Ўзбекистон Республикаси Президентининг 2024 йил 30 августдаги «Ўзбекистон Республикаси Президентининг тадбиркорлар билан тўртинчи очиқ мулоқотида белгиланган вазифаларни амалга ошириш чора-тадбирлари тўғрисида»ги ПФ-132-сон Фармони ижросини таъминлаш ҳамда бозор иқтисодиёти шароитида рақобатни янада ривожлантириш, иқтисодиётда давлат иштирокини қисқартириш ва хусусий сектор учун кенг йўл очиш мақсадида қарор қиламан:

1. Мулкчилик шаклидан қатъи назар бир ёки бир нечта хўжалик юритувчи субъектлар ва давлат ташкилотларига муайян товарларни ишлаб чиқариш (хизматлар кўрсатиш, ишларни бажариш) ёки сотиш ёхуд сотиб олиш, шунингдек, ягона операторлик хизматларини кўрсатиш учун қуйидагилар асосида тақдим этилган мутлақ ҳуқуқ эксклюзив ҳуқуқ сифатида эътироф этилсин:

(a) қонунчилик ҳужжатлари билан истисно тариқасида берилган рухсат (ҳуқуқ);

(б) умумий тартибдан ташқари равишда берилган якка тартибдаги лицензия (рухсатнома). Бунда танлов (тендер) асосида тақдим этилган лицензиялар (рухсатномалар) эксклюзив ҳуқуқ сифатида эътироф этилмайди.

2. Эксклюзив ҳуқуқлар берилган хўжалик юритувчи субъектлар мазкур ҳуқуқ доирасида ишлаб чиқарадиган, сотадиган ёки сотиб оладиган товарлар (иш ва хизматлар) нархлари (тарифлари) ёки уларнинг чекланган даражаларини тартибга солувчи коэффициент, устама ёки чекланган рентабеллик нархларни тартибга солувчи ваколатли давлат органи томонидан уларни тасдиқлаш орқали тартибга солиниши белгилансин.

3. Белгилансинки, 2025 йил 1 апрелдан бошлаб эксклюзив ҳуқуқ хўжалик юритувчи субъектларга Ўзбекистон Республикаси қонунлари ва Ўзбекистон Республикаси Президентининг фармон ва қарорлари билан 3 йилдан ортиқ бўлмаган муддатга фақат қуйидаги мақсадлар учун берилади:

(a) конституциявий тузумни, аҳолининг соғлиғини, Ўзбекистон Республикасининг мудофаа қобилиятини, давлат ва жамоат хавфсизлигини ҳамда жамоат тартибини таъминлаш;

(б) табиий офатлар, ҳалокатлар ва эпидемияларнинг олдини олиш ҳамда уларни бартараф этиш.

4. Эксклюзив ҳуқуқлар берилган хўжалик юритувчи субъектларнинг реестрига (кейинги ўринларда — Реестр) кирган хўжалик юритувчи субъектларга охирги календарь йилда товарларни (иш ва хизматларни) реализация қилишдан олинган тушуми миқдоридан қатъи назар қуйидаги талаблар қўйилади:

(а) истеъмолчиларнинг зарур ҳажмдаги товарни ва лозим даражадаги сифатли товарни олишга бўлган ҳуқуқлари камситилишига йўл қўймаслик;

(б) товарни реализация қилишда ёки олишда камситувчи шарт-шароитларни белгиламаслик;

(в) тегишли товарни ишлаб чиқариш ёки реализация қилиш имконияти бўла туриб, шартнома тузишни асоссиз равишда рад этмаслик;

(г) нархларни давлат томонидан тартибга солиш қўлланиладиган товарлар учун белгиланган нархдан ортиқ ҳақ олмаслик, шунингдек, кўрсатилмаган хизматлар ёки бепул кўрсатилиши керак бўлган хизматлар учун ҳақ олмаслик.

5. 2025 йил 1 апрелдан бошлаб қуйидаги хўжалик юритувчи субъектларнинг фаолият йўналишлари бўйича эксклюзив ҳуқуқлари бекор қилинсин:

(а) «Ўзбекэкспертиза» АЖ ва унинг ҳудудий бўлинмаларининг хорижий инвестициялар иштирокидаги корхоналар томонидан ўз ишлаб чиқариш эҳтиёжлари учун олиб келинаётган мол-мулкка сертификат бериш бўйича;

(б) «ЎзИнжиниринг» лойиҳа институтининг инвестиция лойиҳаларининг лойиҳаолди ва лойиҳа ҳужжатларини ишлаб чиқиш бўйича;

(в) «Миллий PR-маркази» ДУКнинг Ўзбекистон Республикаси туризм салоҳиятини тарғиб қилишга йўналтирилган хорижий компанияларнинг продюсерлик ва реклама хизматларини, хорижий телерадиокомпаниялар ва бошқа оммавий ахборот воситаларининг рекламалари, репортажлари ва бошқа роликларини тайёрлаш ва трансляция қилиш бўйича;

(г) «Sag agro МТП» МЧЖнинг ёнғоқ ишлаб чиқарувчиларга агротехник тадбирларни амалга ошириш бўйича механизация хизматларини кўрсатиш бўйича;

(д) «Ўзбекистон стандартлар институти» давлат муассасасининг миллий стандартларни шартнома асосида бошқа тилларга таржима қилиш бўйича.

6. «Туризм хизматларини сертификатлаш маркази» ДУКнинг туроператор, жойлаштириш воситалари, тоғ чанғиси трассалари ва пляжлар хизматларини сертификатлаштириш, уларга тоифа бериш, шунингдек, сертификатлаштирилган хизматларининг стандартлаштириш бўйича норматив ҳужжатлар талабларига мувофиқлиги устидан инспекция назоратини ўтказиш вазифаси Туризм қўмитасига ўтказилсин.

7. 2025 йилдан бошлаб ҳар йили:

(а) 1 апрелга қадар эксклюзив ҳуқуқ берилган соҳадаги ваколатли давлат органлари томонидан Рақобатни ривожлантириш ва истеъмолчилар ҳуқуқларини ҳимоя қилиш қўмитасига (кейинги ўринларда — Рақобат қўмитаси) Реестрга кирган хўжалик юритувчи субъектларнинг эксклюзив ҳуқуқларини бекор қилиш ёки сақлаб қолиш мақсадга мувофиқлиги тўғрисида таклифлар киритилади;

(б) 1 майга қадар эксклюзив ҳуқуқ берилган соҳадаги ваколатли давлат органларининг таклифлари Рақобат қўмитаси томонидан Иқтисодиёт ва молия вазирлиги, Инвестициялар, саноат ва савдо вазирлиги ҳамда Савдо-саноат палатаси билан биргаликда ўрганиб чиқилади;

(в) 1 июнга қадар Рақобат қўмитаси томонидан эксклюзив ҳуқуқларни бекор қилиш ёки сақлаб қолиш мақсадга мувофиқлиги юзасидан умумлаштирилган таклифлар Вазирлар Маҳкамасига тегишли қарор қабул қилиш учун тақдим этилади.

8. Рақобат қўмитаси 2025 йил 1 апрелга қадар эксклюзив ҳуқуқлар берилиши назарда тутилган қонунчилик ҳужжатларини хатловдан ўтказган ҳолда Реестр шакллантирсин ва оммавий ахборот воситаларида эълон қилсин.

9. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатларига иловага мувофиқ ўзгартириш ва қўшимчалар киритилсин.

10. Мазкур Фармоннинг ижросини самарали ташкил қилишга масъул этиб Бош вазир ўринбосарлари Ж.А. Қўчқоров, Ж.А. Ходжаев ва А.Ж. Раматов ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Х.С. Турахужаев белгилансин.

11. Мазкур Фармон ижроси учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

1. Ўзбекистон Республикаси Президентининг 2020 йил 6 июлдаги «Рақобат муҳитини янада ривожлантириш ва иқтисодиётдаги давлат иштирокини қисқартириш бўйича қўшимча чора-тадбирлар тўғрисида»ги ПФ-6019-сон Фармонида:

а) 2-банд қуйидаги таҳрирда баён этилсин:

«2. Шундай тартиб ўрнатилсинки, унга мувофиқ:

а) 2020 йил 1 октябрдан бошлаб:

тармоқ ва соҳаларда ваколатли этиб белгиланган давлат бошқаруви органларининг асосий вазифаларидан бири рақобат муҳитини яхшилаш ва уни ривожлантириш ҳисобланади ҳамда мазкур вазифаларни амалга ошириш раҳбар ва унинг биринчи ўринбосари зиммасига юклатилади;

давлат иштирокидаги хўжалик юритувчи субъектларни, шунингдек, уларнинг аффилланган шахсларини ва хўжалик фаолиятини амалга ошириш ваколати берилган давлат муассасаларини ташкил этиш (қайта ташкил этиш), мудофаа қобилиятини мустаҳкамлаш ва миллий хавфсизликни таъминлаш мақсадларида ташкил этиш бундан мустасно, монополияга қарши органнинг дастлабки розилиги олингандан сўнг амалга оширилади;

давлат буюртмачиси, стратегик аҳамиятга эга бўлган хўжалик жамияти ва корхонаси билан манфаатлар тўқнашувига эга бўлган хўжалик юритувчи субъект давлат харидлари ёки энг яхши таклифларни танлаб олиш ёхуд тўғридан-тўғри музокаралар иштирокчиси бўлиши мумкин эмас, бундан давлат томонидан ҳимоя қилиниши лозим бўлган шахсларнинг хавфсизлигини таъминлаш, Ўзбекистон Республикасида мудофаа қобилиятини, хавфсизликни таъминлаш ва ички тартибни сақлаш учун амалга ошириладиган давлат харидлари, шунингдек, давлат сирлари билан боғлиқ бўлган давлат харидлари мустасно;

давлат буюртмачиси, стратегик аҳамиятга эга бўлган хўжалик жамияти ва корхонаси тендер ва танлов савдолари, энг яхши таклифларни танлаб олиш ҳамда тўғридан-тўғри музокаралар ўтказилишидан аввал у билан аффилланган шахслар ҳақидаги маълумотларни давлат харидлари махсус ахборот порталида жойлаштиришга мажбурдир;

б) қуйидагиларга йўл қўйилмайди:

беш ва ундан ортиқ хусусий тадбиркорлик субъекти товар ёки молия бозорида фаолият юритиб келаётган, рақобат ривожланган соҳаларда давлат иштирокидаги корхонани ва унинг аффилланган шахсларини ташкил этишга;

республика ижро этувчи ҳокимият органлари, маҳаллий давлат ҳокимияти органлари, шу жумладан, фаолиятнинг айрим турларини лицензиялашни, рухсат этиш хусусиятига эга ҳужжатларни берувчи, махсус электрон тизим воситасида хабарномаларни қабул қилувчи, рўйхатдан ўтказиш ёки аккредитация қилиш ваколатлари берилган давлат муассасалари, шунингдек, давлат мақсадли жамғармаларига фаолиятнинг айрим турларини лицензиялашни амалга ошириш, рухсат этиш хусусиятига эга ҳужжатларни бериш, махсус электрон тизим воситасида хабарномаларни қабул қилиш, шунингдек, рўйхатдан ўтказиш ёки аккредитация қилиш ваколатлари берилган соҳаларда ушбу органлар ва бошқа ташкилотлар томонидан улар иштирокидаги корхоналарни ташкил этишга;

ягона етказиб берувчи бўлган ёки ўзига мазкур ҳуқуқ берилган ёхуд устун мавқега эга бўлган давлат иштирокидаги корхона томонидан фаолияти муассиснинг товарларидан (ресурсларидан) ёки тармоқ инфратузилмасидан фойдаланишга боғлиқ бўлган ҳамда хусусий тадбиркорлик субъектлари билан рақобатлашадиган фаолият билан шуғулланадиган, ушбу корхонага аффилланган шахсларни ташкил этишга, бундан мазкур аффилланган шахсларнинг уларни рақобатчилар билан тенг фаолият шарт-шароитлари билан таъминлаган ҳолда бўлиб юбориш натижасида ташкил этилиши ҳоллари мустасно»;

б) 3-банднинг олтинчи хатбошиси «ҳар қандай турдаги» сўзларидан кейин «давлат ёрдамини, шу жумладан,» сўзлари билан тўлдирилсин;

в) 4-бандда:

бешинчи хатбоши «4-иловага мувофиқ» сўзларидан кейин «тасдиқлансин» сўзи билан тўлдирилсин;

олтинчи хатбоши чиқариб ташлансин;

г) 5-банднинг «б» кичик банди ўз кучини йўқотган деб ҳисоблансин;

д) 5-илова ўз кучини йўқотган деб ҳисоблансин.

2. Ўзбекистон Республикаси Президентининг 2020 йил 25 сентябрдаги «Ичимлик суви таъминоти ва оқова сув тизимини янада такомиллаштириш ҳамда соҳадаги инвестиция лойиҳалари самарадорлигини ошириш чора-тадбирлари тўғрисида»ги ПФ-6074-сон Фармони 3-бандининг биринчи хатбошисидаги «монополияга қарши курашиш ва нархларни (тарифларни) тартибга солиш органлари» сўзлари «соҳада давлат сиёсатини юритувчи ваколатли орган ва нархларни (тарифларни) тартибга солиш органи» сўзлари билан алмаштирилсин.

3. Ўзбекистон Республикаси Президентининг 2022 йил 8 апрелдаги «Тадбиркорлик муҳитини яхшилаш ва хусусий секторни ривожлантириш орқали барқарор иқтисодий ўсиш учун шарт-шароитлар яратиш борасидаги навбатдаги ислоҳотлар тўғрисида»ги ПФ-101-сон Фармони 18-бандининг учинчи хатбошисидаги «фаолиятидан ташқари» сўзлари «фаолиятига боғлиқ бўлмаган» сўзлари билан алмаштирилсин.

4. Ўзбекистон Республикаси Президентининг 2023 йил 6 июлдаги «Маъмурий ислоҳотлар доирасида рақобатни ривожлантириш ва истеъмолчилар ҳуқуқларини ҳимоя қилиш соҳасида давлат бошқарувини самарали ташкил қилиш чора-тадбирлари тўғрисида»ги ПФ-108-сон Фармонида:

а) 1-банднинг бешинчи хатбошисидаги ва 4-илова номидаги «хусусий секторга бериладиган функциялари» сўзлари «давлат-хусусий шериклик ва аутсорсинг механизмлари асосида босқичма-босқич хусусий секторга ва бошқа ташкилотларга ўтказиладиган айрим функциялари» сўзлари билан алмаштирилсин;

б) 3-илованинг 4-бандида:

«Чора-тадбирлар номи» графасидаги «ташкилотлари ҳамда бошқа давлат органлари ва ташкилотларининг» сўзлари «ташкилотлари, давлат органлари ҳамда бошқа ташкилотларнинг» сўзлари билан алмаштирилсин;

«Амалга ошириш муддати» графасидаги «2023 йил давомида» сўзлари «Доимий равишда» сўзлари билан алмаштирилсин.

5. Ўзбекистон Республикаси Президентининг 2023 йил 6 сентябрдаги «Соғлиқни сақлаш вазирлиги фаолиятини янада такомиллаштириш чора-тадбирлари тўғрисида»ги ПФ-156-сон Фармони 6-бандининг олтинчи хатбошисидан «ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси» сўзлари чиқариб ташлансин.

6. Ўзбекистон Республикаси Президентининг 2017 йил 14 мартдаги «Иқтисодиётнинг базавий тармоқларида лойиҳа ишлари самарадорлигини ошириш чора-тадбирлари тўғрисида»ги ПҚ-2831-сон қарорида:

2-банд ўз кучини йўқотган деб ҳисоблансин;

3-банднинг еттинчи хатбошисидан «кейинчалик бош пудратчи функцияларини ўзига юклаган ҳолда,» сўзлари чиқариб ташлансин.

7. Ўзбекистон Республикаси Президентининг 2017 йил 1 июндаги «Ёнғоқ ишлаб чиқарувчилар ва экспорт қилувчилар уюшмасини тузиш ва унинг фаолиятини ташкил этиш тўғрисида»ги ПҚ-3025-сон қарорининг 3-бандида:

бешинчи хатбоши чиқариб ташлансин;

олтинчи ва еттинчи хатбошилар тегишинча бешинчи ва олтинчи хатбошилар деб ҳисоблансин.

8. Ўзбекистон Республикаси Президентининг 2019 йил 24 январдаги «Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси фаолиятини ташкил этиш тўғрисида»ги ПҚ-4126-сон қарорининг 6-бандида:

иккинчи хатбошидан «ва табиий монополиялар» сўзлари чиқариб ташлансин;

учинчи хатбошидан «, табиий монополиялар» сўзлари чиқариб ташлансин.

9. Ўзбекистон Республикаси Президентининг 2021 йил 15 мартдаги «Тартибга солиш таъсирини баҳолаш тизимини янада такомиллаштириш чора-тадбирлари тўғрисида»ги ПҚ-5025-сон қарори 2-банди «а» кичик бандининг олтинчи хатбошиси «ҳар қандай турдаги» сўзларидан кейин «давлат ёрдамини, шу жумладан,» сўзлари билан тўлдирилсин.

10. Ўзбекистон Республикаси Президентининг 2021 йил 6 апрелдаги «Туризм ва спорт вазирлиги фаолиятини ташкил этиш тўғрисида»ги ПҚ-5054-сон қарорида:

а) 5-бандда:

ўнинчи хатбоши чиқариб ташлансин;

ўн биринчи ва ўн иккинчи хатбошилар тегишлича ўнинчи ва ўн биринчи хатбошилар деб ҳисоблансин;

б) 5¹-банднинг бешинчи хатбошисидаги «Туризм ва спорт вазирлиги томонидан Рақобатни ривожлантириш ва истеъмолчилар ҳуқуқларини ҳимоя қилиш қўмитаси ва Молия вазирлиги» сўзлари «Туризм қўмитаси томонидан Иқтисодиёт ва молия вазирлиги» сўзлари билан алмаштирилсин.

11. Ўзбекистон Республикаси Президентининг 2021 йил 28 июлдаги «Соғлиқни сақлаш соҳасида ихтисослаштирилган тиббий ёрдам кўрсатиш тизимини янада такомиллаштириш чора-тадбирлари тўғрисида»ги ПҚ-5199-сон қарорининг 5-банди «а» кичик бандининг учинчи хатбошисидаги «Молия вазирлиги ва Монополияга қарши курашиш қўмитаси» сўзлари «Иқтисодиёт ва молия вазирлиги» сўзлари билан алмаштирилсин.

12. Ўзбекистон Республикаси Президентининг 2022 йил 10 мартдаги «Халқаро тараққиёт уюшмаси иштирокидаги «Сув таъминоти ва оқова сув тизимини ривожлантириш ҳамда институционал салоҳиятни ошириш» дастури доирасида «Самарқанд вилояти Каттақўрғон шаҳрида ичимлик сув ҳамда оқова сув тизимларини реконструкция қилиш» лойиҳасини амалга ошириш чора-тадбирлари тўғрисида»ги ПҚ-159-сон қарорига 7-илованинг 13-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Монополияга қарши курашиш қўмитасининг Самарқанд вилояти ҳудудий бошқармаси,» сўзлари чиқариб ташлансин.

13. Ўзбекистон Республикаси Президентининг 2022 йил 18 мартдаги «Франция тараққиёт агентлиги иштирокида «Навоий вилояти Кармана туманида оқова сув тизимларини қуриш» ҳамда «Қашқадарё вилояти Шаҳрисабз шаҳри ва Китоб тумани марказида оқова сув тизимларини реконструкция қилиш ва қуриш» лойиҳаларини амалга ошириш чора-тадбирлари тўғрисида»ги ПҚ-171-сон қарорида:

а) 7-илованинг 13-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитаси,» сўзлари чиқариб ташлансин;

б) 8-илованинг 13-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитаси,» сўзлари чиқариб ташлансин.

14. Ўзбекистон Республикаси Президентининг 2022 йил 16 июндаги «Аҳолига тез тиббий ёрдам кўрсатиш тизимини такомиллаштириш тўғрисида»ги ПҚ-283-сон қарорининг 16-бандидаги «Молия вазирлиги, Ахборот технологиялари ва коммуникацияларини ривожлантириш вазирлиги ҳамда Рақобатни ривожлантириш ва истеъмолчилар ҳуқуқларини ҳимоя қилиш қўмитаси» сўзлари «Иқтисодиёт ва молия вазирлиги ҳамда Рақамли технологиялар вазирлиги» сўзлари билан алмаштирилсин.

16. Ўзбекистон Республикаси Президентининг 2022 йил 2 августдаги «Осиё тараққиёт банки иштирокида «Тошкент вилояти шаҳар ва туманларида ичимлик ва оқова сув тизимларини қуриш ва реконструкция қилиш (3-босқич)» лойиҳасини амалга ошириш чора-тадбирлари тўғрисида»ги ПҚ-341-сон қарорига 4-илованинг 11-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Монополияга қарши курашиш қўмитасининг Тошкент вилояти ҳудудий бошқармаси,» сўзлари чиқариб ташлансин.

17. Ўзбекистон Республикаси Президентининг 2022 йил 2 августдаги «Европа тикланиш ва тараққиёт банки иштирокида «Наманган вилояти Чуст, Поп ва Наманган туманлари ичимлик сув таъминотини яхшилаш ҳамда Чуст ва Мингбулоқ туманлари марказларида оқова сув тизимларини қуриш» ҳамда «Оқтош» ва «Пошхурт» ер ости сув манбаларидан сув қувури қуриш йўли билан Сурхондарё вилояти Музработ туманининг сув таъминотини яхшилаш» лойиҳаларини амалга ошириш чора-тадбирлари тўғрисида»ги ПҚ-342-сон қарорида:

а) 7-илованинг 13-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Монополияга қарши курашиш қўмитасининг Наманган вилояти ҳудудий бошқармаси,» сўзлари чиқариб ташлансин;

б) 8-илованинг 12-позициясида:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Монополияга қарши курашиш қўмитасининг Сурхондарё вилояти ҳудудий бошқармаси,» сўзлари чиқариб ташлансин.

18. Ўзбекистон Республикаси Президентининг 2023 йил 25 майдаги «Осиё тараққиёт банки ҳамкорлигида Тошкент шаҳри ва Тошкент вилоятида давлат-хусусий шериклик асосида умумий ўрта таълим мактабларини ташкил этиш тўғрисида»ги ПҚ-163-сон қарорига 3-илованинг 4-позицияси «Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитаси (Шарахметов)» сўзлари чиқариб ташлансин.

19. Ўзбекистон Республикаси Президентининг 2023 йил 7 августдаги «Осиё инфратузилма инвестициялари банки иштирокида «Бухоро вилоятининг сув таъминоти ва канализация тизимларини ривожлантириш ва модернизация қилиш (2-босқич)» лойиҳасини амалга ошириш чора-тадбирлари тўғрисида»ги ПҚ-266-сон қарорига 4-иловада:

а) 4-позициянинг «Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Бухоро вилояти ҳудудий бошқармаси,» сўзлари чиқариб ташлансин;

б) 10-позицияда:

«Амалга ошириш механизми» устунининг 2-бандидаги «Монополияга қарши курашиш ва нархларни» сўзлари «Нархларни» сўзи билан алмаштирилсин;

«Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Бухоро вилояти ҳудудий бошқармаси,» сўзлари чиқариб ташлансин.

20. Ўзбекистон Республикаси Президентининг 2024 йил 21 майдаги «Онкологик, гематологик ва иммунологик касалликларга чалинган болаларга тиббий ёрдам кўрсатишни янада такомиллаштириш чора-тадбирлари тўғрисида»ги ПҚ-183-сон қарорида:

11-банднинг «в» кичик банди тўртинчи хатбошисидан «Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда» сўзлари чиқариб ташлансин;

4-илованинг 7-позицияси «Масъул ижрочилар» устунидан «Рақобатни ривожлантириш ва истеъмолчилар ҳуқуқларини ҳимоя қилиш қўмитаси» сўзлари чиқариб ташлансин.

21. Вазирлар Маҳкамасининг 2011 йил 16 майдаги 136-сон қарори билан тасдиқланган Хорижий инвестициялар иштирокидаги корхоналар томонидан ўз ишлаб чиқариш эҳтиёжлари учун олиб келинаётган мол-мулкни аниқлаш тартиби тўғрисидаги низомнинг 3-банди тўққизинчи хатбошиси қуйидаги таҳрирда баён этилсин:

«ваколатли орган — белгиланган тартибда аккредитациядан ўтган хўжалик юритувчи субъектлар».

22. Вазирлар Маҳкамасининг 2020 йил 10 июлдаги 433-сон қарори билан тасдиқланган Туристик хизматларни сертификатлаштириш ва туристик индустрия объектларини таснифлаш тартиби тўғрисидаги низомда:

4-банддаги «Ўзбекистон Республикасининг Туризм ва маданий мерос вазирлиги ҳузуридаги белгиланган тартибда аккредитация қилинган «Туризм хизматларини сертификатлаш маркази» ДУК (кейинги ўринларда — Марказ)» сўзлари «Туризм қўмитаси» сўзлари билан алмаштирилсин»;

7-банддаги «Марказга» сўзи «Туризм хизматларини сертификатлаш маркази» ДУКга (кейинги ўринларда — Марказ)» сўзлари билан алмаштирилсин;

49 — 52-бандлар, 53-банднинг иккинчи хатбошиси, 54-банднинг учинчи хатбошиси, 56-банд, 58-банднинг биринчи ва тўртинчи хатбошилари, 60-банднинг иккинчи хатбошиси, 61-банднинг биринчи хатбошиси, 62-банднинг биринчи хатбошиси, 63-банд, 64-банднинг «д», «е», «з» ва «и» кичик бандлари, 65-банд, 68-банднинг «б» кичик банди, 69 ва 70-бандлардаги тегишли келишикдаги «Марказ» сўзи тегишли келишикдаги «Туризм қўмитаси» сўзлари билан алмаштирилсин».

23. Вазирлар Маҳкамасининг 2024 йил 30 мартдаги 177-сон қарори билан тасдиқланган Миллий стандартларни ишлаб чиқиш, тасдиқлаш, рўйхатдан ўтказиш, бекор қилиш ҳамда уларга ўзгартириш ва қўшимчалар киритиш тартиби тўғрисидаги низомнинг 18-банди қуйидаги таҳрирда баён этилсин:

«18. Миллий стандарт давлат тилида қабул қилинади ва чоп этилади. Миллий стандартлар Стандартлар институти ёки таржимонлик хизматини кўрсатувчи тадбиркорлик субъектлари томонидан шартнома асосида бошқа тилларга таржима қилиниши мумкин».