Oʻzbekiston Respublikasi Hukumati va Serbiya Respublikasi Hukumati (keyingi oʻrinlarda “Ahdlashuvchi Tomonlar” deb ataluvchilar),

oʻz davlatlari va xalqlari oʻrtasidagi doʻstona munosabatlarni tasdiqlab,

oʻzaro manfaatli sohalarda tenglik, oʻzaro foyda va oʻzarolik tamoyillari asosida iqtisodiy hamkorlikni rivojlantirish istagida,

savdo hajmining ortishi natijasida yuzaga keladigan oʻzaro foydalarni hamda savdo, iqtisodiy aloqalar va yaqin hamkorlik munosabatlari orqali ikki tomonlama aloqalarni yanada mustahkamlash istagini inobatga olib, va

oʻz davlatlarining xalqaro shartnomalar doirasidagi majburiyatlarini hisobga olgan holda,

quyidagilar toʻgʻrisida kelishib oldilar:

1. Ahdlashuvchi Tomonlar oʻzlarining milliy qonunchiliklari doirasida va xalqaro majburiyatlarini eʼtiborga olgan holda, oʻzaro manfaat va foyda keltiradigan barcha sohalarda iqtisodiy hamkorlikni eng keng koʻlamda rivojlantirish va mustahkamlash uchun barcha imkoniyatlarini safarbar etadilar.

2. Mazkur Bitim doirasida amalga oshiriladigan hamkorlik quyidagi maqsadlarga yoʻnaltiriladi:

ikki tomonlama iqtisodiy aloqalarni yanada mustahkamlash maqsadida iqtisodiy salohiyatni roʻyobga chiqarish;

savdo aylanmasini oshirish, shuningdek, investitsiyalar, innovatsiyalar va iqtisodiy tadbirlarni tashkil etish sohalarida ikki tomonlama iqtisodiy aloqalarni faollashtirish;

transport infratuzilmasini rivojlantirish; va

hududlararo iqtisodiy hamkorlikni rivojlantirish.

Ahdlashuvchi Tomonlar iqtisodiy hamkorlikni mustahkamlash uchun, xususan quyidagilar orqali qulay shart-sharoitlar yaratishga intiladilar:

Ahdlashuvchi Tomonlar davlatlarida joylashgan biznes subyektlari oʻrtasida, shu jumladan, yengil sanoat, kimyo sanoati, farmatsevtika sanoati, tibbiyot va raqamli sogʻliqni saqlash, energetika, qora va rangli metallurgiya, mashinasozlik, qishloq xoʻjaligi, axborot texnologiyalari (IT) sektori va startaplar hamda boshqa sohalarda hamkorlikni rivojlantirish;

biznes va iqtisodiy axborot almashinuvini, shuningdek, iqtisodiy hamkorlik masalalari boʻyicha vakolatli organlar oʻrtasidagi aloqalarni osonlashtirish va qoʻllab-quvvatlash;

oʻzaro manfaatli sohalarda qoʻshma ishlab chiqarish faoliyatini ragʻbatlantirish;

sertifikatlashtirish va standartlashtirish sohasida oʻzaro asosiy hamkorlikni yoʻlga qoʻyish;

yarmarkalar, koʻrgazmalar, simpoziumlar va shunga oʻxshash tadbirlarni tashkil etishda bir-birlariga koʻmaklashish;

kichik va oʻrta korxonalarning ikki tomonlama iqtisodiy aloqalarda ishtirokini ragʻbatlantirish;

tovarlar va xizmatlar savdosini, shuningdek, sanoat, infratuzilma, telekommunikatsiya, transport va atrof-muhitni muhofaza qilish sohalarida uzoq muddatli hamkorlikni rivojlantirish; va

turizm sohasida hamkorlikni rivojlantirish.

Tariflar va savdo boʻyicha Bosh bitim (GATT)ga muvofiq, Ahdlashuvchi Tomonlar bir-birlariga eng qulay rejimni taqdim etadilar.

1. Ahdlashuvchi Tomonlar mazkur Bitim doirasidagi hamkorlikni muvofiqlashtirish maqsadida Iqtisodiy hamkorlik boʻyicha Oʻzbek-Serb Qoʻshma komissiyasini (keyingi oʻrinlarda “Qoʻshma komissiya” deb ataluvchi) taʼsis etadilar.

2. Qoʻshma komissiyaning asosiy vazifalari quyidagilardan iborat boʻladi:

mazkur Bitim doirasidagi hamkorlikni monitoring qilish;

Ahdlashuvchi Tomonlar oʻrtasidagi hamkorlik sohalarini aniqlash va bu borada tavsiyalar ishlab chiqish;

oʻzaro tovar ayirboshlash hajmini oshirish va nomenklaturasini kengaytirish boʻyicha kelishilgan chora-tadbirlarni ishlab chiqish va qabul qilish;

ikki mamlakat biznes hamjamiyatlari oʻrtasidagi hamkorlik imkoniyatlarini kengaytirishga qaratilgan takliflarni ishlab chiqish;

qonunchilik va iqtisodiy dasturlar toʻgʻrisida, shu jumladan, oʻzaro manfaatli axborot almashish;

transport va tranzit sohasida muvofiqlashtirilgan siyosat yuritish, xalqaro transport kommunikatsiyalari va logistika infratuzilmasini rivojlantirish;

Ahdlashuvchi Tomonlarning tashqi iqtisodiy faoliyat subyektlarining huquq va qonuniy manfaatlarini himoya qilish va ilgari surish;

ikki tomonlama savdo va iqtisodiy hamkorlikka toʻsqinlik qilayotgan muammolarni aniqlash hamda ularni bartaraf etish boʻyicha choralarni taklif etish;

mazkur Bitim qoidalarini amalga oshirish yoki talqin etish bilan bogʻliq bahsli masalalarni muhokama qilish.

Qoʻshma komissiya Ahdlashuvchi Tomonlar vakillaridan iborat boʻladi, zarur hollarda, biznes doiralari vakillari ham uning ishida ishtirok etishga taklif qilinishi mumkin.

1. Qoʻshma komissiya yilida bir marta yoki Ahdlashuvchi Tomonlardan birining soʻroviga koʻra, zarur hollarda, navbatma-navbat Oʻzbekiston Respublikasi va Serbiya Respublikasida yigʻiladi.

2. Ahdlashuvchi Tomonlardan birining tashabbusiga koʻra, Qoʻshma komissiyaning favqulodda yigʻilishi yoki hamraislari uchrashuvi tashkillashtirilishi mumkin.

3. Qoʻshma komissiya yigʻilishining sanasi va kun tartibi Ahdlashuvchi Tomonlar tarafidan oʻzaro kelishilgan holda belgilanadi.

4. Qabul qiluvchi Ahdlashuvchi Tomon Qoʻshma komissiya yigʻilishi boʻyicha yigʻilish yakunida har ikki delegatsiya rahbarlari tarafidan imzolanadigan bayonnoma tayyorlaydi.

Mazkur Bitim qoidalari Ahdlashuvchi Tomonlarning davlatlari ishtirok etadigan boshqa xalqaro shartnomalar doirasida ularning huquq va majburiyatlariga daxl qilmagan holda qoʻllaniladi.

Mazkur Bitim qoidalarini amalga oshirish yoki talqin etish bilan bogʻliq yuzaga keladigan har qanday nizolar va masalalar Ahdlashuvchi Tomonlar oʻrtasida maslahatlashuvlar va muzokaralar orqali hal qilinadi.

Har bir Ahdlashuvchi Tomon milliy xavfsizlik, jamoat tartibi yoki sogʻliqni saqlash sabablari bilan mazkur Bitimning amal qilishini toʻliq yoki qisman toʻxtatib turishi mumkin. Boshqa Ahdlashuvchi Tomon bunday chorani joriy etilishidan kamida 72 soat oldin diplomatik kanallar orqali Bitimning toʻxtatib turilishi haqida xabardor qilinadi.

1. Mazkur Bitim Ahdlashuvchi Tomonlar tarafidan Bitimning kuchga kirishi uchun zarur boʻlgan ichki huquqiy tartib-taomillar bajarilgani toʻgʻrisidagi soʻnggi yozma bildirishnoma diplomatik kanallar orqali olingan sanadan soʻng 30 (oʻttizinchi) kunda kuchga kiradi.

2. Mazkur Bitim 5 (besh) yil muddatga tuziladi va basharti Ahdlashuvchi Tomonlardan biri Bitimni tugatish niyati haqida navbatdagi muddat tugashidan 6 (olti) oy oldin yozma ravishda boshqa Tomonni xabardor qilmasa, u oʻz-oʻzidan navbatdagi bir xil muddatlarga uzayaveradi.

3. Mazkur Bitim Ahdlashuvchi Tomonlarning oʻzaro roziligi asosida mazkur Bitimning ajralmas qismi hisoblanadigan va ushbu Bitim qoidalariga muvofiq kuchga kiradigan alohida bayonnomalar bilan oʻzgartirilishi mumkin.

Toshkent shahrida, 2025-yil 28-oktabrda, ikki asl nusxada, oʻzbek, serb va ingliz tillarida tuzildi, bunda barcha matnlar teng autentikdir. Talqin qilishda tafovutlar yuzaga kelgan taqdirda, ingliz tilidagi matn ustuvor hisoblanadi.