot vazirligi, Moliya vazirligi hamda Sog‘liqni saqlash vazirligining Nogironlarni tibbiy-ijtimoiy va kasb bo‘yicha sog‘lomlashtirish milliy markazini hamda Tayanch-harakat qilish tizimi buzilgan nogironlarni sog‘lomlashtirish respublika markazini birlashtirish yo‘li bilan Mehnat va aholini ijtimoiy muhofaza qilish vazirligi huzurida Nogironlarni sog‘lomlashtirish va protezlash milliy markazini (keyingi o‘rinlarda Markaz deb ataladi) tashkil etish to‘g‘risidagi taklifi qabul qilinsin.

2. Quyidagilar Markazning asosiy vazifalari etib belgilansin:

nogironligi bo‘lgan shaxslarni tibbiy, ijtimoiy, kasb bo‘yicha reabilitatsiya qilish va protezlash;

nogironlik, nogironligi bo‘lgan shaxslarni tibbiy-ijtimoiy va kasb bo‘yicha reabilitatsiya qilish, protezlash muammolari bo‘yicha chuqur ilmiy tadqiqotlar o‘tkazish;

nogiron qiladigan asosiy kasalliklarga chalingan nogironligi bo‘lgan shaxslarni reabilitatsiya qilishning individual dasturlarini ishlab chiqish;

nogironligi bo‘lgan shaxslarni reabilitatsiya qilish va protezlash hududiy markazlariga amaliy-uslubiy yordam ko‘rsatish;

nogironlikning holati va sabablarini tizimli asosda chuqur tahlil qilish, uning oldini olish bo‘yicha ilmiy asoslangan tavsiyalarni ishlab chiqish va joriy etish;

reabilitatsiya qilish markazlari va davolash-profilaktika muassasalari bilan birgalikda nogironligi bo‘lgan shaxslarni tibbiy-ijtimoiy hamda kasb bo‘yicha reabilitatsiya qilish chora-tadbirlarini ishlab chiqish va amalga oshirish;

nogironligi bo‘lgan shaxslarga faol hayot faoliyati, o‘qish va mehnat faoliyati imkoniyatini olishda ko‘maklashish.

3. Markazning tuzilmasi 1-ilovaga muvofiq tasdiqlansin.

Markaz tuzilmasiga o‘zgartirishlar kiritish O‘zbekiston Respublikasi Prezidenti huzuridagi Ijtimoiy himoya milliy agentligi direktori tomonidan Iqtisodiyot va moliya vazirligi bilan kelishilgan holda amalga oshiriladi.

4. Belgilab qo‘yilsinki, Markaz:

Nogironlarni reabilitatsiya qilish va protezlash milliy markazining hamda Tayanch-harakat qilish tizimi buzilgan nogironlarni reabilitatsiya qilish respublika markazining huquqiy vorisi hisoblanadi;

nogironlikning holati va sabablarini tizimli asosda chuqur tahlil qilish, uning oldini olish bo‘yicha ilmiy asoslangan tavsiyalarni ishlab chiqish va joriy etish maqsadida tegishli vazirliklar, idoralardan nogironlik masalalari bo‘yicha zarur ma’lumotlarni olish huquqiga ega.

Markaz faoliyati qonunchilikda belgilangan tartibda respublika budjeti mablag‘lari hisobidan moliyalashtiriladi.

5. Mehnat va aholini ijtimoiy muhofaza qilish vazirligi qonun hujjatlarida belgilangan tartibda bir oy muddatda:

Markaz to‘g‘risidagi nizomni ishlab chiqsin va tasdiqlasin;

Nogironlarni tibbiy-ijtimoiy va kasb bo‘yicha sog‘lomlashtirish milliy markazi hamda Tayanch-harakat qilish tizimi buzilgan nogironlarni sog‘lomlashtirish respublika markazining asosiy fondlari, tovar-moddiy zaxiralari va boshqa boyliklari Markaz balansiga berilishi-qabul qilib olinishini ta’minlasin;

Markazning davlat ro‘yxatidan o‘tkazilishini ta’minlasin;

manfaatdor vazirliklar va idoralarni jalb qilgan holda qayta tashkil etilayotgan markazlar xodimlarini attestatsiyadan o‘tkazsin hamda Markazning yuqori malakali va tajribali mutaxassislar bilan butlanishini ta’minlasin.

6. O‘zbekiston Respublikasi Hukumatining 2-ilovaga muvofiq ayrim qarorlariga o‘zgartirishlar kiritilsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.