1-модда. Ўзбекистон Республикасининг 1997 йил 29 августда қабул қилинган «Давлат божхона хизмати тўғрисида»ги 472-I-сонли Қонунига (Ўзбекистон Республикасининг 2018 йил 18 октябрда қабул қилинган ЎРҚ-502-сонли Қонуни таҳририда) (Ўзбекистон Республикаси Олий Мажлиси палаталарининг Ахборотномаси, 2018 йил, № 10, 678-модда; 2019 йил, № 5, 265-модда, № 9, 588-модда; 2021 йил, 4-сонга илова) қуйидаги қўшимча ва ўзгартишлар киритилсин:

1) 3-модда:

қуйидаги мазмундаги еттинчи хатбоши билан тўлдирилсин:

«жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш бўйича чора-тадбирларни ишлаб чиқиш ҳамда амалга оширишда ўз ваколатлари доирасида иштирок этиш»;

еттинчи — ўн учинчи хатбошилари тегишинча саккизинчи — ўн тўртинчи хатбошилар деб ҳисоблансин;

2) 6-модданинг саккизинчи қисми «умумий штатлари сони» деган сўзлардан кейин «ва меҳнатга ҳақ тўлаш фонди» деган сўзлар билан тўлдирилсин;

3) 7-модда:

қуйидаги мазмундаги тўртинчи хатбоши билан тўлдирилсин:

«божхона аудитини амалга ошириш»;

тўртинчи — ўн иккинчи хатбошилари тегишинча бешинчи — ўн учинчи хатбошилар деб ҳисоблансин;

қуйидаги мазмундаги ўн учинчи хатбоши билан тўлдирилсин:

«жисмоний ва юридик шахсларга қонунчиликда белгиланган тартибда пулли хизматлар кўрсатиш»;

ўн учинчи хатбошиси ўн тўртинчи хатбоши деб ҳисоблансин;

4) 11-модда:

қуйидаги мазмундаги тўртинчи қисм билан тўлдирилсин:

«Божхона органлари ходимлари божхона назоратини амалга оширишда махсус восита сифатида хизмат итларидан фойдаланиши мумкин»;

тўртинчи қисми бешинчи қисм деб ҳисоблансин;

5) 13-модданинг тўртинчи ва бешинчи қисмлари қуйидаги таҳрирда баён этилсин:

«Алоҳида ҳолларда, божхона органларига хизматга ушбу модданинг иккинчи ва учинчи қисмларида кўрсатилган талаблар инобатга олинмаган ҳолда:

Ўзбекистон Республикаси Президентининг фармони, қарори ёки фармойиши, шунингдек розилиги ёки Ўзбекистон Республикаси Вазирлар Маҳкамасининг қарори ёхуд Ўзбекистон Республикаси Давлат божхона қўмитаси раисининг буйруғи асосида — бошқа давлат органларининг ва ташкилотларининг ходимлари;

Ўзбекистон Республикаси Давлат божхона қўмитаси раисининг буйруғи асосида — ёши ўттиздан ошган, тор ихтисосликдаги юқори малакали мутахассислар қабул қилиниши мумкин.

Қуйидагилар божхона органларига хизматга қабул қилиниши мумкин эмас:

муомалага лаёқатсиз ёки муомала лаёқати чекланган деб топилган фуқаролар;

хизматни ўташга монелик қиладиган касаллиги ёки жисмоний нуқсонлари бўлган фуқаролар;

бошқа давлат органларидан салбий сабабларга кўра бўшатилган фуқаролар;

содир этган жинояти учун илгари ҳукм қилинганлар, қўлланилган жазо туридан, судланганлик ҳолати тугатилганлигидан ёки олиб ташланганлигидан ва ўзига нисбатан амнистия акти ёки афв этиш қўлланилганлигидан қатъи назар ёхуд ярашув муносабати билан жиноий жавобгарликдан озод қилинган фуқаролар»;

6) 16-модда:

иккинчи ва учинчи қисмлари қуйидаги таҳрирда баён этилсин:

«Божхона органларининг сержантлар таркиби лавозимларига қабул қилинган шахсларга уларни лавозимга тайинлаш билан бир вақтда «божхона хизмати кичик сержанти» махсус унвони берилади.

Божхона органларининг офицерлар таркиби лавозимларига қабул қилинган шахсларга уларни лавозимга тайинлаш билан бир вақтда «божхона хизмати катта сержанти» махсус унвони берилади, улар бу унвонда дастлабки синов муддати тугаб, биринчи офицерлик унвони берилгунига қадар хизмат қилади»;

қуйидаги мазмундаги тўртинчи қисм билан тўлдирилсин:

«Божхона органларида лавозимлар (офицер ва сержантлар эгаллаши лозим бўлган штат лавозимлари) ва уларга мувофиқ махсус унвонлар Ўзбекистон Республикаси Давлат божхона қўмитаси раиси томонидан тасдиқланадиган божхона органларининг штатларида назарда тутилади»;

тўртинчи — ўттизинчи қисмлари тегишинча бешинчи — ўттиз биринчи қисмлар деб ҳисоблансин;

олтинчи қисмидаги «номзодларга» деган сўз «шахсларга» деган сўз билан алмаштирилсин;

саккизинчи қисмидаги «майор» деган сўз «божхона хизмати майори» деган сўзлар билан алмаштирилсин;

тўққизинчи қисмидаги «полковник» деган сўз «божхона хизмати полковниги» деган сўзлар билан алмаштирилсин;

ўнинчи қисмининг:

биринчи хатбошисидаги «лейтенант» деган сўз «божхона хизмати лейтенанти» деган сўзлар билан алмаштирилсин;

иккинчи хатбошисидаги «синов муддатини» деган сўзлар «бирламчи касбий қайта тайёргарликни» деган сўзлар билан алмаштирилсин;

ўн иккинчи қисмининг иккинчи — тўққизинчи хатбошилари қуйидаги таҳрирда баён этилсин:

«божхона хизмати кичик сержанти — икки йил;

божхона хизмати сержанти — икки йил;

божхона хизмати катта сержанти — муддатсиз;

божхона хизмати лейтенанти — икки йил;

божхона хизмати катта лейтенанти — икки йил;

божхона хизмати капитани — уч йил;

божхона хизмати майори — тўрт йил;

божхона хизмати подполковниги — беш йил»;

ўн учинчи қисмидаги «Полковник» деган сўз «Божхона хизмати полковниги» деган сўзлар билан алмаштирилсин;

ўн тўртинчи қисмидаги «ўн биринчи қисми» деган сўзлар «ўн иккинчи қисми» деган сўзлар билан алмаштирилсин;

ўн тўққизинчи қисми қуйидаги таҳрирда баён этилсин:

«Пенсия олиш ҳуқуқини, шунингдек навбатдаги махсус унвонни бериш имконини берадиган хизмат йилларига эга бўлган, эгаллаб турган лавозими бўйича энг юқори махсус унвони «божхона хизмати капитани» этиб белгиланган, ишда ижобий тавсифланадиган божхона органларининг офицерлар таркибидаги ходимларига хизматдан бўшатиш билан бир вақтда «божхона хизмати майори» махсус унвони берилиши мумкин»;

йигирма биринчи қисмининг иккинчи жумласидаги «лейтенант» деган сўз «божхона хизмати лейтенанти» деган сўзлар билан алмаштирилсин;

ўттизинчи қисми қуйидаги таҳрирда баён этилсин:

«Ўзбекистон Республикаси Президентининг фармони, қарори, фармойиши ёки розилиги асосида божхона органларидаги хизматга генераллар таркибидаги лавозимга юборилган, шунингдек божхона органларидаги хизматга бошқа ҳуқуқни муҳофаза қилувчи органлардан ёки махсус унвонлар ва даражалар мавжуд бўлишини назарда тутувчи бошқа органлардан ўтказиш тартибида ўтказилган шахсларга хизмат қилган йиллари учун фоизли устамани белгилашда аввалги иш жойидаги хизмат ёки меҳнат стажи (фоизли устамани тўлаш учун белгиланган) инобатга олинади ҳамда божхона органларидан бўшатилган тақдирда пенсия тайинлаш чоғида мазкур давр умумий хизмат стажига қўшиб ҳисобланади»;

7) 17-модданинг биринчи қисми қуйидаги таҳрирда баён этилсин:

«Ўзбекистон Республикаси Давлат божхона қўмитаси раиси Ўзбекистон Республикаси Бош вазирининг Ўзбекистон Республикаси Олий Мажлиси Қонунчилик палатаси маъқуллаганидан кейин киритилган тақдимига биноан Ўзбекистон Республикаси Президенти томонидан лавозимга тасдиқланади ва лавозимидан озод этилади»;

8) 18-модда:

қуйидаги мазмундаги иккинчи қисм билан тўлдирилсин:

«Божхона органларига қабул қилинган ходимлар (Божхона институти битирувчиларидан ташқари) мажбурий тартибда бирламчи касбий қайта тайёргарликдан ўтади»;

иккинчи, учинчи ва тўртинчи қисмлари тегишинча учинчи, тўртинчи ва бешинчи қисмлар деб ҳисоблансин;

тўртинчи қисмидаги «ҳар икки йилда» деган сўзлар «Ўзбекистон Республикаси Давлат божхона қўмитаси раисининг буйруғига мувофиқ» деган сўзлар билан алмаштирилсин;

9) 20-модда:

биринчи ва иккинчи қисмлари қуйидаги таҳрирда баён этилсин:

«Ўзбекистон Республикаси Президентининг фармони, қарори, фармойиши асосида, шунингдек унинг розилигига кўра ёки Ўзбекистон Республикаси Вазирлар Маҳкамасининг қарори билан ёхуд юқори турувчи органларнинг буйруғи бўйича бошқа давлат органларига ёки уларнинг тасарруфидаги ташкилотларга, халқаро ташкилотларга тайинланган (юборилган) божхона органи ходими ўз мажбуриятларини бажариш даврида Ўзбекистон Республикаси Давлат божхона қўмитаси кадрларининг амалдаги захирасига (бундан буён матнда кадрлар захираси деб юритилади), агар қонунчиликда бошқача қоида назарда тутилмаган бўлса, божхона органларидаги пул таъминоти сақланмаган ҳолда киритилади.

Божхона органининг ходими сайланган (тайинланган, юборилган) давлат органи ёки унинг тасарруфидаги ташкилот мазкур ходимга у сайлангунига (тайинлангунига, юборилгунига) қадар эгаллаб турган охирги лавозимидагидан кам бўлмаган миқдорлардаги пул таъминоти тўланишини таъминлайди, шунингдек хизмат йиллари учун устама ва махсус унвон бўйича маош тўлайди»;

қуйидаги мазмундаги учинчи қисм билан тўлдирилсин:

«Ўзбекистон Республикаси Давлат божхона қўмитаси раисининг буйруғи билан Ўзбекистон Республикасининг ёки чет давлатнинг олий таълим муассасаларига ва ташкилотларига магистратура мутахассисликлари бўйича ўқишга юборилган божхона органи ходими ўқиш даврида, охирги эгаллаган лавозимидагидан кам бўлмаган миқдорлардаги пул таъминоти сақланган ҳолда божхона органларининг ихтиёрида қолдирилади»;

учинчи, тўртинчи ва бешинчи қисмлари тегишинча тўртинчи, бешинчи ва олтинчи қисмлар деб ҳисоблансин;

тўртинчи ва бешинчи қисмларидаги «биринчи қисмида» деган сўзлар «биринчи ва учинчи қисмларида» деган сўзлар билан алмаштирилсин;

10) 22-модданинг:

ўн учинчи қисми қуйидаги таҳрирда баён этилсин:

«Ички ишлар органларининг ҳарбий-тиббий комиссияси хулосаси асосида бериладиган касаллик бўйича таътил ёки меҳнатга вақтинчалик лаёқатсизлик варақасини расмийлаштирган ҳолда даволанишда бўлиш даврида божхона органи ходимининг пул таъминоти сақланади»;

ўн еттинчи қисми «ўн» деган сўздан кейин «календарь» деган сўз билан тўлдирилсин.

2-модда. Ўзбекистон Республикаси Давлат божхона қўмитаси ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

3-модда. Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

4-модда. Ушбу Қонун расмий эълон қилинган кундан эътиборан кучга киради.