|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
ТОШКЕНТ ШАҲРИДАГИ МЕҲМОНХОНА КОМПЛЕКСИНИ «БАКРИ ИНВЕСТИНДО» (ИНДОНЕЗИЯ) КОМПАНИЯСИГА СОТИШ ТЎҒРИСИДА
LexUZ шарҳиМазкур қарор Ўзбекистан Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Давлат тасарруфидан чиқариш ва хусусийлаштириш жараёнларини чуқурлаштириш, шунингдек туризмни янада ривожлантириш учун қулай муҳит яратиш мақсадида Вазирлар Маҳкамаси қарор қилади:
1. Ўзбекистон Республикаси Давлат мулки қўмитаси ва «Ўзбектуризм» миллий компаниясининг Тошкент шаҳри, Ўзбекистон овози кўчаси, 2-уйда жойлашган меҳмонхона комплексини атрофидаги ер участкаси билан биргаликда «Бакри Инвестиндо» (Индонезия) компаниясига сотиш тўғрисидаги таклифига розилик берилсин.
2. Маълумот учун қабул қилинсинки:
«Ўзбектуризм» миллий компанияси билан «Бакри Инвестиндо» компанияси ўртасида кўрсатиб ўтилган меҳмонхона комплексининг олди-сотди шартномаси тузилган;
«Бакри Инвестиндо» компанияси сотиб олинадиган комплексга мулкчилик ҳуқуқини амалга ошириш ва туризм соҳасида фаолият кўрсатиш учун Тошкент шаҳрида ўз филиалини очади.
3. Меҳмонхона комплексини сотишдан тушадиган маблағлар ва улардан мақсадли фойдаланиш жадвали иловага* мувофиқ тасдиқлансин ҳамда «Ўзбектуризм» миллий компаниясига тушадиган тўловларни тақсимлаш билан боғлиқ барча операцияларни амалга ошириш топширилсин.
* Илова берилмайди.
4. Ўзбекистон Республикаси Адлия вазирлиги «Бакри Инвестиндо» компаниясининг Ўзбекистондаги филиалини белгиланган тартибда рўйхатдан ўтказсин.
5. Тошкент шаҳар ҳокимлиги бир ҳафта муддатда:
сотилаётган меҳмонхонанинг атрофидаги ер участкасига «Бакри Инвестиндо» компаниясининг мулкчилик ҳуқуқини расмийлаштирсин;
«Бакри Инвестиндо» компаниясининг ташкил этилаётган филиалига меҳмонхона комплексида савдо фаолиятини амалга ошириш ҳуқуқини белгиланган тартибда берсин.
6. Ўзбекистон Республикаси Давлат мулки қўмитаси бир ҳафта муддатда аванс тўлов «Ўзбектуризм» миллий компанияси ҳисоб-китоб счётига тушгандан ва комплекснинг қолган қийматига «Бакри Инвестиндо» компанияси томонидан тегишли банк кафолати берилгандан кейин ҳамда Тошкент шаҳар ҳокимлигининг қарори асосида меҳмонхона комплексига ва унинг атрофидаги ер участкасига эгалик ҳуқуқига далолатномани расмийлаштирсин.
7. «Ўзистиқболстат» давлат қўмитаси «Бакри Инвестиндо» компаниясининг меҳмонхона комплексини Ўзбекистон Республикаси Инвестиция дастурига киритсин.
8. Ўзбекистон Республикасининг амалдаги қонун ҳужжатларига мувофиқ хорижий инвесторларга бериладиган имтиёзларга қўшимча равишда «Бакри Инвестиндо» компаниясининг филиали меҳмонхона комплексига мулкчилик ҳуқуқи олинган кундан бошлаб беш йил муддатга ер солиғи ва мулк солиғи тўлашдан озод қилинсин.
Ўзбекистон Республикаси Президентининг «Буюк Ипак йўлини қайта тиклашда Ўзбекистон Республикасининг иштирокини авж олдириш ва республикада халқаро туризмни ривожлантириш борасидаги чора-тадбирлар тўғрисида» 1995 йил 2 июндаги ПФ-1162-сон Фармонига мувофиқ кўрсатиб ўтилган филиал беш йил муддатга четга чиқариладиган фойдадан солиқ тўлашдан озод қилинсин.
Белгилансинки, «Бакри Инвестиндо» филиалининг валюта курси ўзгариб туриши ҳисобидан ҳосил бўладиган фойдаси солиқ солинадиган базадан чиқариб ташланади.
«Бакри Инвестиндо» компанияси филиалига инфляция даражасига мувофиқ активларнинг баланс қийматига тузатиш киритишга, шунингдек электр энергияси, газ ва бошқа коммунал хизматлар учун Тошкент шаҳар меҳмонхона комплекслари учун амалда бўлган нархлар бўйича ҳақ тўлашга рухсат берилсин.
LexUZ шарҳи8-банднинг мулк солиғига доир имтиёз бериш тўғрисидаги қисмининг амал қилиш муддати Ўзбекистон Республикаси Вазирлар Маҳкамасининг 2002 йил 18 апрелдаги 133-сонли қарорига мувофиқ 2002 йил 1 январгача узайтирилган.
9. «Ўзбектуризм» меҳмонхона комплекси «Бакри Инвестиндо» компанияси мулкига берилиши билан боғлиқ давлат пошлиналари ва йиғимларининг барча турларини тўлашдан озод қилинсин.
10. Мазкур қарорнинг бажарилишини назорат қилиш Бош вазирнинг ўринбосарлари С.С. Саидқосимов ва Б.С. Ҳамидов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
1996 йил 23 февраль,
72-сон
