2006-yil boshoqli don ekinlari hosilini o‘z vaqtida va sifatli yig‘ishtirib olish hamda davlat resurslariga g‘alla sotish bo‘yicha kontraktatsiya shartnomalarini bajarish maqsadida:

1. Don hosili o‘rim-yig‘imini tegishli ravishda tashkil etish va talab darajasida amalga oshirish, shuningdek g‘alla o‘rish kombaynlaridan samarali foydalanish uchun shaxsiy javobgarlik Qoraqalpog‘iston Respublikasi Vazirlar Kengashining Raisi, viloyatlar hokimlari, O‘zbekiston Respublikasi Qishloq va suv xo‘jaligi vazirligi, “O‘zagromashservis” uyushmasi va uning mashina-traktor parklari hududiy birlashmalari rahbarlari zimmasiga yuklansin.

2. Qoraqalpog‘iston Respublikasi Vazirlar Kengashi, viloyatlar hokimliklari, O‘zbekiston Respublikasi Qishloq va suv xo‘jaligi vazirligi, “O‘zagromashservis” uyushmasi va uning mashina-traktor parklari hududiy birlashmalari, “O‘zdonmahsulot” aksiyadorlik kompaniyasi:

g‘alla o‘rish kombaynlarini, don tashish uchun jalb etiladigan barcha turdagi transport vositalarini, shuningdek don yig‘iladigan xirmon va maydonlarni, don tozalash mashinalari hamda g‘allani dastlabki qayta ishlash uchun zarur bo‘lgan boshqa moddiy-texnika bazasini tayyorlab qo‘yishni joriy yilning 25-mayigacha tugallash bo‘yicha tashkiliy-iqtisodiy chora-tadbirlar kompleksi amalga oshirilishini;

tayyorlov korxonalari va punktlarida xo‘jaliklardan g‘allani faqat dastlabki tozalangandan keyin, iflosligi va namligi amaldagi standart normativlardan ortiq bo‘lmagan holdagina qabul qilinishini;

idoraviy mansubligidan qat’i nazar, korxonalar va tashkilotlarning don qabul qilish punktlariga g‘alla tashish uchun yaroqli bo‘lgan transport vositalari shartnoma asosida jalb etilishini;

O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi bilan birgalikda xo‘jaliklar bilan — davlat ehtiyojlari uchun xarid qilinayotgan g‘alla uchun, mashina-traktor parklari bilan — ko‘rsatilgan mexanizatsiya xizmatlari va g‘alla o‘rish kombaynlari operatorlariga ish haqi to‘lash uchun o‘z vaqtida hisob-kitob qilinishini ta’minlasinlar.

3. “O‘zagromashservis” uyushmasi g‘alla o‘rim-yig‘im texnikasi mavjud parkining, ayniqsa yuksak unumli kombaynlarning tayyorlanishini ta’minlasin hamda ehtiyot qismlarning zarur zaxirasini yaratsin.

4. Qoraqalpog‘iston Respublikasi Vazirlar Kengashi va viloyatlar hokimliklari O‘zbekiston Respublikasi Ichki ishlar vazirligi bilan birgalikda yo‘llarda harakatlanish xavfsizligini ta’minlash, yong‘inlar kelib chiqishining oldini olish, shuningdek 2006-yilgi boshoqli don ekinlari hosilining talon-toroj qilinishiga va nobud bo‘lishiga yo‘l qo‘ymaslik yuzasidan zarur chora-tadbirlarni ko‘rsinlar.

Shudgorlashga tayyorlashdan oldin tozalash maqsadida dalalardagi ekin poyalari va qoldiqlari yoqib yuborilishi qat’iyan taqiqlansin.

5. O‘zbekiston Respublikasi Ichki ishlar vazirligi joriy yilning 1-iyunidan boshlab Ichki ishlar vazirligi ta’lim muassasalarining tinglovchilari va kursantlari kontingentini ilovaga binoan taqsimlanishiga muvofiq viloyatlar ichki ishlar boshqarmalari ixtiyoriga yuborsin.

“O‘zbekiston temir yo‘llari” davlat-aksiyadorlik kompaniyasi, “Toshshahartransxizmat” uyushmasi O‘zbekiston Respublikasi Ichki ishlar vazirligi buyurtmanomalari bo‘yicha, tinglovchilar va kursantlarni vaqtinchalik o‘rnashish joyiga tashish va don yig‘ishtirish tugallangandan keyin ularni olib kelish uchun transport vositalari zarur miqdorda ajratilishini ta’minlasinlar.

Jizzax, Qashqadaryo, Sirdaryo va Toshkent viloyatlari hokimliklari:

shirkat va fermer xo‘jaliklari tomonidan “O‘zbekiston temir yo‘llari” davlat aksiyadorlik kompaniyasi va “Toshshahartransxizmat” uyushmasi bilan O‘zbekiston Respublikasi Ichki ishlar vazirligi tinglovchilari va kursantlarini vaqtinchalik o‘rnashish joyiga tashish va don yig‘ishtirish tugallangandan keyin ularni olib kelish bo‘yicha xizmatlar ko‘rsatish to‘g‘risida tegishli shartnomalar tuzilishini;

tinglovchilar hamda kursantlarni vaqtinchalik yashash joylari, shuningdek oziq-ovqatlar, ularni tashish uchun transport va yonilg‘i-moylash materiallari bilan — g‘allachilik xo‘jaliklari mablag‘lari hisobiga ta’minlasinlar.

6. “O‘zbekneftgaz” milliy xolding kompaniyasi va “O‘zneftmahsulot” aksiyadorlik kompaniyasi yonilg‘i-moylash materiallarining zarur zaxirasini yaratsinlar va limit bo‘yicha ajratilgan dizel yonilg‘isi qiymatining 30 foizi, birja savdolari orqali sotib olinadigan benzin, suyultirilgan gaz va dizel yonilg‘isi qiymatining 100 foizi oldindan to‘langandan keyin hosilni yig‘ishtirib olish, tashish va tayyorlash bilan band bo‘lgan qishloq xo‘jaligi korxonalari, mashina-traktor parklari va boshqa tashkilotlarga belgilangan tartibda uzluksiz yetkazib berilishini tashkil etsinlar.

7. O‘zbekiston Respublikasi Qishloq va suv xo‘jaligi vazirligi, “O‘zstandart” agentligi va “O‘zdavdoninspeksiya” davlat ehtiyojlari uchun yetkazib beriladigan g‘alla va urug‘lik materiali sifati ustidan tegishli nazorat o‘rnatsinlar.

8. Urug‘lik g‘allani davlat resurslari uchun xarid qilinadigan tovar g‘allaning umumiy hajmi hisobiga topshirish, shuningdek tovar g‘alladan urug‘lik maqsadlarida foydalanish qat’iyan taqiqlansin.

Belgilab qo‘yilsinki, Qoraqalpog‘iston Respublikasi Vazirlar Kengashining Raisi, viloyatlar va tumanlar hokimlari, “O‘zdonmahsulot” aksiyadorlik kompaniyasi va uning joylardagi bo‘linmalari rahbarlari 2007-yil hosili uchun boshoqli don ekinlari urug‘ligining o‘z vaqtida va sifatli g‘amlanishi uchun shaxsan javob beradilar.

9. O‘zbekiston Respublikasi Davlat statistika qo‘mitasi xo‘jaliklar tomonidan don sotish to‘g‘risidagi statistika hisobotlarining ishonchliligini don qabul qilib olish korxonalari bo‘yicha muntazam ravishda tekshirib borsin, hisobotni buzib ko‘rsatishning aniqlangan holatlari to‘g‘risida tezkorlik bilan Vazirlar Mahkamasiga axborot bersin.

10. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.