Хорижий давлатлар фуқароларини Ўзбекистон Республикаси ўқув юртлари ва илмий муассасаларига ўқишга қабул қилиш ва ўқитиш тизимини тартибга солиш мақсадида Вазирлар Маҳкамаси қарор қилади:

1. Хорижий фуқароларни Ўзбекистон Республикаси ўқув юртлари ва илмий муассасаларига ўқишга қабул қилиш ва ўқитиш тартиби тўғрисидаги илова қилинаётган Низом тасдиқлансин.

2. Республика ўқув юртлари ва илмий муассасаларида, уларнинг қайси идорага қарашлилигидан қатъи назар, хорижий фуқаролардан мутахассислар тайёрлашга раҳбарлик қилиш Ўзбекистон Республикаси Олий ва ўрта махсус таълим вазирлигига юклансин.

3.Олий ва ўрта махсус таълим вазирлиги:

Ўзбекистон Республикасига ўқиш учун келаётган хорижий фуқаролар билан тузиладиган намунавий шартнома (контракт)ларни бир ой муддатда ишлаб чиқсин;

Тошкент давлат университети ва Тошкент давлат техника университетининг фаолият кўрсатаётган тайёрлов бўлимлари негизида Олий ва ўрта махсус таълим вазирлиги ҳузурида чет эллик фуқароларга тил ўргатадиган хўжалик ҳисобидаги Марказни ташкил этсин, Марказга республика ўқув юртларига ўқишга келаётган хорижий давлатлар фуқароларини тил ва умумтаълим бўйича тайёрлаш вазифаси юклатилсин. Марказни маблағ билан таъминлаш хорижий талабаларни ўқитишдан тушадиган маблағлар ҳисобига амалга оширилсин;

манфаатдор вазирликлар ва идоралар билан келишган ҳолда олий ўқув юртлари, илмий муассасаларда хорижий фуқароларнинг ўқиши учун тўлов миқдорларини белгилаш бўйича тавсиялар ишлаб чиқсин.

4. Белгилаб қўйилсинки:

хорижий фуқаролар Ўзбекистон Республикасининг ўқув ва илмий муассасаларига ўқишга шартнома (контракт) асосида қабул қилинадилар, Ўзбекистон Республикаси билан бошқа мамлакатлар ўртасида тузилган ҳукуматлараро битимларда назарда тутилган ўқишга қабул қилиш ҳоллари бундан мустасно;

агар давлатлараро битимлар ва контрактларда бошқа валюта назарда тутилмаган бўлса, хорижий фуқароларнинг ўқиши учун тўловлар эркин муомаладаги валютада амалга оширилади;

хорижий фуқароларни ўқитишга рухсатномалар олий ва ўрта махсус ўқув юртларига — Олий ва ўрта махсус таълим вазирлиги томонидан, умумтаълим мактаблари ва ҳунар-техника билим юртларига эса — Ўзбекистон Республикаси Халқ таълими вазирлиги томонидан берилади;

Ўзбекистон Республикасига ўқишга келаётган хорижий фуқароларга виза олишда ёрдам бериш Ўзбекистон Республикаси Олий ва ўрта махсус таълим вазирлиги ва Халқ таълими вазирлиги талабномалари бўйича Ўзбекистон Республикаси Ташқи ишлар вазирлиги томонидан амалга оширилади;

хорижий фуқароларни қабул қилган ўқув юртлари ва илмий муассасалар Ўзбекистон Республикасининг қонун ҳужжатларига мувофиқ ва белгиланган тартибда ўқишнинг бутун даври учун уларнинг миллий паспортларини ички ишлар органларида рўйхатдан ўтказишлари шарт.

5. Мазкур қарорнинг бажарилишини назорат қилиш Таълим ва фан бўлимига юклансин.

1. Ўзбекистон Республикасида хорижий фуқароларни ўқишга қабул қилиш ва ўқитиш «Таълим тўғрисида»ги Қонунга, бошқа қонун ҳужжатлари ва мазкур Низомга мувофиқ амалга оширилади.

2. Ўзбекистон Республикасида таълим олаётган хорижий фуқаролар Ўзбекистон Республикасининг Конституцияси, қонунлари ва халқаро шартномаларига мувофиқ ҳуқуқларга ва эркинликларга эга бўладилар.

3. Хорижий фуқароларни ўқитиш Ўзбекистон Республикаси Олий ва ўрта махсус таълим вазирлигининг рухсатига эга бўлган ўқув юртларида, умумтаълим мактаблари ва ҳунар-техника билим юртларида эса Халқ таълими вазирлигининг рухсати билан амалга оширилади.

4. Республика ўқув юртларида хорижий фуқароларни ўқитиш ўзбек ёки (ўқиётганларнинг хоҳишига кўра) рус тилида олиб борилади.

5. Ўзбекистон Республикасида хорижий фуқароларни ўқишга қабул қилиш қуйидагилар асосида амалга оширилади;

а) Ўзбекистон Республикаси ва хорижий мамлакатлар ўртасидаги ҳукуматлараро шартномалар;

б) Ўзбекистон Республикаси Олий ва ўрта махсус таълим вазирлигида дастлабки экспертизадан ва рўйхатдан ўтказиладиган жамоа ва шахсий шартномалар ҳамда контрактлар (шу жумладан, Ўзбекистонга келиш мақсадларидан қатъи назар, ҳақиқий визалар бўйича республикага келган хорижий фуқаролар билан ҳам).

6. Ўқитиш учун тўловларнинг турлари, миқдорлари, тартиби ва муддати, стипендия билан таъминлаш, турар жой бериш, тиббий хизмат кўрсатиш ва форс-мажор ҳолатлар натижасида етказилган зарарни қоплаш мазкур Низомнинг 5-бандида кўрсатилган шартнома ва контрактларга мувофиқ белгиланади.

7. Хорижий фуқаролар хоҳишларига кўра:

ўрта умумтаълим мактабларида;

ҳунар-техника билим юртларида;

ўрта махсус ўқув юртларида;

олий ўқув юртларида;

илмий муассасаларда таълим олишлари мумкин.

8. Ўрта махсус ўқув юртларига тўлиқсиз ўрта ёки ўрта мактаб даражасида маълумотга эга 25 ёшгача бўлган хорижий фуқаролар қабул қилинади.

9. Олий ўқув юртларига ўрта мактаб даражасида маълумотга эга 35 ёшгача бўлган хорижий фуқаролар қабул қилиниши мумкин.

Маданият, спорт, санъат ва архитектура ўқув юртларига тегишли маълумотга ва қобилиятга эга бўлган хорижий фуқаролар қабул қилинади. Кўрсатилган ўқув юртларига уларни қабул қилиш мазкур мутахассисликларнинг ўзига хос хусусиятлари билан боғлиқ талабларга биноан ўтказилади.

10. Олий ўқув юртлари, академия институтлари ва бошқа илмий муассасаларнинг аспирантурасига ва ординатурасига олий маълумотли, 35 ёшгача бўлган хорижий фуқаролар қабул қилиниши мумкин.

Аспирантурага ва ординатурага кирувчилар Ўзбекистон Республикасида белгиланган талабларга мувофиқ тайёрланган реферат ёки эълон қилинган ишларнинг расмий равишда тасдиқланган рўйхатини тақдим этишлари керак.

11. Ўқув юртлари, академиянинг ёки тармоқ илмий-тадқиқот институтларига, малака ошириш факультетлари ва курсларига тажриба орттириш учун олий ёки ўрта махсус маълумотга эга бўлган хорижий фуқаролар қабул қилиниши мумкин.

12. Ўқишни тамомлаган хорижий фуқароларга олган маълумоти тўғрисида халқаро намунада тегишли ҳужжатлар берилади.

13. Хорижий ўқувчилар республика ўқув юртларига, агар шартнома ёки битимда бошқача тартиб келишилмаган бўлса, оилалари ва қариндошларисиз келадилар.

14. Ўқиш учун келган хорижий фуқаролар тиббий кўрикдан ва «ОИТС касалликлари олдини олиш тўғрисида» Ўзбекистон Республикасининг Қонунига мувофиқ ОИТС вируси бор-йўқлигини аниқлаш текширувидан ўтадилар.

15. Ўзбекистон Республикасига ўқиш учун келган хорижий фуқаролар қуйидаги ҳужжатларни топширадилар;

ўқишга қабул қилиш ҳақида ариза;

ўрганилган фанлар ва улар бўйича имтиҳонларда олинган 6аҳолар (баллар) кўрсатилган ҳужжатларнинг маълумоти ҳақидаги асл нусхалари ва нотариал тасдиқланган нусхалари;

соғлиғи тўғрисида тиббий хулоса;

миллий паспорт ёки туғилганлик ҳақида гувоҳнома;

4 Х 6 катталикдаги 6 дона фотосурат.

Ўқишга кириш учун ҳужжатларни топшириш тартиби ва муддатлари Олий ва ўрта махсус таълим вазирлиги томонидан ишлаб чиқилган ва тасдиқланган махсус йўриқнома асосида белгиланади.

16. Олий ва ўрта махсус ўқув юртларига, аспирантурага ўқишга киришни ёки тажриба орттиришни хоҳлаган, ўзбек ёки рус тилини билмайдиган хорижий фуқаролар Олий ва ўрта махсус таълим вазирлиги ҳузуридаги тил ўргатиш Марказида тил ўрганиш ва танланган мутахассислик бўйича умумтаълим фанларини ўз ичига олган дастурлар асосида таълим оладилар. Ўзбекистон Республикасидан ташқарида ўзбек ёки рус тилларини ўрганган хорижий фуқароларга, тил ўрганиш марказида тест синовларидан ўтгач, ўқишга кириш учун йўлланма берилади.

17. Хорижий фуқаролар умумтаълим мактабларига ёки ҳунар-техника билим юртларига Халқ таълими вазирлигининг йўлланмалари билан ўқишга кирадилар ва зарурат бўлганда, ўқиётган жойида тил ўрганиш курсларидан ўтадилар.

18. Марказда ўқиш тугагач имтиҳонлар ўтказилади. Битириш имтиҳонларини муваффақиятли топширган ўқувчиларга Ўзбекистон Республикасининг тегишли ўқув юртларида ўқишни давом эттириш ҳуқуқини берадиган белгиланган намунадаги гувоҳнома (сертификат) берилади. Марказдаги ўқиш даврида зарур умумтаълим билимларини эгаллай олмаган ва тил ўрганишга бўлган лаёқатини кўрсата олмаган хорижий ўқувчиларга ўқиш учун йўлланма берилмасдан рўйхатдан чиқариладилар.

19. Ўқув юртларида ва илмий муассасаларда ўқиётган хорижий фуқароларни ўқитиш тартиби, муддати ва уларга қўйиладиган талаблар Ўзбекистон Республикасининг тегишли вазирликлари, идоралари томонидан тасдиқланган таълим ўқув юртлари ва илмий муассасалар тўғрисидаги низомлар билан белгиланади.

20. Хорижий ўқувчилар қуйидаги ҳуқуқларга эгадирлар:

кафедраларнинг илмий-тадқиқот ишларида, талабаларнинг илмий жамиятлари ва тўгаракларида қатнашиш;

ўқув юртларининг кутубхоналари, спорт комплекслари, клублари ва маданият саройларидан фойдаланиш;

дам олишнинг уюштирилган турларида қатнашиш.

21. Хорижий ўқувчилар қуйидагиларга мажбурдирлар:

Ўзбекистон Республикаси Конституциясига ва бошқа қонун ҳужжатларига амал қилиш, маҳаллий урф-одат ва анъаналарга ҳурмат билан муносабатда бўлиш, хорижий фуқароларнинг бўлиши ва юриши бўйича республикада белгиланган қоидаларни бажариш;

интизомга риоя қилиш, машғулотларга қатнашиш, ўқув режалари ва дастурларида назарда тутилган ўқув ва ишлаб чиқариш ишларининг барча турларини бажариш, имтиҳон ва синовларни белгиланган муддатларда топшириш;

ўқув юртининг ва талабалар ётоқхонасининг ички тартиб-қоидаларини бажариш;

ўқув юрти раҳбарларининг кўрсатма ва фармойишларини бажариш.

22. Ўқишда ўзлаштирмаслик, интизомни, ўқув юрти ва талабалар ётоқхонасининг ички тартиб-қоидаларини бузганлик учун, шунингдек, Ўзбекистон Республикасининг норматив ҳужжатларида хорижий ўқувчиларга нисбатан назарда тутилган бошқа сабабларга кўра ўқув юрти рўйхатидан чиқариб юборишгача бўлган маъмурий чоралар кўрилиши мумкин; Ўзбекистон Республикаси ҳудудида бўлиш ва юриш тартибини қўпол равишда бузганлик учун улар ўқув юртларининг илтимосига биноан ички ишлар органлари томонидан республикадан ташқарига чиқариб юбориладилар.

23. Ўзбекистон Республикаси ҳудудида жиноят содир этган хорижий ўқувчилар, агар халқаро шартнома ва битимларда бошқа чора кўзда тутилмаган бўлса, Ўзбекистон Республикасининг жиноят ва жазо қонунига биноан жавобгарликка тортиладилар.

24. Ўқишни тугатган ёки ўқув юртлари ва илмий муассасалар рўйхатидан ўчирилган хорижий ўқувчилар бир ой муддатда Ўзбекистон Республикасидан ўз ватанига ёки доимий яшайдиган мамлакатига жўнаб кетишга мажбур.

25. Ўзбекистон Республикасида таълим олаётган хорижий ўқувчилар бир мамлакат ўқувчиларини бирлаштирадиган ватандошлик уюшмасини ташкил қилишлари мумкин. Уларнинг ўқув юрти маъмурияти ва талабалар ташкилотлари билан мустаҳкам алоқада амалга ошириладиган ва сиёсий тусга эга бўлмаган фаолияти ўқув режаларини муваффақиятли бажаришга, интизомга риоя қилишга, унинг аъзоларининг ўқув юрти ижтимоий ҳаётида фаол иштирок этишларига, уларни эзгулик, инсонпарварлик, халқлар ўртасида дўстлик ва тинчлик руҳида тарбиялашга қаратилган бўлиши керак.

26. Олий, ўрта махсус таълим ўқув юртларида ўқув йили биринчи сентябрда бошланади. Таътилларнинг бошланиш ва тугаш вақти, уларнинг давом этиш муддати муайян ўқув юртининг ўқув режаларига мувофиқ белгиланади.

27. Ўзбекистон Республикаси ўқув юртлари ёки илмий-тадқиқот муассасаларига ўқишга қабул қилинган хорижий фуқаролар мазкур Низом билан таништирилади ва улар унинг талабларини бажариш ҳақида ўз мажбуриятларини ёзма равишда тасдиқлайдилар.