119-модда. Процессуал муддатларни белгилаш ва ҳисоблаш 
Процессуал ҳаракатлар ушбу Кодексда ёки бошқа қонунларда белгиланган муддатларда амалга оширилади, процессуал муддатлар белгиланмаган ҳолларда эса улар суд томонидан тайинланади. 
Процессуал ҳаракатларни амалга ошириш муддатлари албатта юз бериши керак бўлган воқеа кўрсатилган аниқ календарь сана билан ёки вақтнинг ҳаракат амалга оширилиши мумкин бўлган даври билан белгиланади. 
Процессуал муддатлар йиллар, ойлар ва кунлар билан ҳисобланади. 
Йиллар, ойлар ёки кунлар билан ҳисобланадиган процессуал муддатнинг ўтиши календарь сананинг эртасидан ёки бошланиши аниқланган воқеа юз берган кундан бошланади.

ИЛМИЙ-АМАЛИЙ ШАРҲ

1. Процессуал ҳаракатлар белгиланган процессуал муддатларда амалга оширилади. Процессуал муддатлар Иқтисодий процессуал кодексининг қатор моддаларида аниқ белгиланган. Шунингдек, муддатлар (даъво муддатлари, судга мурожаат қилиш муддатлари, ишни кўриш муддатлари, суд ҳужжатларини қайта кўриш муддатлари, суд ҳужжатларини ижрога қаратиш ва ижро ишини юритишга доир ва бошқа муддатлар) моддий ва процессуал қонун ҳужжатларида ифодаланган. Шу маънода процессуал муддатлар икки турга ажратилган: 
– процессуал қонунда белгиланган муддатлар; 
– суд томонидан тайинланган муддатлар. 
Процессуал қонунда белгиланган муддатлар деганда, Иқтисодий процессуал кодексида ёки бошқа қонунларда аниқ белгиланган муддатлар тушунилади. 
Масалан, суд топшириғи тўғрисидаги ажрим топшириқ берилган суд учун мажбурийдир ва у ажрим олинган пайтдан эътиборан ўн беш кунгача бўлган муддатда бажарилиши керак (ИПКнинг 91-моддаси). 
Суд томонидан тайинланган муддатлар деганда, Иқтисодий процессуал кодексида ёки бошқа қонунларда процессуал муддатлар белгиланмаган ҳолларда улар суд томонидан белгиланиши ва узайтирилиши мумкин. Масалан, далилларни тақдим этиш ва талаб қилиб олишда суд муддат тайинлашга ҳақли (ИПКнинг 69-моддаси). 
2. Йиллар, ойлар ёки кунлар билан ҳисобланадиган процессуал муддатнинг ўтиши календарь сананинг эртасидан ёки унинг бошланиши белгилаб қўйилган воқеа содир бўлган кундан бошланади.
Йиллар, ойлар ва кунлар билан ҳисобланадиган процессуал муддатларга иш куни бўлмаган кунлар ҳам киради, ИПКда (222-модданинг олтинчи қисми) назарда тутилган ҳоллар бундан мустасно. 
Иш куни бўлмаган кунлар деганда, Ўзбекистон Республикасининг қонун ҳужжатларида белгиланган дам олиш кунлари (шанба ва якшанба) ва байрам (ишланмайдиган) кунлари тушунилади. Шунингдек, байрамлар муносабати билан эълон қилинган қўшимча дам олиш кунлари. 
3. Процессуал муддатлар йиллар, ойлар ва кунлар билан ҳисобланади. Аммо бирор-бир ҳолатга, вазиятга, ҳаракатнинг бошланиши ёки тугашига ҳавола этиладиган муддат ҳам бор. Масалан, пандемия шароити тугаши билан, медиация тартиб-таомилини амалга ошириш тугагунига қадар, бироқ олтмиш кундан ортиқ бўлмаган муддатда, ҳуқуқий вориси аниқлангунига, муомалага лаёқатсиз шахсга вакил тайинлангунига, янги ташкил этилган юридик шахс давлат рўйхатидан ўтгунига қадар; тегишли суднинг суд ҳужжати қонуний кучга киргунига ёки тергов ҳаракатлари тугаллангунига қадар (ИПКнинг 103-моддаси). 
4. Йиллар, ойлар ёки кунлар билан ҳисобланадиган процессуал муддатнинг ўтиши календарь сананинг эртасидан ёки бошланиши аниқланган воқеа юз берган кундан бошланади. Бу ерда аниқ муддат ёки бирор вазиятга ҳавола этилади. Масалан, суднинг ҳал қилув қарори қонуний кучга кирганидан кейин ашёвий далиллар кимдан олинган бўлса, ўша шахсларга қайтариб берилади (ИПКнинг 79-моддаси). Яна бир мисол, суд топшириғи тўғрисидаги ажрим топшириқ берилган суд учун мажбурийдир ва у ажрим олинган пайтдан эътиборан ўн беш кунгача бўлган муддатда бажарилиши керак (ИПКнинг 91-моддаси).