Ҳужжат кучини йўқотган " " 17.04.2017

Ўзбекистон Республикаси Вазирлар Маҳкамасининг

«ЎЗБЕКТУРИЗМ» МИЛЛИЙ КОМПАНИЯСИ ФАОЛИЯТИНИ ЯНАДА ТАКОМИЛЛАШТИРИШ ТЎҒРИСИДА

LexUZ шарҳи

Мазкур қарор Ўзбекистон Республикаси Вазирлар Маҳкамасининг 2017 йил 13 апрелдаги 207-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўзбекистон Республикасининг туризм соҳасини жадал ривожлантиришни таъминлаш чора-тадбирлари тўғрисида» 2016 йил 2 декабрдаги ПФ-4861-сон Фармони ва Ўзбекистон Республикаси Президентининг «Ўзбекистон Республикаси Туризмни ривожлантириш давлат қўмитаси фаолиятини ташкил этиш тўғрисида» 2016 йил 2 декабрдаги ПҚ–2666-сон қарори)»ги қарорига асосан ўз кучини йўқотган.

Ўзбекистон Республикаси Президентининг «Республика давлат бошқаруви органлари тизимини такомиллаштириш тўғрисида» 2003 йил 9 декабрдаги ПФ-3358-сон Фармонини бажариш юзасидан ва туризм соҳасида бошқарувнинг самарали тизимини таъминлаш мақсадида Вазирлар Маҳкамаси қарор қилади:

1. Қуйидагилар «Ўзбектуризм» миллий компаниясининг асосий вазифалари этиб белгилансин:

туризм соҳасида ягона давлат сиёсати ўтказилишини таъминлаш, туристик хизматлар инфратузилмаларини шакллантиришга кўмаклашиш;

туризмни ривожлантириш давлат дастурларини, туристларнинг муҳофаза қилинишини ва хавфсизлигини таъминлаш дастурларини амалга ошириш, туристик фаолиятни тармоқлараро ва минтақалараро мувофиқлаштириш;

туристик хизматларни сертификатлаштириш;

туризм соҳасида реклама-ахборот сиёсатини амалга ошириш;

туризмни ривожлантириш соҳасига хорижий кредитлар ва инвестицияларни жалб этиш, хорижий мамлакатлар, шунингдек хорижий компаниялар билан ҳамкорликнинг узоқ муддатли дастурларини ривожлантириш;

туризм соҳаси учун кадрларни тайёрлаш, қайта тайёрлаш ва уларнинг малакасини ошириш чора-тадбирлари комплексини амалга ошириш, туризм тармоқ фанини ривожлантиришга кўмаклашиш.

2. Қуйидагилар:

«Ўзбектуризм» миллий компаниясининг ташкилий тузилмаси ва марказий аппарат ходимларининг чекланган умумий сони 45 нафар, шу жумладан бошқарув ходимлари 30 нафар бўлган марказий аппарати тузилмаси 1 ва 2-иловаларга мувофиқ;

«Ўзбектуризм» миллий компанияси тўғрисидаги низом 3-иловага мувофиқ;

«Ўзбектуризм» миллий компанияси минтақавий бўлимининг намунавий тузилмаси 4-иловага мувофиқ тасдиқлансин.

«Ўзбектуризм» миллий компанияси раисига зарурат бўлганда компания марказий аппарати тузилмасига ходимларнинг белгиланган чекланган умумий сони доирасида ўзгартиришлар киритишга рухсат берилсин.

3. 5-иловага мувофиқ меҳмонхона хўжалиги корхоналаридаги давлат улушлари профессионал бошқарувчи компанияларга ишончли бошқарувга берилгунгача ёки тўлиқ сотилгунгача бўлган даврда уларни бошқариш ҳуқуқи «Ўзбектуризм» миллий компаниясида сақлаб қолинсин.

«Ўзбектуризм» миллий компанияси «Отель Ўзбекистон» қўшма корхонасини хорижий компанияга ташқи менежмент асосида бошқарувга 2004 йил охиригача бериш юзасидан бир ой муддатда Вазирлар Маҳкамасига таклиф киритсин.

4. Белгилансинки, «Ўзбектуризм» миллий компаниясининг марказий аппарати, минтақавий бўлимлари таъминоти харажатларини молиялаштириш лицензиялар бериш тўғрисидаги аризаларнинг кўриб чиқилганлиги, лицензияларнинг қайта расмийлаштирилганлиги ва лицензиялар дубликатлари берилганлиги учун йиғимдан, ўз хўжалик фаолиятидан тушумлар, бюджетдан ташқари Туризмни ривожлантириш жамғармаси маблағларининг бир қисми ҳамда қонун ҳужжатларида тақиқланмаган бошқа манбалар ҳисобига амалга оширилади.

(4-банд Ўзбекистон Республикаси Вазирлар Маҳкамасининг 2012 йил 10 октябрдаги 288-сонли қарори таҳририда — ЎР ҚҲТ, 2012 й., 41-42-сон, 478-модда)

5. «Ўзбектуризм» миллий компанияси:

Ўзбекистон Республикаси Иқтисодиёт вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, бошқа манфаатдор вазирликлар ва идоралар билан биргаликда 2004 йил 1 декабргача бўлган муддатда 2010 йилгача бўлган даврда туризмни ривожлантириш давлат дастурини ишлаб чиқсин ва Вазирлар Маҳкамасига киритсин;

манфаатдор вазирликлар ва идоралар билан биргаликда сайёҳларнинг Ўзбекистон Республикасига келиши ва кетиши тартиби тўғрисидаги низомни бир ой муддатда ишлаб чиқсин ва белгиланган тартибда тасдиқласин.

6. «Ўзбектуризм» миллий компанияси, Ўзбекистон Республикаси Иқтисодиёт вазирлиги ва Молия вазирлигининг бюджетдан ташқари Туризмни ривожлантириш жамғармасини ташкил этиш ҳақидаги таклифига розилик берилсин.

(6-банднинг биринчи хатбошиси Ўзбекистон Республикаси Вазирлар Маҳкамасининг 2012 йил 10 октябрдаги 288-сонли қарори таҳририда — ЎР ҚҲТ, 2012 й., 41-42-сон, 478-модда)

Ўзбекистон Республикаси Молия вазирлиги, «Ўзбектуризм» миллий компанияси Туристик йиғим ҳамда Туризмни ривожлантириш жамғармаси маблағларини шакллантириш ва улардан фойдаланиш тартиби тўғрисидаги низомни бир ой муддатда ишлаб чиқсинлар ва белгиланган тартибда тасдиқласинлар, бунда Жамғарманинг маблағларидан реклама фаолиятида, жалб этиладиган кредитларни қайтаришда ва туризм инфратузилмасини ривожлантиришда мақсадли фойдаланилишини назарда тутсинлар.

7. Вазирлар Маҳкамасининг «Ўзбектуризм» миллий компаниясининг Уставини тасдиқлаш тўғрисида» 1993 йил 15 февралдаги 82-сон қарори (Ўзбекистон Республикаси ҚТ, 1993 й., 2-сон, 5-модда) ўз кучини йўқотган деб ҳисоблансин.

Ўзбекистон Республикаси Ҳукуматининг 6-иловага мувофиқ айрим қарорларига ўзгартиришлар киритилсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари А.А. Азизхўжаев ва Р.С. Азимов зиммасига юклансин.

Вазирлар Маҳкамасининг Раиси И. КАРИМОВ

Тошкент ш.,

2004 йил 28 июль,

360-сон

Вазирлар Маҳкамасининг
2004 йил 28 июлдаги 360-сон қарорига
1-ИЛОВА

«Ўзбектуризм» миллий компанияси тизимининг ташкилий тузилмаси

Вазирлар Маҳкамасининг
2004 йил 28 июлдаги 360-сон қарорига
2-ИЛОВА

«Ўзбектуризм» миллий компанияси марказий аппаратининг тузилмаси

Вазирлар Маҳкамасининг
2004 йил 28 июлдаги 360-сон қарорига
3-ИЛОВА

«Ўзбектуризм» миллий компанияси тўғрисида

НИЗОМ

I. Умумий қоидалар

1. «Ўзбектуризм» миллий компанияси (кейинги ўринларда Компания деб аталади) туризм соҳасидаги ваколатли давлат органи ҳисобланади ва ўз фаолияти тўғрисида Ўзбекистон Республикаси Вазирлар Маҳкамасига ҳисоб беради.

2. Компания тизимига қуйидагилар киради:

Самарқанд, Бухоро, Хоразм минтақавий бўлимлари;

Ўзбекистон Республикаси вилоятлари марказларидаги Саёҳат ва экскурсиялар бюроси давлат корхоналари;

«Республика илмий-ўқув консалтинг маркази» давлат корхонаси;

«Дистпечерлаштириш ва хизмат кўрсатиш марказий бошқармаси» давлат корхонаси;

тасарруфидаги бошқа ташкилотлар.

3. Компания ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси қарорларига ва бошқа ҳужжатларига, Ўзбекистон Республикаси Президенти фармонлари, қарорлари ва фармойишларига, Ўзбекистон Республикаси Вазирлар Маҳкамаси қарорлари ва фармойишларига, шунингдек ушбу Низомга амал қилади.

4. Компания ўз фаолиятини давлат бошқаруви бошқа органлари, маҳаллий давлат ҳокимияти органлари, жамоат бирлашмалари ва бошқа ташкилотлар билан ўзаро ҳамкорликда амалга оширади.

5. Марказий аппарат, минтақавий бўлимлар таъминоти харажатларини молиялаштириш лицензиялар бериш тўғрисидаги аризаларнинг кўриб чиқилганлиги, лицензияларнинг қайта расмийлаштирилганлиги ва лицензиялар дубликатлари берилганлиги учун йиғимдан, ўз хўжалик фаолиятидан тушумлар, бюджетдан ташқари Туризмни ривожлантириш жамғармаси маблағларининг бир қисми ҳамда қонун ҳужжатларида тақиқланмаган бошқа манбалар ҳисобига амалга оширилади.

(5-банд Ўзбекистон Республикаси Вазирлар Маҳкамасининг 2012 йил 10 октябрдаги 288-сонли қарори таҳририда — ЎР ҚҲТ, 2012 й., 41-42-сон, 478-модда)

6. Компания ва унинг минтақавий бўлимлари юридик шахс ҳисобланадилар, Ўзбекистон Республикаси Давлат герби тасвири туширилган ва ўз номи ёзилган муҳрга эга бўладилар.

II. Компаниянинг вазифалари ва функциялари

7. Қуйидагилар Компаниянинг асосий вазифалари ҳисобланади:

туристик хизматларни сертификатлаштириш;

туризм соҳасида реклама-ахборот сиёсатини амалга ошириш;

8. Компания ўзига юкланган вазифаларга мувофиқ қуйидаги функцияларни амалга оширади:

Ўзбекистон Республикасида туризмни ривожлантиришнинг асосий стратегик йўналишларини ишлаб чиқади;

туризмни ривожлантириш бўйича норматив-ҳуқуқий ҳужжатлар лойиҳаларини ишлаб чиқишда қатнашади;

туристик фаолиятни лицензиялаш бўйича ишчи орган функциясини амалга оширади;

«Туризм тўғрисида»ги Қонунга мувофиқ туристик хизматларни сертификатлаштиришни амалга оширади;

туризм соҳасида статистик ҳисобот тизимини такомиллаштириш бўйича таклифлар ишлаб чиқади;

туризм соҳасида маркетинг тадқиқотларини ташкил қилади;

таҳлилий ишларни амалга оширади ва республикада туризмни ривожлантиришнинг асосий тенденциялари ва прогнозларини белгилайди;

туризмни ривожлантириш бўйича таклифлар тайёрлайди ҳамда мақсадли, тармоқ ва минтақавий дастурлар бажарилишини мувофиқлаштиришни ташкил қилади;

туристик хизматларнинг амалга оширилишини реклама-ахборот билан таъминлаш фаолиятини амалга оширади;

хорижий давлатларнинг миллий туристик маъмуриятлари ва уларнинг Ўзбекистон Республикасидаги ваколатхоналари билан ҳамкорликни амалга оширади;

Жаҳон туризм ташкилоти ҳамда туризм билан боғлиқ бошқа халқаро ташкилотлар билан ўзаро ҳамкорликни таъминлайди, уларда республика манфаатларини ифодалайди;

туризм индустриясини ривожлантиришга инвестициялар жалб этиш ишларида қатнашади;

туризм инфратузилмасини ривожлантириш соҳасидаги инвестиция лойиҳаларини ишлаб чиқади;

ташқи бозорда Ўзбекистон Республикаси манфаатларига риоя этилишини таҳлил қилади ҳамда унинг асосида туризм соҳасидаги салбий ҳолатларни бартараф этиш бўйича таклифлар тайёрлайди;

туризм соҳаси учун кадрлар тайёрлаш бўйича халқаро дастурларни амалга оширади.

9. Компания ўзига юкланган вазифалар ва функцияларни бевосита, шунингдек минтақавий бўлимлар, тасарруфидаги бошқа ташкилотлар орқали бажаради.

III. Компаниянинг ҳуқуқлари ва жавобгарлиги

10. Компания ўзига юкланган вазифалар ва функцияларни бажариш учун қуйидаги ҳуқуқларга эга:

тегишли вазирликлар ва идоралардан туризм фаолияти масалалари бўйича ахборотларни сўраш ва олиш;

хорижий давлатларнинг ваколатли органлари билан белгиланган тартибда ахборотлар айирбошлашни амалга ошириш;

ўз ваколатлари доирасида конференциялар, йиғилишлар, семинарлар, симпозиумлар ўтказиш, кўргазмалар ва бошқа тадбирларни ташкил қилиш, шунингдек бошқа ташкилотлар томонидан ўтказиладиган шу каби тадбирларда қатнашиш;

туризмни ривожлантиришга йўналтирилган лойиҳаларни биргаликда ишлаб чиқиш, тажриба алмашиш мақсадида халқаро, хорижий ва республика ташкилотлари билан амалий алоқалар ўрнатиш;

халқаро нормалар асосида отеллар, меҳмонхоналар, кемпинглар, шунингдек туристларга хизматлар кўрсатувчи бошқа объектлар классификациясини ишлаб чиқишда қатнашиш.

11. Компания ўзига юкланган вазифаларнинг самарали бажарилиши учун жавоб беради.

IV. Компания фаолиятини ташкил этиш

12. Компанияни қонун ҳужжатларида белгиланган тартибда лавозимга тайинланадиган ва лавозимдан озод қилинадиган раис бошқаради.

Раиснинг икки нафар, шу жумладан бир нафар биринчи ўринбосари бўлади.

Раис мақомига кўра вазирга, раис ўринбосарлари — вазир ўринбосарларига тенглаштирилади.

13. Компания раиси:

Компания фаолиятига яккабошчилик асосида умумий раҳбарликни амалга оширади;

Компания ваколатига кирадиган масалалар бўйича қарорлар қабул қилади ҳамда Компанияга юкланган вазифалар ва функцияларнинг бажарилиши учун шахсан жавоб беради;

ўз ўринбосарларининг ваколатларини белгилайди, улар ўртасида вазифаларни тақсимлайди, Компания тизимидаги бошқа мансабдор шахсларнинг ваколатларини, ўз ўринбосарларининг ва бошқа мансабдор шахсларнинг Компания фаолиятининг алоҳида участкаларига раҳбарлиги ҳамда тасарруфидаги ташкилотлар ишлари учун жавобгарлик даражасини белгилайди;

Компания тизими ходимларининг бажариши мажбурий бўлган буйруқлар чиқаради ва кўрсатмалар беради;

Компания марказий аппарати тузилмасига ходимларнинг белгиланган умумий сони доирасида ўзгартиришлар киритади, штат жадвалини, шунингдек Компания марказий аппарати, тасарруфидаги ташкилотлар харажатлари сметаларини тасдиқлайди;

Компаниянинг таркибий бўлинмалари ва минтақавий бўлимлари тўғрисидаги низомларни, ўз тизимига кирадиган тасарруфидаги бошқа ташкилотларнинг уставларини белгиланган тартибда тасдиқлайди;

Компания марказий аппарати ходимларини, минтақавий бўлимларнинг, Компания тизимига кирувчи тасарруфидаги бошқа ташкилотларнинг раҳбарларини белгиланган тартибда лавозимга тайинлайди ва лавозимдан озод қилади.

Раис қонун ҳужжатларига мувофиқ бошқа ваколатларни амалга оширади.

14. Компанияда раис (ҳайъат раиси), унинг ўринбосарлари (лавозимига кўра), шунингдек Компания фаолиятининг асосий йўналишларини мувофиқлаштирувчи таркибий бўлинмалари раҳбарларидан иборат таркибда ҳайъат ташкил этилади.

Ҳайъатнинг аъзолари сони ва шахсий таркиби раиснинг тақдимномасига биноан Ўзбекистон Республикаси Вазирлар Маҳкамаси томонидан тасдиқланади.

Ҳайъат қуйидагилар билан боғлиқ масалаларни кўриб чиқади:

Компания фаолиятининг туризм соҳасида ягона давлат сиёсати ўтказилишини таъминлашни давом эттириш, туристик хизматлар инфратузилмаларини шакллантиришга кўмаклашиш, шунингдек туризмни ривожлантириш давлат дастурларини, туристларнинг муҳофаза қилинишини ва хавфсизлигини таъминлаш дастурларини амалга ошириш бўйича ушбу Низомда белгиланган асосий йўналишларини тайёрлаш ва амалга ошириш;

«Ўзбектуризм» миллий компанияси номенклатурасига кирадиган лавозимларга кадрларни танлаш, жой-жойига қўйиш, тайёрлаш ва қайта тайёрлаш;

Ўзбекистон Республикаси Президентининг фармонлари, қарорлари ва фармойишларида, Ўзбекистон Республикаси Вазирлар Маҳкамаси қарорлари ва фармойишларида белгиланган вазифаларни амалга ошириш бўйича ижро интизомини мустаҳкамлаш, уларнинг ўз вақтида ва сифатли амалга оширилишини таъминлаш учун Компания раҳбарлари ва ходимларининг шахсий жавобгарлигини ошириш.

Ҳайъат Компания ваколатига тааллуқли бошқа масалаларни ҳам кўриб чиқиш ҳуқуқига эга.

Ҳайъат мажлисига Компания ваколатига кирадиган масалалар бўйича бошқа вазирликлар, давлат қўмиталари, идоралар, маҳаллий давлат ҳокимияти органлари, корхоналар, муассасалар, ташкилотлар раҳбарлари таклиф этилиши мумкин.

Ҳайъат унинг мажлисида таркибининг ярмидан кўпи қатнашган тақдирда ваколатли бўлади. Кўриб чиқилаётган масалалар бўйича қарорлар оддий кўпчилик овоз билан қабул қилинади.

Ҳайъат қарорлари раиснинг буйруқлари билан амалга оширилади. Раис ва ҳайъат аъзолари ўртасида келишмовчиликлар пайдо бўлган тақдирда раис пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикр-мулоҳазаларини Ўзбекистон Республикаси Вазирлар Маҳкамасига хабар қилишлари мумкин.

Ҳайъат фаолияти тартиби унинг ҳайъат тасдиқлайдиган регламентида белгиланади.

(14-банд Ўзбекистон Республикаси Вазирлар Маҳкамасининг 2010 йил 5 июндаги 108-сонли қарори таҳририда — ЎР ҚҲТ, 2010 й., 23-сон, 183-модда)

15. Минтақавий бўлимлар ўз фаолиятини тегишли вилоятларнинг ҳокимлари билан келишган ҳолда Компания томонидан тасдиқланадиган низомларга мувофиқ амалга оширадилар.

Компаниянинг минтақавий бўлимлари раҳбарлари лавозимга тегишли вилоятлар ҳокимларининг тақдимномасига биноан раис томонидан тайинланади.

Вазирлар Маҳкамасининг
2004 йил 28 июлдаги 360-сон қарорига
4-ИЛОВА

Минтақавий туризм бўлимининг намунавий тузилмаси

Вазирлар Маҳкамасининг
2004 йил 28 июлдаги 360-сон қарорига
5-ИЛОВА

Профессионал бошқарувчи компанияларга ишончли бошқарувга берилгунгача ёки тўлиқ сотилгунгача давлат улушларини бошқариш «Ўзбектуризм» миллий компаниясида сақлаб қолинадиган корхоналар рўйхати

№	Корхоналар рўйхати	Устав фондидаги давлат улуши (%)
1.	«Отель Ўзбекистон» қўшма корхонаси ёпиқ турдаги акциядорлик жамияти	58
2.	«Шодлик» давлат корхонаси акциядорлик жамияти	16
3.	«Варахша» давлат корхонаси масъулияти чекланган жамияти	25
4.	«Самарқанд» давлат корхонаси акциядорлик жамияти	25
5.	«Чорсу» давлат корхонаси масъулияти чекланган жамияти	30
6.	«Жиззахсаёҳат» давлат корхонаси акциядорлик жамияти	9

Вазирлар Маҳкамасининг
2004 йил 28 июлдаги 360-сон қарорига
6-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартиришлар

1. Вазирлар Маҳкамасининг ««Ўзбектуризм» миллий компанияси фаолиятини ташкил этиш масалалари тўғрисида» 1992 йил 20 октябрдаги 484-сон қарорининг 2—5-бандлари ўз кучини йўқотган деб ҳисоблансин.

2. Вазирлар Маҳкамасининг «Ўзбекистон Республикасида халқаро туризмнинг замонавий инфраструктурасини барпо этиш чора-тадбирлари тўғрисида» 1995 йил 3 июндаги 210-сон қарорининг (Ўзбекистон Республикаси ҚТ, 1995 й., 6-сон, 20-модда) 5, 7 ва 8-бандлари ўз кучини йўқотган деб ҳисоблансин.

3. Вазирлар Маҳкамасининг «Сайёҳлик ташкилотлари фаолиятини ташкил этишни такомиллаштириш тўғрисида» 1998 йил 8 августдаги 346-сон қарорида (Ўзбекистон Республикаси ҚТ, 1998 й., 8-сон, 29-модда):

1-банднинг биринчи хатбошидаги «унинг «Ўзбектуризм» миллий компаниясига қўшилган аъзо сифатида кириши» сўзлари чиқариб ташлансин;

2-банднинг иккинчи ва учинчи хатбоши, 3-банд ўз кучини йўқотган деб ҳисоблансин.

(Ўзбекистон Республикаси қонун ҳужжатлари тўплами, 2004 й., 30-сон, 346-модда; 2010 й., 23-сон, 183-модда; 2012 й., 41-42-сон, 478-модда)