Oʻzbekiston Respublikasi Prezidentining 2022-yil 17-maydagi PF-136-son “Tibbiyot muassasalari xodimlarini moddiy qoʻllab-quvvatlash hamda ragʻbatlantirishni kuchaytirish chora-tadbirlari toʻgʻrisida” Farmoni va Oʻzbekiston Respublikasi Vazirlar Mahkamasining 2005-yil 21-dekabrdagi 276-son “Tibbiyot xodimlari mehnatiga haq toʻlashning takomillashtirilgan tizimini tasdiqlash toʻgʻrisida”gi qaroriga muvofiq Oʻzbekiston Respublikasi Sogʻliqni saqlash vazirligi, Bandlik va mehnat munosabatlari vazirligi hamda Moliya vazirligi qaror qiladi:

1. Tibbiyot muassasalarini moddiy ragʻbatlantirish va rivojlantirish jamgʻarmasi toʻgʻrisidagi nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb topilsin:

Oʻzbekiston Respublikasi Sogʻliqni saqlash vazirligi, Mehnat va aholini ijtimoiy muhofaza qilish vazirligi hamda Moliya vazirligining 2005-yil 31-dekabrdagi 06-3/436-son, 5083-son va 107-son “Tibbiyot muassasalarini moddiy ragʻbatlantirish va rivojlantirish jamgʻarmasi toʻgʻrisidagi nizomni tasdiqlash haqida”gi qarori (roʻyxat raqami 1537, 2006-yil 14-yanvar) (Oʻzbekiston Respublikasi qonun hujjatlari toʻplami, 2006-yil, 3-son, 15-modda);

Oʻzbekiston Respublikasi Sogʻliqni saqlash vazirligi, Bandlik va mehnat munosabatlari vazirligi va Moliya vazirligining 2017-yil 25-oktabrdagi 17, 31-k/k, 147-son “Tibbiyot muassasalarini moddiy ragʻbatlantirish va rivojlantirish Jamgʻarmasi toʻgʻrisidagi Nizomga oʻzgartirish va qoʻshimcha kiritish haqida”gi qarori (roʻyxat raqami 1537-1, 2017-yil 10-noyabr) (Qonun hujjatlari maʼlumotlari milliy bazasi, 13.11.2017-y., 10/17/1537-1/0240-son).

3. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Tibbiyot muassasalarini moddiy ragʻbatlantirish va rivojlantirish jamgʻarmasi (bundan buyon matnda Jamgʻarma deb yuritiladi) mablagʻlarini shakllantirish va ulardan foydalanish tartibini belgilaydi.

1. Jamgʻarma mablagʻlari hisobidan tibbiyot muassasalari xodimlarini moddiy ragʻbatlantirish, tibbiyot muassasalari moddiy-texnik bazasini mustahkamlash, modernizatsiya qilish va taʼmirlash tegishli ravishda ushbu maqsadlar uchun ochilgan shaxsiy gʻazna hisobvaraqlaridagi mavjud mablagʻlar qoldigʻi doirasida amalga oshiriladi.

2. Jamgʻarma mablagʻlaridan foydalanish Tibbiyot muassasalarining moddiy ragʻbatlantirish va rivojlantirish jamgʻarmasi mablagʻlarini tasarruf etish uchun tibbiyot muassasalari huzuridagi maxsus komissiyalar toʻgʻrisidagi nizom (roʻyxat raqami 1536, 2007-yil 14-yanvar) asosida tashkil etilgan Tibbiy tashkilotlarning moddiy ragʻbatlantirish va rivojlantirish jamgʻarmasi mablagʻlarini tasarruf etish boʻyicha maxsus komissiyaning (keyingi oʻrinlarda Maxsus komissiya deb yuritiladi) tegishli qarori asosida qabul qilingan tibbiyot muassasasi rahbarining buyrugʻiga muvofiq amalga oshiriladi.

3. Jamgʻarma mablagʻlari quyidagi manbalar hisobidan shakllantiriladi:

a) Oʻzbekiston Respublikasi Prezidentining 2022-yil 17-maydagi PF-136-son “Tibbiyot muassasalari xodimlarini moddiy qoʻllab-quvvatlash hamda ragʻbatlantirishni kuchaytirish chora-tadbirlari toʻgʻrisida”gi Farmoniga muvofiq, tibbiyot muassasasi uchun ajratiladigan budjet mablagʻlarining umumiy hajmiga nisbatan Davlat budjetidan ajratiladigan mablagʻlarning quyidagi miqdoridan:

birlamchi tibbiy-sanitariya yordami muassasalari, tuman (shahar) tibbiyot birlashmalari, shoshilinch va tez tibbiy yordam xizmati, bolalar tibbiyot muassasalari, Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi va uning hududiy organlari hamda ijtimoiy kasalliklarga (sil, buyrak yetishmovchiligi, onkologik, ruhiy, narkologik, endokrin, moxov (lepra), yuqumli, jinsiy yoʻl bilan yuqtiriladigan, OITS) ixtisoslashgan tibbiyot muassasalarida — umumiy xarajatlarning 10 foizi;

respublika va viloyat darajasidagi boshqa sogʻliqni saqlash muassasalarida — umumiy xarajatlarning 5 foizi;

b) faoliyat ixtisosligi boʻyicha tovarlarni (ishlarni, xizmatlarni) realizatsiya qilishdan olingan daromadlar;

d) hisobot choragining oxirgi ish kunida xarajatlar smetasi boʻyicha tejalgan mablagʻlar, kapital qoʻyilmalarni moliyalashtirish uchun nazarda tutilgan mablagʻlar bundan mustasno;

e) tibbiyot tashkilotiga balansida boʻlib, ijaraga berilgan mol-mulklar uchun ijara haqlarining bir qismi;

j) belgilangan tartibda budjet tashkilotlari tasarrufida qoldiriladigan mablagʻlar;

z) homiylik xayriyalaridan tushgan mablagʻlar.

4. Jamgʻarma mablagʻlari quyidagi ikki yoʻnalish boʻyicha sarflanadi va ularning hisobi alohida shaxsiy gʻazna hisobvaraqlarda yuritiladi:

75 foizi barcha davlat tibbiyot muassasalari tibbiyot, farmatsevtika va boshqa xodimlarini moddiy ragʻbatlantirishga (ishga vijdonan munosabati va koʻrsatilayotgan tibbiy yordamning yuqori sifati uchun bazaviy tarif stavkasiga (oylik lavozim maoshi) oylik ustamalar belgilash, moddiy yordam va mukofotlar toʻlash shaklida, ish haqidan ajratmalar bilan birgalikda);

25 foizi tibbiyot muassasasining moddiy-texnika bazasini mustahkamlash, modernizatsiya qilish hamda taʼmirlashga.

5. Yuridik va jismoniy shaxslar tomonidan tibbiyot muassasasiga koʻrsatilgan homiylik xayriyalarining jami summasi, agar homiy tomonidan boshqacha qoida belgilanmagan boʻlsa, tibbiyot muassasasining moddiy-texnika bazasini mustahkamlash uchun sarflanadi.

6. Tibbiyot muassasasida vaqtincha mehnatga qobiliyatsizlik boʻyicha toʻlanmagan nafaqalar va muddati oʻtgan kreditorlik qarz mavjud boʻlgan taqdirda, Jamgʻarma mablagʻlari birinchi navbatda ushbu qarzlarni toʻlash uchun sarflanadi.

7. Moliya yili yakuni boʻyicha tibbiyot muassasalarining tegishli shaxsiy gʻazna hisobvaraqlaridagi foydalanilmay qolgan Jamgʻarma mablagʻlari kelgusi moliya yiliga oʻtkaziladi hamda belgilangan yoʻnalishlar boʻyicha sarflanadi.

8. Tibbiyot muassasasi xodimlariga moddiy ragʻbatlantirishning quyidagi turlari qoʻllaniladi:

tibbiyot muassasasining yuqori malakali, alohida natijaga erishgan, halol va vijdonan ishlayotgan tibbiyot hamda farmatsevtika xodimlariga oylik lavozim maoshining 100 foizigacha hamda boshqa xodimlarga 75 foizigacha oylik ustamalar (keyingi oʻrinlarda oylik foizli ustamalar deb ataladi);

yangi ish boshlagan salohiyatli yosh shifokorlarga 1 million soʻmgacha maxsus oylik ustamalar;

oilaviy shifokor punktlari, oilaviy poliklinikalar va koʻp tarmoqli markaziy poliklinikalarda kunduzgi statsionar ish vaqtini soat 20:00 gacha uzaytirish hisobiga ikkinchi smenada ishlovchi shifokor hamda hamshiralarga lavozim maoshining 30 foizigacha oylik qoʻshimcha ustamalar;

tibbiyot muassasalari barcha xodimlariga kasbiy va boshqa bayramlar munosabati bilan beriladigan mukofot pullari, shuningdek, moddiy yordam pullari.

9. Oylik foizli ustamalar tibbiyot muassasasida Jamgʻarma uchun ochilgan shaxsiy gʻazna hisobvaraqlarida mavjud boʻlgan mablagʻlardan mazkur Nizomning 6-bandida keltirilgan xarajatlar hamda quyidagi toʻlovlar chegirilgan qismi hisobidan amalga oshiriladi:

oilaviy shifokor punktlari, oilaviy poliklinikalar va koʻp tarmoqli markaziy poliklinikalarda kunduzgi statsionar ish vaqtini soat 20:00 gacha uzaytirish hisobiga ikkinchi smenada ishlovchi shifokor hamda hamshiralarga lavozim maoshining 30 foizigacha oylik qoʻshimcha ustamalar;

yangi ish boshlagan salohiyatli yosh shifokorlarga 1 million soʻmgacha maxsus oylik ustamalar;

Jamgʻarma mablagʻlari hisobidan, tibbiyot muassasalarining barcha xodimlariga kasbiy va boshqa bayramlar munosabati bilan beriladigan mukofot pullari va moddiy yordam pullari.

10. Oylik foizli ustamalar tibbiyot muassasasi xodimlarini reyting baholash tizimi asosida amalga oshiriladi.

Maxsus komissiya har bir xodimning mehnat faoliyati bilan bogʻliq ish yuklamasi, bajaradigan vazifasining murakkabligi, ish samaradorligi, sohaga qoʻshgan hissasi hamda boshqa sanash va hujjat bilan tasdiqlash mumkin boʻlgan 5 ta muhim koʻrsatkichlarni baholash uchun asos sifatida belgilaydi hamda baholashda mazkur koʻrsatkichlarga asoslanadi.

Bunda, xodimlarning mehnatga vijdonan munosabati, mehnat faoliyatida koʻrsatayotgan yuqori natijalari hamda kasb etikasiga rioya etishi inobatga olinadi.

Maxsus komissiya tomonidan har bir koʻrsatkich 20 balgacha boʻlgan reyting tizimida baholanadi. Ushbu koʻrsatkichlarning umumiy yigʻindisi eng yuqori ballarda baholangan taqdirda 100 balni tashkil etishi lozim.

11. Har chorak yakuni boʻyicha keyingi oyning 5-sanasiga qadar haqiqatda amalga oshirilgan ishlar yuzasidan boʻlim (boʻlinma) boshligʻi har bir xodimning koʻrsatkichlarini belgilab, tasdiqlovchi hujjatlar bilan birga Maxsus komissiyaga koʻrib chiqish uchun taqdim etadi.

Maxsus komissiya har chorak yakuni boʻyicha keyingi oyning 5-sanasidan boshlab 5 ish kuni ichida xodimlarga berilgan yakuniy bahoni tasdiqlaydi.

Baholash natijalari yoki Maxsus komissiyaning qaroridan norozi boʻlgan xodimlar qonunchilik hujjatlarida belgilangan tartibda yuqori turuvchi tashkilotga yoki sudga shikoyat qilishlari mumkin.

Chorak yakuni boʻyicha yuqori natijaga erishgan xodimlar uchun keyingi chorak davomida har oylik foizli ustamalar Maxsus komissiyaning tegishli qarori asosida qabul qilingan tibbiyot muassasasi rahbarining buyrugʻiga muvofiq belgilanadi. Bunda, joriy yilning birinchi choragi uchun oylik foizli ustamalar oʻtgan yil toʻrtinchi chorakda erishilgan natijalar boʻyicha tayinlanadi.

12. Umumiy 100 ballik reyting tizimi asosida 75 baldan 100 balgacha natijaga erishgan tibbiyot muassasasi xodimlari oylik maoshiga quyidagi tartibda qoʻshimcha oylik foizli ustamalar belgilanadi:

a) tibbiyot xodimlariga:

75 baldan 84 balgacha oylik maoshining 50 foizgacha miqdorida;

85 baldan 94 balgacha oylik maoshining 75 foizgacha miqdorida;

95 baldan 100 balgacha oylik maoshining 100 foizgacha miqdorida.

b) tibbiyot xodimlaridan tashqari boshqa xodimlar uchun:

75 baldan 84 balgacha oylik maoshining 25 foizgacha miqdorida;

85 baldan 94 balgacha oylik maoshining 50 foizgacha miqdorida;

95 baldan 100 balgacha oylik maoshining 75 foizgacha miqdorida.

Oylik foizli ustamalarni toʻlash Nizomning ilovasiga muvofiq amalga oshiriladi.

13. Maxsus komissiyaning tegishli qarori asosida qabul qilingan tibbiyot muassasasi rahbarining buyrugʻiga muvofiq yangi ish boshlagan tibbiy oliy taʼlim tashkilotlari bitiruvchilariga (keyingi oʻrinlarda salohiyatli yosh shifokorlar deb yuritiladi) ishga qabul qilingan kundan boshlab, oylik ish haqi toʻlovlariga maxsus oylik ustamalar qoʻshimcha tarzda belgilanadi.

14. Salohiyatli yosh shifokorlar uchun 1 million soʻmgacha maxsus oylik ustamalar ularning birinchi uch yillik mehnat faoliyati uchun belgilanadi.

Bunda yangi ish boshlagan salohiyatli yosh shifokorlar uchun har oyda:

birinchi yil uchun — 1 million soʻmdan;

ikkinchi yil uchun — 750 ming soʻmdan;

uchinchi yil uchun — 500 ming soʻmdan maxsus oylik ustamalar belgilanadi.

15. Oilaviy shifokor punktlari, oilaviy poliklinikalar va koʻp tarmoqli markaziy poliklinikalarda kunduzgi statsionar ish vaqtini soat 20:00 gacha uzaytirish hisobiga ikkinchi smenada ishlovchi shifokor hamda hamshiralarga lavozim maoshining 30 foizigacha oylik qoʻshimcha ustamalar toʻlab beriladi.

Mazkur oylik qoʻshimcha ustamalar tibbiyot xodimlarining lavozim maoshiga quyidagi miqdorlarda belgilanadi:

tibbiyot muassasasida shifo oʻrni 5 tagachani tashkil qilganda — 10 foiz;

tibbiyot muassasasida shifo oʻrni 5 tadan 10 tagachani tashkil qilganda — 20 foiz;

tibbiyot muassasasida shifo oʻrni 10 dan yuqorini tashkil qilganda — 30 foiz.

16. Tibbiyot muassasasi rahbari tomonidan mehnat qonunchiligiga rioya qilgan holda har oyning 25-sanasidan kechiktirmay kelgusi oy uchun bir shtat birligida shifokor hamda bir shtat birligida hamshira lavozimlarida tibbiyot xodimlari kunduzgi statsionar ish vaqtini soat 20:00 gacha uzaytirgan holda faoliyat yuritishi uchun moslashuvchan ish vaqti rejimi boʻyicha jadval tasdiqlanadi.

Bunda oilaviy shifokor punktlari, oilaviy poliklinikalar va koʻp tarmoqli markaziy poliklinikalarda uzaytirilgan kunduzgi statsionarga jalb etilgan shifokor hamda hamshiralarga haqiqatda ishlagan soatiga har bir soati uchun toʻlanishi lozim boʻlgan oylik qoʻshimcha ustamalarning foiziga nisbatan toʻlovlar amalga oshiriladi.

17. Tibbiyot muassasalari xodimlariga kasbiy va boshqa bayramlarda beriladigan mukofot miqdori bir kalendar yil mobaynida har bir xodimga ikki lavozim maoshidan oshmagan holda belgilanadi.

18. Tibbiyot muassasalari xodimlariga ularning murojaatiga koʻra yoki tegishli tibbiyot muassasasi kasaba uyushmasi tashkilotining tashabbusi bilan (yaqin qarindoshlarning vafot etishi, ogʻir jarohatlar olish, kasal boʻlish, tabiiy ofatlar oqibatlarida) moddiy yordam koʻrsatiladi.

Bunda yuqoridagi moddiy yordam miqdori har bir tayinlangan holat uchun xodimning bir lavozim maoshidan oshmasligi lozim.

19. Jamgʻarma hisobidan ustamalar, bayramlarda mukofot pullari va moddiy yordam pullarini toʻlash boʻyicha qabul qilingan tibbiyot muassasasi rahbarining buyrugʻida har bir xodim boʻyicha toʻlanishi lozim boʻlgan mablagʻlarning aniq miqdorlari hamda ularni toʻlash muddatlari koʻrsatilishi lozim.

Bunda ustamalar boʻyicha tibbiyot muassasasi rahbari buyrugʻining belgilangan muddatdan kech qabul qilinishi xodim olishi lozim boʻlgan ustamaning ushbu Nizomda belgilangan muddatdan boshlab toʻlanishini istisno etmaydi.

20. Tibbiyot muassasasi rahbariga ustamalarni belgilash, mukofot pullari hamda moddiy yordam pullari berish Oʻzbekiston Respublikasi Sogʻliqni saqlash vazirligi yoki uni lavozimga tayinlash va lavozimdan ozod etish vakolatiga ega boʻlgan yuqori turuvchi tashkilot rahbarining rasmiy roziligi bilan amalga oshiriladi.

21. Jamgʻarma mablagʻlari hisobidan tibbiyot muassasasining moddiy-texnika bazasini mustahkamlash Maxsus komissiyaning qarori asosida amalga oshiriladi.

22. Maxsus komissiyaning qarori asosida tibbiyot muassasasi rahbari mablagʻlarni sarflashning aniq maqsadlari, yoʻnalishlarini va uning miqdorini koʻrsatgan holda buyruq chiqaradi.

23. Tibbiyot muassasasi rahbarlari va Maxsus komissiya aʼzolari Jamgʻarma mablagʻlarini shakllantirish va ulardan foydalanish tartibiga rioya qilinishi uchun javobgardirlar.

24. Jamgʻarma mablagʻlaridan maqsadli foydalanilishi ustidan nazorat Oʻzbekiston Respublikasi Sogʻliqni saqlash vazirligining Ichki audit departamenti, shuningdek Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi va uning hududiy boshqarmalari tomonidan qonunchilik hujjatlarida belgilangan tartibda amalga oshiriladi.

25. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.