OʻZBEKISTON RESPUBLIKASI PREZIDENTINING

QARORI

Chorvachilik tarmogʻi va yaylov xoʻjaligini zamonaviy boshqaruv tizimi va yangicha yondashuvlar asosida rivojlantirish chora-tadbirlari toʻgʻrisida

Chorvachilik tarmogʻida zamonaviy va samarali uslublarni joriy etish, investitsiya loyihalarini barcha bosqichlarda qoʻllab-quvvatlash va kompleks xizmatlar koʻrsatish tizimini yoʻlga qoʻyish, tarmoq korxonalariga har tomonlama yordam koʻrsatish, ozuqa bazasini koʻpaytirish va naslchilikni yaxshilash, shu jumladan, sunʼiy urugʻlantirishni yanada rivojlantirish maqsadida qaror qilaman:

I. Maqsadlar

1. Quyidagilar chorvachilik tarmogʻini 2026 — 2028-yillarda rivojlantirishning maqsadli koʻrsatkichlari etib belgilansin:

(a) qoramollar bosh sonini 16,5 milliontaga, qoʻy va echkilar bosh sonini 30 milliontaga, parrandalar bosh sonini 141 milliontaga yetkazish;

(b) chorvachilik (goʻsht va sut) mahsulotlarini sanoat usulida qayta ishlash darajasini 50 foizga olib chiqish;

(v) nasldor qoramollar ulushini 90 foizga yetkazish orqali chorva mollari mahsuldorligini oshirish;

(g) qishloq xoʻjaligiga moʻljallangan yer uchastkalarida ozuqabop ekinlar maydonlarini 1,5 baravarga koʻpaytirish.

II. Yangi boshqaruv tizimini joriy etish

2. Oʻzbekiston Respublikasi Prezidentining 2026-yil 12-maydagi “Oziq-ovqat mahsulotlari xavfsizligi, fitosanitariya va veterinariya sohalarida yagona davlat boshqaruvi va nazorat tizimini joriy etish chora-tadbirlari toʻgʻrisida”gi PF-84-son Farmoni bilan Qishloq xoʻjaligi vazirligi huzurida Chorvachilik va yaylov xoʻjaligini rivojlantirish agentligi (keyingi oʻrinlarda — Agentlik) tashkil etilgani maʼlumot uchun qabul qilinsin.

3. Belgilansinki:

(a) Agentlik chorvachilik tarmogʻini rivojlantirish, yaylovlardan oqilona va samarali foydalanish boʻyicha strategik rejalashtirish, muvofiqlashtirish, hududlar kesimida yoʻnalishlarni belgilash va chorvachilik mahsulotlari yetishtirishni koʻpaytirishda biznes loyihalarni qoʻllab-quvvatlash, metodologik taʼminlash hamda monitoring qilishga masʼul etib belgilanadi;

(b) Agentlik huzurida yuridik shaxs maqomiga ega boʻlmagan Chorvachilik tarmoqlarini qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etiladi.

4. Quyidagilar:

(a) Chorvachilik va yaylov xoʻjaligini rivojlantirish agentligi tashkiliy tuzilmasi hamda faoliyatining ustuvor yoʻnalishlari 1 va 2-ilovalarga muvofiq;

(b) Chorvachilik tarmoqlarini qoʻllab-quvvatlash jamgʻarmasini shakllantirish manbalari 3-ilovaga muvofiq tasdiqlansin.

III. Chorvachilikda ozuqa bazasini kengaytirish va naslchilikni yaxshilash

5. Belgilab qoʻyilsinki, mazkur qarorga 4-ilovaga muvofiq chorvachilikka ixtisoslashtirilgan tumanlar doirasida:

(a) qishloq xoʻjaligiga moʻljallangan yer uchastkalarida ozuqabop ekinlar ekishga ustuvorlik beriladi;

(b) 2027-yil hosilidan boshlab yer ijara shartnomasiga asosan qishloq xoʻjaligi tashkilotlaridagi paxta va boshoqli don joylashtirilishi nazarda tutilgan yer maydonlarining 50 foiziga ozuqabop ekinlarni joylashtirishga ruxsat etiladi, qolgan yer maydonlarida paxta va boshoqli don yetishtiriladi;

(v) Qishloq xoʻjaligini davlat tomonidan qoʻllab-quvvatlash jamgʻarmasi mablagʻlari hisobidan paxta va gʻallani yetishtirishni moliyalashtirish uchun belgilangan mablagʻlar miqdori kamaytirilmagan holda ozuqabop ekinlar yetishtirishni moliyalashtirishga ham yoʻnaltiriladi.

6. Paxtachilik, gʻallachilik va (yoki) chorvachilikka ixtisoslashgan xoʻjaliklarga ijaraga berilgan, jami maydoni 10 gektardan kam boʻlmagan va yaxlit kontur maydoni 2 gektardan koʻp boʻlgan sugʻoriladigan yerlarning 20 sotixdan koʻp boʻlmagan qismidan ruxsat etilgan foydalanish turini ichki xoʻjalik yer tuzish loyihasiga asosan chorva mollari va chorva uchun ozuqani saqlash va koʻpaytirish turiga oʻzgartirishga ruxsat berilsin. Bunda:

(a) “Oʻzdaverloyiha” DILI tomonidan ishlab chiqilib, tuman hokimi tomonidan tasdiqlanadigan ichki xoʻjalik yer tuzish loyihasi ushbu yer uchastkasida kapital qurilish obyekti hisoblangan chorva mollari va chorva uchun ozuqani saqlash va koʻpaytirishga ixtisoslashgan bino va inshootlar (keyingi oʻrinlarda — chorvachilik obyekti)ni qurish uchun qurilishga ruxsat berishga doir hujjatlarni olish uchun murojaat qilish huquqini beradi;

(b) ichki xoʻjalik yer tuzish loyihasi tasdiqlangandan keyin bir oy davomida Qoraqalpogʻiston Respublikasi Vazirlar Kengashi va viloyat hokimliklari mazkur yer uchastkasining tegishli qismini sugʻoriladigan yerlar toifasidan chiqarish boʻyicha Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasiga taklif kiritadi, ushbu yerlar keyinchalik Oʻzbekiston Respublikasi Prezidentining farmoyishi bilan sugʻoriladigan yerlar toifasidan chiqariladi;

(v) ruxsat etilgan foydalanish turi oʻzgartiriladigan yer uchastkasiga qishloq xoʻjaligi va oʻrmon xoʻjaligi ishlab chiqarishi nobudgarchiliklarining oʻrnini qoplash boʻyicha toʻlovlar oʻn yil davomida har yili teng ulushlarda boʻlib-boʻlib toʻlanadi;

(g) ichki xoʻjalik yer tuzish loyihasini tasdiqlash bilan bir paytda yer uchastkasi ijarasi shartnomasiga qoʻshimcha kiritiladi, unda yer uchastkasidan oqilona foydalanish shartlaridan biri sifatida bir sotix yer maydonida kamida shartli 3 bosh qoramolni muntazam ravishda saqlash va parvarishlash majburiyati qatʼiy belgilanadi;

(d) chorvachilik obyektidan yer uchastkasi ijara shartnomasining amal qilish muddatida foydalaniladi, ushbu muddat tugaganda va yer uchastkasi hokimlik zaxirasiga qaytarilganda yoki chorvachilik obyektidan belgilangan maqsadda foydalanilmaganda chorvachilik obyekti ular egasi tomonidan buzib tashlanadi va buning uchun kompensatsiya toʻlovlari toʻlanmaydi;

(j) yer uchastkasi ijara shartnomasi bekor qilinganda yer uchastkasida chorvachilik obyekti mavjudligi shartnoma muddatini uzaytirishga asos hisoblanmaydi.

7. 2026-yil 1-iyuldan boshlab 2028-yil yakuniga qadar Toshkent davlat agrar universiteti, Qishloq xoʻjaligi sohasi kadrlarining malakasini oshirish va qayta tayyorlash instituti, Samarqand davlat veterinariya meditsinasi, chorvachilik va biotexnologiyalar universiteti, uning Qoraqalpogʻiston Respublikasi va Toshkent shahridagi filiallari hamda Andijon qishloq xoʻjaligi va agrotexnologiyalar institutida Agentlik tomonidan sunʼiy texnik-osemenatorlik boʻyicha 10 kunlik oʻquv kurslari tashkil qilinsin. Bunda:

(a) oʻquv kurslarini tashkil qilishga tajribali texnik-osemenatorlar jalb qilinadi hamda har yili kamida mingta talabgorlar oʻqitiladi;

(b) oʻquv kurslarini muvaffaqiyatli tamomlab, sertifikat olgan texnik-osemenatorlarga:

(i) Agentlik tomonidan Davlat budjeti mablagʻlari hisobidan mazkur qarorga 5-ilovaga muvofiq jihoz va uskunalar begʻaraz beriladi;

(ii) oʻquv kurslariga sarflangan xarajatlar uchun, biroq 2 million soʻmdan oshmagan miqdorda Agrar sohada toʻlovlar agentligi hisobidan kompensatsiya taqdim etiladi.

8. 2026-yil 1-iyuldan boshlab 2030-yil 1-yanvarga qadar aholi xonadonlarida identifikatsiya qilingan sigirlardan quyidagilar orqali olingan har bir bosh nasldor buzoq (identifikatsiya qilingan) uchun Agrar sohada toʻlovlar agentligi tomonidan Davlat budjeti hisobidan subsidiya ajratish yoʻlga qoʻyilsin:

(a) sunʼiy urugʻlantirish orqali olinganda — 500 ming soʻmdan;

(b) embrionlarni koʻchirib oʻtkazish (transplantatsiya) orqali olinganda — 700 ming soʻmdan.

IV. Chorvachilikni sanoatlashtirish uchun moliyaviy qoʻllab-quvvatlash choralari va imtiyozlar

9. Belgilansinki, 2026-yil 1-iyuldan boshlab:

(a) Qishloq xoʻjaligini davlat tomonidan qoʻllab-quvvatlash jamgʻarmasidan har yili tijorat banklariga yillik 6 foiz stavkada 10 yil muddatga 1 trillion soʻm miqdorida mablagʻ joylashtiriladi;

(b) Tiklanish va taraqqiyot jamgʻarmasidan AT “Xalq banki” hamda “Mikrokreditbank” ATBga ularning buyurtmanomalari asosida 10 yil muddatga, 4 yillik imtiyozli davr bilan yillik 6 foiz stavkada milliy valyutada 50 million AQSH dollariga teng ekvivalentda mablagʻlar ajratiladi;

(v) mazkur bandning “a” va “b” kichik bandlaridagi resurslar hisobidan quyidagi yoʻnalishlarda tijorat banklari orqali yillik 10 foiz stavkada (shundan 4 foiz bank marjasi) 4 yillik imtiyozli davr bilan 10 yilgacha muddatga kreditlar ajratiladi:

(i) chorvachilik majmualarini tashkil qilish hamda nasldor yirik va mayda shoxli qoramol xarid qilish loyihalarini moliyalashtirish uchun 5 milliard soʻmgacha;

(ii) chorvachilikda naslli buqalar urugʻini yetishtiradigan korxonani tashkil qiladigan tadbirkorlik subyektlariga qurilish, asbob-uskunalar va naslli qoramollar sotib olish xarajatlarini moliyalashtirish uchun 20 milliard soʻmgacha;

(g) chorvachilik yoʻnalishida davlat kafolati ostida jalb qilingan xalqaro moliya institutlarining kredit mablagʻlari tadbirkorlik subyektlariga yillik 10 foiz stavkada ajratiladi. Bunda mazkur kichik bandda nazarda tutilgan kreditlarni imtiyozli shartlarda ajratish bilan bogʻliq xarajatlar Davlat budjetidan qoplanadi.

10. Agentlik mazkur qarorning 9-bandida nazarda tutilgan resurslar oʻzlashtirilishiga qarab, qoʻshimcha mablagʻ ajratish boʻyicha Oʻzbekiston Respublikasi Prezidenti Administratsiyasiga takliflar kiritib borsin.

11. 2026-yil 1-iyundan boshlab 2029-yil 1-yanvarga qadar xorijiy davlatlardan nasldor qoramol, qoʻy va echkilarni Oʻzbekiston Respublikasi hududiga olib kirish qoʻshilgan qiymat soligʻidan ozod etilsin.

12. Iqtisodiyot va moliya vazirligi Qishloq xoʻjaligi vazirligi bilan birgalikda ikki oy muddatda mazkur qarorning 11-bandidan kelib chiqib, Soliq kodeksiga oʻzgartirish va qoʻshimchalar kiritishni nazarda tutuvchi qonun loyihasini Vazirlar Mahkamasiga kiritsin.

V. Moliyaviy resurslar

13. Belgilansinki:

(a) Agentlik chorvachilik va yaylov xoʻjaligi yoʻnalishidagi xalqaro moliya institutlari va xorijiy hukumat moliya tashkilotlarining investitsiya, kredit hamda grant loyihalarini amalga oshirishga masʼul hisoblanadi;

(b) Veterinariya va chorvachilikni rivojlantirish qoʻmitasi tomonidan xalqaro moliya institutlari va xorijiy hukumat moliya tashkilotlari hisobidan amalga oshirilayotgan loyihalar, loyihalarni amalga oshirish guruhlari loyiha doirasidagi huquq va majburiyatlar, shartnomalar, mol-mulklari bilan birgalikda Agentlikka oʻtkaziladi.

14. Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasi (Xodjayev) uch oy muddatda mazkur qarorning 13-bandi “b” kichik bandidagi loyihalar komponentlari va mablagʻlari Agentlik hamda Oziq-ovqat mahsulotlari xavfsizligi qoʻmitasi oʻrtasida tegishliligi boʻyicha taqsimlanishini taʼminlasin va loyihalar ijrosi tashkil etilishini doimiy ravishda nazorat qilib borsin.

15. Iqtisodiyot va moliya vazirligi:

(a) 2027-yil 1-fevralga qadar “Parrandasanoat” uyushmasiga 2033-yil avgust — dekabr oylarida teng ulushlarda qaytarish sharti bilan Oʻzbekiston Respublikasi respublika budjetidan 50 milliard soʻm miqdorida ssuda ajratsin. Bunda ushbu mablagʻlar “Parrandasanoat” uyushmasi tomonidan tijorat banklari depozitlariga joylashtiriladi hamda bundan kelib tushgan daromadlar ushbu uyushmaning moddiy-texnika bazasini mustahkamlash, sohaga ekspertlarni jalb etish, tashqi bozorlarni ochish hamda oylik ish haqi va saqlash xarajatlarini moliyalashtirish maqsadlariga sarflanadi;

(b) mazkur qarorga muvofiq subsidiyalar bilan bogʻliq xarajatlarni moliyalashtirish uchun Qishloq xoʻjaligi vazirligining hisob-kitoblariga asosan joriy yilda Oʻzbekiston Respublikasi respublika budjetining 2026-yil xarajatlaridan maqbullashtirish belgilangan mablagʻlar hisobidan bosqichma-bosqich 50 milliard soʻm qoʻshimcha mablagʻ ajratsin va kelgusi yillarda Davlat budjeti parametrlarini shakllantirishda tegishli mablagʻlarni koʻzda tutsin;

(v) mazkur qarorning 9-bandi “v” kichik bandining “i” xatboshisida koʻzda tutilgan resurslarni joylashtirish uchun Qishloq xoʻjaligini davlat tomonidan qoʻllab-quvvatlash jamgʻarmasiga joriy yilda qoʻshimcha 1 trillion soʻmgacha mablagʻ ajratsin, ushbu jamgʻarmaning kelgusi yillar daromadlari va xarajatlari balansini shakllantirishda zarur mablagʻlar inobatga olinishini taʼminlasin.

16. AT “Xalq banki” va “Mikrokreditbank” ATB 2026-yil 1-sentabrdan boshlab chorvachilikni rivojlantirish yoʻnalishida kreditlarni elektron platforma orqali raqamlashtirgan holda ajratishni yoʻlga qoʻysin. Bunda:

(a) kredit olish uchun arizalar barcha bosqichlarda onlayn tarzda koʻrib chiqiladi, kredit ajratish boʻyicha hujjatlar elektron koʻrinishda shakllantiriladi, taqdim etiladi va masofadan imzolanadi;

(b) Agentlikka platformadagi maʼlumotlardan (davlat siri yoki qonun bilan qoʻriqlanadigan boshqa sirni tashkil etuvchi maʼlumotlar bundan mustasno) toʻgʻridan-toʻgʻri foydalanishga ruxsat etiladi.

VI. Qaror ijrosini tashkil etish, taʼminlash va nazorat

17. Qoraqalpogʻiston Respublikasi Vazirlar Kengashi va viloyatlar hokimliklari 2026-yil yakuniga qadar:

(a) mazkur qarorga 4-ilovaga muvofiq tumanlarda ichki xoʻjalik yer tuzish loyihalari tasdiqlanishi va obyektlar qurilishini;

(b) har bir tumanda maydoni 1 gektardan kam boʻlmagan sanoatlashgan chorvachilik majmualarini tashkil qilish uchun kamida 20 ta yer uchastkasi auksion savdolariga chiqarilishini taʼminlasin.

18. Bosh prokuraturaning:

(a) Tabiiy koʻllarda baliqchilikni rivojlantirish va suv resurslaridan foydalanishga oid qonunchilik ijrosi ustidan nazorat boshqarmasini Chorvachilik va uning tarmoqlarini rivojlantirishga oid qonunchilik ijrosi ustidan nazorat boshqarmasi deb;

(b) Qoraqalpogʻiston Respublikasi va viloyatlar prokuraturalaridagi tabiiy koʻllarda baliqchilikni rivojlantirish va suv resurslaridan foydalanishga oid qonunchilik ijrosi ustidan nazorat boʻyicha katta yordamchi lavozimini chorvachilik va uning tarmoqlarini rivojlantirishga oid qonunchilik ijrosi ustidan nazorat boʻyicha katta yordamchi deb qayta nomlash toʻgʻrisidagi takliflariga rozilik berilsin.

19. Bosh prokuratura (Toʻxtaboyev) chorvachilik va uning tarmoqlarini rivojlantirishga oid, shu jumladan, mazkur qarorda belgilangan vazifalar ijrosi yuzasidan chora-tadbirlar sifatli va oʻz vaqtida amalga oshirilishi ustidan taʼsirchan nazorat oʻrnatsin hamda har chorakda amalga oshirilgan ishlar yuzasidan Oʻzbekiston Respublikasi Prezidenti Administratsiyasiga axborot kiritib borsin.

20. Agentlik xodimlariga nisbatan Agrosanoatni rivojlantirish agentligi xodimlari uchun belgilangan moddiy ragʻbatlantirish va mehnatga haq toʻlash shartlari tatbiq etilsin.

21. Agentlik Toshkent shahri Kichik halqa yoʻli koʻchasi 21a-uy manziliga operativ boshqaruv huquqi asosida joylashtirilsin.

22. Qoraqalpogʻiston Respublikasi Vazirlar Kengashi va viloyatlar hokimliklari Davlat aktivlarini boshqarish agentligi, Oziq-ovqat mahsulotlari xavfsizligi qoʻmitasi hamda Qishloq xoʻjaligi vazirligi bilan birgalikda bir oy muddatda Agentlikning hududiy boshqarmalari tugatilgan Veterinariya va chorvachilikni rivojlantirish qoʻmitasining hududiy boshqarmalari binolarida tekin foydalanish huquqi asosida joylashtirilishini taʼminlasin.

23. Agentlik:

(a) zaruratga koʻra hamkorlikda faoliyat yuritayotgan uyushmalarni oʻzi joylashgan binoda bepul ijara asosida joylashtirsin;

(b) Qishloq xoʻjaligi vazirligi, Oziq-ovqat mahsulotlari xavfsizligi qoʻmitasi bilan birgalikda 2026-yil 1-sentabrga qadar Jamgʻarma mablagʻlari hisobidan quyidagi imkoniyatlarga ega raqamli platformani ishga tushirsin hamda “Agroportal” elektron dasturiga integratsiya qilsin:

(i) chorvachilik tarmogʻi subyektlari, chorva bosh soni, ularning ishlab chiqarish koʻrsatkichlari, naslchilik tadbirlarini raqamli hisobga olish, shuningdek, sohaga oid ishonchli maʼlumotlar bazasini shakllantirish;

(ii) investitsiya loyihalari toʻgʻrisidagi maʼlumotlar, tarmoq korxonalariga hamrohlik qilish va ularga xizmatlarni kompleks koʻrsatish imkoniyatlari;

(v) uch oy muddatda hududlarning ozuqa bazasi, suv taʼminoti, yer maydonlari, logistika va bozor talabidan kelib chiqqan holda ishlab chiqilgan sigʻimi 250 tagacha chorvaga moʻljallangan chorvachilik majmualarining namunaviy loyihalarini tadbirkorlik subyektlariga taklif qilsin va doimiy ravishda ushbu ishlarni amalga oshirib borsin;

(g) Qurilish va uy-joy kommunal xoʻjaligi vazirligi, Kadastr agentligi bilan birgalikda ikki oy muddatda chorvachilik majmualarining namunaviy loyihalarini ishlab chiqsin va eʼlon qilsin.

24. Oʻzbekiston Respublikasi Prezidentining ayrim qarorlariga 6-ilovaga muvofiq oʻzgartirishlar kiritilsin.

25. Qishloq xoʻjaligi vazirligi ikki oy muddatda quyidagilarni Vazirlar Mahkamasiga kiritsin:

(a) Chorvachilik va yaylov xoʻjaligini rivojlantirish agentligi hamda Chorvachilik tarmoqlarini qoʻllab-quvvatlash jamgʻarmasi toʻgʻrisidagi nizomlarni;

(b) Iqtisodiyot va moliya vazirligi bilan birgalikda mazkur qarorga asosan moliyaviy qoʻllab-quvvatlash choralarini ajratish tartiblarini;

(v) manfaatdor vazirlik va idoralar bilan birgalikda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisidagi takliflarni.

26. Mazkur qaror ijrosini samarali tashkil qilishga masʼul va shaxsan javobgar etib Bosh vazir oʻrinbosarlari J.A. Qoʻchqorov va J.A. Xodjayev hamda qishloq xoʻjaligi vaziri I.Yu. Abduraxmonov belgilansin.

27. Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidentining agrar rivojlanish masalalari boʻyicha maslahatchisi Sh.M. Gʻaniyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 12-may,

PQ-179-son

Oʻzbekiston Respublikasi Prezidentining 2026-yil 12-maydagi PQ-179-son qaroriga
1-ILOVA

Chorvachilik va yaylov xoʻjaligini rivojlantirish agentligining

TASHKILIY TUZILMASI

Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi

Qoraqalpogʻiston Respublikasi hamda viloyatlar chorvachilik va yaylov xoʻjaligini rivojlantirish boʻlimlari

Naslchilik ilmiy-ishlab chiqarish markazi

“Parrandasanoat” uyushmasi *

Hududiy yaylov xoʻjaliklari

“Oʻzbekiston asalarichilari” uyushmasi *

Chorvachilik va yaylov xoʻjaligini rivojlantirish boʻyicha tumanlar (shaharlar)ga biriktirilgan masʼullar

“Yaylov xoʻjaligini rivojlantirish” uyushmasi *

* Agentlik oʻz faoliyatini mazkur uyushmalar bilan hamkorlikda olib boradi.

Oʻzbekiston Respublikasi Prezidentining 2026-yil 12-maydagi PQ-179-son qaroriga
2-ILOVA

Chorvachilik va yaylov xoʻjaligini rivojlantirish agentligi faoliyatining ustuvor yoʻnalishlari

1. Chorvachilikning barcha tarmoqlarini rivojlantirish, naslchilik-seleksiya ishlarini takomillashtirish, sunʼiy urugʻlantirishni tashkil etish, chorvachilik mahsulotlari ishlab chiqarish hajmlarini koʻpaytirish, chorva ozuqa bazasini mustahkamlash.

2. Sohani rivojlantirish dasturlari va “yoʻl xaritalari”ni tayyorlash, hududlar kesimida ustuvor yoʻnalishlar va ixtisoslashuvni belgilash.

3. Chorvachilik tarmogʻi infratuzilmasini, jumladan, sunʼiy urugʻlantirish punktlari, soʻyish maydonchalari, sut qabul qilish punktlari, laboratoriyalar, omborlar, chorvachilik majmualari, qayta ishlash korxonalari hamda logistikani rivojlantirish.

4. Chorvachilik tarmogʻida samarali biznes modellarni joriy qilish, tarmoqning investitsiyaviy jozibadorligini oshirish, qayta ishlash va qoʻshilgan qiymat zanjirlarini rivojlantirish, xorijiy investitsiyalar va grant mablagʻlarini jalb qilish.

5. Chorvachilik tarmogʻiga zamonaviy texnologiyalar va innovatsiyalarni joriy etish, raqamli yechimlar, avtomatlashtirish tizimlari, shuningdek, hayvonlarni parvarishlash, oziqlantirish va koʻpaytirishning zamonaviy usullarini keng tatbiq qilish.

6. Chorvachilikda sof genofondni saqlab qolish va rivojlantirish, ilmiy-tadqiqot muassasalari tomonidan ishlab chiqilgan naslchilik-seleksiya dasturlarini amaliyotga tatbiq etish va muvofiqlashtirish.

7. Chorvachilikda nasldorlik va mahsuldorlik koʻrsatkichlarini yaxshilash maqsadida naslchilik resurslarini yaratish, saqlash, takror koʻpaytirish va ulardan oqilona foydalanish.

8. Chorva mollari bosh soni, mahsuldorlik, ishlab chiqarish hajmi, narxlar, investitsiyalar va eksport koʻrsatkichlari hamda tegishli yer uchastkalarida ozuqabop ekinlar yetishtirilishi boʻyicha maʼlumotlarni yigʻish, tahlil qilish va monitoring qilish.

9. Yaylov yerlaridan samarali va maqsadli foydalanish, ularni muhofaza qilish, degradatsiyasining oldini olish, oʻsimliklar tabiiy plantatsiyalarini yaratishga qaratilgan chora-tadbirlar ishlab chiqish.

10. Yaylovlarda oʻsimliklar urugʻchiligini rivojlantirish, yaylov yerlarini ijaraga berishni tashkil etish, shartnomaviy munosabatlarni monitoring qilish.

11. Qorakoʻl zotining genofondini saqlash, takror koʻpaytirish, seleksiya-naslchilik ishlari rejalarini amaliyotga tatbiq etish hamda infratuzilmalarni yaxshilash boʻyicha takliflar ishlab chiqish.

Oʻzbekiston Respublikasi Prezidentining 2026-yil 12-maydagi PQ-179-son qaroriga
3-ILOVA

Chorvachilik tarmoqlarini qoʻllab-quvvatlash jamgʻarmasini shakllantirish manbalari

1. Davlat chegarasi va transportda davlat veterinariya nazorati boshqarmasining hamda Veterinariya dori vositalari, ozuqabop qoʻshimchalar sifati va muomalasi nazorati boʻyicha Davlat ilmiy markazining xizmatlar koʻrsatishdan tushadigan mablagʻlarining respublika budjeti hamda tegishli xizmat koʻrsatuvchi tashkilotlarga yoʻnaltiriladigan qismi chegirilgandan keyin qoladigan mablagʻlarning 20 foizi.

2. Veterinariya va chorvachilikni rivojlantirish qoʻmitasi huzuridagi Veterinariya xizmati va chorvachilikni rivojlantirish jamgʻarmasining qoldiq mablagʻlaridan 20 mlrd soʻm qismi.

3. Xalqaro moliya institutlari va xorijiy hukumat moliya tashkilotlarining grantlari.

4. Jamgʻarmaning vaqtincha boʻsh turgan mablagʻlarini tijorat banklarining depozitiga joylashtirish hisobidan tushadigan foizlar.

5. Qonunchilikda taqiqlanmagan boshqa manbalar.

Oʻzbekiston Respublikasi Prezidentining 2026-yil 12-maydagi PQ-179-son qaroriga
4-ILOVA

Chorvachilikka ixtisoslashtiriladigan tumanlar

ROʻYXATI

T/r	Hudud nomi	Tuman nomi
1.	Qoraqalpogʻiston Respublikasi	Taxtakoʻpir tumani
2.	Andijon viloyati	Ulugʻnor tumani
3.	Buxoro viloyati	Gʻijduvon tumani
4.	Jizzax viloyati	Zarbdor tumani
5.	Qashqadaryo viloyati	Gʻuzor tumani
6.	Navoiy viloyati	Qiziltepa tumani
7.	Namangan viloyati	Kosonsoy tumani
8.	Samarqand viloyati	Kattaqoʻrgʻon tumani
9.	Surxondaryo viloyati	Uzun tumani
10.	Sirdaryo viloyati	Guliston tumani
11.	Toshkent viloyati	Ohangaron tumani
12.	Fargʻona viloyati	Bagʻdod tumani
13.	Xorazm viloyati	Tuproqqalʼa tumani

Oʻzbekiston Respublikasi Prezidentining 2026-yil 12-maydagi PQ-179-son qaroriga
5-ILOVA

Respublikada 2026-2028-yillarda sunʼiy urugʻlantirish ishlari bilan shugʻullanuvchi texnik-osemenatorlarga olib beriladigan jihoz va uskunalar

ROʻYXATI

T/r	Hududlar nomi	Sunʼiy urugʻlantiruvchi texnik xodimlar soni	Dyuar idishlar												Texnik osemenatorlar sumkasi (toʻplam)						Velosiped
			2026-yil				2027-yil				2028-yil				2026-yil		2027-yil		2028-yil		2026-yil		2027-yil		2028-yil
			Jami	shundan		Talab etiladigan *(mln.soʻm)*	Jami	shundan		Talab etiladigan *(mln.soʻm)*	Jami	shundan		Talab etiladigan *(mln.soʻm)*	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)
			Jami	6 litr	35 litr	Talab etiladigan *(mln.soʻm)*	Jami	6 litr	35 litr	Talab etiladigan *(mln.soʻm)*	Jami	6 litr	35 litr	Talab etiladigan *(mln.soʻm)*	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)	soni	Talab etiladigan (mln.soʻm)
1.	Qoraqalpogʻiston Respublikasi	210	94	70	24	564	94	70	24	620	94	70	24	682	70	315	70	329	70	344	70	140	70	140	70	140
2.	Andijon viloyati	240	108	80	28	648	108	80	28	713	108	80	28	784	80	360	80	376	80	393	80	160	80	160	80	160
3.	Buxoro viloyati	267	120	89	31	720	120	89	31	792	120	89	31	871	89	401	89	418	89	437	89	178	89	178	89	178
4.	Jizzax viloyati	162	73	54	19	438	73	54	19	482	73	54	19	530	54	243	54	254	54	265	54	108	54	108	54	108
5.	Qashqadaryo viloyati	348	157	116	41	942	157	116	41	1036	157	116	41	1140	116	522	116	545	116	569	116	232	116	232	116	232
6.	Navoiy viloyati	135	61	45	16	366	61	45	16	403	61	45	16	443	45	203	45	212	45	221	45	90	45	90	45	90
7.	Namangan viloyati	156	70	52	18	420	70	52	18	462	70	52	18	508	52	234	52	244	52	255	52	104	52	104	52	104
8.	Samarqand viloyati	441	198	147	51	1188	198	147	51	1307	198	147	51	1437	147	662	147	691	147	722	147	294	147	294	147	294
9.	Surxondaryo viloyati	234	105	78	27	630	105	78	27	693	105	78	27	762	78	351	78	367	78	383	78	156	78	156	78	156
10.	Sirdaryo viloyati	108	50	36	14	300	50	36	14	330	50	36	14	363	36	162	36	169	36	177	36	72	36	72	36	72
11.	Toshkent viloyati	246	110	82	28	660	110	82	28	726	110	82	28	799	82	369	82	385	82	403	82	164	82	164	82	164
12.	Fargʻona viloyati	234	105	78	27	630	105	78	27	693	105	78	27	762	78	351	78	367	78	383	78	156	78	156	78	156
13.	Xorazm viloyati	219	99	73	26	594	99	73	26	653	99	73	26	719	73	329	73	343	73	358	73	146	73	146	73	146
Jami		3000	1350	1000	350	8100	1350	1000	350	8910	1350	1000	350	9800	1000	4500	1000	4700	1000	4910	1000	2000	1000	2000	1000	2000

Oʻzbekiston Respublikasi Prezidentining 2026-yil 12-maydagi PQ-179-son qaroriga
6-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirishlar

1. Oʻzbekiston Respublikasi Prezidentining 2020-yil 29-yanvardagi “Chorvachilik tarmogʻini davlat tomonidan qoʻllab-quvvatlashning qoʻshimcha chora-tadbirlari toʻgʻrisida”gi PQ-4576-son qarorida:

(a) 1-band hamda 1-ilova oʻz kuchini yoʻqotgan deb hisoblansin;

(b) 12-banddagi “Respublika kengashi” soʻzlari “Oziq-ovqat xavfsizligini taʼminlash boʻyicha respublika komissiyasi” soʻzlari bilan almashtirilsin.

2. Oʻzbekiston Respublikasi Prezidentining 2023-yil 24-avgustdagi “Chorvachilikda identifikatsiya qilish tizimi va naslchilik sohasini takomillashtirishga oid qoʻshimcha chora-tadbirlar toʻgʻrisida”gi PQ-285-son qarorining 15-bandi quyidagi tahrirda bayon etilsin:

“15. Chorvachilik va yaylov xoʻjaligini rivojlantirish agentligiga Markazni joylashtirish uchun bino va inshootlarni qurish hamda taʼmirlash ishlarini taklif soʻrovi asosida amalga oshirishga ruxsat berilsin”.

3. Oʻzbekiston Respublikasi Prezidentining 2025-yil 17-yanvardagi “2025-yilda aholi bandligini taʼminlash va kambagʻallikni qisqartirish chora-tadbirlari toʻgʻrisida”gi PQ-12-son qarorining 5-bandi birinchi xatboshisidagi “korxonalari (kushxonalar) va muzlatkichli omborxonalar, mahsulotlar va chiqindilarni qayta ishlash, naslli joʻjalar yetishtirish va parranda mahsulotlari ishlab chiqarish quvvatlarini oʻz ichiga olgan tayyor biznes loyihalarini” soʻzlari “(kushxonalar), ozuqa-yem va ozuqabop qoʻshimchalar ishlab chiqarish korxonalari, muzlatkichli omborxonalar, inkubatoriya, laboratoriya, naslli joʻjalar yetishtirish va parranda mahsulotlari ishlab chiqarish hamda parranda mahsulotlari, qoldiqlari va chiqindilarini qayta ishlash quvvatlarini oʻz ichiga olgan yoki alohida ishlab chiqarish yoʻnalishlaridagi “tayyor biznes” loyihalarini” soʻzlari bilan almashtirilsin.

4. Oʻzbekiston Respublikasi Prezidentining 2025-yil 30-yanvardagi “Chorvachilik va parrandachilikni qoʻllab-quvvatlash, sohada yuqori qoʻshilgan qiymat yaratish boʻyicha qoʻshimcha chora-tadbirlar toʻgʻrisida”gi PQ-34-son qarori 2-bandi “b” kichik bandining uchinchi xatboshisidagi “hamda” soʻzi “hamda respublikada parrandachilik sohasida tayyor biznes va” soʻzlari bilan almashtirilsin.

(Qonunchilik maʼlumotlari milliy bazasi, 21.05.2026-y., 07/26/179/0521-son)