|
Ҳужжат кучини йўқотган " " 19.01.2026
|
Ўзбекистон Республикаси Вазирлар Маҳкамасининг
қарори
Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимини жорий этиш тартиби тўғрисидаги низомни тасдиқлаш ҳақида
LexUZ шарҳиМазкур қарор Ўзбекистан Республикаси Вазирлар Маҳкамасининг 2025 йил 17 октябрдаги 650-сонли «Истеъмол ва техник этил спирти, алкоголь ҳамда тамаки маҳсулотлари ишлаб чиқаришни ва уларнинг айланмасини назорат қилиш бўйича хавфни таҳлил этиш автоматлаштирилган тизимини жорий қилиш тартиби тўғрисидаги низомни тасдиқлаш ҳақида»ги қарорига асосан 2026 йил 19 январдан ўз кучини йўқотади.
Ўзбекистон Республикаси Президентининг «Ўзбекистон Республикаси Молия вазирлиги ҳузуридаги Алкоголь ва тамаки бозорини тартибга солиш инспекцияси фаолиятини ташкил этиш тўғрисида» 2019 йил 5 февралдаги ПҚ-4162-сон қарори ижросини таъминлаш мақсадида Вазирлар Маҳкамаси қарор қилади:
1. Қуйидагиларни назарда тутувчи Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимини жорий этиш тартиби тўғрисидаги низом иловага мувофиқ тасдиқлансин:
истеъмол ва техник этил спирти, алкоголь ва тамаки маҳсулотларини ишлаб чиқарувчилар, шунингдек, алкоголь маҳсулотларини улгуржи савдоси билан шуғулланувчи ташкилотларда маҳсулот ишлаб чиқарилиши ва уларнинг айланмаси соҳасида ҳуқуқбузарлик хавфини автоматик тарзда инсон омили аралашмаган ҳолда таҳлил қилиш;
тадбиркорлик субъектлари томонидан лицензия талаблари ва шартларига риоя этилишини тўлиқ таҳлил қилиш ҳамда якуний натижаларни балли тизим орқали ҳуқуқбузарлик хавфи даражасини баҳолаш;
тизим маълумотлари асосида шакллантирилган рўйхатга асосан ташкилотларда текшириш ўтказиш юзасидан Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилга мурожаат қилиш тартиби.
2. Ўзбекистон Республикаси Молия вазирлиги:
икки ой муддатда истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш мақсадида «таҳлика-таҳлил» тизими ишлаб чиқилишини ҳамда Молия вазирлиги ҳузуридаги Алкоголь ва тамаки бозорини тартибга солиш инспекцияси фаолиятига 2020 йил 1 майдан жорий этилишини;
2020 йил 1 июлга қадар «таҳлика-таҳлил» тизимида ўзаро ахборот алмашинуви тартиб-таомилларини йўлга қўйиш мақсадида Молия вазирлиги, Давлат солиқ қўмитаси ва Давлат божхона қўмитасининг ахборот тизимлари ҳамда «Asl belgisi» маҳсулотларни маркировкалаш ва кузатиб бориш миллий ахборот тизими билан интеграциялашувини таъминласин.
(2-банднинг учинчи хатбошиси Ўзбекистон Республикаси Вазирлар Маҳкамасининг 2020 йил 31 декабрдаги 833-сонли қарори таҳририда — Қонун ҳужжатлари маълумотлари миллий базаси, 31.12.2020 й., 09/20/833/1704-сон)
3. Мазкур қарор расмий эълон қилинган кундан эътиборан уч ой ўтгач кучга киради.
4. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодиёт ва саноат вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2020 йил 18 март,
166-сон
Вазирлар Маҳкамасининг 2020 йил 18 мартдаги 166-сон қарорига
ИЛОВА
ИЛОВА
Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимини жорий этиш тартиби тўғрисида
НИЗОМ
1-боб. Умумий қоидалар
1. Мазкур Низом Алкоголь ва тамаки бозорини тартибга солиш ҳамда виночиликни ривожлантириш агентлигида (кейинги ўринларда — Агентлик) истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимини (кейинги ўринларда тизим деб аталади) жорий этиш тартибини белгилайди.
(1-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
2. Тизимда истеъмол ва техник этил спирти, алкоголь ва тамаки маҳсулотларини ишлаб чиқарувчилар, шунингдек, алкоголь маҳсулотларини улгуржи савдоси билан шуғулланувчи ташкилотларда (кейинги ўринларда ташкилотлар деб аталади) маҳсулот ишлаб чиқарилиши ва уларнинг айланмаси соҳасида ҳуқуқбузарлик (кейинги ўринларда ҳуқуқбузарлик деб аталади) хавфи автоматик тарзда инсон омили аралашмаган ҳолда таҳлил қилиш орқали амалга оширилади.
Агентлик томонидан тизимда маълумотларни киритиш ва таҳлил этиш ушбу Низомга иловага мувофиқ схема бўйича амалга оширилади.
(2-банднинг иккинчи хатбошиси Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
3. Тизим Агентликдаги мавжуд ички ҳамда Ўзбекистон Республикаси Молия вазирлиги, Давлат солиқ қўмитаси ва Давлат божхона қўмитаси томонидан тақдим этилган ташқи маълумотларга асосан қуйидаги йўналишларда:
(3-банднинг биринчи хатбошиси Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
истеъмол ва техник этил спирти, алкоголь ва тамаки маҳсулотлари ишлаб чиқариш, шунингдек, алкоголь маҳсулотларининг улгуржи савдоси фаолиятини амалга ошириш бўйича лицензия талаблари ва шартларининг бузилишини;
истеъмол ва техник этил спирти, алкоголь ва тамаки маҳсулотларини ишлаб чиқариш учун сарфланган хом ашё ва ёрдамчи материалларнинг тайёр маҳсулотга нисбатан мутаносиблигини;
истеъмол этил спиртини ишлаб чиқарувчи корхоналарда ишлаб чиқарилган маҳсулот намуналарининг синовдан ўтказиш натижалари бўйича мунтазам равишда (бир йил давомида икки ва ундан ортиқ марта) қайта ишлаб чиқариш жараёнига қайтарилишини;
Истеъмол этил спирти ва алкоголь маҳсулотлари сифатини органолептик баҳолаш бўйича республика дегустация комиссиясининг Алкоголли маҳсулотларнинг хавфсизлиги тўғрисидаги умумий техник регламент талабларига мувофиқ эмаслиги тўғрисидаги қарорини;
истеъмол ва техник этил спирти, алкоголь ва тамаки маҳсулотларини ишлаб чиқариш ва уларнинг айланмаси билан боғлиқ ҳисоботлар бўйича мунтазам равишда қайта ҳисоб-китобларнинг амалга оширилганлигини;
маҳсулотларни сақлаш, транспортда ташиш ва реализация қилишда ҳужжатлар бўлмаслиги ҳолатларини;
ташкилотлар ҳисобот даври мобайнида дастлаб рўйхатга олинган юридик манзилини ёки технологик жиҳозларни мунтазам равишда ўзгартириб борилганлигини;
ишлаб чиқарилган истеъмол ва техник этил сирти, алкоголь ва тамаки маҳсулотларини маркировкасиз ёки қалбаки акциз маркали маҳсулотларни реализация қилиш ҳолатларини;
жисмоний ва юридик шахслар томонидан айнан бир ташкилот фаолиятидан норозилиги ҳақидаги мурожаатларни таҳлил қилади.
4. Тизим мазкур Низомнинг 3-бандида белгиланган йўналишларга асосан тадбиркорлик субъектлари томонидан лицензия талаблари ва шартларига риоя этилишини тўлиқ таҳлил қилади ҳамда якуний натижаларни балли тизим орқали ҳуқуқбузарлик хавфи даражасини баҳолайди.
Ҳуқуқбузарлик хавфи даражасининг балли тизими Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил (кейинги ўринларда ваколатли орган деб аталади) билан келишилган ҳолда Агентликнинг буйруғи билан тасдиқланади.
(4-банднинг иккинчи хатбошиси Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
2-боб. Ҳуқуқбузарлик содир этиш хавфини таҳлил этиш
5. Тизим орқали ташкилотларда ҳуқуқбузарлик хавфи даражаси балли тизимда таҳлиллар давомида аниқланган камчиликлар сони ва оғирлик даражасидан келиб чиқиб амалга оширилади.
6. Агентлик томонидан тизим маълумотлари асосида шакллантирилган ташкилотларда ҳуқуқбузарлик хавфи даражаси таҳлили мунтазам ўтказиб борилади.
(6-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
7. Аниқланган ҳолатлар юзасидан Агентлик томонидан ташкилотларда ҳуқуқбузарлик содир этиш хавфи даражасидан келиб чиқиб, текшириш ўтказиш юзасидан белгиланган тартибда ваколатли органга мурожаат қилинади.
(7-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
8. Тизим таҳлили натижаларига кўра хавфлилик даражасидан келиб чиқиб, тадбиркорлик субъектлари уч тоифага бўлинади:
ҳуқуқбузарлик содир этиш хавфи юқори бўлган ташкилотлар;
ҳуқуқбузарлик содир этиш хавфи ўртача бўлган ташкилотлар;
ҳуқуқбузарлик содир этиш хавфи паст бўлган ташкилотлар.
3-боб. Ҳуқуқбузарлик содир этиш хавфи юқори, ўртача ёки паст бўлган ташкилотлар билан ишлаш
9. Агентлик томонидан ҳуқуқбузарлик содир этиш хавфи юқори, ўртача ёки паст бўлган ташкилотлар рўйхати тизим маълумотлари асосида шакллантирилади.
(9-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
10. Тизим маълумотлари асосида шакллантирилган рўйхатга асосан ҳуқуқбузарлик содир этиш хавфи юқори ташкилотларда текшириш ўтказиш юзасидан ваколатли органга мурожаат қилинади.
11. Тизим маълумотлари асосида шакллантирилган рўйхатда келтирилган ташкилотларга Агентлик томонидан ҳуқуқбузарлик содир этиш хавфи ўртачалиги тўғрисида аниқланган тафовут ҳамда камчиликлар батафсил баён қилинган ҳолда ёзма равишда хабарнома юборилади.
Аниқланган тафовут ва камчиликларни бартараф этиш юзасидан ташкилотлар томонидан аниқлаштирилган қайта маълумот ҳамда асослантирувчи ҳужжатлар тақдим этилмаганда ёки тақдим этилган маълумотларда ҳуқуқбузарликлар бартараф этилмаганлиги аниқланганда, Агентлик текшириш ўтказиш юзасидан ваколатли органга мурожаат қилади.
(11-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
12. Агентлик томонидан ҳуқуқбузарлик содир этиш хавфи паст бўлган ташкилотларга аниқланган тафовут ҳамда камчиликлар батафсил баён қилинган ҳолда ёзма равишда хабарнома юборилади ва улар фаолияти текширилмайди.
(12-банд Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори таҳририда — Қонун ҳужжатлари маълумотлари миллий базаси, 01.12.2020 й., 09/20/753/1572-сон)
4-боб. Якунловчи қоидалар
13. Ҳуқуқбузарлик содир этиш хавфни таҳлил этиш натижаларидан норози бўлган шахслар юқори турувчи органга ёки судга шикоят қилишга ҳақли.
14. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўладилар.
(14-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимини жорий этиш тартиби тўғрисида низомга
ИЛОВА
ИЛОВА
Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимида маълумотларни киритиш ва таҳлил этиш
СХЕМАСИ
|
Субъектлар |
Механизм |
Муддатлар | ||||
|
1-босқич |
Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги |
Истеъмол ва техник этил спирти, алкоголь ва тамаки маҳсулотларини ишлаб чиқаришни ва уларнинг айланмасини назорат қилиш бўйича «таҳлика-таҳлил» тизимига ишлаб чиқарувчи ва савдо ташкилотлари томонидан киритилган маълумотларни таҳлил қилиб боради. |
Иш кунлари | |||
|
|
|
| ||||
|
2-босқич |
1. Давлат солиқ қўмитаси 2. Давлат божхона қўмитаси |
1. Истеъмол ва техник этил спирти, алкоголь ва тамаки маҳсулотларини ишлаб чиқарувчи корхоналар ҳамда алкоголь маҳсулотлари улгуржи савдоси ташкилотлари томонидан тақдим этилган солиқ ҳисоботларининг маълумотларини Агентликга электрон кўринишда тақдим этади. 2. Ўзбекистон Республикаси ҳудудига импорт қилинган истеъмол ва техник этил спирти, алкоголь ва тамаки маҳсулотлари тўғрисидаги маълумотларни электрон кўринишда Агентликга тақдим этади. |
1. Солиқ ҳисоботлари тақдим этилган кун | |||
|
3-босқич |
Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги |
Тақдим этилган маълумотлар асосида корхоналар томонидан лицензия талабларига риоя этилишини таҳлил қилади ҳамда якуний натижаларни балли тизими орқали ҳуқуқбузарлик хавфи даражасини баҳолайди. |
Ҳар ойда, ҳисобот ойидан кейинги ойнинг 5 санасигача | |||
|
|
|
| ||||
|
4-босқич |
Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги |
Ҳуқуқбузарлик содир этиш хавфи даражасидан келиб чиқиб, зарур ҳолларда текшириш ўтказиш юзасидан белгиланган тартибда ваколатли органга мурожаат қилади. |
1 (бир) иш кунида | |||
|
|
|
| ||||
|
5-босқич |
|
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил |
|
Агентликнинг мурожаатини кўриб чиқиб, текширишга рухсат этиш ёки этмаслик масаласини ҳал қилади. |
|
Белгиланган тартибда |
|
|
|
| ||||
|
6-босқич |
Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги |
Ваколатли органнинг рухсати асосида корхонани қонунчилик ҳужжатларида белгиланган тартибда текширади ва натижалари асосида тегишли чораларни кўради. |
Белгиланган тартибда | |||
|
|
|
|
(илова Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
(Қонун ҳужжатлари маълумотлари миллий базаси, 18.03.2020 й., 09/20/166/0330-сон, 01.12.2020 й., 09/20/753/1572-сон, 31.12.2020 й., 09/20/833/1704-сон; Қонунчилик маълумотлари миллий базаси, 05.04.2022 й., 09/22/153/0266-сон)
