Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida”gi PF-98-sonli Farmoni 2-boʻlimi 3-bandi (b) kichik bandida, shuningdek, Oʻzbekiston Respublikasi Vazirlar Mahkamasining 2011-yil 4-apreldagi “Dafn etish va dafn ishi toʻgʻrisida”gi Oʼzbekiston Respublikasi qonunini amalga oshirish chora-tadbirlari haqida”gi 101-sonli qaroriga 1-ilova, “Dafn etish joylarini saqlash, ulardan foydalanish va qabr usti yodgorliklarini oʻrnatish tartibi toʻgʻrisida”gi Nizomining 2-boʻlim 6-bandi 3-xatboshida “Dafn etish joylarini saqlash qoidalari xalq deputatlari tuman (shahar) Kengashlari tomonidan tasdiqlanadi” deb belgilangan.

Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida”gi PF-98-sonli Farmoni hamda Oʻzbekiston Respublikasi Vazirlar Mahkamasining 2011-yil 4-apreldagi “Dafn etish va dafn ishi toʻgʻrisida”gi Oʼzbekiston Respublikasi qonunini amalga oshirish chora-tadbirlari haqida”gi 101-sonli qarori ijrosini taʻminlash maqsadida, Oʻzbekiston Respublikasi “Mahalliy davlat hokimiyati toʻgʻrisida” gi Qonunining 6 va 24-moddasiga asosan xalq deputatlari tuman Kengashi qaror qiladi:

1. Zarbdor tumanidagi dafn etish joylarini saqlash qoidalari (keyingi oʻrinlarda — qoidalar) ilovaga muvofiq tasdiqlansin.

2. Zarbdor tumani Qurilish va uy-joy kommunal boʻlimi (v.v.b. A. Esirgapov), Sanitariya-epidemiologik osoyishtalik va jamoat salomatligi boʻlimi (N. Gairov), Ekologiya va iqlim oʻzgarishi boʻlimi (J. Abduholiqov), Obodonlashtirish boshqarmasi (O. Xolmonov)larga:

qoidalarning barcha qabristonlarda bir xilda ijro etilishi;

qoidalarda belgilangan normalar mahalla fuqarolar yigʻinlari raislari (oqsoqollar) bilan birgalikda doimiy targʻib qilib borilishi taʼminlansin.

3. Kadastr agentligi tuman boʻlimi (R. Kushbakov) tuman hududida mavjud, shuningdek, yangi tashkil qilinadigan qabristonlarning kadastr hujjatlari qonunchilikda belgilangan talablar asosida yuritilishini taʼminlasin.

4. Tuman hokimligi axborot xizmati (Oʻ. Sulaymanov)ga mazkur qarorni ommaviy axborot vositalarida yoritilishi tavsiya etilsin hamda tuman hokimligining rasmiy veb-saytiga joylashtirilsin.

5. Ushbu qarorning ijrosini taʼminlash tuman hokimining oʻrinbosari A. Erjigitov zimmasiga yuklatilsin.

6. Mazkur qarorning bajarilishini nazorat qilish xalq deputatlari tuman Kengashining Agrar, suv xoʻjaligi va ekologiya masalalari boʻyicha doimiy komissiyasi (S. Xadjikulov) zimmasiga yuklatilsin.

7. Ushbu qaror rasmiy eʼlon qilingan kundan eʼtiboran kuchga kiradi.