Ўзбекистон Республикаси Ҳукумати билан Озарбайжон Республикаси Ҳукумати, бундан кейин «Томонлар» деб аталувчилар,

Ўзбекистон Республикаси билан Озарбайжон Республикаси ўртасида йўловчи ва юкларни ташиш, шунингдек уларнинг ҳудудлари бўйлаб транзит ташувининг муҳимлигини эътиборга олиб,

Томонлар давлатлари миллий манфаатларидан келиб чиққан ҳолда, ўзаро манфаатли шартлар асосида темир йўл транспорти соҳасидаги ҳамкорликни биргаликда ривожлантириш истагида,

1996 йил 27 майда Боку шаҳрида имзоланган Ўзбекистон Республикаси ва Озарбайжон Республикаси ўртасида дўстлик ва ҳамкорлик тўғрисидаги Шартномани ва 1997 йил 18 июнда Тошкент шаҳрида имзоланган Ўзбекистон Республикаси ва Озарбайжон Республикаси ўртасида ҳар томонлама ҳамкорликни ва шериклик муносабатларини янада ривожлантириш тўғрисидаги Декларацияни инобатга олиб,

мавжуд ва янги қурилаётган темир йўллардан ўзаро манфаатли равишда фойдаланиш, Европа — Кавказ — Осиё транспорт коридори бўйлаб қитъалараро ўзаро ташувларни келажакда янада ривожлантиришнинг муҳимлигини тасдиқлаб, шунингдек, транспорт соҳасида ҳар томонлама ҳамкорликни, шу жумладан, биргаликда ташувларни амалга ошириш орқали янада чуқурлаштиришга интилиб,

икки давлат учун кучга кирган халқаро кўп томонлама битимларга амал қилган ҳолда,

Ҳар бир Томон ўз давлати ҳудудида йўловчи ва юкларни темир йўлларда халқаро ташувларни амалга ошириш учун ўзаролик асосида энг қулай шароитларни таъминлайди.

Томонлар Европа — Кавказ — Осиё халқаро транспорт коридорига йўловчи ва юкларнинг қўшимча ҳажмини жалб этиш мақсадида, келишилган тариф сиёсатини юргазиш ва имтиёзларни қўллаш, интермодал ва мултимодал ташувларни кенгроқ қўллаш, транспорт коридори бўйлаб халқаро логистика марказларини барпо этишга йўналтирилган чора-тадбирларни кўрадилар.

Томонлар, икки томонлама ва кўп томонлама асосда эришилган аҳдлашувларга мувофиқ экспедиторлик хизматларини амалга оширишга кўмаклашадилар.

Ушбу Битим мақсадлари учун қуйидагилар Томонларнинг ваколатли органлари ҳисобланади:

Ўзбекистон Республикаси учун — Ташқи иқтисодий алоқалар, инвестициялар ва савдо вазирлиги, «Ўзбекистон темир йўллари» Давлат акциядорлик темир йўл компанияси;

Озарбайжон Республикаси учун — Транспорт вазирлиги.

Ҳар бир Томон ўз қонунчилиги ва амалдаги халқаро-ҳуқуқий нормалар доирасида йўловчилар ташиш, ҳаракатланувчи составни ўтказиш ва юкларни ташишни, шу жумладан учинчи давлатларга/дан транзитини таъминлайдилар.

Томонлар ўз ҳудудлари бўйлаб қўшимча транзит юклар оқимини жалб қилиш мақсадида, Томонлар ўз ваколатли органларига тегишли Битим имзолаш орқали келишилган тариф сиёсатини, тарифларга преференцияларни мавжуд темир йўллари ҳамда янги Баку — Тбилиси — Карс темир йўли бўйлаб бириктирилган транзит юк ташувларга қўллашни топширадилар.

Европа — Кавказ — Осиё транспорт коридори рақобатбардошлигини янада ривожлантириш мақсадида, Томонлар ЕИ ва БМТ халқаро дастурларининг самарадорлигини ошириш бўйича, транспорт коммуникациялари ва транспорт секторига инвестицияларни жалб қилиш учун мақбул шароит яратиш бўйича биргаликда ҳаракат қиладилар.

Томонлар тузиладиган икки томонлама шартномаларда белгиланган ҳажмларда темир йўл транспорти эҳтиёжлари учун техника, ускуналар, эҳтиёт қисмлари, моддий, ёқилғи-энергетика манбалари ва мойларни ўзаро етказиб беришни таъминловчи Ўзбекистон Республикаси билан Озарбайжон Республикасининг моддий-техника таъминоти ташкилотлари ҳамда муассасалари ва бошқа хўжалик юритувчи субъектларга кўмаклашадилар.

Томонлар ўзининг миллий қонунларга мувофиқ ўз давлатлари ҳудудида йўловчи ва юкларни темир йўл транспортида ташишни амалга ошириш хавфсизлигини таъминлайдилар.

Томонлардан бирининг транспорт воситалари, ходимлари, йўловчилари ёки юклари иштирокида авария ёки бахтсиз ҳодисалар юз берганда бошқа Томон, тегишли транспорт воситасини рўйхатдан ўтказган Томонни бу тўғрида хабардор қилади ва тергов натижалари тўғрисида ахборот беради.

Зарарни қоплаш Томонлар учун кучга кирган, ушбу масалани тартибга солувчи халқаро ҳужжатлар асосида ҳал этилади.

Томонлар хизмат кўрсатувчи ходимлари ва ишлари поездлар йўналиши бўйича ўтадиган шахсларнинг меҳнат шарт-шароитлари хавфсизлигини таъминлайдилар, бошқа Томон давлатининг ҳудудида турган темир йўл ходимларига уларнинг хизмат мажбуриятларини бажаришда, шартнома асосида овқатланиш ва дам олишни ташкил этишда кўмаклашадилар.

Томонларнинг ҳар бири бошқа Томоннинг хизмат кўрсатувчи ходимларига давлатлари қонунчилигида кўрсатилган ҳажмда шошилинч тиббий ёрдам кўрсатадилар.

Томонлар ўзларининг миллий қонунларига мувофиқ ўз давлатларининг ҳудудларида бошқа Томоннинг темир йўл транспорт корхоналари ва акционерлик жамиятлари, компаниялари ваколатхоналарининг фаолият олиб боришлари учун шарт-шароитлар яратишга кўмаклашадилар.

Томонлар темир йўл транспорти мутахассисларини тайёрлаш соҳасида ҳамкорлик қиладилар.

Тегишли ўқув муассасасини тамомлагандан сўнг, берилган ихтисослик ҳужжатлари иккала Томон давлатининг ҳудудларида уларнинг миллий қонунчилигига мувофиқ тегишли процедуралар ўтказилгач, бир хил юридик кучга эга бўлади.

Томонлар ушбу Битимнинг алоҳида қоидаларини амалга ошириш мақсадида темир йўл транспортини бошқариш бўйича ваколатли органларга зарур ҳолларда тегишли ҳужжатлар тузиш ҳуқуқини берадилар.

Томонлар темир йўл ташувлари соҳасида бошқа Томоннинг манфаатларига дахлдор қабул қилинган ёки тайёрланаётган қарорлар тўғрисида бир-бирларини хабардор қиладилар.

Иккала Томон давлатларининг ҳудуди бўйлаб ташувлар, шунингдек уларнинг давлатлари ҳудуди орқали ҳарбий мақсаддаги юклар ёки бошқа хавфли юкларнинг транзит ўтиши Томонларнинг миллий қонунчилиги билан тартибга солинади.

Ушбу Битимни талқин қилиш ёки қўллашда юзага келадиган барча баҳсли масалаларни Томонлар музокаралар ва маслаҳатлашувлар орқали ҳал қиладилар.

Томонларнинг ўзаро келишувига биноан ушбу Битимга унинг ажралмас қисми бўлиб ҳисобланадиган, алоҳида протоколлар билан расмийлаштириладиган ва 14-моддада кўрсатилган тартибда кучга кирадиган ўзгартиришлар ва қўшимчалар киритилиши мумкин.

Ушбу Битим Томонларнинг унинг кучга кириши учун зарур бўлган ички давлат процедураларини бажарганлиги тўғрисидаги сўнгги ёзма хабарномани олган санадан бошлаб кучга киради.

Ушбу Битим беш йил муддатга тузилади. Томонлардан ҳеч бири унинг амалдаги муддатининг якунидан камида олти ой аввал бошқа Томонни Битим амал қилишини тўхтатиш тўғрисида ёзма равишда хабардор қилмаса, унинг амал қилиш муддати кейинги беш йиллик муддатга ўз-ўзидан узайтирилади.

Ушбу Битимнинг амал қилиши тўхтатилган ҳолда, унинг қоидалари у амал қилган даврда тузилган барча тегишли ҳужжатларга нисбатан уларнинг тўла бажарилишига қадар қўлланилади.

Боку шаҳрида 2008 йил 11 сентябрда икки асл нусхада, ҳар бири ўзбек, озарбайжон ва рус тилларида тузилди, бунда барча матнлар бир хил юридик кучга эга. Ушбу Битим қоидаларини талқин қилишда келишмовчиликлар юзага келган ҳолда рус тилидаги матндан фойдаланилади.