Ўзбекистон Республикаси Вазирлар Маҳкамасининг 1994 йил 11 майдаги 249-сон Қарори билан тасдиқланган «Пенсиялар тайинлаш учун зарур бўлган ҳужжатларни тақдим этиш ва расмийлаштириш тартиби тўғрисида»ги низомга асосан пенсия ва нафақа тайинлаш, қайта ҳисоблаш, тўлаш бўйича қабул қилинган ҳар кунлик ҳужжатларнинг ижросини сифатли ва қонун ҳужжатлари билан белгиланган муддатларда таъминлашнинг тартибини белгилаш мақсадида буюраман:

1. «Пенсия ҳужжатларининг шакллари ва уларни тўлдириш қоидалари ҳамда пенсионерлар йиғма жилдини расмийлаштириш ва юритиш тартиби ҳақида»ги йўриқнома иловага мувофиқ тасдиқлансин.

2. Ушбу Йўриқнома Ўзбекистон Республикаси Адлия вазирлигида давлат рўйхатига олинганидан сўнг ўн кундан кейин амалга киритилсин.

Мазкур Йўриқнома Ўзбекистон Республикаси Вазирлар Маҳкамасининг 1994 йил 11 майдаги 249-сон Қарори билан тасдиқланган «Пенсиялар тайинлаш учун зарур бўлган ҳужжатларни тақдим этиш ва расмийлаштириш тартиби тўғрисида»ги низомга мувофиқ Пенсия ҳужжатларининг шакллари ва уларни тўлдириш қоидалари ҳамда пенсионерлар йиғма жилдини расмийлаштириш ва юритиш тартибини белгилайди.

1. Ушбу Йўриқнома туман (шаҳар) ижтимоий таъминот бўлимларида (кейинги ўринларда — бўлим) пенсия тайинлаш учун ҳужжатларни қабул қилиш, пенсия ҳужжатларининг шакллари, тўлдирилиш қоидалари, пенсия иши йиғма жилдини расмийлаштириш, пенсия тайинлаш бўйича барча зарур ҳужжатлар ва рўйхатга олиш китобларини бир хил тартибда юритилишини ташкил этилишини таъминлайди.

2. Бўлимларда пенсия тайинлаш ишлари мазкур Йўриқномага мувофиқ расмийлаштирилади.

3. Бўлимларда пенсия тайинлаш, қайта ҳисоблаш ишларини расмийлаштириш учун мазкур Йўриқноманинг 1-иловасида кўрсатилган китоблар юритилади.

Бу китоблардаги рўйхат йил бошида биринчи рақам билан очилади, йил мобайнида янги очилса рақам давом эттирилади, йил якунида дафтар охирги рақам билан ёпилади ва бўлим бошлиғи ҳамда пенсия ва ижтимоий нафақа тайинлаш гуруҳи раҳбари (кейинги ўринларда тайинлаш гуруҳи раҳбари) томонидан имзоланиб, муҳр қўйилади ва доимий сақлаш учун бўлимнинг архивига топширилади.

4. Пенсия тайинлаш ишларини расмийлаштириш вазифаси бўлимнинг тайинлаш гуруҳи зиммасига, ҳамда бу ишларни ташкил қилиш ва уларни расмийлаштириш юзасидан белгиланган ягона тартибга риоя қилиниши устидан назорат ўрнатиш бўлим бошлиғининг биринчи ўринбосари вазифаси бўлиб, умумий назорат бўлим бошлиғига юклатилади.

Бўлимнинг ҳар бир ходими ўз ҳудудига тааллуқли ишларни бажариш, ҳужжатларни тўғри расмийлаштириш, юритиш ва ўз вақтида ижросини таъминлаш учун масъулдир.

5. Бўлимнинг пенсия ва ижтимоий нафақа тайинлаш гуруҳи инспектори (кейинги ўринларда — тайинлаш гуруҳи инспектори) лавозимидан озод этилганда, бошқа лавозимга тайинланганда ёки қонун ҳужжатларида назарда тутилган бошқа ҳолларда бўлим бошлиғининг буйруғи асосида пенсия ишлари, ҳамда бошқа ҳужжатларни топшириш ва қабул қилиб олиш ишлари тайинлаш гуруҳи раҳбари, инспектори ва ҳуқуқшуносдан иборат ишчи гуруҳи томонидан амалга оширилади.

Пенсия ишлари ва бошқа ҳужжатларни топширилиши ва қабул қилиниши, ишчи гуруҳи томонидан тасдиқланган далолатнома билан расмийлаштирилади.

6. Бўлимга ишга янги қабул қилинган ходимлар мазкур Йўриқнома билан таништирилиши шарт ва улар синов муддати давомида уни тўлиқ ўзлаштириши, синов муддатидан ўтганлигини белгиловчи асосий мезонлардан бири бўлиши лозим.

7. Пенсия тайинлаш тўғрисида ёзилган ариза, мурожаат этувчи фуқаронинг (васийнинг) доимий яшаш (рўйхатдан ўтган) жойидаги бўлимга топширилади.

8. Пенсия тайинлаш тўғрисидаги аризалар, ишламайдиган фуқароларнинг ўзларидан, агарда ишласа у ишлаётган корхона, муассаса ёки ташкилот вакилидан қабул қилинади. Фуқаролар пенсия олиш ҳуқуқи пайдо бўлганидан сўнг исталган пайтда пенсия тайинлашни сўраб мурожаат этишлари мумкин.

9. Ёшга доир пенсия тайинланишини сўраб пенсия ёшига тўлмасдан аввал ҳам мурожаат этиш мумкин, лекин бу мазкур пенсияни олиш ҳуқуқи пайдо бўлишидан бир ойдан олдин бўлмаслиги керак.

10. Пенсия тайинлаш учун ҳужжатларни қабул қилишда бўлимнинг тайинлаш гуруҳи раҳбари ва инспектори қуйидагиларга эътибор қаратишлари керак:

а) ариза тақдимнома ва иш ҳақи тўғрисидаги маълумотномалар тўғри расмийлаштирилганлиги, шунингдек улардаги маълумотларни паспорт ва мурожаат этувчининг бошқа ҳужжатларидаги маълумотларга мос келишини текшириши;

б) тақдим қилинган ҳужжатларнинг мазмуни ва тўғри расмийлаштирилганлиги, уларни бирламчи ҳужжатларга мослигини текшириш лозим. Бунда, фуқаронинг пенсияга бўлган ҳуқуқини, талаб этилган иш стажининг мавжудлигини, тақдим этилаётган ҳужжатларни тўғри ва тўлиқ расмийлаштирилганлигини ҳамда пенсия тайинлаш учун асос бўлувчи ҳужжатларнинг мавжудлигини кўриб чиқади;

в) қабул қилинаётган ҳужжатни бўлим бошлиғи ёки биринчи ўринбосари кўриб чиқиб, аризага раҳбар кўрсатмасини ёзиб, ҳужжатларни аслига солиштирган ҳолда нусхаларига имзо ва муҳр қўйиб тасдиқлайди;

г) тайинлаш гуруҳи раҳбари аризани махсус китобга рўйхатга олади ва тайинлаш гуруҳи инспекторига расмийлаштириш учун топширади.

11. Тайинлаш гуруҳи инспектори ҳужжатларнинг аслини (меҳнат дафтарчаси ва архив маълумотномаларидан ташқари) қайтаради ва ҳужжатларни қабул қилиб олганлиги тўғрисида мурожаат этувчига тилхат беради, тилхатнинг нусхаси бўлимга тақдим этилган ҳужжатлар билан бирга сақланади.

12. Пенсия тайинлаш учун талаб қилинган ҳужжатлар тўлиқ топширилмаган бўлса, аризачига ёки корхона, муассаса, ташкилот вакилига бу ҳақда қачон билдирилганлиги кўрсатилган ёзма хабарнома берилади. Хабарнома нусхаси аризага қўшиб қўйилади ва барча ҳужжатлар билан сақланади.

Етишмаётган ҳужжатлар тақдим этилгандан кейин бўлимнинг тайинлаш гуруҳи инспектори томонидан қабул қилиб олинганлиги тўғрисида тилхат берилади ва хабарнома нусхасига ҳамда тақдим қилинган ҳужжатга унинг қачон топширилганлиги ёзилади.

13. Агар улар қўшимча ҳужжатлар тақдим этилиши лозимлиги тўғрисида хабарнома олинган кундан эътиборан уч ой ичида тақдим этилса пенсия тайинлаш тўғрисидаги ариза қабул қилинган кун ёки ариза юборилган жойдаги почта штемплида кўрсатилган сана пенсия тайинлаш тўғрисидаги ариза қабул қилинган кун ҳисобланади.

14. Пенсия тайинлаш масаласида мурожаат этувчи фуқаронинг, ёшини ва яшаш манзилини тасдиқловчи ҳужжат, яъни паспортини кўрсатиши шарт ва бўлимнинг тайинлаш гуруҳи инспектори унинг паспортидан керакли маълумотларни кўчириб олади. Зарурат туғилса паспортдан нусха олади.

15. Ўзбекистон Республикасида доимий яшайдиган чет эл фуқаролари ва фуқаролиги бўлмаган шахсларнинг ва уларнинг оила аъзоларининг пенсия тайинлаш тўғрисидаги аризалари юқорида кўрсатиб ўтилган тартибда қабул қилинади ва расмийлаштирилади.

16. Агар туғилган вақтини кўрсатувчи ҳужжатда аниқ кун кўрсатилмай ой кўрсатилган бўлса, тегишли ойнинг 15-куни туғилган кун ҳисобланади.

Агар тақдим этилган ҳужжатда фақат туғилган йили кўрсатилиб туғилган ойи кўрсатилмаган бўлса, шу йилнинг 1 июли туғилган кун ҳисобланади

17. Ёшга доир, ногиронлик, боқувчисини йўқотганлик пенсияларини тайинлаш тўғрисидаги аризага Ўзбекистон Республикаси Вазирлар Маҳкамасининг 1994 йил 11 майдаги 249-сонли қарорининг 13-иловаси билан тасдиқланган «Пенсия тайинлаш учун ҳужжатларни тақдим этиш ва расмийлаштириш тартиби тўғрисида»ги низомда кўрсатилган ҳужжатлар тақдим қилинади.

18. Пенсия тайинлашда инобатга олиш учун меҳнат стажини тасдиқловчи ҳужжатлар Ўзбекистон Республикаси Вазирлар Маҳкамасининг 1994 йил 11 майдаги 249-сонли қарори билан тасдиқланган «Пенсия тайинлаш учун меҳнат стажини тасдиқлаш тартиби тўғрисида низом»га мувофиқ қабул қилинади.

19. Ҳарбий хизматчиларнинг ногиронлик ва боқувчисини йўқотганлик пенсиясини тайинлаш тўғрисидаги аризаларига Ўзбекистон Республикаси Вазирлар Маҳкамасининг 1994 йил 11 майдаги 249-сонли қарорининг 12 ва 13-иловаларида кўрсатилган ҳужжатлар илова қилинади.

20. Пенсия тайинлаш учун тегишли ҳужжатлар нотариал идора ёки бўлим томонидан тасдиқланиши мумкин.

21. Пенсия тайинлашга доир ҳужжатларни бўлим расмийлаштиради. Пенсия тайинлашни (бир турдан иккинчи турга ўтказишни) сўраб ёзилган ариза билан бирга тегишли ҳужжатлар топширилган кундан кейин Ўзбекистон Республикаси «Фуқароларнинг давлат пенсия таъминоти тўғрисида»ги Қонунининг 45-моддасига мувофиқ пенсия тайинлаш тўғрисидаги ҳужжатлар, улар келиб тушган кундан эътиборан 10 кундан кечиктирмасдан кўриб чиқилади.

22. Пенсия тайинлаш рад этилган ҳолларда, бўлим томонидан тегишли қарор чиқарилгандан кейин 5 кун ичида пенсия тайинлашни рад этиш сабаби ва шикоят қилиш тартибини тушунтириб, пенсия тайинлаш бўйича мурожаат этган фуқарога ёки корхона, муассаса, ташкилотга хабарнома юборади ва тақдим этилган ҳужжатларни аслини қайтаради.

23. Бўлимга кичик бизнес, фермер хўжаликлари ва бошқа ташкилотлар томонидан пенсия тайинлаш учун тақдим этилган ҳужжатларда, уларнинг асосли берилиши бўйича шубҳа туғдирган, иш стажи ва иш ҳақи тўғрисидаги маълумотларни пенсия тайинлангунга қадар текшириши мумкин.

24. Пенсия тайинлаш юзасидан мурожаат тегишли ҳужжатлар билан келиб тушгандан сўнг, пенсия ва ижтимоий нафақалар тайинлаш Комиссияси (кейинги ўринларда — Комиссия ) 10 кунлик муддатда қарор (пенсия тайинлаш, пенсия тайинлашни рад этиш, тақдим этилган ҳужжатларни қайта текшириш ва бошқ.) қабул қилади.

25. Бўлим томонидан пенсия тайинлаш учун тақдим этилган ҳужжатлар юзасидан текширув ўтказилганидан сўнг, Комиссия пенсия тайинлаш тўғрисидаги ҳужжатларни қайтадан кўриб чиқади.

Бунда, пенсия тайинлаш учун тақдим этилган ҳужжатларнинг асосли берилганлиги тасдиқланса, у ҳолда Комиссия пенсияни, пенсия тайинлаш учун биринчи маротаба мурожаат этган кундан тайинлаш тўғрисида қарор қабул қилади.

26. Агар текширилиши керак бўлган ҳужжатларсиз ҳам фуқаронинг пенсия олишга ҳуқуқи бўлса, унинг ёзма розилигига асосан, Комиссия томонидан қонун ҳужжатларида белгиланган тартибда энг кам миқдорда пенсия тайинланиши мумкин.

Агар фуқаро энг кам миқдордаги пенсия тайинланишига рози бўлмаса, Комиссия пенсия тайинлаш бўйича қарорни, ҳужжатлар юзасидан ўтказилаётган текширув ишлари тугаллангандан кейин қабул қилади.

27. Пенсия тайинлаш ёки қайта ҳисоблаш учун тақдим этилган ҳужжатлар юзасидан қонун ҳужжатларида белгиланган тартибда ўтказиладиган текширишлар, текшириш ўтказилган сана кўрсатилган далолатнома билан расмийлаштирилади.

28. Текшириш корхона, муассаса ёки ташкилот вакили иштирокида ўтказилиб, далолатнома бўлим ходими, корхона, муассаса ёки ташкилот вакили имзолари ва текширилган корхона, муассаса, ташкилот ва архив муҳри билан тасдиқланиши лозим.

29. Тайинлаш гуруҳи инспектори пенсия тайинлаш учун топширилган ҳужжатларга асосан маълумотларни компьютер базасига киритади, меҳнат стажини, ўртача иш ҳақини, пенсия миқдорини ҳисоблаб, ҳисоб-китобларни чоп этади ҳамда Комиссиянинг пенсия тайинлаш ёки пенсия тайинлашни рад этиш юзасидан қарор лойиҳасини тайёрлайди.

Ҳужжатларни тартиб бўйича тикиб, тайинлаш гуруҳи раҳбарига текшириш учун беради. Пенсия тайинлаш муддатини назорат қилиш учун мазкур Йўриқноманинг 2-иловасида келтирилган махсус назорат варақаси тўлдирилади. Пенсия тайинлаш ишларидаги ҳужжатлар мазкур Йўриқноманинг 3-иловасида кўрсатилган тартибда тикилади.

30. Бўлимнинг тайинлаш гуруҳи раҳбари иш стажи, ўртача иш ҳақи ва пенсия миқдорини тўғри ҳисобланганлигини, пенсия тайинлаш муддати тўғрилигини текшириб имзо қўяди.

31. Комиссия ҳафтада камида бир маротаба йиғилиш ўтказиб, тақдим этилган ҳужжатлар юзасидан пенсия тайинлаш ёки уни тайинлашни рад этиш, пенсиядан ушлаб қолиш, пенсия тўловини тўхтатиш, зарур ҳолларда пенсия тайинлаш ёки қайта ҳисоблаш учун тақдим этилган ҳужжатларни текшириш, гувоҳлар кўрсатмасига асосан иш стажини тасдиқлаш ва бошқа коллегиал ҳал қилиниши зарур бўлган масалалар юзасидан қарорлар қабул қилади.

32. Комиссия қарорлари баённома билан расмийлаштирилади. Баённомада барча кўрилган пенсия ишлари умумий рўйхат қилиниб ва унда кўриб чиқилган ҳолатлар тўлиқ кўрсатиб ўтилади.

Баённома Комиссия аъзолари томонидан имзоланади ва муҳр билан тасдиқланади.

33. Пенсионер вафот этгандан кейин унинг ёпилган пенсия иши оила аъзоларига тайинланган боқувчисини йўқотганлик пенсия ишига қўшиб тикилади.

34. Боқувчисини йўқотганлик пенсиясидан улуш ажратишни сўраб ёзилган ариза қуйидаги тартибда ҳал этилади:

а) асосий боқувчисини йўқотганлик пенсиясини олувчи яшаб турган жойдаги бўлимга пенсиядан улуш ажратиш тўғрисида хатга ариза ва тегишли ҳужжатларни илова қилган ҳолда мурожаат этади;

б) ушбу мурожаатга асосан уни олган бўлим, бу оила аъзоларининг пенсия олишга бўлган ҳуқуқини тасдиқлайдиган ҳужжатлар асосий пенсия ишига тикиб қўйилади, пенсиядан улуш ажратиш тўғрисида қарор чиқаради ва қарордан кўчирмани оила аъзоларидан алоҳида яшаб турган жойдаги бўлимига юборади;

в) пенсиядан улуш ажратилганлиги тўғрисида қарордан кўчирмани олган бўлим, қарорни «пенсия ишига» тикади ҳамда уни пенсия ва нафақалар тўлови бўйича мониторинг гуруҳига беради, ушбу гуруҳ томонидан алоҳида шахсий ҳисобварақаси очилади, шу ҳисобварақасидаги рақам улуш олувчининг «пенсия иши»га ҳам қўйилади;

г) пенсиядан улуш олувчиларнинг «пенсия иш»лари алоҳида сақланади.

Бўлим пенсиядан улуш олувчи оила аъзоларининг таркибида бўлган ва пенсиянинг миқдорини ўзгартириш ёки пенсия тўловини тўхтатишга сабаб бўладиган барча ўзгаришлар тўғрисида тегишли бўлимга хабар қилиши шарт;

д) боқувчисини йўқотганлик пенсиясини олаётган оиланинг бир туманда (шаҳарда) яшаб турган аъзоларига пенсиядан улуш ажратиш ва ҳужжатларни расмийлаштириш юқорида кўрсатиб ўтилган тартибда амалга оширилади;

е) пенсия иши сақланаётган бўлим оила таркибида ўзгаришлар бўлганлиги муносабати билан ёки Ўзбекистон Республикаси Президентининг «Иш ҳақи, пенсиялар, стипендиялар ва ижтимоий нафақалар миқдорини ошириш тўғрисида»ги фармонларига асосан пенсия миқдорини қайтадан кўриб чиққанида, бошқа туманда (шаҳарда) яшаб турган оила аъзолари учун пенсиядан ажратилган улушнинг янги миқдори тўғрисидаги фармойишни янгидан расмийлаштириб пенсия тўлови амалга оширилаётган тегишли бўлимга юбориши шарт.

35. Пенсия тайинлаш тўғрисидаги қарор Комиссия томонидан тасдиқланганидан кейин пенсия иши пенсия ва ижтимоий нафақалар тўлови бўйича мониторинг гуруҳига махсус китобга қайд этилиб берилади (махсус китоб намунаси мазкур Йўриқноманинг 4-иловасида келтирилган). Ушбу китоб бўйича тўлов ҳужжатларини расмийлаштирилиши, пенсия ишларининг қайтарилиш муддатлари назорат қилинади.

36. Шахсий ҳисобварақаси очилгандан кейин пенсия олувчининг ишига шахсий ҳисобварақаси рақами билан бир хил рақам қўйилади, тўлов ҳужжати расмийлаштирилиб, тайинлаш гуруҳи инспекторига қайтарилади.

37. Тайинлаш гуруҳи инспектори пенсия ишига асосан пенсия гувоҳномасини ёзади. Пенсия гувоҳномаси бланкаси қатъий ҳисоби юритиладиган ҳужжат ҳисобланади ва бўлим бошлиғи томонидан масъул этиб белгиланган ходимда сақланади.

38. Пенсия гувоҳномаси олувчи фуқаро бўлимга 2 та расм тақдим этади (биттаси гувоҳномага, иккинчиси гувоҳномаларни рўйхатга олиш китобига ёпиштириб қўйиш учун).

39. Пенсия гувоҳномаси, гувоҳномалар берилишини ҳисобга олиб бориш мазкур Йўриқноманинг 5-иловасида келтирилган китобга ёзилиб, пенсионерга уни олганлиги тўғрисида имзо чектирилиб берилади.

40. Пенсия гувоҳномаси йўқолган тақдирда гувоҳноманинг «дубликати» берилади. «Дубликатга» йўқотилган гувоҳноманинг рақами берилади ва гувоҳномаларни ҳисобга олиб бориш китобига қайси рақам билан қайд этилганлиги ёзиб қўйилади.

41. Пенсия олиш тўғрисидаги маълумотнома мазкур Йўриқноманинг 6-иловасида келтирилган китобга, аризачига уни олганлиги тўғрисида имзо қўйдириб берилади.

42. Ўзбекистон Республикаси ҳудудида доимий яшайдиган чет эл фуқароларига ҳам (фуқаролиги бўлмаган шахсларга) ҳам шахсий ҳисобварақаси очиш ва пенсия гувоҳномаси юқорида кўрсатилган тартибда берилади.

43. Ҳаракатдаги пенсия ишлари бўлимнинг тайинлаш инспекторларида сақланади ва уларнинг тўлиқ сақланишига ушбу шахслар масъул ҳисобланадилар.

44. Пенсияни қайта ҳисоблашни, бир турдаги пенсиядан бошқа турдаги пенсияга ўтказишни, аввал тайинланган пенсияни тиклашни сўраб ёзилган ариза, тегишли ҳужжатлар билан бирга бўлимга топширилади. Пенсияларни қайта ҳисоблаш бир турдаги пенсиядан бошқа турдаги пенсияга ўтказиш, аввал тайинланган пенсияни тиклаш тўғрисидаги аризалар 5 кун ичида кўриб чиқилади.

45. Фуқаро қайта ҳисоблаш учун қўшимча ҳужжатлар билан мурожаат этганда тайинлаш гуруҳи раҳбари ва инспектори:

а) тақдим қилинаётган ҳужжатлар ва қайта ҳисоблаш бўйича аризани бўлим бошлиғи ёки биринчи ўринбосарга киритади;

б) бўлим бошлиғи ёки биринчи ўринбосар аризага тегишли кўрсатма қўяди;

в) тайинлаш гуруҳи инспектори аризани қабул қилиб олганлиги тўғрисида мурожаат этувчига тилхат ёзиб беради ва қайд этиш китобига рўйхатга олади.

46. Ариза рўйхатга олингандан кейин, тегишли ҳужжатлар билан бирга тайинлаш гуруҳи инспектори томонидан қайта ҳисобланади ва текшириш учун тайинлаш гуруҳ раҳбарига берилади ва тасдиқлаш учун Комиссияга тақдим этилади. Пенсияларни қайта ҳисоблашдаги ҳужжатлар мазкур Йўриқноманинг 7-иловасида кўрсатилган тартибда тикилади.

47. Пенсияни қайта ҳисоблашда, бир турдаги пенсиядан бошқа турдаги пенсияга ўтказишда, аввал тайинланган пенсияни тиклашни рад этилган ҳолда, Комиссиянинг тегишли қарори чиқарилган кундан бошлаб 5 кун ичида рад этиш сабаби ва арз қилиш тартиби тушунтирилиб, аризачига ёки корхона, муассаса, ташкилотга хабарнома юборади ва тақдим этилган ҳужжатларнинг аслини қайтаради.

48. Пенсия нотўғри тайинланганлиги аниқланган ҳолларда, пенсия тўловини тўхтатиш масаласи Комиссия томонидан кўриб чиқилади ва баённома билан расмийлаштирилиб, 5 кун ичида фуқарога ёки корхона, муассаса, ташкилотга баённомадан кўчирма берилади (юборилади).

49. Пенсия тўлови қонун ҳужжатларида белгиланган тартибда тўхтатилганда, (масалан пенсия тўлаш муддати тугаганда, пенсионер вафот этганда ёки пенсия тўлови вақтинча тўхтатилганда, тиббий меҳнат эксперт комиссиясидан (ТМЭК) кўригидан ўтиш муддати ўтказиб юборилганда, пенсионер озодликдан маҳрум этиш жазосига ҳукм қилинганда ва бошқа ҳолларда), пенсия тўлашни тўхтатиш ёки вақтинча тўхтатиб туриш пенсия ва нафақалар тўлови бўйича мониторинг гуруҳи томонидан пенсия ишининг махсус графасига тўлов қачондан тўхтатилганлиги ва тўхтатилиш сабабини кўрсатилиб, расмийлаштирилади.

50. ТМЭК кўригидан ўз вақтида ўтмасдан кейинчалик ўтиб, унга Ўзбекистон Республикасининг «Фуқароларнинг давлат пенсия таъминоти тўғрисида»ги Қонуни 55-моддасига асосан пенсияни тўлаш Комиссия қарорига асосан расмийлаштирилади.

51. Пенсияни тиклаш Комиссия қарори билан расмийлаштирилади. Пенсияни тиклаш рад этилган ҳолларда, бу ҳақда аризачи 5 кунлик муддатда ёзма равишда хабардор қилинади.

52. Пенсионер доимий яшаш учун бошқа туманга (шаҳарга) кўчиб кетаётганда пенсия ишини ҳисобдан чиқариш тўғрисидаги ариза (ёки кўчиб кетаётган жойдаги бўлимдан сўровнома) беради.

53. Кўчиб кетаётган пенсионерга аввал рўйхатда турган бўлим томонидан рўйхатдан чиққан ойнинг пенсияси тўлаб берилади (агар пенсия тўлови олдиндан тўхтатилмаган бўлса, яъни муддати тугаган, узоқ вақтдан буён пенсия олишга мурожаат этмаган бўлса).

54. Қайси муддатгача пенсия тўланганлиги пенсия ишига ва шахсий ҳисобварақасига ёзиб қўйилади.

55. Пенсионерни ҳисобдан чиқариш бўлимнинг пенсия ва ижтимоий нафақалар тўлови бўйича мониторинг гуруҳи томонидан расмийлаштирилади. Бу ҳақда пенсия ишига ва шахсий варақага тегишли равишда ёзиб қўйилади.

56. Пенсионернинг яшаш жойи ўзгарганлиги муносабати билан пенсия ишини ҳисобга олишни сўраб ёзган аризасига асосан, унинг янги яшаш жойидаги бўлим мазкур туманда яшаётганлигини тасдиқловчи ҳужжат, яъни янги яшаш жойида рўйхатга олинганлиги тўғрисида белги қўйилган паспорт асосида ҳисобга олади ва 3 кунлик муддатда пенсия ишини юбориш тўғрисида аввал ҳисобда турган бўлимга сўровнома юборади.

57. Сўровномани олган бўлим 5 кунлик муддатда пенсия ишини сўровнома берган бўлимга юборади.

58. Пенсиядан чегирма ушланиб келинган ҳолларда, маблағ ушлаб қолиш учун асос бўладиган ижро ҳужжатлари тегишли судга қайтарилади. Судга қайтариш жараёнида, қайтарилиш сабаблари ва пенсионернинг янги манзили тўғрисида маълумот кўрсатилади.

59. Пенсия иши фақатгина фуқаро яшаш жойини республика ҳудудида ўзгартирган тақдирда янги яшаш жойига берилади.

Доимий яшаш учун чет давлатга кўчиб кетган фуқаронинг пенсия иши берилмайди.

60. МДҲ давлатларига кўчиб кетаётган пенсионерларнинг пенсия ишларини бериш (юбориш) қонун ҳужжатларида белгиланган тартибда амалга оширилади.

61. Пенсионернинг янги яшаш жойидаги бўлим пенсия ишини олгандан сўнг, пенсионер тўғрисидаги маълумотларни компьютер базасига киритади. Назорат тариқасида қайта тайинлаш бўйича компьютер ҳисобларини (пенсия миқдори, ўртача ойлик иш ҳақи, стажининг ҳисоби) чоп этиб, белгиланган тартибда расмийлаштирилган фармойиш асосида пенсионернинг илгари яшаб турган жойида қайси вақтгача пенсия тўланган бўлса, шу вақтдан бошлаб (қонун асосида) пенсия тўлови давом эттирилади.

62. Пенсиядан улуш олиб келаётган оила аъзоси доимий яшаш учун бошқа туманга (шаҳарга) кўчиб борганида янги жойдаги бўлим пенсиядан улуш ажратиш тўғрисидаги қарорнинг кўчирмасини юбориш тўғрисида, шу улуш олувчи илгари яшаб турган жойдаги бўлимга сўровнома юборади.

63. Пенсия улушини тўлаб турган бўлим, шу хатни олганидан кейин 3 кунлик муддат ичида қарордан кўчирмани ва пенсия улуши қачонгача тўланганлиги кўрсатиб ёзилган маълумотномани пенсиядан улуш олувчининг янги яшаш жойидаги бўлимга юборади. Бир вақтнинг ўзида пенсиядан улуш олувчи оила аъзосининг яшаш манзили ўзгарганлиги ҳақида, асосий пенсия иши сақланаётган бўлимга ҳам хабар берилади.

64. Пенсия ишларини юбориш тўғрисида ёзилган хатлар ва келган пенсия ишлар бўлимда алоҳида юритилган китобларда қайд этилади.

Пенсия ишларини юборишни сўраб ёзган сўровномалар ва ишларни жўнатишга доир барча ёзишма алоҳида йиғмажилдга тикиб қўйилади.

65. Пенсия ишлари махсус жиҳозланган хонада сақланади.

Ҳаракатдаги пенсия ишларини сақлаш бўйича жавобгар, тайинлаш гуруҳи раҳбарлари ва инспекторлари ҳисобланади.

66. «Саховат» ва «Мурувват» уйларида яшаб турган пенсионернинг пенсия иши шу муассаса жойлашган бўлимда сақланади. Пенсионерга пенсия белгиланган тартибда мазкур бўлим томонидан тўланади.

Руҳий касалликлар шифохонасига жойлаштирилган ва васий тайинланган пенсионернинг пенсия иши васийнинг яшаб турган жойидаги бўлимда сақланади.

67. Пенсия тўлаш тўхтатилган фуқароларнинг пенсия ишлари, ҳаракатдаги пенсия ишларидан алоҳида ажратилган ҳолда бўлим архивида сақланади.

68. Бўлимнинг архивидаги пенсия ишлари алфавит китобига қайд этилади ва китобга қайси рақам билан ёзилган бўлса, пенсия ишига ҳам шу рақам қўйилади. Ҳар бир алфавит ҳарфи бўйича бирдан бошлаб алоҳида тартиб рақам қўйиб борилади.

69. Алфавит китобига пенсионернинг фамилияси, исми, отасининг исми, пенсия тури, архивдаги иш бошқа жойга жўнатилганлиги тўғрисидаги ёзув каби маълумотлар киритилиши лозим.

70. Бўлимнинг архивида пенсия ишларининг сақланишига архивчи (архивариус штати йўқ жойларда бўлим бошлиғининг буйруғи билан масъул этиб тайинланган ходим) зиммасига юклатилади.

71. Пенсия тайинлаш рад этилган фуқароларнинг ишлари архивда алоҳида сақланади. Бу ишда қуйидаги ҳужжатлар бўлиши лозим:

а) пенсия тайинлашни сўраб ёзилган ариза;

б) ариза ва тақдим қилинган ҳужжатларни қабул қилганлик тўғрисидаги тилхат нусхаси;

в) иш стажи ва иш ҳақи ҳисоби;

г) аризачи томонидан топширилган ёки бўлим томонидан расмийлаштирилган ҳужжатларнинг нусхалари ёки кўчирмалари;

д) Комиссия баённомасидан кўчирма ва пенсия тайинлаш рад қилинганлиги тўғрисида ёзилган хабарноманинг нусхаси. Хабарнома ариза эгасига топширилган бўлса унинг нусхасида ариза эгасининг ҳужжатларни қайтариб олганлиги тўғрисида, олган санасини кўрсатган ҳолда қўйган имзоси бўлиши шарт.

Агар ҳужжатлар почта орқали юборилган бўлса, буюртма билан юборилганлиги ҳақида почтадан берилган квитанциянинг рақами ва санаси кўрсатилади.

Юқорида кўрсатиб ўтилган ҳужжатлар ишнинг муқовасига тикиб қўйилади ва алфавит тартибида сақланади. Ишнинг муқовасига ариза эгасининг фамилияси, исми, отасининг исми ва яшаш манзили ёзилади.

Юқорида кўрсатиб ўтилган барча китоблар: